Embandizo 27
27
Isaka naha Yakobo omugisha
1Isaka kayagurusire n'amaisho gakagira ekibubi akaba atakishobora kubona, ayeta omutabani omukuru Esau, amugambira ati, “Mwana wange,” ogu ahorora ati, “Kaboneke waitu!” 2Ati, “Lea Nagurusha, tindikumanya kiro kyo ndaferamu. 3Mbwenu okwate ebikwato byawe, ekilimba n'obuta, ogende omw'irungu ompiigire enyamaishwa, 4mara onchumbire ekyakulya kishaire, ekyo nyenda, okindetere nkilye, nyije nkuhe omugisha ntakafire.”
5Rebeka akaba nahuliliza orwo Isaka alikugambira atyo omutabani Esau. Esau kayagiire omw'irungu kuhiga enyamaishwa kugileta, 6Rebeka agambira omutabani Yakobo ati, “Nahulira sho nagambira murumuna wawe Esau, ati, 7‘Ondetere enyamaishwa, onchumbire ekyakulya kishaire nkilye, nyije nkuhe omugisha omu maisho g'Omukama ntakafire.’ 8Mbwenu aha rw'ekyo mwana wange ohulire ekigambo kyange ekyo ndikukuragira. 9Ogende omu buhyo ondetere obubuzi buto bubili oburungi, nyije mbuchumbire sho ekyakulya kishaire eky'ayenda. 10Okimutwalire akilye, aije akuhe omugisha atakafire.” 11Kyonkai Yakobo agambira Rebeka nyina ati, “Murumuna wange Esau muntu aina omwoya, kandi inye nyina omubili ogulikutelera. 12Shana tata yakunkwatakwata mboneka nimubeiya, aho nyeletera omuraamo aha mwanya gw'omugisha.” 13Nyina amugambira ati, “Mwana wange, omuraamo gwawe gukwate inye, ekiliho ohulire ekigambo kyange. Genda obundetere.” 14Yakobo agenda abukwata abumuletera. Nyina achumba ekyakulya kishaire ekyo ishe ayenda. 15Rebeka akwata ebijwaro ebirungi muno eby'omutabani omukuru Esau, ebyo yabaire ainabyo omu nju, abijweka omutabani omuto Yakobo. 16N'obuhu bw'embuzi abumuteeka aha mikono n'omu ngoto ahalikutelera. 17Amukwasa ekyakulya kishaire n'omukate ebyo yabaire achumbire.
18Yakobo ataha mbali ishe yabaire ali, amweta ati, “Tata.” Ishe amuhorora ati, “Ndi aha, oli ohai mwana wange?” 19Amugarukamu ati, “Ndi Esau omuzigaijo gwawe. Nakozire okwo wangambira; mbwenu imuka oshuntame, oboneke aha bwite bwange, obone kumpa omugisha.” 20Kyonkai Isaka abaza omutabani ati, “Mwana wange wagikwasa otai bwangu?” Amuhorora ati, “Omukama Ruhanga wawe yantunga egoshoko.” 21Isaka agambira Yakobo ati, “Ngoba mwana wange, nkukwatakwate manye nka oli kwo mwana wange Esau anga chei.” 22Yakobo agoba ishe; ishe amukwatakwata nagamba ati, “Eiraka iraka lya Yakobo, kyonkai emikono ya Esau.” 23Tiyamumanyire aha rw'okuba emikonoye ekaba eina omwoya nk'emikono ya mukuruwe Esau, nikwo kumuha omugisha. 24Ashuba amubaza ati, “Oli kwo mwana wange Esau?” Ogu amuhorora ati, “N'inye.” 25Aho Yakobo agamba ati, “Ndetera ekyakulya ekyo ndye aha bwite bwawe mwana wange, nkuhe omugisha.” Akimuletera akilya, amuletera n'edivai, nayo anywa. 26Amugambira ati, “Mwana wange ngoba, onywegere.” 27Amugoba, amunywegera. Isaka anukiliza akatachu k'ebijwarobye, amuha omugisha nagamba ati,
“Leba, akatachu k'omwana wange,
kali nk'akataachu k'endimiro
ey'Omukama yahaire omugisha.
28Ruhanga akutunge orume rw'eiguru
n'akashaju k'ensi, n'engano nyingi n'edivai.
29Abantu bakukolere,
amahanga gakubandamire.
Obe mutwazi wa barumuna bawe,
n'abaana ba nyoko bakubandamire.
N'akaraamwe alikuraama wena;
ahabwe omugisha alikakuha omugisha wena.”
Esau nashaba ishe omugisha
30Orwo Isaka yamazire ati kuha Yakobo omugisha, na Yakobo wenene ashangwa yamurugaho ati yaturuka, Esau omurumuna aihurura naruga omu muhigo. 31Na wenene achumba ekyakulya kishaire, akiletera ishe, amugambira ati, “Tata, imuka oboneke aha bwite bw'omwana wawe, obone kumpa omugisha.” 32Ishe amubaza ati, “Oli ohai?” Amuhorora ati, “Ndi mwana wawe Esau omuzigaijo gwawe.” 33Isaka ajugumba orujugumbo rungi, ati, “Ahosi n'ohai ayaita enyamaishwa akandetera nkalya yona, iwe otakaizire, mara nkamuha n'omugisha? Rwona omugisha araguhabwakwo.” 34Esau kayahuliire ebyo ishe yagamba akunga, aboroga, agambira ishe ati, “Tata, nanye ompe omugisha.” 35Kyonkai ishe amugambira ati, “Murumuna wawe yaija n'obwenge, yatwara omugisha gwawe.” 36Esau agamba ati, “Isi tikyo yayeteirwe Yakobo? Ogu murundi gwa kabili nanyakira omu magezi. Akanyaka obuzigaijo bwange; leba na mbwenu yanyaka n'omugisha gwange.” Ashuba abaza ishe ati, “Isi toina mugisha ogwo wansigiraho?” 37Isaka amuhorora ati, “Namuhindura mukama wawe, n'abarumuna bona nabahindura bairube, namuha n'emyaka n'edivai. Iwe aho nkukolereki mwana wange?” 38Esau agambira ishe ati, “Tata, isi oina omugisha gumoi gwonkai? Inye nanye ompe omugisha.” Atungika eiraka alira.
39Aho Isaka ishe amuhorora ati,
“Leba, obuturo bwawe tibuligira kashaju ka nsi,
tibuligira na rume rwa iguru.
40Olitungwa embanda yawe,
mara olikolera murumuna wawe.
Kyonkai k'olyeyemamu,
olyeihya enkomoye omu ngoto.”
Esau nanoba Yakobo
41Esau anoba Yakobo namutura omugisha ogwo ishe yamuhaire. Atekeleza ati, “Tata ali haihi kufa; k'alikumara kufa murumuna wange Yakobo nimwita.” 42Bagya bagambira Rebeka ebyo Esau omutabani omukuru alikugamba. Aho atuma ab'okumwetera Yakobo omutabani omuto, amugambira ati, “Esau murumuna wawe nayemaramara, nanama kukwita. 43Aha rw'ekyo mwana wange, ohulire ekyo ndikukugambira; imuka osingirwe Harani owa munyanyazi Labani, 44obe oikaire nawe ebiro bike kuhika orwo murumuna wawe arahwa ekiniga. 45K'aramara kwebwa eky'omukoleire, aho ndakutumaho nkwihyeyo. Tinakuferwa nywembili kiro kimoi.”
Yakobo nairuka Esau
46Rebeka agambira Isaka ati, “Abahiti baka Esau banyira. Na Yakobo kayakushwera omwisiki w'omuhiti, omunyansi wa munu, hakili nkafa.”
المحددات الحالية:
Embandizo 27: RHAY01
تمييز النص
شارك
قارن
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Ruhaya DC Bible © Bible Society of Tanzania, 2001.