Éxodo 9
9
Ja ëyo'on mëti'ipë këtakën ma ja jëyujk tsajpkaajëtyën
1Ënet yë Dios t'ënëmaay yë Moisés:
Nëjkx xy'ixy yë yajkutujkpë ets xy'ënëëmëty: Jëtu'un yë Wintsën y'ënä'äny mëti'ipë yë hebreo ja'ayëty Tyios'ajtëpën: Ëxmajtskës yë nkajpn wä'änës min xy'ëwtaty. 2Pën ka'ap xy'ëxmatsy, je'eyë ni'ikyë xy'ëtuky yë nyë'ë'aaw tyu'u'aawëty, 3yë Dios yajkëta'akäämpy yë myëk'ajtën jam ma jëyujkëtyën, mëti'ipë jam myajtënääpyën mkamwinm mtu'uwinm ets nëjkx y'o'kta'atë mëët ja pa'am ëyo'on. Nëjkxëp y'o'kta'atë yë jëyujk tsajpkaa, këwaayëty, kruktsëty, tsajppaxëty kupixynyëty. 4Yë Dios yë'ë yaj'ixanëp ko mijts yë mtsajpkaajëty ëpëky yë'ëjëty mëët ëëts yë njä'äjëty, yë Israel ja'ayëty ka'ap yë tsyajpkaajëty y'ooka'antë.
5Yë Dios ojts t'awitsy ja xëëw jëna'a ya'atë tyuna'any jyata'anyën ets y'ënäny:
Jopyës ya'atë jëtu'unpë nyajtuna'any nyajjata'anyë.
6Ko kyomjëpom'ajty jëtu'un ja Dios tjantyuuny. Tëkokyë yë jëyujk tsajpkaa japëpë Egiptë ënety yajpaatën, ojts y'o'kta'atë, e ja jyëyujk tsyajpkaajëty ja Israel ja'ayëty ka'ap ojts niwi'ix jya'ajtëpë, nitu'uk kya'o'ktë. 7Ojts ja mëj'ënä'ämpë jam ja tyuunpë tkexy, ma ja jyëyujk tsyajpkaa jam tyänëtën ja Israel ja'ayëty. Ja yajkutujkpë je'eyëm ka'ap ninu'un kyäjpxyjyä'äykyujkëy ets ka'ap t'ëxmajtsy ja Israel ja'ayëty ets jap tsyoontëty.
Ja pu'uts mëti'ipë ojts näjyëtu'un y'ëyo'on'atyën.
8Ënet ja Dios t'ënëmaay ja Moisés ets ja Aarón:
Nëjkx wäänë wooktë yë kuyjyaam ma tsajpkääky kyi'iyën ets Moisés jam tyujkwëjëty ma yajkutujkpë wyintuuyën. 9Yë kuyjyaam jëtu'un nëjkx y'awinpity tä yë naaxjokën ets nëjkx pyuutsë'kta'atë yë ja'ay ets jëyujk ma tëkokyë Egiptë y'itjotmën.
10Tä yë Moisés mëët yë Aarón ojts tjantywyooktë ja kuyjaam ma tu'uk yë jëëntooytyaknën ets ojts tninëjkxtë ja yajkutujkpë, jamts ojts ja Moisés tyujkwëjy ja kuyjaam ets tëkokyë ja'ayëty ets jëyujkëty pyuutsë'ktaaytyë. 11Ja xëëwmääpyëtëjkëty, ka'ap ojts y'ëkmaayënëtë tjëjpkuwa'akëtëty ja Moisés, jä'ä ko yë'ëjëty ojts ja pu'uts pa'am pyatënëtë. 12E yë Dios yë'ë ojts kë'ëm tyajkutuky ets yajkutujkpë ka'ap ninu'un kyäjpxyjyä'äkyukëty ets ka'ap ninu'un timmyëj'ixy ja Moisés ets ja Aarón, jëtu'un ijxtëm ënety ja Dios të t'ënëëmën ja Moisés.
Ja tëtsn tuu mëti'ipë näjyëtu'un ëyo'on'ajtën
13Ënet ja Dios t'ënëmaay ja Moisés:
Jopy mpëtë'kojëty mëjjajp poopjajp ets nëjkx xy'ënëëmë yë mëj'ënä'ämpë: Jëtu'un yë Dios y'ënä'äny mëti'ipë Tyios'ajtëpën yë hebreo ja'ayëty: Ixmats yë nkajpnës wä'änës min xy'ëwtaty. 14Jä'ä ko ëjts nkäxäämpyës tu'kë'ëyë yë ëyo'on jotmay ma mijtsën mëti'ipës të ntuknipëjktaakën, näjyëtu'unës nkäxa'any ja ëyo'on ma ja mwintsëntëjkëtyën ets ma ja mja'ayëtyën, jëtu'un'äämpy xynyijawëtëty, ko ka'ap ma wiinkpë pën jëtu'unpë tä ëjtsën. 15Ka'ap jeexyë të xykyamayës mijts ëxëëk të ntuny mëët yë ëyo'on jotmay kanaakpëkpyë ma mijtsën ets ma mnaax mkajpnën ets mijts jëna'ajëp jeexyë mjëwa'knë yaa naaxwiiny. 16E ëjts tëëjës nyajkutuky ets mjuuky'atëty ets xy'ixëty wi'ix'äämpy ëjts yë mëk'ajtën nmëëtëtyën ets jëtu'un akäjpxy n'itëtyës oy tyimmaajëty. 17E oy jyajëtu'unëty, mijts je'eyë yowë nëkoo mtimjäntykyujuun'o'knë, oy xyjya'ixy ko yë ëyo'on jyatuny jyajatyë. 18E ka'ap wyi'ixëty, ko jyopy'atëty, ya'atpë xëëw, yajxonës mëk nyajtëtsntu'uja'any, kajëna'a jëtu'un yaa Egiptë kyatëtsntu'uynyëm, tä jopy xy'ixa'anyën. 19Paaty yam n'ënëëmë yaja'ajta'a yë mjëyujk mtsajpkaa jënu'un jam muum xyajtänën, muum tunkëjxm kopkëjxm, këtiipë yë tëtsn tuu muum yaj'ookëtëty, jä'ä ko ënety jopy tyëtsntu'uy yaj'o'kta'ajäämpy yë ja'ay ets jëyujk tsajpkaa mëti'ipë muum yajpatëpën ëwaatsëtuuy ets ka'ap tyëkotyëty.
20Jënaakën ja wintsëntëjkëty ojts tmëpëktë, jëtu'un tä ënety ja Dios të tnikäjpxyën ets tpëjktaktë ja tyuunpëtëjkëty tëkoty ets näjyëtu'un ja jyëyujkëty. 21E mëti'ipë ka'ap ojts ninu'un timmyëpëktë ja aaw ayuk, jëtu'unyë t'ëxmajtstaaytyë winë ëwaatsëtuuy. 22Ënet ja Dios t'ënëmaay ja Moisés:
Yujkxaj yë mkë'ë tsajpjotm ets wä'än tka'ay yë tëtsn tuu ma tëkokyë yë nyaax kyajpnën yë Egiptë ets näjyëtu'un ma ja'ayëtyën ets ma jëyujkëtyën.
23Ënet ja Moisés ojts ja kyë'ë tyujkxajy tsajpjotm, tä ja Dios tkejxy ja ënääw wëtsuk ets ja tëtsn tuu yaa naaxwiiny naaxkëjxy. Yë'ë jëtu'un ojts t'ëwa'atsy ets nëkooyë tyëtsntu'ujëty jap ma Egiptë kajpnën ets ma tu'kë'ëyë it naaxwiinyëtë tnitänën. 24Yë ënääwëty wëtsukëty ets ja tëtsntuujëty ëxëëk jap y'ëtëtstë Egiptë, jeky yajxon tyëtsntuuy, ka'ap tsyojknajxy. Tä tyëtsntuuyën jap Egiptë, ka'ap ënety nijëna'a jëtu'un yaj'ixynyëm. 25Ja tëtsn tuu yajxon jap kyëtäky Egiptë, ojts may yë ja'ay y'ooktë ets jëyujk tsajpkaa; aay ujts pu'uxmën jya'ajtaay ets aay kepy ojts wyinka'ata'atë mëti'ipë ënety jap Egiptë ijtëpën. 26Jap Egiptë mëj këjää yë ëyo'on y'ijty, e jam Gosen nitii jam kyatuun kyajajtë, nitu'uk yë tëtsn ojts jam kyaka'ay ma ënety tsyëënëtën yë Israel ja'ayëty.
27Ënet yë mëj'ënä'ämpë ojts tnikäxë yë Moisés ets Aarón, tääts t'ënëmaay:
Nija'apës koos tëë mpokytyuny, ëjts jëtu'un yë poky nmëët'ajtyp mëët yë nnaax nkajpnës. Ëjts ka'apës yë'ë mpoky'ixy yë Wintsën. 28Mëk ëëts yë ënääw wëtsuk ets tëtsn tuu të nyajnaxtë, paaty tyam ka'ap yam miits n'ëk'ëtukanëtë. Mëpëjktsowtë yë Dios mëët ëëtsëty ets jëtu'un yam n'ëxmatstëty.
29Ets ja Moisés y'ëtsooy:
Je'eyës yaa mpëtsëmëty etsës yam yë Dios nmëpëjktsowa'any mëët mijtskyëjxm ets wä'än ja tëtsn tuu tnaxy, näjyëtu'un këtiipë y'ëkwëtsujknëty ets ënääw y'ëk'ënanëty. Jëtu'un'äämpy xynyijawëty ko yë naaxwiinyëtë Dios yë jyä'ä'ajtyp. 30E ëjts wa'atsës nijawë ko mijts ets mwintsëntëjkëty mëti'ipë mëët mtuunmukyën, ninu'un yë mjot mwinma'anyëty xykyayajyu'unkëtë ma Tiosën mëti'ipë tëy jaanty Wintsën'ajtpën.
31Ja pëjktä'äkyëty mëti'ipë ënety ëka'any kujk mëjaawtso'onpën ets ja aay ujts mëti'ipë ënety jä'ä mëët ja wit tyajkojtën, wa'ats ja tëtsn tuu wyinka'tstaayëtë. 32E yë tsajpmok ets tu'uk ja ujts mëti'ipë xyëëwajtypyën centeno, ka'ap ojts tii jyatëtë jä'ä ko ok ojts myuxtë.
33Ko yë Moisés jap tsyo'ony ma kajpnën, ma ënety mëët të myëtyä'äkyën ja mëj'ënä'ämpë, ënät ojts ja Dios tmëpëjktsoy, tä ënätyë ja tëtsn tuu nyäxy, ja ënääw wëtsukëty ka'ap ojts y'ëk'ëtëts y'ëk'ënanëtë. 34E ko ja mëj'ënä'ämpë t'ijxy ko tëë ja tuu nyäxy, ka'ap y'ëktëtsntuunë, ka'ap ma ja ënääw wëtsuk y'ëk'ënanë, ënät ojts ja jyot wyinma'any mëk tpëjktakojnëpë ets ka'ap jëtu'un yi'iyëty ojts atu'uk ja ëxëëk winma'any tpaaty, näjyëtu'un ja wyintsëntëjkëty mëti'ipë ënety mëët tyuunmuktën. 35Ja mëj'ënä'ämpë kä'äpyëm kyäjpxyjyä'äykyujkëy, ka'ap ojts ja Israel ja'ayëty t'ëxmatsy tsojk, jëtu'un tä ënety ja Dios të tnikäjpxyën.
المحددات الحالية:
Éxodo 9: QUETZMIXE
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Biblia Dc en Mixe de Quetzaltepec, Oaxaca México © Sociedad Bíblica de México, A.C.