الإنجيل زي ما كتبه مَتَّى 19
19
الطّلاق
1و بعد ما خلص يسوع من كلامه، راح إلى منطقة الجليل و حوالي منطقة اليهودية و ورا نهر الأردن. 2وتبعته جماعات واجد، و شفى مرضاهم هناك.
3و جوا له ناس من جماعة الفريسيين عشان يختبروه، وسألوه: «الحين يحق للرجال إنه يطلّق مرته لأي سبب كان؟» 4و رد عليهم و قال: چى ما قريتوا الاية إلا تقول : «هو خلقهم من بداية الخلق دكر وأنثى»، 5و قال بعد: «عشان چدي يترك الرجال أبوه و أمه ويتحد ويا زوجته، و يصيروا إثنينهم جسد واحد. 6و من يرتبطوا ببعض ما يُعتَبروا جسدين أثنين، لكن جسد واحد. و إلا يجمعهم الله ما يقدر يفرقهم إنسان!» 7وسألوه: «عجل إلاويه وصّى موسى أن المره تنعطى ورقة طلاق و تروح في حال سبيلها؟» 8و جاوبهم : «بسبب قساوة قلوبكم، سمح ليكم موسى بتطليّق نسوانكم. و لكن ما كان الحال چدي من البداية». 9و هداني أقول ليكم: «إلا يطلّق مرته لسبب غير الزنا، ويتزوج وحدة غيرها، فهو يُعتبر زاني. و ألا يتزوج وحدة مطلقة، فهو يتعبر بعد زاني». 10و قالوا له تلاميده: «إدا كان الموضوع چدي، يعني الواحد يبقى من دون زواج أحسن له!» 11و قال ليهم: «ترا مو الكل يقبل هالكلام، بس إلا الله أنعم عليهم بهالشي. 12لأن في خصيان ينولدوا من بطون أمهاتهم خصيان؛ وفي خصيان خصوهم الناس؛ وغيرهم سمحوا لنفسهم يكونوا خصيان عشان ملكوت السماوات. و إلا قادر أنه يتقبّل هالشي، يتقبله!»
يسوع والأطفال
13بعدين جابوا له أطفال عشان يحط يده عليهم ويصلي ليهم، و قاموا هزأوهم التلاميد. 14و لكن يسوع قال: «خلّوا الجهال الصغار يجوا ليي ولا تمنعوهم، لأن ملكوت السماوات بصير للناس إلا زيهم!» 15و حطّ إيده عليهم عشان يباركهم، و بعدين راح.
الشّاب الغنيّ
16و إلا شوي جا له شاب يسأله: «يا المعلم الصالح، ويشهو العمل الصالح إلا المفروض أسويه عشان أحصل على الحياة الأبدية؟» 17و رد عليه يسوع و قال: «إلاويه تسألني عن العمل الصالح؟ واحد هو الصالح. و لكن، إدا بغيت تحصل على الحياة، أعمل بالوصايا». 18و سأله: «أي وصايا؟» و جاوبه يسوع: «لا تقتل ولا تزني ولا تبوق ولا تشهد بالزور؛ 19أكرم أبوك وأمك؛ و حبّ جارك زي ما تحب لنفسك». 20و قال له الشّاب: «هدي كلها سوّيتها من يوم أنا صغير، وش هو إلا ناقصني بعد؟» 21و جاوبه يسوع: «إدا بغيت تصير كامل، روح وبيع كل ما تملكه، و وزعه على الفقارا، و بيكون ليك كنز في السماوات.، وبعدين تعال و أتبعني!» 22و لما سمع الشّاب هالكلام، مشى و هو حزين لأنه كان غني مره.
23و قال يسوع لتلاميده: «بأمانة أقول ليكم: «ترا صعبه على الغنيّ إنه يدخل ملكوت السماوات. 24و بعد أقول ليكم: سهل إن يدخل الجمل في خرم إبرة، من إن الغنيّ يدخل ملكوت الله». 25و إستغربوا التلاميد من الكلام إلا سمعوه، و قاموا سألوه: «عجل منهو إلا يقدر ينجو؟» 26و طالع فيهم يسوع و قال ليهم: «هدا الشي مستحيل عند الناس. و لكن عند الله، كل شي ممكن!»
27ووقتها قال بطرس: «هدا أحنا تركنا كل شي و تبعناك، وش بيكون نصيبنا؟» 28و رد عليهم يسوع و قال : «بأمانة أقول ليكم: إن لما يقعد إبن الإنسان على عرش مجده في المجيء الثاني لما كل شي يصير جديد، بتقّعدوا أنتون إلا تبعتوني على إطنعشر عرش عشان تحكموا على أسباط إسرائيل الإطنعشر. 29أي واحد فيكم ترك بيوت أو أخوة أو خوات أو أبو أو أم أو أولاد أو أراضي و مزارع بسبب أسمي، فهو بيحصل على مية ضعف وبيورث الحياة الأبدية. 30و في واجد ناس في المقدمة بيصيروا في الأخير، وفي ناس في الأخير بيصيروا في المقدمة!»
المحددات الحالية:
الإنجيل زي ما كتبه مَتَّى 19: QNAV
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Qatifi New Arabic Version © 2024 Strategic Resource Group