Éxodo 24
24
Ma yajnikäjpxyën ja käjpxytyu'unën
1Ënet ja Dios t'ënëmaay ja Moisés:
Pät jam maas tyam nyajpaata'anyën, mëët yë Aarón, Nadab ets Abihú ets mëjja'aytyëjkëty oy nitëkë'px majkën, mëti'ipë nyimëjja'ay'ajtëpën yë Israel ja'ayëty, najëkämtëkë mtänëtëty ets mnäkyoxtënaaytya'akëtëty. 2Je'eyëp ko mijtsyë atu'uk xymyëwinkonëpës, mëti'ipë mjämyëët'ajtëpën, këtii nëkooyë wyinkontëty, yë wiink ja'ay ka'ap mëpaat pyety mëët mijts.
3Ënet ojts nyijkxy ets tukmëmëtyaktaay ja naax kajpn ijxtëm ënety ja Dios të y'ënë'ëmxëtyën ets ijxtëm ënety winë të tyuk'ëne'emyën, ënät ojts ja naax kajpn tu'ukyë y'ëtsoowta'atë:
Oy ëëtsëty jëtu'un ntuntëty ijxtëm ja Dios të tni'ënä'ämën.
4Yë Moisés ojts tjaaypyäjta'ay tëkokyë mëti'ipë ënety ja Dios të tnikäjpxyën, ko kyomjëpom'ajty, tsojk ojts myä'äypyëtë'kojy ets t'oytyuuny tu'uk yë wintsë'këntyakn jam ma kopk'ëjxën, majkmäjtsk ojts ja tsaa tkoontä'äky jëtu'un ijxtëm ënety ja Israel ja'ayëty ja tyeety y'apetyën nimajkmäjtskpë. 5Ënet ojts tuk'ëne'emy ja ëna'ktëjkëty ets tyaj'ooktëty ja tsajpkaa ets jä'ä tukwintsë'ëkëtëty ja Dios, jëtu'un'äämpy ja nay'ëëw'oy näykyajpx'oyë tuntëty mëët yë'ë. 6Yë Moisés ojts ja ne'pny tpëky ets jap tpëjktäky ma tu'uk yë mëj'a'ukënën ets ojts tuknixijkxy kujkwä'kxy ja wintsë'këntyakn. 7Tä ojts tu'uk ja noky tkoonë'ëky ma jap myinyën këxja'ay ja aaw ayuk ma ja käjpxytyu'unën ojts tuntën mëët ja Dios, ojts tukwinkukajpxë ja naax kajpn ets y'ëtsoowtë.
Nja'akyukëjantëp ëëtsëty mëti'ipë ja Dios të tni'ënä'ämën.
8Ënet ojts ja Moisés ja ne'pny tkëëyi'iky, mëti'ipë ënety jap ijtpën a'ukënjoty ets ojts tuknixijkxta'ay ja mayjyä'äy, tääts t'ënëmaay:
Ya'atë ne'pny yë'ë jëtu'un nyikäjpxyp ja käjpxytyu'unën, mëti'ipë ja Dios të tunyën mëët miitsëty, jëtu'un ijxtëm yap këxja'ay myinyën.
9Tä ojts ja Moisés pyety jam kopkkëjxm mëët ja Aarón, Nadab ets Abihú ets mëët näjyëtu'un nitëkë'px majk ja mëjja'aytyëjkëty mëti'ipë nyimëjja'ay'ajtëpën ja Israel ja'ayëty. 10Jam ojts ja Dios t'ixtë mëti'ipë yë Israel ja'ay Tyios'ajtëpën, ojts yë tyeky tyajnaaxkëtä'äky ets jëtu'un yaj'ijxy yë'ë yowë tyukte'empy yë wa'kpäjn mëti'ipë oytyunyën mëët yë tsaa mëktsuxkpë ets jëtu'un tyi'kxy tä tsajp jyäjyën. 11Dios ka'ap ojts wi'ix tuny ya'atë ja'ayëty, mëti'ipë ënety mëj'äämpy ijtëpën ma ja nyaax kyajpnën ja Israel, oy ënety tëë ja Dios tja'ixtë, ojts jam kyäytyë y'uuktë ma ënety jam yajpaatën.
Moisés yajpaaty jam ma ja Sinaí kopkën
12Jëtu'un yë Dios t'ënëmaay yë Moisés:
Pät jam ma kopkën, maas ëjts nyajpaatyën ets jamës xy'ëwxitëty, jam nmo'oja'any mäjtsk yë tsaatsetsy maas të nkëxja'ayën yë ënä'ämën tëyajtën mëti'ipë yë Israel ja'ayëty pyatuntëpën.
13Ënet ja Moisés pyëti'ky ets ojts jam pyety ma ja Dios ja kyopkën, ojts pyanëjkxyë ja Josué mëti'ipë ijty xëmë jämyëët'ajtëpën. 14Ets t'ënëmaay ja mëjja'aytyëjkëty:
Yaa miitsëty m'ëwxitëty, koonëmës nwinpitëty, yaa näjyëtu'un wyë'ëma'any yë Aarón ets Hur mëët miitsëty, ko jää tiijotmay xymyëët'atëty yë'ë mtuk'ëwaanëtëp.
15Ko ja Moisés myëtyaktaay, ënät jam pyejty kopkkëjxm ets ja yoots nëma'a jam kyëtäky ma ja kopkupi'tsykën, mëti'ipë ojts yajnitëkoyën. 16Yë Dios yë myëj'ajt y'oyajtën ojts jam kyëtä'äky ma ja Sinaí kopkën, tëtujk xëëw ojts jëtu'un y'ity. Ko wyëxtujkxëëwpejtyp täänëm ja Dios ojts tmëkäjpxy ja Moisés jap jokjoty yootsjoty. 17Yë Dios yë myëj'ajt y'oyajtën jëtu'un ojts t'ixtë yë Israel ja'ayëty jam kopkkëjxm, tä tu'uk yë jëënën mëti'ipë tsääpyën no'kpën. 18Tä ja Moisés ojts jap tyëjkënë yootsjoty ko jam pyajnë kopkkëjxm, jä'ä jam kopkëjxm y'ijty wëxtyikxy xyëëw wëxtyikxy tsyu'um.
المحددات الحالية:
Éxodo 24: QUETZMIXE
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Biblia Dc en Mixe de Quetzaltepec, Oaxaca México © Sociedad Bíblica de México, A.C.