LUKA 16
16
Thil Zohkhenhtu Mihrokhrawl
1Jesuh nih a zultu kha a thawh hna i, “Mirumpa pakhat a rak um i cu mirumpa nih cun thil zohkhenhtu pakhat a ngei i a thil zohkhenhtu nih cun a tangka kha a duhduh in pakpalawng ah a hman tiah an chimh. 2Amah cu a kawh i, ‘Nangmah kong i ka theihmi hi zeidah a si? Ka thilri na tuahtonak cazin kha tlamtling tein ka pe tuah, zeicahtiah ka thil zohkhenhtu na si kho ti lo,’ tiah a ti. 3Mipa nih cun a lungthli in, ‘Ka bawipa nih hin ka rian in a ka phuah ko lai, Zeidah ka tuah kun lai? Vawlei cawh le ka celh lo, mi thil hal le ka ning a zak fawn. 4A! Atu cu zeidah ka tuah lai ti kha ka hngalh cang! Cu ti ka tuah ahcun ka rian a dih tikah an inn ah a ka umter duhtu hawikom ka ngei hna lai,’ a ti. 5Cucaah a bawipa lei a bami vialte kha a auh hna. A hmasa bikpa kha, ‘Ka bawipa cu zeizat dah nang na bat?’ tiah a ti. 6Anih nih, ‘Oliv chiti pung za khat,’ tiah a leh. Thil zohkhenhtu pa nih cun, ‘Hihi na cazin siseh, ṭhu law sawm nga in ṭial,’ tiah a ti. 7A dang pakhat cu, ‘Nang tah zeizat dah na bat?’ tiah a ti. ‘Changvut rel thong khat,’ tiah a leh. ‘Hihi na cazin siseh, za riat in ṭial,’ tiah a ti. 8Cu thil zohkhenhtu mihrokhrawlpa cu a bawipa nih khan cu bantukin fim ngaiin thil a ti caah a thangṭhat; zeicahtiah hi vawlei cung mi hna hi an thil tining ah ceunak mi hna nakin an fim deuh,” tiah a ti.
9Cun Jesuh nih cun, “Cucaah hitin kan chimh hna: vawlei cung chawva in hawikom i ser hna u, zeicahtiah chawva cu a dih tikah zungzal inn ah an umter hna lai. 10Thil hmete ah zumhawktlak a simi cu thil ngan zongah zumhawktlak an si tawn, thil hmete ah a hrokhrawlmi cu thil ngan zongah an hrokhrawl tawn. 11Vawlei cung thil tuahtoning i zumhawktlak lo nan si ahcun zeitindah rumnak taktak cu pek khawh nan si lai? 12Cun midang thil a simi ah zumhawktlak nan si lo ahcun aho nih dah nanmah ta a simi thil cu an in pek hna lai?
13“Sinum pakhat cu bawi pahnih sal a si kho lo: pakhat kha a huat lai i pakhat kha a dawt lai; pakhat sinah zumh awktlak tein a um lai i pakhat kha zei ah a rel lai lo. Pathian le chawva cu nan bawi ah an pahnih in nan kemh kho hna lai lo,” tiah a ti. #Mat 6.24
Jesuh Chimmi Bia Dangdang
(Mat 11.12-13; 5.31-32; Mar 10.11-12)
14Farasi mi nih hi a chimmi vialte cu an theih tikah, annih cu tangka a duhmi an si caah, amah kha an nihsawh. 15Jesuh nih a thawh hna i, “Nannih hi minung mithmuh i miding aa lawhtermi pawl nan si, sihmanhsehlaw Pathian nih cun nan lungthin cu a hngalh ko. Zeicahtiah minung nih man sung ngai i an ruahmi cu Pathian mithmuh ah cun pakpalawng a si ko.
16“Moses Phungbia le profet ṭialmi ca hna cu Tipil petu Johan chan tiang caah khan an si; cu ri cun Pathian Pennak Thawngṭha cu chim a si i a mi kip cu heh tiah an lut. #Mat 11.12-13 17Sihmanhsehlaw Phungbia chung i a deh hme bikte hmanh a loh nakin van le vawlei loh hmanh kha a fawi deuh lai. #Mat 5.18
18“Ahohmanh a nupi a ma i nu dang a ṭhimi cu a nupi cungin sualnak a tuah a si; cun makmi nu a ṭhimi cu sualnak a tuah a si,” tiah a ti. #Mat 5.32; 1Kor 7.10-11
Mirumpa le Lazaruh Kong
19Voi khat cu mirum pakhat hi a rak um i puan man sung bikbik in aa thuam i nifate in nuam ngaingai in khua a sa. 20Cun misifak pakhat, a min Lazaruh an timi zong kha a um ve i hma nih a pumpuluk in a tlunh. 21Mirumpa cabuai in a tlami rawl ṭiltlawt kha ka khim lai ti i ruahchan in mirumpa innka hram ah khan an ratpi tawn. Cun uico kha an ra i a hma kha an liahpiak tawn. 22Misifakpa cu a thi i vancungmi nih vancung puai tuahnak ah khan an zuanpi i Abraham pawngah khan an ṭhutter. Mirumpa zong cu a thi ve i an vui. 23Mirumpa cu Hell chungah a tla i nganfak ngaiin a um; cunglei hi a hun zoh i lamhlapi ah khin Abraham le a pawng i Lazaruh kha a hun hmuh hna. 24Cucaah a hun kawh i, “Ka pa Abraham, ka zaangfah tuah. Lazaruh kha hei thlah law a kutdong kha ti ah va hnim seh law ka lei ah hin run ka thlerh seh, zeicahtiah hi mei chungah hin ka ngan a fak tuk hringhran,” tiah a ti. 25Sihmanhsehlaw Abraham nih a thawh i, “Ka fapa, na nun lioah khan thil ṭha phun kip kha pek na si i Lazaruh nih khan thil ṭhalo vialte a co kha philh hlah ngat; sihmanhsehlaw atu cu anih cu nuam tein a um i nang cu nganfak ngaiin na um. 26Cu pinah; kan karlak ah horkuang thukpi a um i cucaah hikalei in nangmah leiah tan a duhmi nih khan an tan kho lo i cu bantuk ṭhiamṭhiam in nangmah lei in kanmah leiah rat a duhmi zong an ra kho ve lo,” tiah a ti. 27Cun mirumpa nih cun a thawh i, “Asi, ka pa, Lazaruh cu ka pa inn ah khan hun thlah ko, 28cuka ah cun chuahpi unau panga ka ngei hna i hung kal seh law annih tal cu hi nganfah innak hmun ah hin an rat nakhnga lo ralrinnak hung pe hna seh,” a ti. 29Abraham nih cun aa thawh i, “Na unau hna ralrinnak petu dingah cun Moses le profet hna an um ko ṭung; an chimmi kha na unau hna nih cun ngai ko hna ngat seh,” tiah a ti. 30Mirumpa nih cun a hun leh i, “Ka pa, Abraham, cucu a za lo, mi pakhatkhat cu thihnak in a thawh i an sin i a va kal ahcun an nunning kha an ṭhinh ko lai,” tiah a ti. 31Sihmanhsehlaw Abraham nih, “Moses le profet kha an bia an ngaih hna lo ahcun, mi pakhatkhat cu thihnak in a thawh hmanh ah an zum hlei lai lo,” a ti.
المحددات الحالية:
LUKA 16: HCL06
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Lai (Hakha) Common Language Bible © Bible Society of Myanmar 2006