Keriekitho 13
13
Abram mu Lot Unie Kekhoketa
1Abram-e puo kimia mu puo vie pete se di Ijipt nunu tuo Negeb nu vota, mu Lot puo ze vota.
2Abram-e kicükiri siro suna mu raka nyi se. 3Puoe sünunu tuo Bethel tsa vota. Sidi puo thiedzü puo pfheki bakecü Bethel mu Ai-nie donu thechüu nu volie, 4puo thiedzü ruosuoba puo chüpie keba thechüu nu; sidi puo sünunu Jihova za kie. 5Abram ze ketuo Lot rei tekuo, temvü tsiu peri kroko mu pfhekiko nyi. 6Mu unie vieko krathorketa la, unie kenienie la kijüu mereta di kepeza lhou balie reta. 7Süla Abram thupfheko mu Lot thupfheko kegeita. Süki Kananmia mu Perizmia kijü sünu lhou tuo zo.
8Süla Abram-e Lot ki, “Avu sü siezedzürie ze, siro avu mu avu themiako bu kegei tuo hiecie. 9Kijü pete n mhodzüki zhü mo üme? N thuo a kinu krei pratacie. No thevitsa vata ro a thezatsa vatatuo, no thezatsa ro a thevitsa votatuo.”
10Sitse Lot-e kijüu mehoshü ru Jordan razhau pete, Jihova zieu, mu Ijipt kijü süu Zoar kevatsa mhiei dzü vi sekecü ngulie. Hau Jihova Sodom mu Gomora pekakewa mhodzü. 11Süla Lot-e puo thuo Jordan razhau pete kedalie di niathutsa vata. Sümhie di unie kekhota. 12Abram-e Kanan kijü nu bata mu Lot vo Sodom kepenuoki Razhau nadiko donu lhouta. 13Ru Sodom nu themiako lhou rüzhü mu Jihova gei phouma pezha seta.
14Lot tuoketa sie Jihovae Abram ki, “No n tha nunu tosie pesotsa, pekhrotsa, niathutsa mu niakratsa mehoshücie; 15ae n bu n mhipie kengu kijü pete pie no mu n nuosenuoyieko tsütuo, tsiu süu kechachie n vie chütuo. 16A n nuosenuoyie#13:16 Ibri nu Tsia. chü pekrapie nyophe mhieshütuo, sidi mia puoe nyopheko phrü hulie vi liro, n nuosenuoyieko rei phrülietatuo. 17Sielie di tuo kijüu puochapuochie meho vocie, ae süu pie n tsüketuo la.” 18Süla Abram-e puo pfheki rhuose Hebron nu phriebo keba Mamre nu vota, di sünu rei puoe ruosuoba puo chüpie Jihova tsü.
المحددات الحالية:
Keriekitho 13: ANBRBSI
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
The Bible Society of India
© 2023, Used by permission. All rights reserved. More