LAMKALTU 1
1
1Ka dawtmi Theofilas:
Ka cauk hmasa u ah khan Jesuh nih rianṭuan hram aa thawk ri in vancung i lak a si ni tiang #Luk 1.1-4 2a tuahmi thil vialte le a cawnpiaknak vialte kha ka ṭial. Vancung i a kal hlanah khan a lamkaltu caah a thimmi hna kha Thiang Thlarau thawngin a cawnpiak hna. 3A thih hnuah ni sawm li chung an sinah voi tampi a lang i a nung ṭhan hrimhrim ti kha zumh lo awk zeihmanh um loin lam tam piin a langhter: annih nih amah cu an hmuh i anih nih Pathian Pennak kong kha a ruah hna. 4Cun an sin i a um lioah khan hi nawlbia hi a pek hna i, “Jerusalem khua hi chuahtak hlah u, ka Pa nih a rak in kamhmi hna laksawng ka rak in chimhmi hna tu kha hngak ko u. #Luk 24.49 5Johan nih cun ti in tipilnak a pek hna, sihmanhsehlaw kan hmailei ni tlawmte chungah hin Thiang Thlarau in tipilpek nan si lai,” tiah a ti. #Mat 3.11; Mar 1.8; Luk 3.16; Jhn 1.33
Jesuh Vancung Ah A Kai
6Jesuh le a lamkaltu hna cu hmunkhat i an um tikah khan, a lamkaltu hna nih cun an thawh i, “Bawipa, atu caan ah hin maw Israel mi cu uknak kha na pek ṭhan hna lai?” tiah an hal.
7Jesuh nih cun a thawh hna i, “Ka Pa nih amah nawlngeihnak chungah a chiahmi caan le nithla kong cu nannih hngalh awk a herh lo. 8Asinain Thiang Thlarau nan cung i a tlun tikah cun, ṭhawnnak in nan khat lai i Jerusalem khua le Judea ram vialte le Samaria ram ah le vawlei cung khuazakip ah ka tehte nan si lai,” tiah a ti hna. #Mat 28.19; Mar 16.15; Luk 24.47-48 9Hi bia a chim dih in an hmuh hngan te ah cun vancung ah a kai; cun minmei nih a hun phenh i an hmu kho ti lo. #Mar 16.19; Luk 24.50-51
10Annih nih a liam riahmah kha an cuanh ko lioah cun, puan rang aih in minung pahnih an pawngah cun chikkhatte ah khin an rung dir i, 11“Galilee mi hna, zeicahdah van lei zoh in nan dir ko? Nan sinin van ah a kaimi Jesuh hi, van ah a kai nan hmuh bantukte hin a ra kir ṭhan lai,” tiah an ti hna.
Judas Chaangtu Thimnak
12Cun lamkaltu hna cu Oliv Tlang khan Jerusalem khua ah khan an kir; cucu Jerusalem khua in meng cheu tluk a si. 13Jerusalem khua chungah khan an lut i an rak umnak khaan chungah khan an va kal: Peter, Johan, Jeim le Andru, Filip le Thomas, Bartholomew le Matthai, Alfeas fapa Jeim, Phunṭanh Simon le Jeim fapa Judas an si. #Mat 10.2-4; Mar 16.15; Luk 6.14-16 14Thlacam awkah atu le atu a bu tein an i pum i an sinah cun nu hna le Jesuh nu Mary le Jesuh naule kha an um ve.
15Cu hnu ni tlawmpal ah khan Jesuh a zummi hna kha an i pum i an dihlak ah za khat le kul tluk an si; cu pumhnak ah cun Peter cu a tho i, 16“Ka u le ka nau hna, Jesuh a tlaitu hna lam hruaitu Judas kong ah, Thiang Thlarau nih David ka in a chimchungmi bia, Cathiang chung i aa ṭialmi kha a tlin awk a herh. 17Judas cu kan rian ah hin i tel ve awkah thim a rak si caah khan kan bu chungah hin a rak i tel ve,” tiah a ti.
18(Judas nih khan thil ṭhalo a tuahmi man ah tangka a hmuhmi khan lo pakhat a cawk i cuka ah cun thi lakin a tlu i a kek dih i a chungril vialte a chuak dih. #Mat 27.3-8 19Jerusalem khua i a ummi vialte nih cucu an theih i cu lo cu a min ah anmah holh in Akeldama an sak i, a sullam cu Thisen Chuahnak Lo ti a si).
Peter nih cun, “Salm cauk chungah khan,
20‘A inn cu lawng seh law
a chungah ahohmanh um hna
hlah seh,’
tiin le
‘A rianṭuannak hmun zong kha
pakhatkhat nih rawlh hna seh,’
tiin aa ṭial i. #Slm 69.25; 109.8
21Cucaah Bawipa Jesuh a thawh-ṭhannak a hngaltu tehte si ve awk caah pakhatkhat nih cun a kan chap a hau. 22Amah cu Bawipa Jesuh nih kanmah he khual a tlawn lengmang lio i kan sin i aa tel lengmang vemi, Johan nih tipil innak kong a chim ri in Jesuh nih van ah a kan kaitak tiang kan sinah aa tel lengmang vemi a si awk a si,” tiah a ti. #Mat 3.16; Mar 1.9; 16.19; Luk 3.21; 24.51
23Cucaah mi pahnih min kha an chuahpi: cu hna cu Josef, Barsabbas an timi, (Justas ti zongah an ti fawnmi) le Matthias kha an si. 24Cun thla an cam i, “Bawipa, nangmah nih minung lungthin vialte cu na hngalh dih. 25Cucaah Judas nih amah hmun a simi i kal awkah a chuahtakmi rian, lamkaltu hna rian rawlh awkah, hi pahnih hna lakah hin aho deuh hi dah na thimmi an si, kan hmuhsak tuah,” tiah an ti. 26Cun cu hna pahnih lakah aho deuh cu dah kan thim lai tinak caah camcawhfung an zuh i an thimmi cu Matthias kha a si; cun amah cu lamkaltu pahleikhat hna bu chungah khan a lut.
المحددات الحالية:
LAMKALTU 1: HCL06
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Lai (Hakha) Common Language Bible © Bible Society of Myanmar 2006