Génesis 19
19
Sodóma ha Gomórra oñehundi
1Ha umi mokõi yvága rembiguái ka’arupytũme og̃uahẽ Sodómape; ha Lot oguapy javehína Sodóma táva rokẽme. Ha Lot ohechávo ichupekuéra, opu’ã omomaiteívo ichupekuéra oñakãitývo henondepekuéra,
2he’i: Péina ág̃a, che karaikuéra, ajerure peẽme peju pene rembiguái rógape pepyta ha pejepyhéi hag̃ua; ha pyhareve pepu’ãta peho jevy hag̃ua pende rapére, ha ombohovái ichupe hikuái: Nahániri, okápente ropytáta ko pyharépe.
3Ha ha’e he’i jevy jey ichupekuéra, ha oho hikuái hendive ha oike hógape; ha Lot ojapouka ichupekuéra karuguasu, ha ombojy pan levadura’ỹre (ojoguáva mbejúpe) ha okaru hikuái.
4Ha oñeno mboyve hikuái, umi kuimba’e Sodomaygua oñondivepa omongora Lot róga, pe imitãvéva guive pe itujavéva peve.
5Ha ohenói hikuái Lótpe, ha he’i ichupe: Mamo piko oime umi kuimba’e ko pyharépe og̃uahẽva’ekue ne rendápe. Eguenohẽ ichupekuéra okápe roipyhy hag̃ua ichupekuéra.
6Upémaramo Lot osẽ hógagui, ha omboty pe okẽ hapykuerépe,
7ha he’i ichupekuéra: Ajerure peẽme, che ryke’ykuéra, ani pejapo ko mba’evaietéva pejaposéva.
8Pehendumi che ha’étava peẽme, che areko mokõi che rajy ne’ĩrava gueteri oikuaa kuimba’e; aguenohẽta ichupekuéra peẽme, ha pejapo hesekuéra pejaposéva; ko’ã kuimba’e rehénte ani pejapótei mba’eve, oúgui hikuái che róga kuarahy’ãme.
9He’i ichupe hikuái: Ejei upégui; ha he’ive hikuái: Ou ko tetã ambueygua oiko hag̃ua ñande apytépe, ha oikóta piko ko’ág̃a ñane mbojovakehára ramo, roñembosarái vaivéta nderehe ichuguikuéragui. Ha’ekuéra omyaña mbarete ichupe, ha oñemboja hikuái ojokapa hag̃uáicha hokẽ.
10Upéramo umi yvága rembiguái ipojái, ha omoinge hikuái Lótpe ikotýpe, hendivekuéra, ha omboty hikuái hóga rokẽ.
11Ha ombohesatũmba hikuái umi kuimba’e okápe oĩvape, pe michĩvéva guive itujavéva peve, ikane’õ meve hikuái okẽ rekávo.
12Ha he’i umi yvága rembiguái Lótpe: Reguereko gueterípa ne pehẽnguekuéra ko’ápe. Eguenohẽmba ko távagui nde rajykuéra menarã, nde ra’ykuéra ha nde rajykuéra, ha opaite nde reheguáva guive,
13rohundítagui ko táva, heseguakuéra terakuã vaiete og̃uahẽma Ñanderuete renondépe; ha upévagui Ñanderuete orembou rohundi hag̃ua ko’ã távape.
14Upémaramo Lot osẽ ha oñe’ẽ itajyrakuéra menarãnguérape, ha he’i ichupekuéra: Pepu’ã ha pesẽ ko’águi Ñanderuete ohundítagui ko táva kóva. Ha itajyrakuéra menarãnguérape ha’eténte ku ha’e oñembohorýva hesekuéra.
15Ha ko’ẽju potávoma, umi yvága rembiguái he’i Lótpe pya’e osẽ hag̃ua, he’ívo ichupe: Epu’ã ha egueraha ne rembireko ha nde rajy mokõivévape oĩva ko’ápe, ani hag̃ua omanótei hikuái ko táva kóva oñehundítamagui.
16Ha imbegueitereígui ha’e, umi mokõi kuimba’e ipógui oguenohẽ ichupe, hembireko ha itajýra mokõivévape, Ñanderuete oiporiahuverekoitereígui ichupekuéra; ha oguenohẽ ichupekuéra pe távagui oka gotýo.
17Ha ogueraha rire ichupekuéra okápe, peteĩva he’i: Pekañy pende rekove rehehápe; aníke pema’ẽtei pende rapykuére gotýo, ha aníke pepytátei pe ñu tuichakue rupi; pekañy cerrokuáre, ani hag̃ua pemano.
18Lot katu he’i ichupekuéra: Nahániri, ajerure peẽme, che jarakuérape,
19pema’ẽ porã pene rembiguái rehe ha tajohu py’aporã pende resa renondépe, peẽ oreporiahuvereko haguére rojohu jevy ore rekove, che ndaikatumo’ãi akañy pe cérrokuáre, anítemo cherupity pe mba’evai, ag̃uahẽ mboyve upépe ha amano.
20Pema’ẽ porã, pe táva hi’ag̃uívape akañyse, ha imichĩ avei; cherejána takañy upépe, ani hag̃ua añehundi.
21Ha peteĩva he’i ichupe: Oĩ porã, ahendu avei ne mba’ejerure ha nahundimo’ãi pe táva nde eréva.
22Pya’e, pekañy upépe; mba’eve ndaikatumo’ãi rojapo peg̃uahẽ mboyve upépe. Upévare oñemoambue pe táva réra, Zoar.
23Pe kuarahy osẽvo, Lot og̃uahẽ Zoárpe.
24Upévo Ñanderuete oity Sodóma ha Gomórra ári itaysy (azúfre) ha tata ára guive.
25Ha ohundi umi táva, iñu tuichakue, ha opaite oikovéva guive umi távape ha opaite plantakuéra.
26Upéramo Lot rembireko oma’ẽ hapykue gotýo, ha oiko ichugui ta’ãnga jukyguiguáva.
27Ha Abraham opu’ã ambue pyharevete ha oho oñemongeta haguépe Ñanderuete ndive.
28Ha oma’ẽ Sodóma, Gomórra ha iñunguéra rehe; ha péina pe tatatĩ opu’ã yvýgui tatakuaguasu ratatĩcha.
29Ha Ñanderuete ohundi ramoguare umi táva iñunguéra reheve, Ha’e imandu’a Abraham rehe, ha upévare oguenohẽ Lótpe, ohundi ha ombotapere mboyve umi táva Lot oiko haguépe.
30Lot katu osẽ Zoárgui ha oho pe cérrore, ha hendive itajýra mokõi; okyhyjégui opytave hag̃ua Zoárpe, ha oiko hikuái peteĩ itakuaguasúpe, ha’e ha itajyrakuéra ndive.
31Ha pe ig̃uaig̃uivéva he’i imitãvévape: Ñande ru ningo itujáma, ha nahembyvéi kuimba’e ko yvy apére ñamenda hag̃ua hesekuéra.
32Eju ha ja’uka víno ñande rúpe, ha ñañeno hendive jaguereko hag̃ua ñande rúgui ñane membyrã.
33Ha ho’uka hikuái itúvape víno pe pyharépe, ha oike pe ig̃uaig̃uivéva oñeno hag̃ua itúva ndive; ha ha’e noñandúi oñeno ramoguare hendive oka’úgui.
34Ha ambue árape, pe ig̃uaig̃uivéva he’i imitãvévape: Péina ápe, che añenókuri ange pyhare ñande ru ndive; ja’uka jevy ichupe víno ko pyharépe, ha eñeno nde avei hendive, jaguereko hag̃ua ñande rúgui ñane membyrã.
35Ha pe pyharépe ho’uka jevy víno itúvape, ha opu’ã pe imitãvéva oñeno hag̃ua hendive; ha Lot noñandukuaái oñeno ni opu’ã hague ijykéregui.
36Upéicha mokõive Lot rajy hyeguasu itúvagui.
37Ha pe tuichavéva imemby peteĩ mitãkuimba’e, ha ombohéra ichupe Moab, ha péva hína umi Moabgua ru ko ára peve.
38Ha pe imitãvéva imemby avei peteĩ mitãkuimba’e, ha ombohéra ichupe Benammi, ha péva hína umi Amongua ru ko ára peve.
المحددات الحالية:
Génesis 19: ÑÑP2015
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.