Luk 21
21
Deefịị Ọ́rụ́ḅọ Pịrịnyẹ
(Mak 12.41-44)
1Jizọs tọ́rụ́ saghị dighim, warị ngọ nyánáapụ ma árị nnị nna igbii suarị sáá Tamunoopuwarị ma igbii daa igbe bie. 2Ọ pịghị opuma ịgónyí gbẹ́rẹ́ deefịị ọ́rụ́ḅọ arịm, árị árẹ mmẹẹ́ a pẹ́nị pa suarị sáá, 3Ọ warị ḅẹẹ, <<A dugho ọ pịrịm, mịị ịgónyí deefịị ọ́rụ́ḅọ ma dụḅaḅá nyẹ sua kị́nị́mamgba nẹngịmam. 4Isiapụ pịrịm n nyánányẹ ḅụ kọnyẹ́, kụ́ma árị árẹ ịgónyí láa ḅara ḅụ árị árẹ nyánányẹ mamgba pịrịm.>>
Sáá Ma Kunema Ilíghíma
N Tamunoopuwarị ma Gulugulumabẹm
(Mat 24.1-2; Mak 13.1-2)
5Ori ọḅụdua jẹ́apụ Tamunoopuwárị ma gbólómanyẹ dughoarị, anị fíafía ḅara na pịghị n pa anị nama fíafía dapịrị, n pa Tamuno pịrị sị n pa anị birima nyẹ, Jizọs warị ḅẹẹ, 6<<Ọmịnị árịarị nyẹ mamgba, sáá ḅoarị ọ gbẹ́rẹ́ dapịrị sọ arịbịgha jẹ́nyẹ ọgọ́nọ́, nyẹ gonyẹ́ gonyẹ́ nnị anị ká gálágálámabẹm.>>
Ḅụḅáláḅálá Na Tọ́rụ́siarị
(Mat 24.3-14; Mak 13.3-13)
7Nnị warị ọ́ gbíla, <<Nyẹ́dieḅọ, mịma tẹ́ sáá kiriakị bẹ? Tẹ́ págháa bẹ diebẹnyẹ ḅẹẹ, sáá ma lámam?>>
8Jizọs warị ḅẹẹ, <<Ọ tọ́rụ́ pa kiri lama, o minima kị́nị́ oḅori pa ọ sị, tọghaapụ ḅẹarịapụ ḅẹẹ nnị ẹ́gẹ́rẹ kọọ i pịrịarị, n ḅobẹm ḅo dugho ḅẹẹ, <Irị anịị ori!> Sị pịghị dugho ḅẹẹ, <Sáá ma kikiamam!> Ọmịnị n dua ma. 9Ọ ḅáláfama ọ saghị ọ́mụ́ ọwụ namaẹrẹ na pịghị túminị́ sághị táarịapụ ma na ḅẹ́rẹ́miearị sáá, mịnanyẹ ma parị kiriakịbẹm, kụ́ma anị dughogha ḅẹẹ kunema ma kiriakịbẹm anị gbẹ́rẹ́kirikiri.>>
10Ọ warị pa saghị dugho ḅẹẹ, <<Sẹ na jẹ́ sẹ na owusọbẹm; amadakiri na amadakiri jụghọ jụghọ na ọmụ́gbibẹm. 11Kiri opuma jighebẹm, ḅuruḅa, sii obi ngaa mamgba, tọ́rụ pa dighigha pịghị ḅáláfáma nyẹ so tọ́rụ́ ḅụ saghị ḅobẹm.
12<<Mịnanyẹ mamgba na kiriakịgha sáá, n tarị ọmịnị kuubẹm, pịghị ọ pa tọ́rụ́siarịma, nnị ọ saghị Juuapụ kobiri yọ pịrịbẹm sị n ḅẹ́rẹ́kọ ọmịna sịbị sị ọ pa ikólibie sua; nnị ọmịnị akuoo ámányánáapụ na táarịapụ tórúku ḅobẹm i sịbị go. 13Mịị anịị ọ nyáná asọ sị ibi ẹ́gẹ́rẹ́ ma dugho wásámáa. 14Ọmịnị ibi sáá ọmịna tẹ́mẹ́ mịẹ kụ́rọ ma ọ balabịgha ḅara ọmịna ḅụ dua ḅụ. 15Tegó a kịrị níminyẹ na ẹ́gẹ́rẹ́ pa ọ pịrịbẹm sị ọmịna iruonaapụ ine dabịgha nyẹ anịgha pịghị anị pa epele nyẹ mịẹ. 16Ọmịna nyingiapụ na ọmịna daapụ na pịghị ọmịna owiapụ mịná ọmịna mịnaapụ na pịghị ọmịna nángwọ́apụ ọ saghị n pịrịbẹm n pịghị ọmịna ḅụ jẹ́apụ, ḅaabẹm. 17Kị́nị́mamgba, o dighi ḅụ akụbẹm i sịbị go. 18Kụ́ma ọmịna sịbị gbẹ́rẹ́ núme mgbọ́lụ sọ fabịgha. 19Sẹ́ kụ́rọ, anịsáa ị ịḅụ duaḅọ́rọ́mabẹm.
Nnị Jerusalem Gulugulumabẹm
(Mat 24.15-21; Mak 13.14-23)
20<<Ọmịnị ọ́mụ́gbiapụ árị sị nnị Jerusalem gbiriikélékélé ma sáá, anịsáa o nimi ḅẹẹ ḅọlọgha sáá ḅụ nnị anị gulugulumabẹm. 21Anịsáa, Judiya ḅụ fịnịapụ mangị tụ́ndụ́ ọ́gọ́nọ tándị, ama bie fịnịapụ mangị pághá, anịsáa ámá bie oforiapụ asọ dọ́ghụ́ma ḅẹẹ nnị ámá bie sọọ bẹ ḅara. 22Tegó mịị anịị tọ́rụ́siarị sáá ma, kiriakị bẹnyẹ sị Tọ́ndiri ma dughonyẹ mamgba ḅo karakárányẹ sọọ bẹ ḅara. 23Anị éné biri ma anị opuma ḅáláfa dighi fura ẹ́rẹ́ámáapụ pịrịbẹm, na pịghị ndomaẹ́rẹ́! Opu tọ́rụ́siarị ama ma ḅụ kóróbẹm, Tamuno igani pịghị mịná túminị́ ma ḅụ korobẹm. 24Jẹ́apụ nnị afaragada pa n pẹlẹ ḅaabẹm. Jẹ́apụ nnị n pa jẹ́ sẹ ḅụ ikólibie suabẹm; Juughaapụ ma ḅụọ pa Jerusalem nánga wárii sị nna sáá kara sáá lábẹm.
Tumḅọ Yii Tụwọ Ma Ori Ḅoo
(Mat 24.29-31; Mak 13.24-27)
25<<Tọ́rụ pa dighigha nyẹ anịị kiriakị bẹnyẹ ịrụa na akalụ́ na pịghị ḅálōló mamgba ḅụ. Tuminikiri sẹ gonyẹ́ gonyẹ́ tẹ́mẹ́ mangị na ḅáláfa ḅụ fịnịbẹm, dinọngụ tọ́rụ́bie opuma iganịarị ḅara álála nwángịarị mingi bie. 26Túminị́ tuminikiri ḅụ págháarị nyẹ ma árị sáá, n fụmbẹm ḅáláfa ḅụ, tegó so tọ́rụ́ baá pịrịarịnyẹ ma jighebẹm sị anị fịnịkiri wáriso. 27Anịsáa, anịị túminị́ Tumḅọ yii Tụwọ ma árị bẹnyẹ, o ḅoarị angaá oḅuto bie, kụrọ na ori opu ipine ḅụ. 28Mịị mamgba saghị kiriakị máare ọ saghị sẹ sị ọmịna sịbị saghị, tegó ọmịna dụaḅọ́rọ́ma kikiamam.>>
Fịgị Sịịmgbọlụ Pa Wa Diebẹnyẹ
(Mat 24.32-35; Mak 13.28-31)
29Jizọs warị mịị kaḅụ ma kọọ n pịrị, <<Ọ fịgị sị ma dighi pịghị jẹ́ jẹ́ sịịmgbọ́lụ. 30Ọmịnị árị sị anị ányị́nyá saghị págháḅoarị sáá, o nimim ḅẹ́ ẹ́rẹ́kụra kikiamam. 31Anị gbẹ́rẹ́ ḅara ma, ọmịnị árị sị mịnanyẹ ma saghị kiriakị máare o nimibẹm ḅẹẹ Tamuno Ásẹ́mẹ́kiri ma anị ḅo bẹ sáá lámam.
32<<A karakárányẹ ma dugho ọ pịrịarị, mị́sa dumafịnịapụ mamgbagha fịị bẹnyẹ, mịnanyẹ mamgba kiriakị bẹ sáá. 33So na kiri na ḅọ́rọ́ sọ́bẹm, kụ́ma ị́yẹ́ ẹ́gẹ́rẹ́ jẹ́ éné jẹ́ éné ḅọ́rọ́ sọbịgha.
34<<Ọmịnị ọ ḅụ ẹbị sị minima opu fị na ḅụ na ọ dighi akị so, ọ pịghị minima sị tuminikiri ḅụḅáláḅálá opuma ọmịna tẹ́mẹ́bie bii sí ọ ḅáláḅálá ma anịgha éné ma ḅo ọ ḅụ koro tọ́rụ́ pa dighigha sáá, sọ́ḅọ́rọ́ n tughu dia. 35Anịị anị tuminikiri ḅụ fịnịapụ mamgba ḅụ kóró bẹ ḅara. 36Ọ tọ́rụ́ findi kúru sị pịghị sáá mamgba ḅụ tẹ́ghẹ̄ ḅẹẹ ọmịnị ịnyọ nyáná sị tulu ḅọ́rọ́bẹm págháarị nyẹ mamgba ḅụ, sị pịghị Tumḅọ yii Tụwọ ma tórúku sẹ́.>>
37Anịsáa ma ḅụ, éné mamgba Jizọs sáá fámam nyẹ́diearị nna Tamunoopuwárị ma bie éné bie, éné dii sáá o mú Olivu Tụ́ndụ ọ́gọ́nọ fịnịbẹm dii gbọrụ. 38Dede gbọrụ, túminị́ Tamunoopuwárị ma muarị nnị mú o pughu bẹ ḅara.
المحددات الحالية:
Luk 21: IBY
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
©2024 Luke Initiative for Scripture Translation