Éxodo 39
39
Yaj'oytyuntë ja wyit tyujkxëty ja teetytyëjkëty
1Ja wit jo'oky mëti'ipë jap tunaanpën tsajptëkoty, yë'ë yajtuk'oytyuun yë tsu'unkpë wit, ukpyë ets tsaptspë, yë'ë wit mëët yaj'oytyuuny ja Aarón ja wyit, jëtu'un ijxtëm ënety ja Moisés ja Dios të tyuk'ëne'emyën.
2Ko ojts yë kejky yä'äp y'oyë, pu'ts pujxn ojts tyuny, kanaak ja wit jo'oky tyuuny, tam tsu'unkpë, ukpyë, tsatptspë ets tam ja linë wit awiity. 3Ojts tyaj'oyëtë may ja tsya'a, pu'ts pujxn mëët t'oytyuuntë, yë'ë tyuka'tstëëwtë yë pujxnkuwojpën ets tsujktaktë piityën; ojts tukjo'oktë ja wit tä'äky, ja tsu'unkpë, ukpyë, tsaptspë ets ja linë wit awiity. 4Yë kejky yä'äp ojts mäjtsk yë nyitëëyë'ëk yajpëjktä'äky, jam ma ja tyatskën mäjtskpa'ajëty ets jam jëjp'am y'atsuumtukyëty. 5Ja nyiwëën mëti'ipë ënety yajtukmajts'itaanpën ja kejky yä'äp, näjyëtu'un ojts yaj'oytyuny mëët yë pu'ts pujxn ja wit ukpyë, tsu'unkpë, tsatptspë ets ja linë wit awiity, jëtu'un ijxtëm ënety ja Dios të tuk'ëne'emyën ja Moisés.
6Ja tsuxktsaa jam ojts yajpëjktakta'ay ma ja kyëxmëtakpäjnën ja pu'ts pujxnpë ets ma tu'ukjaty ja tsaajën jam ojts yajkëxtsa'ay ja Israel ja y'u'unk y'ëna'k ja xyëëwëty, jëtu'un tä yë noky yajtsa'ayën mëët yë tsa'ajën. 7Ënet ja Besalel jam tkëxtëëy ma ja kejky yä'äp ja nyitëëyë'ëkën ets yë'ë yajtukja'amyätsëty ja y'u'unk y'ëna'k yë Israel, jëtu'un ijxtëm ënety yë Dios të tuk'ëne'emyën ja Moisés.
8Ja katsyjyän, janty'oy ojts yajjo'oky jëtu'un tä ja kejky yä'äpën näjyëtu'un, ojts yajtuk'oytyuny yë pu'ts pujxn ets wit tä'äky tsu'unkpë, ukpyë, tsaptspë ets ja linë wit awiity. 9Amäjtsk ënety ets taxktatsk y'ixëty, i'px mäjtsk kë'ë'u'unk yë y'ok tmëëtëty pa'apa'a. 10Nëkëjxy yë'ë ënety myëët'ajtyp yë tsaa oyëtypë, jëtu'un taxk waats tyimnaxy aak tsaa oyjyätyëtypë, tu'k waatspë nyäxyën yë'ë jam ijtp tu'uk yë tsapts tsaa, tu'uk yë të'kxy tsyaa ets tu'uk yë tsuxktsaa. 11Ma ja mëmäjtsk waatspën yë'ë myëët'ajtyp tu'uk yë uky tsyaa, tu'uk yë tsuxk'uky tsyaa ets tu'uk yë yëktsuxk tsaa. 12Ma ja mëtëkëëk waatspën, yë'ë myëët'ajtyp tu'uk yë monytsyapts tsaa, tu'uk yë yëktsapts tsaa ets tu'uk yë nipyu'ts tsaa. 13E ma ja mëmajktaxk waatspën yë'ë myëët'ajtyp: tu'uk yë pu'ts tsaa, tu'uk yë uky tyapts tsaa ets tu'uk yë tsu'unk tsaa, ya'atë tsaa jam ojts yajpëjktakta'ay ma ja kyëxmëtakpäjnën aak pu'ts pujxnpë. 14Jä'ä wyinë'aty majkmäjtsk, jä'ä ko ja Israel ja y'u'unk y'ëna'k majkmäjtsk jä'äjëty; ma ya'atë tsaajën jam ojts kyëxkojtë yë Israel yë y'u'unk y'ëna'k yë xyëëwëty, tu'ukjaty ja xyëëwëty jam yajkëxpëjktë ma tu'ukpë ja tsaajën, jëtu'un yajkëxtsaaytyë jam tä tu'uk yë noky yajkëxtsa'ayën.
15Ma ja katsyjyänën ojts jam tpëjkta'aktë yë pujxnjo'kn u'unk, aak pu'ts pujxnpë, jëtu'un kyëxë'ëky xyäätyëty tä piityën. 16Ets ojts näjyëtu'un mäjtsk yaj'oytyuny yë kyëxmëtakpäjn aak pu'ts pujxnpë ets mäjtsk yë nyitëëyë'ëky nän aak pu'ts pujxn, jam tpëjktaktë ma ja katsyjyän ja pya'ajën mäjtskpëkyëty. 17Jamts ojts yajkëxtsumy ja pu'ts pujxn jo'oky ma ja nyitëëyë'ëkën. 18Tääts yajpëjktäky ja pu'ts pujxn jo'oky mäjtskëty ma mäjtsk ja kyëxmëtakpäjnën ets mëët tsuummujktë ja kejky yä'äp ja nyitëëyë'ëk wintuuytsyow. 19Ojts mäjtsk ëpëky tyajkojtë yë nyitëëyë'ëk aak pu'ts pujxn ets tpëjktaktë ma ja katyjyän y'ityën, je'eyëp ko jä'ä ja ëpa'tkë'ëy'äämpyë, pë'aaytsyow ojts tkëxtsumtë, mëti'ipë yajpatpën itkujky mëët yë kejky yä'äp. 20Ojts yë wiinkpë nyitëëyë'ëky mäjtsk yaj'oytyuny aak pu'ts pujxnpë mëti'ipë ojts jam yajpëjktä'äkyën ma ja kejky yä'äp ja nyitëëyë'ëkën, pa'tkë'ptsow ojts tkëxuytyë ets yë'ë mëët nyäpyäätyë tu'ukyë ja kejky yä'äp ja nyiwëën. 21Tääts t'atsuumujktë ja katsyjyän ja nyitëëyë'ëk mëët ja kejky yä'äp ja jyä'ä, yë'ë tyuk'atsuumujktë yë uky tyejpxy ets ja katsyjyän ojts nëkëjxy wyi'imy ma ja kejky yä'äp ja nyiwëënën ets nijëna'a ëpëkyjyäty kya'itëty, jëtu'un ojts yaj'oytyuny tä ënety ja Moisés ja Dios të tyuk'ëne'emyën.
22Tu'kë'ëyë yë kejky yä'äp, ukywyit ojts yajtuknixuy. 23Itkujky ma jyutëtyën, ojts tu'uk yë wit yajtukpa'axuyë, këtiipë nyajtskëëtsëty, jëtu'un ojts yajëjpxuuywyimpity tä yë po'o nijänën kë'ëtukpë xyuyëtyën. 24Tä ojts jam tkëxuytyë yë piity tyä'äky kanaakjëjp ma ja wit ja pya'ajën, yë'ëjës mëët oy tyaj'ijxënkëxë'ëktë; ja piity tyä'äky yë'ë ukpyë, tsu'unkpë, tsaptspë ets linë wit awiity. 25Ënet ojts näjyëtu'un t'oytyuntë yë pujxn u'unk aakyë'ë pu'ts pujxnpë ets ojts tukmëpëkëtë ja piity apity ets jam yajkëxuuytyë ma ja wit pa'ajën. 26Jä'ä jëtu'un ja nijän mëti'ipë ja teety jap pyëjkta'aktëpën, ko jap tyuntëty tsajptëkoty. Xëpiny ojts tpëjkta'aktë ja pujxn u'unk mëët ja piity apity; tu'uk yajkëxuuy ja pujxn u'unk ets tu'uk ja piity apity, tu'uk ja pujxn u'unk ets tu'uk ja piity apity ets jëtu'un tkëxuuytyääytyë na'ëwtityëty ets ojts kyojy tä ënety ja Wintsën të tuk'ëne'emyën ja Moisés.
27Ja Aarón ja wyit tä'äky mëët ja y'u'unk y'ëna'k ja jyä'äjëty, mëti'ipë aak oywyitën, yë'ë ojts t'oytyuny tu'uk yë ja'ay mëti'ipë ënety yajxon nyija'apën wi'ix yë wit yajo'okyën. 28Näyjyëtu'un ja kupit, ja kutsum mëti'ipë yajtuktsuumwë'ëmpën ja kupit ets ja nyi'ëxmotspa'tk, aakyë'ë ojts tyuny ja linë wit awiity, 29näjyëtu'un ja wëën mëti'ipë mëët y'oytyunyëtyën ja linë wit awiity ets ja wit tä'äky ukpyë, tsu'unkpë ets tsaptspë, yajxon ojts yajtä'äky oy, jëtu'un ijxtëm ënety ja Dios të tuk'ëne'emyën ja Moisés.
30Ojts näjyëtu'un tyaj'oyëtë yë tsya'a aak pu'ts pujxnpë, mëti'ipëjaty ënety yajwa'atsnajxypyën ets ojts jam witkëjxm jëtu'un tyajkëxkojtë tä yë ja'ay muum tii tkëxtsa'ayën, jä'ä y'ënä'äny: Dios yajmoopy. 31Ënet ojts ja pu'ts pujn jam tkëxtsumtë ma ja wit këxtëy y'ityën, mëti'ipë xyëëwajtypyën kupit; yë'ë tyukëxtsuumtë tu'uk ja ukypyiity timnikojëpë, jëtu'un ojts wyi'imy tä ënety ja Dios të tuk'ëne'emyën ja Moisés.
Jëtu'un ojts y'o'oyëtyä'äy ja tsajptëjk
32Ja wit tëjk ma y'ityën ja näpyaatë mëët yë Dios, ojts ja kyojta'ay ets y'apatëtyääy. Ja Israel ja'ayëty jëtu'un ojts t'oytyuntë tä ojts ja Dios tuk'ëne'emyën ja Moisés, 33tääts ja Moisés ojts tkë'ëmooytyääynyëtë tëkokyë mëti'ipë ënety të tyaj'o'oyëtya'atën jap ma ja Dios ja jyëën tyëjkën; ja wit tëjk ma ja näpyaatë y'ityën ets tëkokyë jënu'un ënety jap tyuna'anyën: ja jo'kn, ja kepyjyiity, ja witsë ets ja xeny mëët ja nyi'ëjx tu'uktu'uk. 34Ja nyiyä'äp mëti'ipë oytyunyën mëët ja kupixyny yä'äy ak, mëti'ipë ënety të wyatsnën tsapts, ja oyjyätyëtypë ja po'o mëti'ipë näjyëtu'un yajtuknikäämën ets ja wit'atëëytyuk mëti'ipë yajtuk'atëëytyujkpën ja kaaxë; 35ja kaaxë mëti'ipë myë'ijtypyën ja käjpxytyu'unën ets ja nyiwitsë, näjyëtu'un ja nyi'akë'ë; 36ja kaaypyäjn ets tëkokyë jënu'un mëët tyunyën ja tsajpkääky mëti'ipë ja Dios yajmoopyën.
37Ja mëj jëëntooytyakn mëti'ipë aak pu'ts pujxn mëët y'oytyunyëtyën ets ja nyikutë'kxn mëti'ipë mä'kxy yajpatpën ets tu'kë'ëyë jënu'un ënety mëët tyuna'anyën, jëtu'un tä ja onën mëti'ipë mëët tyoyën ja kutë'kxn; 38ja pu'ts pujxn wintsë'këntyakn, ja on mëti'ipë yajtukkënu'kxpën, ja poom mëti'ipë pa'akxu'kpën; ja wit'atëëytyuk mëti'ipë yajtuk'atëëytyujkpën ja tyëjkëtyakn ja wit tëjk ma ja näpyaatë y'ityën; 39ja tsuxkpujxn wintsë'këntyakn ets näjyëtu'un ja tsuxkpujxn atënaayë'ëk, mëët ja nyiwitsë ets tëkokyë jënu'un mëët tyunyën; tä ja pujxn kë'ëpujtakn mëët ja nyi'ëjx. 40Ja wit'atëëytyuk mëti'ipë tuunën ma ja tëja'awën, ja xyenyëty ets ja nyi'ëjx; ja wit'atëëytyuk mëti'ipë jam tuunën ma ja tëja'aw yajnitëkën, ja nyitejpxy ets ja nyi'akujpë'ëk mëti'ipë tuuntën ma ja tëja'awën, tëkokyë jënu'un winë tyuuntaayën ma ja Dios ja jyëën tyëjkën, ja wit tëjk ma ja näpyaatë y'ityën. 41Ja wit mëti'ipë jo'okyën, mëti'ipë jap tuunën ma ja tsajptëjkën, ja wit tä'äky mëti'ipë yajtukni'oytyu'unëyën ja teety Aarón ets ja wyitëty ja y'u'unk y'ëna'këty mëti'ipë myëteety'atëpën.
42Yë Israel ja'ayëty jëtu'un ojts kä'pxy t'oytyuunta'atë tä ënety ja Dios të tuk'ëne'emyën ja Moisés. 43Ko ja Moisés t'ijxy, ko ja ja'ayëty mëj këjää të tyuntë, ënät ojts ni'ëmukë tkënu'kxta'ay.
المحددات الحالية:
Éxodo 39: QUETZMIXE
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Biblia Dc en Mixe de Quetzaltepec, Oaxaca México © Sociedad Bíblica de México, A.C.