যোহননা 4

শমরিয়ানি মিচিক

1যীশু যোহননা বাত্তে বাং·আরাংখো জা·রিকগিবা দাক্কিংজক আরো রিপ্পলেতিংজক উখো ফরীশীরাং খিন্নামিং। 2ইন্দিবা যীশু আন·থাংদে রিপ্পলেতজাংআমিং, বিনি জা·রিকগিবারাংসা রিপ্পলেতিংআমিং। 3যীশু উখো হা·আইনা মা·ন্নে যিহূদিয়া হা·দকখো ওয়াত্তে দা·আবা গালীলচানা রি·য়াংজক। 4গালীলচানা রি·য়াংমিত্তিংও বিখো শমরিয়া হা·দক গিত্তা রি·য়াংনা নাংজক। 5বিয়া শুখর মিংগিবা শমরিয়ানি সং দামসাওনা রি·বাজক। যাকোব বিনি দেফান্থি যোষেফনা জে হা·বাখো হ·ন্নামিং ইয়া সং উনি সেফাংওনমিং। 6উয়া হা·দামও যাকোবনি চিহা·খল দংআমিং। রামা রি·এ নেং·বকানি গিম্মিন যীশু উয়া চিহা·খলনি কেচ্চিও আসংজক।

উনো সালজাৎচিমাং হং·আমিং। 7-8যীশুনি জা·রিকগিবারাং চা·আনিখো ব্রিনা সংচানা রি·য়াংজক; উয়া সময়ও শমরিয়ানি মিচিক সাকসা চি খো·না রি·বাজক। যীশু বিনা আগানজক, “আংনা অকখিসা চি রিংনা হন·বো।”

9শমরিয়ানি উয়া মিচিক বিনা আগানজক, “আংআদে শমরিয়ানি মিচিক হং·আ। না·আ যিহূদী মান্দি হং·এবা বাদিকে দাক্কে আংচানিখো চি রিংনা হা·ম্মিংআ?” উয়া মিচিক ইন্দাকে আগানজক মুয়ানা যিহূদীরাং আরো শমরিয়ারাং আপসান চা·রিম রিংরিমজামিং।

10যীশু উয়া মিচিকনা আগানচাকজক, “না·আ ইসলনি হ·ন্নাখো আরো সা নাং·চানিখো চি রিংনা হা·ম্মিংআ ইখো হা·আইওদে ইন্দিদে না·আন বিচানিখো চি রিংনা হাম·নুয়ামিং আরো বিয়া নাং·না চিজাংগিখো হ·ন্নুয়ামিং।”

11উয়া মিচিক আগানজক, “ইন্দিবা নাং·চা চি খো·চাকানি মামুংবা দংজা আরো চিহা·খলবা নাম্মেন থিং·নাপ্পা। ইন্দিদে উয়া চিজাংগিখো বানিখো মান·জক? 12না·আ চিংনি ফাগিৎচাম যাকোবনা দাল·বাৎজা। ইয়া চিহা·খলখো বিয়ান চিংনা হ·ন্না। বিয়া আন·থাং আরো বিনি দেফান্থিরাং ইয়া চিহা·খলনি চিখোন রিংনুয়ামিং আরো বিনি জিল্লানিরাংবা রিংনুয়ামিং।”

13উনোন যীশু আগানজক, “সাবা ইয়া চিখো রিংওদে দা·আবা রিংনা হা·সিকফিলনুয়া। 14ইন্দিবা আংআ জে চিখো হ·ন্নুয়া উখো রিংগিবানিদে মামুং সালোবা রিংনা হা·সিকফিলজানুয়া। উয়া চি বিনি খা·থংও চিমিক হং·এ ফাংনাজলনি জাংগিখো হ·ন্নুয়া।”

15উনি গিম্মিন উয়া মিচিক যীশুনা আগানজক, “ইন্দিদে আংনা উয়া চিখো হন·বো জেখো রিং·ওদে আংআ রিংনা হা·সিকফিলজানুয়া আরো ইয়োনা রি·বাএ চি খো·না নাংজানুয়া।”

16যীশু বিনা আগানজক, “ইন্দিদে রি·য়াংবো, নাং·নি সেখো ইয়োনা রিক্কামে রা·বাবো।”

17মিচিক আগানজক, “আংনিদে সে দংজা।”

যীশু বিনা আগানজক, “না·আ খাকখেৎখোন আগানা নাং·নি সে দংজা, 18মুয়ানা নাং·নি সে সাকবংআ হং·জক, আরো দা·আও নাং·মুং দংগিবা নাং·নি সে হং·জা। না·আ বিবিখোন আগানা।”

19উনোন উয়া মিচিক যীশুনা আগানজক, “দা·আও আংআ হা·আইনা মান·জক না·আ সাকসা আগানসোগিবা হং·আ। 20ফাগিৎচামরাং ইয়া হা·ব্র্রিও অলাখিনুয়ামিং, ইন্দিবা না·সং আগানে দংআ যিরূশালেমোন মান্দিরাংনি অলাখিনা নাংআ।”

21যীশু বিনা আগানজক, “খিন্নাবো, আংনি আগানাখো বিবিরা·বো, ইন্দাকগিবা সাল রি·বাংজক জেনসালো না·সং আপফা ইসলখো ইয়া হা·ব্র্রিওবা অলাখিজানুয়া, যিরূশালেমোবা অলাখিজানুয়া। 22না·সং জেখো হা·আইজা উখো অলাখিয়া, ইন্দিবা চিংআ জেখো হা·আইয়া উখোসা অলাখিয়া, মুয়ানা পাপওনি জক্কানি রামা যিহূদীরাং গিত্তান রি·বাআ। 23ইন্দিবা ইন্দাকগিবা সাল রি·বাংজক, আরো দা·আওন উয়া সাল হং·আ জেনসালো অলাখিচং·মতগিবারাং গিসিকো আরো বিবিও ফাগিবা ইসলখো অলাখিনুয়া। ফাগিবাবা ইন্দাকগিবা অলাখিগিবারাংখোন সান্দিয়া। 24ইসল গিসিক হং·আ; জেরাং বিখো অলাখিয়া, গিসিকো আরো বিবিও বিসং অলাখিনা নাংনুয়া।”

25উনোন উয়া মিচিক আগানজক, “আংআ হা·আইয়া মশীহ, জেখো খ্রীষ্ট মিংআ, বিয়া রি·বাংজক। জেনসালো বিয়া রি·বানুয়া উনসালো চিংনা গিম্মিকখোন আগানে হ·ন্নুয়া।”

26যীশু বিনা আগানজক, “আংআন উয়া, নাং·মুং খাৎথা আগানগিবা।”

27উনো যীশুনি জা·রিকগিবারাং রি·বাএ মিচিক সাকসামুং যীশুনি খাৎথা আগানগ্রিকাখো নিক্কে আইয়াও ইনমানজক। ইন্দিবা বিসং সাকসাবা আগানজাজক, “না·আ মুয়াখো হা·ম্মিংআ?” বা “মুয়ানা না·আ বিমুং খাৎথা আগানগ্রিকিংআ?”

28উয়া মিচিক উনো বিনি গুম্বিখো গাল্লে দন্নাংএ সংচানা রি·য়াংজক আরো মান্দিরাংনা আগানজক, 29“না·সং সাকসা মান্দিখো রি·বাএ নিবো। জাংগিথাংও আংনি দাকগিবা দিমদাকখোন বিয়া আংনা আগানে হন·জক। ইন্দিদে বিয়ান উয়া খ্রীষ্ট হং·আমা?” 30উনি গিম্মিন মান্দিরাং সংওনি হং·খাতে যীশুচানা রি·বানা হা·বাচেংজক।

31ইন্দাকমিত্তিংও বিনি জা·রিকগিবারাং বিখো মল·মলে আগানজক, “স্খিগিবা, চা·বো।”

32যীশু বিসংনা আগানজক, “আংচা ইন্দাকগিবা চা·আনি দংআ জেখো না·সং হা·আইজা।”

33উনি গিম্মিন জা·রিকগিবারাং আগানগ্রিকনা হা·বাচেংজক, “ইন্দিদে সাবা বিনা চা·আনি মামুংখো রা·বাএ হ·ন্নামা?”

34উনোন যীশু বিসংনা আগানজক, “আংখো ওয়াত্তেতগিবানি হা·সিকাখো মানিয়া আরো বিনি কামখো চু·সকেতান আংনি চা·আনি হং·আ। 35‘জাব্রি দংখুংআ, উনি জা·মানোন মি রাত্তানি সময় হং·নুয়া’ ইন্নে না·সং আগানজামা? ইন্দিবা আংআ না·সংনা আগানিংআ, মিক্রোন দি·চাএ রাং·সা হা·বাচানা নিএতবো, মি রাতনা গিত্তা হং·জক। 36মি রাতগিবা বিনি মজুরিখো দা·আওন মা·ন্নিংআ আরো ফাংনাজলনি জাংগিনা মিখো চিম্মংএ দন্নিংআ। উনি গিম্মিন বিৎচ্রি গোগিবা আরো মি রাতগিবা সাকগ্মিআন আপসান খুসি হং·রিমা। 37উনি গিম্মিন ইয়ান বিবি হং·আ, ‘সাকসা গোআ আরো সাকসা রাত্তা।’ 38আংআ না·সংখো ইন্দাকগিবা মিখো রাতনা ওয়াত্তেতজক জেনি গিম্মিন না·সং গামজা। গিপ্পিনরাং গামজক আরো না·সং উয়া গাম্মানি মিখো রাতজক।”

39বিনি দাকগিবা গিম্মিকখোন বিয়া আগানে হন·জক, উয়া মিচিকনি ইন্দাকে সাক্ষি হ·ন্নাখো খিন্নাএ উয়া সংনি বাং·বিয়া শমরিয়ারাং যীশুখো বিবিরা·জক। 40বিসং যীশুচা রি·য়াংএ বিখো বিসংমুং দংখানা মল·মলজক। উনি গিম্মিন যীশু উয়ো সালগ্মি দংজক। 41উনোন বিনি খাৎথাখো খিন্নাএ বাং·আ মান্দিরাংআন বিবিরা·জক। 42উয়া মিচিকনা বিসং আগানজক, “দা·আও চিংআ নাং·নি আগানানি গিম্মিন বিবিরা·জা, ইন্দিবা চিংআ আন·থাংথাংআন বিনি আগানাখো খিন্নাএ ইখো হা·আইনা মান·জক, বিয়া বিবিন মান্দিরাংখো জক্কেৎগিবা হং·আ।”

রাজানি সুবিদারনি দেফান্থি নামজক

43-44যীশু আগানামিং, সংথাংও আগানসোগিবা মান্দিরা·আখো মান·জা; উয়া খাৎথা চু·সকখানা ইন্নে শমরিয়াও সালগ্মি দংআনি জা·মানো বিয়া গালীল হা·দকচানা রি·য়াংজক। 45পর্বনি সালো যীশু জেখো জেখো দাক্কামিং, গালীলনি মান্দিরাং উয়া পর্বনি সালো রি·য়াংআমিং ইন্নে বিসং গিম্মিকখোন নিকনা মা·ন্নামিং। ইনি গিম্মিন যীশুনি গালীলচানা রি·য়াংওন উনি মান্দিরাং বিখো রা·চাকজক।

46জা·মানো যীশু দা·আবা গালীলনি উয়া কান্না সংওনা রি·য়াংজক। ইয়োন বিয়া চিখো আংগুরনি বিৎচি থারিয়ামিং। গালীলনি কফরনাহূম সংজিলমাও রাজানি সুবিদার সাকসানি দেফান্থি সাবিল্লাকে দংআমিং। 47যীশুখো যিহূদিয়াওনি গালীলওনা রি·বাখো খিন্নাএ উয়া সুবিদার বিচা রি·য়াংজক আরো কফরনাহূমচা রি·য়াংএ বিনি দেফান্থিখো নাম্মেতখানা ইন্নে বিখো মল·মলজক। বিনি দেফান্থি উনো সিনা গিত্তিক দাকজকমিং।

48যীশু উয়া সুবিদারনা আগানজক, “মামুং চিনখো বা মামুং আইয়াও ইনমানানি কামরাংখো নিকজাওদে না·সং মামুং দাক্কেবা বিবিরা·জানুয়া।”

49উনোন উয়া সুবিদার আগানজক, “খা·সাফাএ আংনি দেফান্থি সিনা স্খাংআন রি·বাবো।”

50যীশু বিনা আগানজক, “না·আ রি·য়াংবো, নাং·নি দেফান্থি থাংচাজক।” ইনি গিম্মিন বিয়া যীশুনি আগানাখো বিবিরা·এ রি·য়াংআরিজক।

51উয়া সুবিদার নকচানা রি·য়াংমিত্তিংও রামাওন বিনি নকখলরাং বিচা রি·য়াংএ আগানজক, “নাং·নি দেফান্থি নাম্মাংজক।”

52বিয়া উয়া নকখলরাংচা সিং·জক, “বিয়া বাসোকো নামজক?”

বিসং আগানজক, “মিজাও সাল একটা বাজিও বিনি জম্মা সা·আলজক।”

53উনি গিম্মিন দেফান্থিনি ফাগিবা হা·আইনা মান·জক, উয়া সময়ওন যীশু বিনা আগানামিং, “নাং·নি দেফান্থি থাংচাজক।” উনোন উয়া সুবিদার আরো বিনি নকগিম্মিকবা যীশুখো বিবিরা·জক।

54যিহূদিয়াওনি গালীলওনা রি·বানি জা·মানো যীশু ইয়া গ্মিগিবা আইয়াও ইনমানানি কামখো দাকজক।

المحددات الحالية:

যোহননা 4: GLNT

تمييز النص

نسخ