YOHANES 21
21
Yesus Kiperneng Ilei nu Tujoh Urag Ipengikot
1Telas ajeh Yesus Kiperneng Ilei nukali nij nu Ipengikot-pengikot ku Tasek Tiberias. Begei adehloh pekare ajeh belaku: 2Simon Petrus, Tomas (de bigelar Kerbar), Natanael (de kibeasal ju pekan Kana ku lengrik Galilea), kekenon Zebedeus,#21:2 Kekenon Zebedeus: Yohanes ru Yakobus. ru nar mom pengikot Yesus de kilek tengah naibekumpol. 3Simon Petrus kiurok nu enai, “Eng ngha-jala kak.”
Naiberlag, “Jiha-joi.” Lalu naihuj perahu ru naicip. Tapi sepanjang kelem ajeh enai pek naikep nuikor pen kak. 4Ku pepegelap ajeh, Yesus Kijinjeg ku pantei tapi Ipengikot-pengikot pek naicam Kek. 5Yesus Kitanya nu enai, “Bei, engkekepka?”
“Walah!” naiberlag.
6Yesus Kiurok, “Kibarloh jala nu englag kentop perahu. Engkek doh engkekep kak.” Jadi, enai pen naikibar jala tapi pek dapat naiha-tarek jala muj nu kateh perahu kerana ihad jeoi kak.
7Pengikot de bihok ya Yesus Kiurok nu Petrus, “Kek ajeh Tuhan!” Bile Simon Petrus kicerngai Kek ajeh Tuhan, Petrus kilog ijubah (de kiteg mase kikerakjak) lalu kitau nu kateh teu. 8Pengikot-pengikot de lekat ku kateh perahu naitarek jala de tebeg ya kak nu darat kerana enai pek nyak ju darat, kira-kira 100 meter taleh. 9Bile nailei nu darat, naineng kak birag ku kemil bara os arang ru ruti pen mong ku pajeh. 10Yesus Kiurok nu enai, “Enloh memerip ikor kak de pai engkekep.”
11Simon Petrus kihuj nu perahu lalu kisaher jala nu darat. Jala ajeh tebeg ya kak de entoi-entoi, ijengoi 153 ikor. Hamapen jeoi begei ajeh, jala ajeh pek betej. 12Yesus Kiurok nu enai, “Bei cakcak.” Pek numom pen berani naibetanya, “Jen adeh bok?” kerana naipanei Kek ajeh Tuhan. 13Yesus Kiperek nu enai ru Kikot ruti lalu Kiog nu enai. Kek Kiog kak juga nu enai.
14Adehloh ku inik kali Yesus Kiperneng Ilei nu Ipengikot-pengikot telas biberkos ju Idanan.
Yesus ru Petrus
15Telas naicakcak, Yesus Kitanya nu Simon Petrus, “Simon kenon Yohanes, hahokka ha Eng lebeh daripade dikdij sengoi adeh naihok ha Eng?”
Petrus kiberlag, “Hooh Tuhan, Jenpanei eng nghok ha Jen.”
Yesus Kiurok, “Bercakloh kekenon dombe Eng.”
16Nukali nij Yesus Kitanya nu kek, “Simon kenon Yohanes, hahokka ha Eng?”
Petrus kiberlag, “Hooh Tuhan, Jenpanei eng nghok ha Jen.”
Yesus Kiurok, “Jagaloh dombe-dombe Eng.”
17Ku inik kali Yesus Kitanya nu kek, “Simon kenon Yohanes, hahokka ha Eng?”
Petrus kisedeh kerana ya nik kali Yesus Kitanya amen kek kihok ha Ilei. Petrus kiberlag, “Tuhan, Jenpanei dikdij hal. Jenpanei nghok ha Jen!”
Yesus Kiurok, “Bercakloh dombe-dombe Eng. 18Cerngailoh abor, mase lekat hanyengnyam, hek hasekyap lalu haet nu belok taleh de hahod. Tapi mase haengrak, hek doh hasurong teg hek lalu mai kilek doh naisedia hek ru naien hek nu tempat de hanyek enget.” 19(Yesus Kiurok begei ajeh Kaha-pasal begeiharok Petrus doh kidat ru kipemulie Jenang.) Lalu Yesus Kiurok nu Petrus, “Joiloh Eng!”
Yesus ru Pengikot de Kihok
20Petrus kiceleg ru kibakek pengikot de bihok ya Yesus tengah kijoi ubai. Kek ajehloh ipengikot de kiperek nu Yesus mase naicak caknak Paskah ru de kitanya nu Yesus, “Guru, bokka de doh kikianat Jen?” 21Bile Petrus kibakek ha kek, Petrus kitanya nu Yesus, “Tuhan, ma de doh tejadi nu kek?”
22Yesus Kiberlag, “Hamapen Nghod kek kisui lei Nglos nij doh, hal ajeh pek hal hek. Hek, joiloh Eng!”
23Kerana Yesus Kiurok begei ajeh, sesedara seiman naisebar gah tentang pengikot ajeh doh pek kidat. Yesus pek Kiurok pengikot ajeh doh pek kidat tapi Kek Kiurok, “Hamapen Nghod kek kisui lei Nglos nij doh, hal ajeh apeka hal hek!”
24Kek ajehloh pengikot de kipasal ru kicot dikdij hal ku kateh kitab adeh. Hipanei ipenasal ajeh betol.
Engrok Idanij
25Lekat jeoi nij pekare kilek de bibeh ya Yesus. Tapi amen dikdij ajeh bicot peraknek-peraknek, ngrasa pek cukop tempat ku dunia adeh hiha-dek dikdij bob de bicot ajeh.
المحددات الحالية:
YOHANES 21: AEH
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.