LUKA 22
22
Jesuh Rawinak Ding Khuakhannak
(Mat 26.1-5; Mar 14.1-2; Jhn 11.45-53)
1Lanhtak Puai timi Thilnu Telhlo Changreu Puai kha a nai cang. #Exo 12.1-27 2Tlangbawi upa hna le Phungbia Cawnpiaktu saya hna nih khan mizapi kha an ṭih hna caah zeitindah Jesuh kha a thli in kan thah lai tiah lam an kawl.
Judas Nih Jesuh Rawi Awk A Hna A Tla
(Mat 26.14-16; Mar 14.10-11)
3Khi tikah zultu pahleihnih hna lak i aa tel vemi Judas Iskariot an timi chungah khan Satan cu a lut. 4Cucaah Judas cu a va kal i tlangbawi upa hna le Biakinn cawngtu hna an bawile hna he khan zeitindah Jesuh cu an sinah a chanh khawh lainak ding kha an ceih. 5An lung a si ngaingai i phaisa kan in pek lai, tiah an ti. 6Cucu Judas zong kha a hna a tla i mizapi hngalh loin zeitindah Jesuh cu an sinah ka lei khawh lai tinak caan rem bawh hram kha a thawk.
Jesuh Nih Lanhtak Zanriah Ei Awk Aa Tim
(Mat 26.17-25; Mar 14.12-21; Jhn 13.21-30)
7Thilnu Telhlo Changreu Puai chung i Lanhtak rawl caah tuufa an thah hna ni kha a phan. 8Jesuh nih Peter le Johan cu a thawh hna i, “Va kal u law Lanhtak zanriah kan ei ding kha va tim tuah u,” tiah a ti hna. 9“Khuazei ah dah va tim u tiah na kan duh?” tiah annih nih an ti. 10Anih nih a thawh hna i. “Ngai hmanh u. Khuapi chung i nan vung luh ah khan ti-um in ti a thanmipa he nan i tong lai. A luhnak inn tiang khan nan hei zulh lai i 11cu inn a ngeitu pa cu, ‘Kan sayapa nih, “Khuazei ah dah a ka zultu hna he Lanhtak zanriah kan einak ding khaan cu a si?” a ti,’ tiah nan va hal lai. 12Cungdot ah khaan kaupi pakhat, ṭhutdan cabuai tlamtling tein an chiahnak an hmuhsak hna lai i cuka ah cun nan va timh lai,” tiah a ti. 13An va kal i Jesuh nih a chimh hna bantukte khan thil cu an va hmuh hna i annih nih Lanhtak zanriah cu an timh.
Bawipa Zanriah
(Mat 26.26-30; Mar 14.22-26; 1Kor 11.23-25)
14A caan a phak tikah Jesuh cu lamkaltu hna he khan cabuai ah cun an ṭhu. 15Annih cu a thawh hna i, “Sifahnak ka in hlanah hin hi Lanhtak rawl nannih he ei ṭi hi ka duh hringhran. 16Zeicahtiah Pathian Pennak chungah hi rawl hi a sullam taktak langhter a si hlan paoh cu ka ei ti lai lo,” tiah a ti. 17Cun Jesuh nih hrai kha a lak i Pathian sinah lawmhnak bia a chim hnuah, “Hihi i lak u law i hrawm u, 18zeicahtiah Pathian Pennak a phanh hlan tiang cu, hi mitsur hang hi ka ding ti lai lo,” tiah a ti. 19Cun chang kha a lak i Pathian sinah lawmhnak bia a chim hnuah a cheu i annih cu a pek hna i, “Hihi ka pum a si, nan ca i ka pekmi cu. Keimah philh lonak ah run tuah u,” tiah a ti. 20Cu bantuk ṭhiamṭhiam in zanriah an ei dih hnuah hrai zong kha a pek hna i “Hi hrai hi nan caah ka thletmi ka thi in khenhchihmi Pathian biakamnak a si. #Jer 31.31-34
21“Sihmanhsehlaw zohhmanh u. Keimah a ka rawitu cu ka sinah cabuai ah hin a um ko. #Slm 41.9 22Pathian nih a khiah cia bantukin Mi Fapa cu a thi lai, sihmanhsehlaw a rawitu caah cun ṭihnung a va si hringhran dah!” tiah a ti. 23Cun anmah le anmah cu, aho nih dah mah hihi a tuah lai, tiah pakhat le pakhat kha an i hal.
Ahodah A Ngan Bik
24Cun a zultu hna lakah khan, ahodah a ngan bik ah ruah awk a si, ti bia alnak kha a chuak. #Mat 18.1; Mar 9.34; Luk 9.46 25Jesuh nih a thawh hna i, “Jentail mi siangpahrang hna nih cun an michia kha a lal in an lalhnawh hna i nawl ngeitu hna kha ram ca ‘Thil ṭha tuahtu’ ti an si tawn. #Mat 20.25-27; Mar 10.42-44 26Sihmanhsehlaw nannih cu hitihin nan si awk a si lo: nan lak i a ngan bik kha a ngakchia bik bantuk a si awk a si i hruaitu a simi kha sal bantuk a si awk a si. #Mat 23.11; Mar 9.35 27Ahodah a ngan deuh? Rawl ei awkah a ṭhumi kha maw rawl a petu kha dah? Chim hau loin a ṭhumi kha a ngan deuh. Sihmanhsehlaw kei cu nan lakah rawl petu bantukin ka um. #Jhn 13.12-15
28“Harnak ka in caan a dihlak in a ka umpitu cu nanmah nan si; 29cun ka Pa nih uknak nawl a ka pek bantukin kei zong nih nannih he biakamnak ka tuah lai. 30Ka Pennak ah ka cabuai ah nan ding nan ei lai i Israel mi phun hleihnih kha biaceihpiak awkah bawi ṭhutdan cungah nan ṭhu lai,” tiah a ti. #Mat 19.28
Peter Nih A Hlawt Lainak Kong A Chim
(Mat 26.31-35; Mar 14.27-31; Jhn 13.36-38)
31Jesuh nih, “Simon, Simon, ngai-hmanh. Lothlotupa nih facang cu a fang le a hi a thleidan bantukin Satan nih nannih cu nan dihlak in hneksaknak nawl kha a hmuh cang. 32Sihmanhsehlaw Simon, na zumhnak a pur nakhnga lo nangmah caah thla ka cam. Cun keimah lei ah na hon i mer ṭhan tikah na unaule kha thazang na pek ve hna lai,” tiah a ti. 33Peter nih a leh i, “Bawipa, nangmah he thongtlak le thih kha ka ngamh ko,” tiah a ti. 34Jesuh nih a leh ve i, “Peter, tuzan ah, amah cu ka hngal lo, tiah voi thum tiang na ka ti hlan tiang ar a khuang lai lo,” tiah a ti.
Tangka Bawm, Zal le Vainam
35Cun Jesuh nih annih cu a thawh hna i, “Phaisa bawm siseh, zal siseh, kedan siseh i ken loin ka rak in thlah hna ah khan zeital nan bau maw?” tiah a ti. “Zeihmanh kan bau lo,” tiah annih nih an leh. #Mat 10.9-10; Mar 6.8-9; Luk 9.3; 10.4 36Cun Jesuh nih, “Sihmanhsehlaw atu cu, phaisa bawm siseh, zal siseh a ngeimi paoh nih i phorh u; cun vainam a ngei lomi paoh nih a angkileng kha zuar seh law pakhat in i cawk seh. 37Zeicahtiah Cathiang nih, ‘Amah cu misual mi hna sinah rel chih a si cang,’ tiah a timi kha ka kong ah hin a tlin awk a si. Ka kong an rak ṭialmi vialte kha a tling cuahmah cang,” tiah a ti. #Isa 53.12 38Cun annih nih, “Bawipa, zohhmanh, hika ah hin vainam pahnih an um ko,” tiah an ti i, “Cucu a za,” tiah a leh hna.
Jesuh Thla A Cam
(Mat 26.36-46; Mar 14.32-42)
39Cun Jesuh cu a chuak i a tuah tawn bantuk khan Oliv Tlang ah a kal i a zultu kha a sinah an kal ve. 40A hmun kha a phak tikah annih cu a thawh hna i, “Tukforhnak chungah nan tlak sual nakhnga lo thlacam tuah u,” a ti hna. 41Cun an sin khan lungchep tluk a va kal i a khuk aa bil i thla a cam. 42“Ka Pa, na hna a tlak ahcun hi hrai hi ka ṭhialpiak ko. Sihmanhsehlaw keimah nawl si loin nangmah nawl si ko seh,” tiah a ti. (43Vancung in vancungmi pakhat a sinah a rung lang i a rung hnemh. 44Lungthin fak ngaingai in fak chinchin in thla a cam i a thlan cu vawlei ah thi dor bantukin a tla.)
45A thlacamnak cun a tho i a zultu hna sinah khan a va kir i an rak i hngilh kha a hmuh hna, an lungre a theih tuk ah an ba dih. 46Annih cu, “Zeicahdah nan i hngilh? Tukforhnak ah nan tlak nakhnga lo tho u law thlacam u,” a ti hna.
Jesuh Cu An Tlaih
(Mat 26.47-56; Mar 14.43-50; Jhn 18.3-11)
47Bia a chim lengmang lioah cun mibu kha an ra phan i zultu pahleihnih lak i aa tel vemi Judas nih khan a hun hruai hna. Jesuh cu hnamh awkah a hun fuh. 48Sihmanhsehlaw Jesuh nih a rak thawh i, “Judas, Mi Fapa hi hnamh in maw na rawi ko lai?” tiah a ti. 49Jesuh cu a sin i a ummi a zultu hna nih khan thil umtuning kha an hmuh tikah an thawh i, “Bawipa, kan vainam kan hmang hna lai maw?” an ti. 50Cun an lak i pakhatpa nih khan Tlangbawi Ngan sal kha a orhlei hna pet lak in a tuk. 51Sihmanhsehlaw, “Hihi cu a za cang,” tiah Jesuh nih a ti. Mipa a hna kha a tawngh i a damter.
52Cun amah tlaih awkah a rami tlangbawi upa pawl hna le Biakinn cawngtu hna i an bawi pawl hna le upa hna kha a thawh hna i, “Damiah hei si ning law cu bang, zeicahdah vainam le thingtan he nan ka rathnawh? 53Nifate in pei nan sinah Biakinn ah ka um ko cu, tlaih nan ka zalh ṭung lo. Sihmanhsehlaw atu hi cu nanmah le muihnak ṭhawnnak nan caan a si,” tiah a ti hna. #Luk 19.47; 21.37
Peter Nih Jesuh A Hlawt
(Mat 26.57-58,69-75; Mar 14.53-54,66-72; Jhn 18.12-18,25-27)
54Jesuh cu an tlaih i Tlangbawi Ngan inn ah khan an kalpi; cun Peter nih lamhlatpi khin a zulh. 55Tual laifang ah khan mei an kau i mei cu an to i a tomi hna sinah cun Peter cu a ṭhu ve. 56Cun mei a toh lio cu sinumnu ngakchia pakhat nih a hmuh i dengteo in a zoh i, “Hi pa zong hi amah sinah aa telmi a si ve,” tiah a ti. 57Sihmanhsehlaw Peter nih aa pheh i, “Minu, a hngalh hmanh ka hngalh ṭung lo,” a ti. 58Cu hnu tlawmpal ah cun pa pakhat nih a hmuh i, “Nangmah zong hi anmah lak i aa telmi na si ve ko,” tiah a ti. Sihmanhsehlaw Peter nih cun aa pheh ṭhan i, “Mipa, ka si lo,” tiah a leh. 59Cu hnu suimilam pakhat tluk ah khin midang pakhat nih ṭhawng chinchin in, “Hi pa hi amah sin i aa telmi a si hrimhrim ko, zeicahtiah Galilee mi pei a si ko hi!” tiah a ti. 60Sihmanhsehlaw Peter nih cun, “Mipa, na chimmi hi zei a si ti awk hmanh ka hngal lo,” tiah a leh. Bia a chim lioah cun, chikkhatte ah khin ar a hung khuang. 61Bawipa cu a hun i mer i Peter kha a hei zoh i Peter nih cun Bawipa nih, “Tuzan ah ar a khuan hlanah, amah cu ka hngal lo, tiah voi thum tiang naa pheh lai,” a timi kha a lung ah a hung pem. 62Peter cu a chuak i lunghno ngaiin a ṭap.
Jesuh Cu An Nihsawh I An Tuk
(Mat 26.67-68; Mar 14.65)
63Jesuh cu a cawngtu hna nih khan nihchuak ah an saih. An tuk, 64a mit an huh i, “Ahodah an tu? Kan chim tuah,” tiah an ti chih. 65Cuticun nihsawhnak bia kha a cungah tampi an chim.
Biaceihtu Khawngsil Hmaiah An Chuahpi
(Mat 26.59-66; Mar 14.55-64; Jhn 18.19-24)
66Khua a dei tikah Judah mi upa hna le tlangbawi upa pawl hna le Phungbia cawnpiaktu saya hna kha an i pum i an hmaiah cun Jesuh cu an chuahpi. 67Annih nih an thawh i, “Messiah na si maw si lo kan chim tuah,” an ti. Anih nih, “Kan chimh hna zongah nan ka zum lai lo, 68cun bia kan hal hna zongah nan ka let duh fawn lai lo. 69Sihmanhsehlaw atu hin cun Mi Fapa hi Lianngan Bik Pathian orhlei kamah ṭhutter ka si cang lai,” tiah a ti. 70Cun annih nih an dihlak in, “Pathian Fapa maw na si kun?” an ti. Anih nih a leh hna i, “Nan ka ti bangin ka si,” tiah a ti. 71Cun annih nih, “Tehte dang zeidah kan herh ti? Amah kaa hrimhrim in pei kan theih ko cang cu,” an ti.
المحددات الحالية:
LUKA 22: HCL06
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Lai (Hakha) Common Language Bible © Bible Society of Myanmar 2006