Keriekitho 17
17
Zhükere Dietseidiekho-u
1Abram cie hiethepfüethepfüketa ki Jihovae puo pengu di puo ki, “Ae Kepenuopfü Kuokejokejüu#17:1 Ibri El Shaddai. zowe, a mhodzüki tuolie, mu no vi tseilie. 2Sitse a avu donu dietseidiekho puo chüshütuo mu n chü pekruo phishütuo.” 3Sitse Abram tsu zerepfü zhüta mu Ukepenuopfü puo rüchü di sie, 4“Harie, a la we a dietseidiekho-u n ze tuo zo, mu no seyie krodi puou chütuo. 5N za bu Abram#17:5 Puoca zayie pfutsau. ü salie lhote, derei n za bu Abraham itatuo, kekreilamonyü a n chüpie seyieko krodi puotsau chüshüketa la. 6A n chü pekruo phishütuo; mu a n geinu seyieko pelhoushütuo, mu kedimiako n geinu siertuo. 7A telhekechachie la avu mu n sie vorketuo n nuosenuoyieko la dietseidiekho puo chüshütuo, n nuosenuoyie#17:7 Ibri Tsia. mu n Kepenuopfü chülieketuo la. 8Siro ae kechachie la no, tsie solhimia chü lhouketuo Kanan kijü pete pie no mu n nuosenuoyieko tsütuo, mu a uko Kepenuopfü chütuo,” si.
9Siro Ukepenuopfüe Abraham ki, “No we a n ze dietseidiekhokelieu se balie, no rei mu n nuosenuoyie n sie vorkezhü thephou pete rei. 10Hauha nie bu ze tuo üdi, a mu no, siro n sie vorkezhü n nuosenuoyie donu dietseidiekho chükelieu: Nieko donu thepfumia pete bu rei u zhüretuo. 11Nieko nie chü nu nie zhü tieu retuo, mu süu bu a mu nie donu dietseidiekhokewa zasi puo chütuo. 12Nieko donu thepfumia zha thethaketa pete zhü retuo; thephou pete nu nie diemia nie kinu penuokelieko tsiu nie shükeiraka se khrükelieko rei. 13Kediemia nie kinu penuokeliemia mu nie raka se khrükeliemia zhüre beituo. Hai di a dietseidiekho-u kechachie nie chü nu tuotatuo. 14Siro thepfumia kehoupuorei puo chü nu puo zhürekemomia puo themiako do nunu kelhiwatuo, puoe a dietseidiekho-u varhuoketa la.”
15Sitse Ukepenuopfüe Abraham ki, “N kimia Sarai, n bu puo üse Sarai üdi kie sa lhote, derei puo za bu Sara ütatuo. 16A ja puo tsütuo, sizomonyü a puo geinu thepfunuomia puo kha n tsütuo. A ja puo tsütuo, mu puo seyieko zuopfü puo chütuo, seyieko kedimia puo geinu siertuo.” 17Sitse Abraham tsu zerepfülie di puo dzükerüchüta, sidi puo thuo puo rüchü di, “Themia puo cie krie puoketa zenu nuo nyilie vi me? Sara cie hiethepfüta di puo nuo nyilie vi me?” 18Sidi Abraham-e Kepenuopfü ki, “He-i Ishmael bu n mhodzünu lhou tuota zocü mu!” 19Sitse Ukepenuopfüe sie, “Silie lho, n kimia Sara geinu thepfumia puo penuoshü n tsü zotuo, mu no puo za pie Isak#17:19 Puoca puoe nyü. chüliecie. A puo ze dietseidiekho chükelieu bu puo sie vorketuo puo nuosenuoyieko la rei sa kechachie dietseidiekhokewa puo chütuo. 20Tsiu Ishmael la we, a n pfhe sishüte; mu harie, a ja puo tsütuo mu a puo chü pekruo mu pekra phishütuo; puo kedimia kerekenie krü chütuo mu puo chüpie seyie kezha puo chüshütuo. 21Derei a dietseidiekho-u zowe Isak ze chütuo, süu Sarae thecie, tsie meseki penuoshü n tsütuo.” 22Sidi Ukepenuopfüe Abraham rüchükewa sie tuota.
23Sitse Abraham-e puo nuo Ishmael mu puo ki nu penuokelie puo dieko raka pie khrükelieko, Abraham kinu keba thepfumia pete zelie, di Ukepenuopfü puo ki pukeshü mhiei sünhie teiluo uko chü gei u zhütieu re phrewa. 24Abraham-e puo chü geinu puo zhütieu rekecü ki cie hiethepfüethepfüta. 25Mu puo nuo Ishmael puo chü geinu puo zhütieu rekecü ki cie kereseta. 26Sünhie teiso Abraham mu Ishmael unie rei unie zhüre phrelie, 27mu puo kinu keba thepfumia keba pete, ki nu penuokelie kedieko rei mu chazoumia kinu raka pie khrükelieko rei puo ze di u zhüre phrelie.
المحددات الحالية:
Keriekitho 17: ANBRBSI
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
The Bible Society of India
© 2023, Used by permission. All rights reserved. More