Éxodo 34
34
Ja jemypyë ja tsaatsetsy ma ja ënä'ämën tëyajtën yajkëxja'ajëtyën.
Dt 10:1-5
1Ënet yë Dios t'ënëmaay yë Moisés:
Tsäts mijts kë'ëm yë tsaa, mäjtsk xy'oytyunëty, jëtu'un tä ojts mëjëyëjpë y'ityën etsës jam ja n'aaw n'ayuk xykyëxja'ajëty jatëkok, mëti'ipë ijty jam miinpën këxja'ay ma ja tsaatsetsyën mëti'ipë ojts xytyukpu'ujën. 2Nänyi''ixët näjyëtu'un ets jopy tsojk mpa'tëkëty ma Sinaí kopkën, jam jopy näpyatëmëty ma kopk kupi'tykyën. 3Ka'ap pën jam mëët mpätëty ets ma kopkën ka'ap pën mëpaat jam yajpaaty, ni jëyujk tsajpkaa, ni tsajppax ets kupixyny.
4Yë Moisés ojts mäjtsk yë tsaatsetsy t'oytyuny jëtu'un tä mëjëyëjpë ojts y'ityën, ko kyomjëpom'ajty tsojk ojts nyëjkxkojy jam kopkkëjxm, mëët mäjtsk ja tsaatsetsy jëtu'un ijxtëm ënety ja Dios të y'ënë'ëmxëtyën. 5Ënet ja Wintsën jam kyëtäky yootsjotm ets ojts nyäxyëëwkukäjpxyë ets mëët xyoony y'ijty ja Moisés. 6Jam ojts nyäxy winkon ma ja Moisés yajpaatyën ets mëk y'ënäny ja mëto'owën:
Yë Wintsën, yë Wintsën. Yë Dios mëti'ipë oyjyot oywyinma'any myëët'ajtypyën, mëti'ipë pa'ëyoop najts'ëyo'owëpën, mëti'ipë mä'kxtujkpën ets mëj këjää tsyoky jyawë ets aak mëtëy winë tuny. 7Oy kanaak xëëw kanaak jëmëjt nyaxëty, jyuuky'atëty yë ja'ayëty ets y'ooktëty, wiinkpë myintëty naaxwiiny, yë Dios xëmë tkuuytyuna'any yë y'aaw y'ayuk ets tsyojkën jya'awën xëmë y'ita'any. Näyjyëtu'un ja poky këtyey tnime'kxy e yë'ë ka'ap jëtu'unyë tyajninaxa'any ja mëti'ipë pokymyëëtën, jä'ä ko ja tëytyu'unën jam ja tyajnaxy ma ja u'unk ëna'kën, ok u'unk ok ëna'k ets ma ja y'u'unk y'ëna'këty ja ok u'unk ok ëna'k.
8Ënet ja Moisés poj'am nyäjyijtakë ets wyintäky nyaaxkooy ets ojts t'ëwtaty ja Dios, 9ets y'ënäny:
Wintsën. Wintsën. Pën janty tëy koos xy'oyjyawë, mijts xëmë xyjyämyëët'atëpës, janty tëy jëtu'un ja ijty ko ya'atë ja'ayëty ka'ap kyäjpxyjyä'äkyukëtë, e tyam n'ënëëmë mä'kxtëkës ëëts yë ntuuntëko'oy nkajpxtëko'oyënëty ets ëxajëtëkës jëtu'un tä yë mnaax mkajpnën.
Ja käjpxytyu'unën ja jemypyë
10Jëtu'un yë Dios y'ënäny:
Ëkmëtoow'itë: Tyamës ntuny tu'uk yë käjpxytyu'unën mëët ya'atë naax kajpn, mëj këjääjës yë nmëjajtën nyaj'ixa'anyë ma miitsëtyën, mëti'ipë ka'ap maa jëtu'unpë yaj'ixynyëmën ma wiinkëtypë naax kajpnën. Tëkokyë miitsëty m'ixtëp ets mnijawëtëp wi'ix yë Dios mëj këjää winë tunyën, jä'ä ko nyaj'ixanëpës yë nmëjajtën mëjpë këjääpë ma miitsëtyën.
11Tuntë mëti'ipë të ntuk'ënä'ämtën, ëjts n'ëxkäxäämpyës yë Amor ja'ayëty, Canaán ja'ayëty, Hit ja'ayëty, Ferez ja'ayëty, Heve ja'ayëty ets Jebús ja'ayëty.
12Nitii aaw nitii ayuk mëët tääpë ja'ayëty xykyamëët'atëty mëti'ipë jam tsënaaytyëpën ma mnëjkxtën, këtiipë ëxëëktum myajka'ajëtëty. 13Ni'ikyë xyjyijtë'kta'atëty yë wyintsë'këntyakn ets xyajma'ta'atëty yë tsyaapotsy ets kepy tyetsy.
14Këtii wiinkëtypë wintsën xy'ëwtatëty, jä'ä ko yë Dios ni'äkë'ajtp yë'ë, jä'ä xyëëwajtyp Ni'äkë'ajtpë.
15Nitii käjpxytyu'unën mëët xykyamëët'atëty tääpë ja'ayëty jampë jyuuky'atën ma tampë itjotmën. Këtii xy'oytyijtëty yë wyintsën ets këtii xyjyë'kxtëty xypyëktëty yë jyi'kxyëty, mëti'ipë të tukwintsë'ëkëtën ets të tkë'ëmo'otën yë wiink tios mëti'ipë yë'ë y'ëwtajtëpën. 16Ets ni yë'ë mëpaat tkayajpëk tkayaj'uuktë yë nyëëxëty mëët mijts yë mmaankëty, jä'ä ko ënety tuntë tkajpxtë ja ëxëëkpë jam ma ja wyintsënëty t'ëwtatën, tsojk näjyëtu'un ja m'u'unkëty y'ëtëtsta'aktëty.
17Kajëna'a mëpaat xykyayajkoj'awinaxtë oytyiijëty mëët yë pujxn.
Ja xëëw mëti'ipë winë jëmëjt yajtuunpën
18Mtuntëp yë nyixëëw ja tsajpkääky mëti'ipë ka'ap tsyooymyëëtëtyën, jëtu'un tääjës të ni'ënä'ämën, jää xykyäytyëty ja tsajpkääky ka'apë tsyooymyëëtëtyën wëxtujk xëëw. Jää xykyäytyëty ma ja Abib po'o y'änyën, jä'ä ko jä'ä xëëw ojts tsyoontë yë Israel ja'ayëty jap Egiptë.
19Tu'kë'ëyë yë m'u'unk m'ëna'këty mëti'ipë kä'äxkopkëtyën, yë ye'etyëjktëjk ëjts yë xypyaat'ajtp, näjyëtu'un yë mjëyujkëty mëti'ipë më''ëka'any pi'k'ajtëpën, yë tsajpkaa, tsajppax ets kupixyn, mëti'ipë yä'äyëtyën, ëjts yë xypyatp. 20Yë'ë mtukunaxëp yë krukts kä'äxkopkpë tu'uk yë kupixyny; e pën kajts ënety xyaka'antë tu'uk ja kupixyny, ja krukts nëjkxëp xyo'ktëjtë. Näyjyëtu'un ko ja m'u'unkëty maayëty më''ëka'any myintëty naaxwiiny, nëjkxëp ja nyi'ayajk nyi'ako'onën xyajkëtë ets ma ëjtsën këtii pën xynyiminëtyës pën ka'ap tii tmëminy.
21Tëtujkxëëw mtuntëty mye'eytyëty, e ko wyëxtujkxëëwpätëty mpo'kxnëtëp jää, oy jyääjëty ma ënety tnixëëw'atyën ja nipën kojën, ëkë ma yajpëjkë'ëky yajtuunë'ëkyën ja pëjktä'äky.
22Mëjjawëtëp ja xëëw mëti'ipë sëmaan'am yajtuunpën, ma yajnixëëwtunyën ja pëjktä'äky mëti'ipë mëjaawtso'onpën ets ma ja pëjktä'äky pyëti'ikyën ko jajëmëjt kyëjxnë. 23Tëkokyë yë ye'etyëjktëjk tëkëëk'ok tu'kjëmëjtpë jam nyäwya'këxë'ëkëtëty ma Wintsënën, mëti'ipë yë Israel ja'ayëty Tyios'ajtëpën. 24Ëjts kë'ëmës ntimy'ixkäjxtaja'any wiinkëtypë naax kajpn mijts mwintuuyëty, jëtu'un'äämpyës yë mnaaxëty mkajpnëty nyajmëjëja'any ets ka'ap tjëkyäpëty wi'ix pën tnajä'äniwa'anëty ja mnaax mkamëty ko ënety mnëjkxtë ma ja Wintsënën mëti'ipë mTios'ajtëpën ets mnäywya'këxë'ëkëtëty jam tëkëëk'ok tu'kjëmëjtpë.
25Ko xyaktëty tu'uk yë jëyujk tsajpkaa tä tu'uk yë wintsë'kënën, këtii xyaktëty yë ne'pny mëët yë tsajpkääky mëti'ipë tsooymyëëtën tu'kmukyë, ko nyatëkëty ja mëti'ipë ënety të wyintsë'kën'atyën, këtii xypyëjkë'ëktëty ets komjëpom xytyukjëjp'ixtëty ja ëmaayxyëëw.
26Yë'ë mëpaat xymyënëjkxtë ma ja mWintsën Dios ja tyëjkën, oyëtypë aaytyëëm ujtstëëm mëti'ipë tëëm'ajtë'kpën më''ëka'any, jampë pyëtsimyën naaxwinm kamwinm.
Këtii yë tsajppax u'unk jap xyajkë'ëwtëty ma tyaak yë tsyi'tsk nëëjën.
Moisés tja'ay yë ënä'ämën tëyajtën
27Ënet yë Dios t'ënëmaay yë Moisés: jä'ä ya'atë aaw ayuk, jä'ä ko yë'ë mëët wyintu'upëky ja käjpxytyu'unën mëti'ipës yam ntuunpyën mëët mijts ets mëët yë naax kajpn.
28Yë Moisés ojts jam pyo'oxy kopkkëjxm mëët yë Dios, jä'ä jam y'ijty wëxtyikxy xyëëw wëxtyikxy tsyu'um ets nitii ojts tka'uuky tkajë'kxy. Jam tkëxjaaytyääy ja aaw ayuk ma ja tsaatsetsyën mëti'ipë ënety të t'oytyunyën, tëkokyë mëti'ipë ja Dios ojts tnikäjpxyën, mëët ko ja käjpxytyu'unën tuny, ja majkpë ja ënä'ämën tëyajtën. 29Ënet ojts ja Moisés jam tsyo'onë ma ja Sinaí kopkën, mëët mäjtsk ja tsaatsetsy ma tkëxjaayën ja ënä'ämën tëyajtën, ko jam kyëtäky ma ja kopk'ëjxën, ka'ap ninu'un tja'awëy ko ja wyiin jyëjp atë'kxp, mëët yë'ëkyëjxm ko ja Dios ënety mëët të myëtyä'äky. 30Ko yë Aarón ets Israel ja'ayëty t'ijxtë, ko ja Moisés atë'kxp ja wyiin jyëjp, ojts tsyë'ëkëtë ets ka'ap ënätyë tmëwinkoontë. 31Yë Moisés ojts kë'ëm myëkajpxwinpitëtë, tääts yë Aarón ets ja ja'ayëty ja mëj'äämpyëtypë y'itën ma ja naax kajpnën, tnimiintë ja Moisés ets mëët myëtyaktë. 32Ënet ja Israel ja'ayëty tyu'ukmujktaaytyë jam ma ja Moisésën ets tyukmëtoowëtë ja ënä'ämën tëyajtën, mëti'ipë ënety ja Dios të kyë'ëmo'oyën jam ma Sinaí kopkën. 33Ko ojts myëtyakta'atë mëët, ënät jatëkok ja Moisés nyätyukwinkupëjkëyë ja wit.
34Ko ja Moisés ijty jap tyëkë ma ja Dios yajpaatyën, tääts ja wit nyätyukwinpëjktu'utyë ets jëtu'un jap nëjkx y'ity koonëm jatëkok pyëtsimy. Tääts tukmëmëtyakta'ay ja Israel ja'ayëty tëkokyë ja ënä'ämën tëyajtën mëti'ipë ënety ja Dios të tyuk'ëne'emyën. 35Ko ja Israel ja'ayëty ijty t'ixtë ko ja Moisés atë'kxp ja wyiin jyëjp, ënät ja Moisés ënätyë nyätyukwinkupëkëty ja wit, koonëm jatëkok jap tyëkë ma ja Dios jap mëët myëtyä'äkyën.
المحددات الحالية:
Éxodo 34: QUETZMIXE
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Biblia Dc en Mixe de Quetzaltepec, Oaxaca México © Sociedad Bíblica de México, A.C.