Kutachika 9
9
Chitiyaŋenu chaNzambi naNowa
1Nzambi wakiswilili niNowa nianyanindi nkisu, hakuyila nindi, Semununenu, mwakavuli, mwakawanishi hamaseki.
2Akayakama nakuyitiya woma kudi anyama ejima ahamaseki, nikudi atuda ejima amuluzwizu; niyuma yejima yazalalaŋa hamaseki, nianshi ejima amukaluŋalwiji, anayinkuwu enu.
3Yuma yejima yendaŋa yikweti wumi yakela yakudya yenu; neyi chinayinkeli yisakola yituuta, nayinki yejima.
4Ilaŋa mbiji nawumi wayu, wowu #Lev 17:10-16; Kuhit 12:16, 23; Yil 15:20, 29mashi ayu, bayi muyidyaku.
5Chalala, mashi enu, wowumi wenu, wowu nakayihulawu; nakehulawu kudi anyama ejima, nikudi muntu, mwalala kudi antu ejima nakehulaku wumi wawanakwawu.
6Yowu wukumwaŋa mashi amuntu,
Niyena akamumwaŋa mashi indi kudi muntu;
Muloŋa Nzambi wamwilili muntu
Ekali chochekalayi yena.
7Ninenu semununenu, mwakavuli;
Semenu nankashi hamaseki, mwakavuliluhu.
8Nzambi walejeli Nowa nanyanindi hamu,
9nindi, Ami aweni, chalala ami hohu, hinukukolesha chitiyaŋenu chami nanenu, nawanyanenu akulondelamu;
10nayuma yayumi yejima yidi kudenu, hela atuda, hela ayimuna, hela anyama ejima ahamaseki hamu nanenu; ejima akwidika muwatu, chalala wowu anyama ejima ahamaseki.
11Nukukolesha chitiyaŋenu chami nanenu, niakwanyijimba ejima hiyamba kayijilumuna cheŋi namenji adibajuku; hikwamba kenza nawa cheŋi dibaji dakujilumuna iseki dejimaku.
12Nzambi nindi, Chinjikijilu chakutiyaŋana kunukutiyaŋana nanenu, nayuma yayumi yejima mudi nayu enu, chakutiyaŋana nayisaka yejima yahayanyaka, dichenichi,
13nashi kansuluŋunda kami hevu, kakela chinjikijilu chakutiyaŋana ami neseki.
14Chikwila chinukuleta ivu hewulu damaseki, #Ezek 1:28; Chim 4:3kansuluŋunda kakumwekana hevu,
15hinukwanuka chitiyaŋenu chami chinatiyaŋani nanenu, nayuma yayumi yejima yikweti nyijimba, nimenji hiyakela cheŋi dibaji dakujilumuna akwanyijimba ejimaku.
16Kansuluŋunda kakwikala hevu, nukukatala, kulonda nanukiluhu kutiyaŋana kwahayanyaka kwatiyaŋeni Nzambi nayuma yayumi yejima yikweti nyijimba yekala hamaseki.
17Nzambi wamwilili Nowa, nindi, Chenichi dichi chinjikijilu chakutiyaŋana kunakoleshi nawantu ejima ekala hamaseki.
Anyana kaNowa
18Anyana kaNowa edikili muwatu adiŋi Shemi, Hami, niYafweta; Hami diyi tata yaKenani.
19Wenawa asatu diwu anyana kaNowa; wowenawa diwu awanishili hamaseki hejima.
20Nowa hakutachika kudima, hakudima itempa danyivinyu.
21Wanwini vinyu, hakusheta; mwitenti mwadiŋiyi mahinindi hiyakubeluka.
22Hami, tata yaKenani, wamweni tata yindi wudi nzekesi, hakuleja anakwindi mwayedi wawu hanzi.
23AShemi naYafweta anoneni ihina dakuvwala, adishili hamafwiji awu mwayedi wawu, ayili mamfuntanyima, amubutili tata yawu wadiŋi nzekesi; mesu awu atalili kukwinzawu, hiyamweni tata yawu chadiŋiyi nzekesuku.
24Nowa watoneni mutulu twakaminiyi navinyu yindi, welukili mwanamukoŋiyi kabinda kindi.
25Hakwila nindi,
Kenani ashiŋewi, kudi anakwindi
Ekali kwindi nduŋu yawanduŋu.
26Nindi,
Kisu kisu Yehova,
Nzambi yaShemi;
Kenani ekali kwindi nduŋu yindi.
27Nzambi amutoheshi Yafweta,
Ashakami kwindi mumatenti aShemi;
Kenani ekali kwindi nduŋu yindi.
28Chidahitili dibaji, Nowa washakamini nyaka nkulakaji jisatu nanyaka makumi atanu (350).
29Nyaka yaNowa yejima kuyibomba hamu yashikili munyaka nkulakaji jitanu najiwana nanyaka makumi atanu (950); yofwa nikufwa.
المحددات الحالية:
Kutachika 9: MWW04
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
The Holy Bible in Lunda Ndembu © United Bible Societies, 2003.