Luk 16
16
Duma Gbụ́nụ́nụ́gha Ọrụtọḅọ Kaḅụ
1Jizọs ori ọḅụduaapụ ḅẹm: <<Gbẹ́rẹ́ sáá biri, gbẹ́rẹ́ ngọ nyánáḅọ imi, ori ómóniḅọ nyánam ori ngọ ma pa ọrụtọarịḅọ. N dugho ngọ nyánáḅọ ma pịrịm ḅẹ́ ọrụtọḅọ ma ori igbii gulugulumaarị. 2Ọ warị ọ sịị sị o gbíla ḅẹẹ, <Mịị tẹ́ nyẹ a ịḅụ naarị nyẹ? Gbẹ́rẹ́nyẹ gbẹ́rẹ́nyẹ gịẹ findi, i ḅara warị ị́ ị́yẹ́ ngọ ma pa ọrụ́tọ́arị ḅara tegó, ị mịnị ị́yẹ́ ọrụtọḅọ sọbịgha.>
3<<Ọrụtọḅọ ma warị ọ ḅụ ḅẹẹ, <I nyánáḅọ ma ori i deesi dumaarị ị́yẹ́ fịrị ḅụ, mị́sa a tẹ́ mịẹ ḅẹ́? A ịnyọ nyanagha a pa kiri sughu bẹnyẹ, ịḅụ sọ gịrịrịarị nyẹ́bi ḅụ. 4Mị́sa a nimim a mịẹbẹnyẹ. Anịị ị́yẹ́ fịrị i ḅara faá sáá, a nangwọapụ nyánábẹm i dakóróma nna wárịbie suu bẹ nwángịapụ.>
5<<Ọ warị ori nyánáḅọ ḅara sá ọ́lọ́apụ mamgba kobiri. <Ọ warị parị ngaḅọ gbíla, ị́yẹ́ nyánáḅọ ḅara ị́ ndẹẹ́ a igbii ọlọ?>
6<<Ọ warị ọ pagharaa, <Pulo galọn mmẹẹ́ a ndẹ́ẹ, mị ị́yẹ́ sá fịnị ḅara diri bie.>
<<Ọrụtọḅọ ma ọ ḅẹm, <Kpọrọfịnị sị galọn ndẹ́ẹ gịẹ.>
7<<Ọ warị jụghọ gbíla, <Ịrị ị́ ndẹẹ́ ọlọ?>
<<Ọ warị ọ pagharaa, <Witi sịmgbọlụ buseli mmẹẹ́ ndẹ́ẹ na oyia si.>
<<Ọrụtọḅọ ma warị ọ ḅẹẹ, <Sáá diri ma akị sị mmẹẹ́ ndẹ́ẹ gịẹ kóróma.>
8<<Mịma go, duma gbụ́nụ́nụ́gha ọrụtọḅọ ma nyánáḅọ warị ọ túminí ḅẹẹ ọ nwọfịnị sịbịbie nyánam; tegó mịị tuminikiribieapụ ma n sịbịbie nyáná baá bie fịnịapụ ma nẹngịm nnị nna duma kọarị ḅara. 9A dugho ọ pịrịm ḅẹẹ ọ tuminikiri ngọ ma pa nángwọ mịẹ ọ ḅụ pịrị, sị mịma mịnị ófórigha sáá nnị ine o daá kóróma gbámásó fịnị yọ ḅụ kóróma bẹ ḅara.
10<<Túminị́ ịḅụ biegbáná nyáná nyáná kálányẹ ḅụ, n pịghị ịḅụ biegbáná nyánábẹm opunyẹ ḅụ, ḅọ́rọ́ túminị́ ịḅụ biegbána nyanagha kálányẹ ḅụ n pịghị ịḅụ biegbáná nyánábịgha opunyẹ ḅụ. 11Ḅọ́rọ́ tuminikiri ngọ ma ọrụtọ ḅụ nnị ịḅụ biegbáná nyanagha, tụwọ karakárá ngọ ma ọrụtọ pa ị ḅárábie sua bẹ? 12Ḅọ́rọ́ jụghọ ngọ ḅụ nnị ịḅụ biegbáná nyanagha, tụọ ị́yẹ́ angaá ngọ pa ị pịrịbẹ?
13<<Gbẹ́rẹ́ sáá ine fịrịnwangị mmẹẹ́ kị́nị́nyánáapụ pịrịbẹ ómóniḅọ ofori. Ọ gbẹ́rẹ́ḅọ ḅẹ́lẹ́mabẹm sị tarịgha ḅụ ị siḅọ na fịnị, anịgha ọ gbẹ́rẹ́ḅọ osibẹm si isi angáḅọ dighisima. Ịrị ine fịrịnwangị Tamuno na igbii pịrịbịgha gbẹ́rẹ́ sáá.>>
14Farisiiapụ ma mịma náa sáá, n saghị Jizọs kombom nnị igbii ḅẹ́lẹ́mam gosi. 15O warị n ḅẹẹ, <<Ọmịnị anịị ọḅụ diearịnyẹ ḅẹẹ ọmịnị karakárá ibiamịẹnyẹapụ túminị́ tórúku ḅụ, kụ́ma Tamuno ọmịna kúkúbie nimim. Túminị́ pa opuma nyẹ́sị nyẹ anị bẹnyẹ bẹnyẹ ḅụ ofori Tamuno tórúku.
Jizọs Die Jẹ́nyẹ
(Mat 11.12,13; 5.31,32; Mak 10.11,12)
16<<Mosis ologho ma na Ikiakoroapụ ma gịẹnyẹ kiriakịm akị mú Jọn Mingi Saraḅọ sáá láa. Anịsáa ma ḅụ saghị bịpị muu ásẹ́mẹ́kiri ma ibi oku ma n dugho wásámaarị, ọ́rụ́ḅọ ọ́rụ́ḅọ pịghị amịna ḅụ suma anị bie suuarị. 17Anị sárásáráḅabẹm sị so ma na kiri ma ẹmẹẹfáa, tụ́ma ólóghó ma ḅụ ịrụḅa nyẹ anị kụrọ ḅuma.
18<<Amịna táḅọ sịghịḅọ gonyẹ́ gonyẹ́ sị jẹ́ ọ́rụ́ḅọ yaa amadọghụm, pịghị n sịghị ọ́rụ́ḅọ ma yaaḅọ gonyẹ́ gonyẹ́ amadọghụm.
Ngọ́nyáná Owitụ́wọ Ma Na Lazarọs Kaḅụ
19<<Gbẹ́rẹ́ ngọ́nyáná owitụ́wọ imi opuma nyẹ́la áláápụ́ bịtẹ suasuaḅọ pịghị ḅẹlẹḅịpị fị́fị́ḅọ éné mamgba. 20Ori warị onu ḅụ́pọ́ kundu gbẹ́rẹ́ igonyiḅọ ḅụlọlọ fịnịm Lazarọs pa sịḅọ ịnọ nyánáḅọ ori oju gbọrụ ḅụ 21o biarị ḅẹẹ ori áláḅọ ma opuịkasị ḅụ sóórókoro nyẹ ma tụ́tụ́rụ fị. Obiri pịghị ḅo ḅom sị ori ịnọ ma táḅa.
22<<Sáá ḅo láa sáá igonyiḅọ ma fịịm sookumuapụ ma warị ọ dighi pa Ebraham angásá kóróma. Áláḅọ ma sọ fịịm n warị o dipi. 23Duaama, ọ ḅụakụ ḅụ fịnị angaá, ọ tọ́rụ́ saghịm sị ḅọlọanga ḅụ Ebraham árị, na pịghị Lazarọs ori angásá. 24Ọ warị ilúghú ọ sịị, <Daa Ebraham, tọ́rụ́kụrụkụ́rụ́ nyáná i pịrị sị Lazarọs fịrịma sị ọ ḅara pa mingi gbọ i ḅẹlẹ lama, tegó a ḅụakụ ḅụ imi mịị a fịnị fị́nị́ ma bie.>
25<<Kụ́ma Ebraham pagharam, <I tụwọ biekóróma ḅẹ́ ị́yẹ́ duma sáá ịrị ibinyẹ gonyẹ́ gonyẹ́ nyánaḅom, Lazarọs warị siinyẹ nyánáḅọ, kụ́ma mị́sa ọ ḅụ diin nyánámam ịrị warị ḅụakụ ḅụ sọ. 26Mịmámgba pa ngapịrị, wamịnị ogboku bie opu póghóló kiri imi, anịgosi mịnga saghị anị ngá ḅo biapụ inegha, aningáa saghị mịnga ḅo dọghụapụ sọ inegha.>
27<<Áláḅọ ma warị ḅẹẹ, <Daa Ebraham, a ị tẹ́ghẹm, Lazarọs fịrịma i daa warị mú, 28ḅẹẹ a sọ́nọ́a mịna owiapụ nyánam. Ori n birinụ́nụ́, sị nnị mị tọ́rụ́siarị angaá ma ḅobịgha ḅara.>
29<<Ebraham pagharam, <Mosis ologho na ikiakoroapụ ma dienyẹ nnị na imi, nnị anị pughu.>
30<<Ọ warị ḅẹẹ, <Ọkọgha daa Ebraham, ḅọ́rọ́ tumḅọ fịị ḅụ saghị n dámámuu n sii ḅụ pighibẹm.>
31<<Ebraham warị ọ pagharaa, <Nnị ḅọ́rọ́ Mosis ologho na ikiakoroapụ ma puughugha n mininibịgha ḅọ́rọ́ tumḅọ fịị ḅụ saghị n dámámuu.> >>
المحددات الحالية:
Luk 16: IBY
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
©2024 Luke Initiative for Scripture Translation