Luk 10
10
Jizọs Tẹ́si Oyi Findi Na Mmẹẹ́ Fịrịma Pághámam
1Mịma ḅọ́rọ́ sáá, Kị́nị́nyánáḅọ ma jẹ́ túminị́ tẹ́si oyi findi na mmẹẹ́ sẹ́lẹ́akịm warị mmẹapụ mmẹapụ pa n fịrịma págháma, ḅẹ n tarị ọ ḅụ ámá na yọ gonyẹ́ gonyẹ́ muu, ori ma muu dọghụ ngaa mamgba. 2Ọ warị dugho n pịrị ḅẹẹ, <<Opu duasughu imi, kụ́ma fịrịnaapụ ma dụḅagha. Tẹ́ghẹ̄ẹ̄ ḅẹẹ duasughu ma Nyánáḅọ ma fịrịnaapụ fịrịma sị n sughu nyẹ ma kobiri. 3Ḅẹẹ, muu! A ánáná ḅara pa ọ fịrịmaarị túú ogbobie. 4Igbii suanyẹ akịma, anịgha nyẹ muu akpa, anịgha agbaa, gbẹ́rẹ́ḅọ sọ kule ma asọogbo.
5<<Ọ́ sọọ warị gonyẹ́ gonyẹ́, parị dugho ḅẹẹ, <Diin mị warị ma na fịnị.> 6Ḅọ́rọ́ diin ḅẹlẹma ḅọ anị ngaa nganga, ị́yẹ́ diin kule ma anịḅọ ma ọ́gọ́nọ fịnịbẹm, anịgha nḅẹḅẹ́ ị́yẹ́ diin kule ma pịghịma ḅo ị pịrịbẹm. 7Anị gbẹ́rẹ́ warị ma ḅụ fịnị sị nnị ị pịrịnyẹ fị si pịghị nnị ị pịrịnyẹ ḅuu, tegó fịrịnwangịapụ nna gbẹ́ẹnyẹ nyáná na ḅụ́gbẹm, nwángị ikelekele ma gbẹ́rẹ́ warị ḅụ akị mú jẹ́ la.
8<<Ịrị ámá sọ sa gonyẹ́ gonyẹ́ sị nnị i dakórómam, n gbánā ị pịrị fị́nyẹ gonyẹ́ gonyẹ́ fịị. 9Anị ámá bie fịnị obiapụ gwọọ, dugho anị ngaa fịnịapụ ma pịrị ḅẹẹ, <Tamuno Ásẹ́mẹ́kiri ma anị kikia ọ dámáḅómam.> 10Kụ́ma ị muu sị nnị ị daakórómagha ama gonyẹ́ gonyẹ́ págháa asọogbo muu sị dugho ḅẹẹ, 11<Ọmịna ámá, wa ḅụọ ḅolo onwo sọọ wamịnị anị gugu sárá ọ pịrịm pa die ḅẹ́ anị ḅụḅáláḅálá ọmịna sịbị gbánabẹm. Kụ́ma o biekóróma ḅẹẹ Tamuno Ásẹ́mẹ́kiri ma kikia ọ fịnịngaa ḅomam.> 12A tẹ́mẹ́kụrọ ḅara pa dugho o pịrịarị ḅẹẹ, ḅẹ́rẹ́kọọ éné ma ḅụ ọmịna tọ́rụ́siarị Sodom angaá nyẹ nẹ́ngịbẹm.
Mininigha Ama Gbọrụ
(Mat 11.20-24)
13<<Anị ịḅụ siḅaabẹm Korasin! Anị pịghị ịḅụ siḅaabẹm Bẹtịsaida. Ḅọ́rọ́ nnị ibie nwángị ḅụ́gbérépuma fịrị ma nnị anị nwángịm Taya na Sidọn ḅụ, túminị́ ma ḅolo sáá duadubịtẹ sua sị fọọ taa n sịbị sara sị diepágháma ḅẹẹ nnị nna sii ḅụ pịghịmam. 14Tamuno ḅẹ́rẹ́kọ éné ma ḅụ ọmịna tọ́rụ́siarị Taya na Sidọn nganyẹ nẹ́ngịbẹm. 15Ịrị Kapanọm, ị́ ịḅụ saghị iwó muu sobie láa bẹ? Nnị i saghị duama gbi suabẹm.>> 16Jizọs warị ori ọḅụduaapụ ḅẹẹ, <<O pughuḅọ gonyẹ́ gonyẹ́ pịghị i pughum; ọ́ sịghịḅọ gonyẹ́ gonyẹ́ pịghị i sịghịm, i sịghịḅọ gonyẹ́ gonyẹ́ pịghị i fịrịmaḅọ ma sịghịm.>>
Tẹ́si Oyi Findi Na Mmẹapụ Ma Pịghịma Ḅo
17Tẹ́si oyi findi na mmẹẹ́ owiapụ ma pịghịma ḅom opu bieḅẹlẹ ḅụ sị dughoarị ḅẹẹ, <<Kị́nị́nyánáḅọ sitẹ́mẹ́ sọ wa mịná bịpị osim wamịnị igani n pịrị sa ị́yẹ́ ẹ́rẹ ḅụ.>> 18Jizọs warị n pagharaa ḅẹẹ, <<A Satanị arịm sobie saghị sóghórókoro sofịnị ḅara ma, 19o pughuu, a kụ́rọ pa ọ pịrịmam sị ọ mịnị ododó ọ́gọ́nọ nwángịbẹm na pịghị ododobiriḅọ ọ́gọ́nọ, sị pịghị iruonaḅọ kụ́rọ mamgba nẹ́ngịma, gbẹ́rẹ́nyẹ sọ pịghị ọ labịgha. 20Kụ́ma o bieḅẹlẹma ḅẹẹ sitẹ́mẹ́ ọmịna bịpị osim, tụ́ma o bieḅẹlẹ ḅẹẹ sobie nnị ọmịna ẹ́rẹ gịẹmam.>>
Jizọs Bieḅẹlẹm
(Mat 11.25-27; 13.16-17)
21Anịsáa ma ḅụ Tọ́ntọ́ Tẹ́mẹ́ ma warị ḅo Jizọs bieḅẹlẹma, Jizọs warị ḅẹẹ, <<Daa, so na tuminikiri Nyanaḅọ, a ịmịẹḅam pa i ḅẹm ḅẹẹ, i mịnyẹ ma pa nyẹ́nimiapụ na dirinimiapụ ma ḅọghumam, kụ́ma ịrị anị pa dọghụdọghụ awọ diemam. I Daa, mịị anịị ị dọghụ ḅara sị anị ọkọ pághá.
22<<I Daa, nyẹ gonyẹ́ gonyẹ́ pa ị pịrịmam. Tụwọ ma nimiḅọ ofori, Daḅọ ma sima, pịghị Daḅọ ma nimiḅọ ofori, Tụwọ ma sima na pịghị Tụ́wọ ma bi sị ọ Daḅọ ma pa n diebiapụ.>>
23Anịsáa Jizọs warị anị ngaa ẹ́gẹ́rẹ kọọ ori ọḅụduaapụ pịrị ḅẹẹ, <<Ọmịnị ọmịna tọ́rụ́ pa mịnanyẹ ma árịarịapụ Tamuno ibima ọ karịibimam. 24A dugho ọ pịrịm, tọgha ikiakoroapụ na ámányánáapụ dọ́ghụm ḅẹẹ nnị ọmịnị árịarị nyẹ ma arị, kụ́ma nnị inegha n pịghị náa dọ́ghụm ọ naarị nyẹ, kụ́ma pịghị inegha.>>
Ibi Sameriyaḅọ Ma Kaḅụ
25Gbẹ́rẹ́ ólóghó nyẹ́dieḅọ Jizọs damaḅom sị diatughu Jizọs pịrị ọ warị ḅẹẹ nyẹ́dieḅọ, <<A tẹ́ mịẹbẹ sị gbámásó duma nyáná?>>
26Jizọs warị o pagharaa, <<Tọ́ndiri ma anị tẹ́ dugho? Í tọ́rọ́pa anị dugho findiarị?>>
27Owitụ́wọ ma warị pagharaa ḅẹẹ, << <Ibie mamgba pa Gbámásóḅọ ma ị́yẹ́ Tamuno ḅẹlẹma, na pịghị ị biebẹ duma mamgba pịghị ị́yẹ́ ịnyọ mamgba, na pịghị ị bie mamgba.> Pịghị, <Ị nana kikiama ngaa ḅọ ḅẹlẹma ị ịḅụ ḅẹlẹma ḅara.> >>
28Jizọs warị ọ ḅẹẹ, <<I karakáram, mịma mịẹ anịsáa i dumabẹm.>>
29Kụ́ma ólóghó nyẹ́dieḅọ ma, o dọ́ghụm túminị́ toruku nnị ori árị ḅẹẹ ọ karakáram, warị Jizọs gbíla, <<Tụọ i nana kikiama ngaaḅọ.>>
30Jizọs warị ọ pagharaa, ḅẹẹ, <<Gbẹ́rẹ́ sáá gbẹ́rẹ́ owitụ́wọ imi Jerusalem ḅụ sághị Jeriko muarịḅọ, furuapụ warị okiekoro, ọ ḅụ bịtẹ si, sị ibima o fom sị ọfịfị ḅara fịnịm sị ọ wáriso. 31Anị ḅo pághá ḅara, gbẹ́rẹ́ igwagwaḅọ anị asọ ma ḅụ ḅọ́rọ́arị si o ḅọ mị owitụ́wọ ma árị sáá, ọ sáḅá isi angaá ḅọ́rọ́m. 32Anị gbẹ́rẹ́ ḅara ma Livai furotụ́wọ anị ngaa ma ḅom sị owitụ́wọ ma arịm sị sáḅá isi angaá ḅọ́rọ́. 33Kụ́ma gbẹ́rẹ́ Sameriyaḅọ anị asọ ma ḅụ ḅọ́rọ́arịḅọ ḅọ owitụ́wọ ma arịm, ori ọrẹ árị sáá, ori ọ tọ́rụ́kụ́rụ́kụ́rụ́mám. 34Ọ warị ọ fịnịnga muu sị pulo na iru na pa n pa ọ lama nyẹ ma ḅụ sárá warị bịtẹ mpara pa anị káká sị ọ saghị pa ori ikúnyẹ dighi ásụ nama ọ́gọ́nọ gbánā sị ori akuoo igoniapụ fịnịfịnịwarị ma biekóróma, sị o didighi. 35Éné ḅáanyẹ ma ori mmẹẹ́ pị́naḅala igbii pághámá ḅom, sị pa igoniapụ fịnịfịnịwarị ma kuruḅọ ma pịrị, ọ warị igoniapụ fịnịfịnịwarị ma kuruḅọ ma ḅẹẹ, <Ibima o didighi, ḅẹẹ a pịghịma mị párángáa ḅo bẹ jẹ́ sáá ị fama jẹ́ igbii gonyẹ́ gonyẹ́ ọ ḅụ, a pa ị gbẹ́bẹm.> >>
36Jizọs warị ẹ́gẹ́rẹ́ ma kunema ḅẹẹ, <<Ịḅụ mị tẹ́rẹ́apụ ma ḅụ tụọ ọrẹ kikiama ngaaḅọ ḅara pa nyẹ́ mịẹ? Furuapụ kiẹkoro owitụ́wọ ma ḅụ?>>
37Ólóghó nyẹ́dieḅọ ma pagharam ḅẹẹ, <<Tọ́rụ́kụrụkụ́rụ́ nyáná ọ pịrịḅọ ma.>>
Jizọs warị ọ págháraa, <<Ịrịsọ soo sị anị gbẹ́rẹ́ ḅara ma mịẹ.>>
Jizọs Muu Mata Na Meri Dighim
38Jizọs na ori ọḅụduaapụ nna asọ nwángịarị sáá, o ḅo gbẹ́rẹ́ káláama laam, Mata pa sị gbẹ́rẹ́ ọ́rụ́ḅọ o dakórómam a wárịbie.
39A gbẹ́rẹ́ mị́naḅọ ọ́rụ́ḅọ nyánam Meri pa sịḅọ, Jizọs ḅụọ angaá kpọrọfịnị sị ọrẹ dienyẹ pughuarịḅọ. 40Mata a tọ́rụ́ sẹgha a fị́nyẹ mịẹ n pịrịbẹ ḅara gosi, a warị ḅo ḅẹẹ, <<Kị́nị́nyánáḅọ anị ibi ḅẹẹ, i numboru ọ́rụ́ḅọ i wáriso sị ịrị ngéré nyẹ gonyẹ́ gonyẹ́ mịẹarị? Dugho a pịrị sị a ḅo ḅárásua i pịrị.>> 41Kị́nị́nyánáḅọ ma warị a págháraa ḅẹẹ, <<Mata, Mata, ị tọgha nyẹ pa ịḅụ ḅáláḅálámáarị. 42Gbẹ́rẹ́nyẹ ngéré anịị ị binyẹ. Meri karakárányẹ ma sẹ́lẹ́akịmam, gbẹ́rẹ́ḅọ sọ pịghị ine a ḅara anị daákịbịgha.>>
المحددات الحالية:
Luk 10: IBY
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
©2024 Luke Initiative for Scripture Translation