Jọn 8
8
Amadọghụ Ḅụ Nnị Kuu Ọ́rụ́ḅọ
1Jizọs warị so Olivu Tụ́ndụ ma tándịm. 2Dede láa sáá o sima Tamunoopuwárị ma ẹpẹlẹ́ múm, túminị́ ma wárị o gbiriikélékélé ọ wárị kpọrọfịnị sị nyẹ pa n die. 3Ologho Nyẹ́dieapụ ma na Farisiiapụ ma wárị gbẹ́rẹ́ ọ́rụ́ḅọ akuoo, n kuuḅo amadọghụ ḅụ. Nnị warị a mịẹsị a túminị́ mamgba tórúku sẹ 4nnị warị Jizọs ḅẹẹ, <<Nyẹ́dieḅọ, wa ḅara na mịị ọ́rụ́ḅọ ma kum amadọghụ ḅụ. 5Ólóghó ma ḅụ Mosis tọ́ọ wa pịrịm ḅẹẹ ọkọfịnị ọ́rụ́ḅọ wamịnị mgbọ́lụ pa n ḅọ gbii. Mị́sa ịrị ị tẹ́ dugho?>> 6Nnị mịma gbilam pa dia tughu ọ pịrị n pa ḅara ọlọ sị ḅẹ́rẹ́ pa ọ sịbị gbánā bẹnyẹ.
Kụ́ma Jizọs tughum sị saghị ọ ḅara tụ́mgbọlụ pa kiri ma ḅụ nyẹ gịẹ. 7Nnị o gbíla so o gbíla ḅarịarị ḅara ma ọ tụ́ghụ́ saghịm sị n ḅẹẹ, <<Ḅọ́rọ́ ọmịna bie sii ḅụ ófórigha gbẹ́rẹ́ḅọ imi imi, n ḅo parị mgbọ́lụ ma saghị pa a gbii.>> 8O sima tughum sị kiri ma ḅụ nyẹ gịẹ.
9Nnị ọ náa sáá, gbẹ́rẹ́ḅọ gbẹ́rẹ́ḅọ, saghị ọ warị so sọm, parị sẹ́nịapụ ma ḅụ saghị, Jizọs ngéré ḅo kọọ, ọ́rụ́ḅọ ma anị ngá pa sẹ́fịnịarị. 10Jizọs tụ́ghụ́ saghị sáá, ọ warị gbíla, <<Ọ́rụ́ḅọ, nnị tẹ́ anga imi? Ḅẹ́rẹ́ pa i ḅara simaḅọ ofori?>>
11Á warị pagharaa, Inyanaḅọ, gbẹ́rẹ́ḅọ sọ ofori. Jizọs warị a ḅẹẹ, <<Irịsọ a ḅẹ́rẹ́ pa ị ḅara simagha, sọ, kụ́ma mú jẹ́ siinyẹ mịẹma.>>
Jizọs Anịị Tuminikiri Baá Ma
12Jizọs sima ẹ́gẹ́rẹ́kọọ túminị́ ma pịrị sáá, o dughom ḅẹẹ, <<Irị anịị tuminikiri baá ma. I dua ḅo gonyẹ́ gonyẹ́ kánákánábie asọ nwángịbịgha, kụ́ma n ḅọ duma pịrị baá ma nyánábẹm.>>
13Farisiiapụ ma warị ọ ḅẹẹ, <<Ịrị onyẹsẹ́ ịḅụ pịrịarị; ị́yẹ́ onyẹ́sẹ bẹnyẹ bẹnyẹ ḅụ ofori.>> 14Jizọs pagharam, <<Ḅọ́rọ́ ḅẹ́ dii ḅẹẹ a onyẹ́sẹ ịḅụ pịrịm, ị́yẹ́ onyẹ́sẹ ma karakárányẹ, ḅẹẹ a nimim a saghị ḅo ngá na pịghị a muarị anga. Kụ́ma ọmịnị o nimigha a saghị ḅo anga na pịghị a muarị anga. 15Ọmịnị ọ tuminikiriapụ ḅara pa ḅẹ́rẹ́kọm kụ́ma ịrị a gbẹ́rẹ́ḅọ sịbị sọ ḅẹ́rẹ́pẹ́lẹ́gha. 16Kụ́ma a ḅẹ́rẹ́kọọ kọọ ị́yẹ́ ḅẹ́rẹ́kọ karakáram tẹ́ go irị ngéréghaa. A i fịrịma Daḅọ ma na sẹ́fịnịm. 17Ọmịna ologho ḅụ n gịẹ kórómam ḅẹẹ mmẹapụ sẹ sị dugho págháma nyẹ karakáram. 18Irị anịị ị gbolomanyẹ dugho pághámarịḅọ; i fịrịma Daḅọ ma anịị ị́yẹ́ jẹ́ onyésẹ̄ḅọ.>>
19Anịsáa, nnị warị ogbila, <<Ị daá ọ tẹ́ anga imii?>> Jizọs pagharam, <<Ọmịnị inimigha anịgha i Daá ma, ọ ḅọ́rọ́ ị nimi, ọmịnị i Daá ma sọ nimibẹm.>> 20Ọ mịị ẹ́gẹ́rẹ́ ma kọm ọ pa Tamunopuwárị ma párángáa nyẹ́diearị sáá, ósó igbii sua ngá ma na kikianyẹ. Anịsọ gbẹ́rẹ́ḅọ sọ okugha tegó ọ sáá na laagha.
21Jizọs sima dugho nnị pịrịm, <<A sọarị, ọ pịghị i dọghụbẹm, ọ pịghị ọmịna sii ḅụ fị́ị́bẹm. A muarị anga ọ mịnị ine ḅobịgha.>>
22Mịma mịẹm sị Juuapụ ma gbíla, <<Ori ọ ḅụ ḅaá bẹ? Anị o go dughonyẹ ḅẹẹ, <A muarị anga ọmịnị ine ḅobịgha?> >>
23Jizọs pa ẹ́gẹ́rẹ́arị, <<Ọmịnị sughubie saghịḅom; irị ọ́gọ́nọ a saghịḅom. Ọmịnị anịị tuminikiri bẹapụ; irị mị tuminikiri bẹ ḅọgha. 24A dugho ọ pịrịm ḅẹ́ ọmịnị ọmịna sii ḅụ fị́ị́bẹm; ḅọ́rọ́ ọ mininigha ḅẹẹ, Irị anịị Irị Ma, ọ tụ́ma ḅara pa ọmịna sii ḅụ fị́ị́bẹm.>>
25Nnị o gbilam, <<Ịrị tụọ?>>
Jizọs pagharam, <<Saghị éné éné ị gboloma sị a dughoarị nyẹ ma. 26A tọgha nyẹ nyánam a dugho bẹnyẹ sị pa ọ sịbị ḅẹ́rẹ́kọọ. Kụ́ma ọ karakáram i fịrịma ḅọ ma; a pịghị ọ bịpị náanyẹ anịị a dugho tuminikiri ma pịrịarịnyẹ.>>
27Nnị ori akanyaḅogha ḅẹ́ ori o Daá ma gbolomanyẹ dugho nnị pịrịarị. 28Jizọs warị ḅẹẹ, <<Ọ Tumḅọ yii Tụ́wọ ma saghị sóghólóma maẹrẹ, anịsáa o nimibẹm ḅẹ́ Irị anịị Irị Ma, a pịghị ị́yẹ́ kụ́rọ pa ḅẹnyẹ ḅẹnyẹ mịẹgha, kụ́ma Daḅọ ma pa i dienyẹ ngéré anịị a diearịnyẹ. 29I fịrịma ḅọ ma ori irị na imi; na ori i warịsogha sị irị ngéré papa fịnị, ọḅụ ḅẹ́lẹ́nyẹ ngéré anịị a mịẹarịnyẹ.>> 30Ori ẹ́gẹ́rẹ́ ḅara ma tọghaapụ nna minini pa ọ ḅụ gbánām.
Siiamịẹnyẹ Ḅọ Sii Ómóniḅọ
31Jizọs warị ọ ḅụ minini Juuapụ ma ḅẹẹ, <<Ọ ḅọ́rọ́ ị́yẹ́ dienyẹ ma ọlọ ọlọ, ọmịnị anịị tụ́ma sị ị́yẹ́ ọḅụduaapụ. 32Anịsáa, ọ karakárá ma nimibẹm karakárá ma pịghị ọ duaḅọ́rọ́mabẹm.>>
33Nnị ọ pagharam, <<Wamịnị Ebraham furoawọ jẹ́ éné na wa pịghị jụghọ ómóniḅọ sọgha. I tọ́rọ pa dugho bẹ ḅẹẹ, nnị wa duaḅọ́rọ́mabẹm?>>
34Jizọs pagharam, <<A karakárányẹ ma dugho ọ pịrịm, siiamịẹnyẹ mịẹarịḅọ gonyẹ́ gonyẹ́ n ḅọ anịị siiamịẹnyẹ ómóniḅọ. 35Mị́sa ómóniḅọ ọ nyánáḅọ warị fịnị gbámásóbịgha, Kụ́ma n yii tụwọ anị ngá fịnị gbámásóbẹm. 36Anịgo ḅọ́rọ́ Tụ́wọ ma i dụaḅọ́rọ́ma, ị karakáráma dụaḅọ́rọ́ma nyánam. 37A nimim ḅẹẹ ọmịnị Ebraham furoawọ. Anịsọ ọ pa i baá dọ́ghụm tegó ọ fịnịkiri nyáná ị́yẹ́ ẹ́gẹ́rẹ́ ma pịrịgha. 38A Daḅọ toruku a árịmaá nyẹ dugho ọ pịrịarị, ọmịnị sọ pịghị ọmịna daá bịpị náanyẹ mịẹm.>>
39Nnị ọ pagharam, <<Ebraham anịị wámịna Daá.>> Jizọs warị ḅẹẹ, <<Ọmịnị ḅọ́rọ́ Ebraham awọ, anịsáa Ebraham mịẹnyẹ anịị ọ mịẹbẹnyẹ. 40Anị fịnị ḅara ma, ọmịna tẹ́mẹ́bie ọ tọ́ọ ḅọ́rọ́mamam ḅẹẹ ọmịnị i ḅáabẹm, irị Tamuno ḅara a náa karakárá ma dugho ọ pịrịmaá ḅo. Ebraham ọkọfịnị nyẹ mịẹgha. 41Ọmịna daá mịẹnyẹ anịị ọ mịẹarịnyẹ.>> Nnị pagharam, <<Nnị amadọghụ ḅụ wa yiigha, Tamuno ngéré anịị wa nyáná Daḅọ.>>
Ẹ́kpẹ́dua Awọ Ma
42Jizọs dugho n pịrịm, <<Ḅọ́rọ́ Tamuno anịị ọmịna Daá, ọmịnị i ḅẹ́lẹ́mabẹm, ḅẹẹ a Tamuno ḅara saghịḅom a mịnga ma ḅụ imi mị́sa. A ị́yẹ́ kụ́rọ ḅụ ḅogha; kụ́ma ori i fịrịmam. 43O tẹ́ go a dughoarị nyẹ ma akanyaḅogha anịị ọmịnị ine a dughoarị nyẹ naagha gosi. 44Ọmịnị anịị ọmịna daá ẹ́kpẹ́dua awọ, ọ pịghị ọmịna daa binyẹ mịẹ dọ́ghụm. Parị sáá éné éné ori anịị kị́nị́ ḅá ḅáḅọ, karakárá ma ọlọgha pa, gbẹ́rẹ́ karakárá sọ ọ ḅụbie ofori. Ori iruonyẹ dughoarị sáá ori ọrẹ ama bịpị fiearị, ori anịị iruonyẹ dugho dugho ḅọ pịghị iruonyẹ ma daḅọ. 45Anịị a karakárányẹ ma dugho ọ pịrịm ẹrẹ́sị, ọmịnị i mininigha! 46Ọmịna bie tụọ ḅẹrẹ pa i ḅarasima bẹ ḅẹẹ, mịị a mịẹ sii? A ḅọ́rọ́ karakárányẹ ma dugho ọ pịrịarị sáá ọ tẹ́ go i mininigha? 47Tamuno ju ḅọ ma, Tamuno dughonyẹ ma naánam. Ọmịnị Tamuno nyẹ́gha gosi anị o go ọ naagha nyẹ.>>
Jizọs Imii Sị Ebraham Ḅoo
48Juuapụ ma ọ pagharam, ḅẹẹ, <<Wa karakáragha wa dugho sáá ḅẹẹ ịrị Sameriyaḅọ ḅẹẹ sitẹ́mẹ́ pịghị ịḅụ imii?>>
49Jizọs pagharam, <<Sitẹ́mẹ́ ịḅụ ofori, kụ́ma a kuu pa i Daá pịrịm kụ́ma ọmịnị kuu pa i pịrịgha. 50A ị́yẹ́ boma bigha; kụ́ma gbẹ́rẹ́ḅọ imi anị biarị ḅo, ori anị pịghị ḅẹ́rẹ́kọḅọ ma. 51A karakárányẹ ma dugho ọ pịrịm, ị́yẹ́ ẹ́gẹ́rẹ́ ma dughonyẹ mịẹarịḅọ gonyẹ́ gonyẹ́ jẹ́ éné fịị arịbịgha.>>
52Mịma ḅụ ḅọ́rọ́ Juuapụ ma warị dugho ḅẹẹ, <<Mị́sa wa nimim ḅẹ́ Sitẹ́mẹ́ ị ḅụbie imi! Ebraham fịịm anịị ikiakoroapụ ma sọ fịị ḅara, anịsọ i pa dughoarị ḅẹ́, ị́yẹ́ ẹ́gẹ́rẹ́ ma dughonyẹ mịẹarị ḅo gonyẹ́ gonyẹ́ jẹ́ éné fịị arịbịgha. 53Ị wámịna Daá Ebraham nẹ́ngị? Ọ fịịm ikiakoroapụ ma sọ fịịm. Ị si ḅẹ́ ịrị ḅọ́rọ́ tụ́ọ?>>
54Jizọs pagharam, <<A ḅọ́rọ́ ịḅụ boma ị́yẹ́ boma ḅẹnyẹ ḅẹnyẹ ḅụ ofori. I Daá ma, ọ ḅẹ ḅọ ma ḅẹ́ ori ọmịna Tamuno, ori ma anịị i bomaarịḅọ. 55Tụ́manyẹ ḅẹ́ ọmịnị o nimigha, ịrị o nimim. A ḅọ́rọ́ bẹ a o nimigha a iruonyẹ dugho ḅo sọ́bẹm ọmịnị fịnị ḅara ma. Kụ́ma a ibima o nimim pịghị ori ẹ́gẹ́rẹ́ dughonyẹ mịẹ. 56Ọmịna daá Ebraham dụrụkụ́m ḅẹẹ, ori ị́yẹ́ ḅo bẹ sáá árịbẹm; ori anị arịm pịghị bieḅẹlẹ.>>
57Juuapụ ma warị ọ ḅẹẹ, <<Na ị kụ́rá a mmẹẹ́ si oyi findi laagha, ị pịghị Ebraham sọ árịmam!>>
58Jizọs pagharam, A karakárányẹ ma dugho ọ pịrịm, <<Na nnị Ebraham yiigha sa éné éné a imi!>> 59Mịma ḅụ ḅọ́rọ́ nnị mgbọ́lụ saghị akịm nnị pa o gbi bẹ ḅara, kụ́ma Jizọs ọ ḅụ ḅọghum, sị Tamunopuwárị ma ẹpẹlẹ́ wáriso.
المحددات الحالية:
Jọn 8: IBY
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
©2024 Luke Initiative for Scripture Translation