मर्कूस 13
13
येशूसे मन्दिरको बिनाशको भबिष्यबाणी
(मत्ती. 24:1-51; लूक. 21:5-36)
1जब येशू यरूशलेमको मन्दिरसे निकरत रहए, तओ बाके चेला मैसे एकजनै बासे कही, “देखओ महान गुरु, कित्तो बडो घर! कित्तो बणे-बणे पत्थरसे घरकी भित बनिहएं।” 2येशू उनसे कही, “जे बणे घरके बारेमे जो तुम देख रहेहओ, पर मए तुमसे कहात हओं, दुस्मन एकफिर पत्थरके नाए छोडैगो। बे सब नष्ट करे जएहएं।”
अन्तके दिनके चिन्हा
3जब येशू यरूशलेमको मन्दिरसे जैतूनको पहाडमे चलोगओ और पहाडके बापार जाएके बैठिगओ। और पत्रुस, याकूब, यूहन्ना और अन्द्रियास बाके सँग इकल्ले रहएं तओ बे बासे चुप्पएसे पुछीं, 4“हमके बता, जे सब बात कब हुइहएं? और जब जे सब बात हुइहएं बो समयको चिन्हा का हुइहए?”
5येशू उनसे कही, “होसियार रहाबओ, कोइ तुमके धोखा नाए देमएं। 6बहुतसे आदमी मिर नाउँमे आमंगे और कहामंगे, ‘मए ख्रीष्ट हओं,’ और बे बहुतसे आदमीनके बहकामंगे। 7जब तुम युद्ध और युद्धको हल्ला सुनैगे, तओ मत् डरैयओ, काहेकी जे घटना होन जरुरी हए। पर दुनियाको अन्त तुरन्त नाए होबैगो। 8काहेकी जाति-जातिके आदमी एकदुस्रेके उपर हमला करंगे और एक देशके आदमी दुस्रे देशके आदमीके बिरुद्धमे लडंगे। ठाउँ-ठाउँमे हालाचाला जाबैगो और अनिकाल होबैगो। जा समय कष्टको सुरुवात इकल्लो हए। जा, बैयरके घरि-घरि व्यथा लागो कता हुइहए।”
9“तुम अपनो बारेमे होसियार रहाबओ। तुमर दुस्मन तुमके कचेहेरीमे और यहूदी सभाघरमे लैजएहएं और बे तुमके पिटंगे, काहेकी तुम मिर चेला हओ। जहेमारे हाकिम और राजाके ठिन, जाँचके ताहीं तुम खडा होबैगे और मिर बारेमे तुम गवाही देहओ। 10जाके अलाबा, दुनियाको अन्तसे पहिले मिर बारेमे अच्छो समाचार जाति-जातिके आदमीके सुनान पणैगो। 11जब तुम पकणिगए और तुमके अदालतमे लैचलेगए, तओ का कहमंगे और का बोलंगो करके चिन्ता मत् करीयओ। बो समयमे परमेश्वर जो कुछ फिर तुमसे कहाबैगो, बहे बुलियओ। काहेकी तुम बहे शब्द बोलैगे, जो पबित्र आत्मा तुमके देहए।
12आदमी अपन भइया और बहिनियनके सँग बिश्वासघात करंगे काहेकी बे मिर चेला हएं। अइयादौवा अपन बच्चनके बिरोध करंगे और बच्चा अपन अइयादौवाको बिरोध करंगे और बिनके मारन लगए हएं। 13और तुम मिर उपर बिश्वास करे, बहेमारे तुम सबसे घृणित हुइहओ, पर जो मेरे उपर भरोसा करतए रएहए और पृथ्वीमे जीबनको अन्त तक मिर पिच्छु चलतए रएहए कहेसे, बो पापको दण्ड पानसे बचाओ जएहए।”
महासंकटको समय
14“(पढन बारे बुझएं, कि मए काके बारेमे कहानडटो हओं।) एकदिन तुम, घिनौनो मनैके यरूशलेमको मन्दिरमे ठाणो देखैगे, जहाँ बाके नाए होन रहए। ताकी जा मन्दिरके सब जनै छोड जामएं। तओ यहूदिया परदेशके आदमीनके छुपनके ताहीं पहाड घेन भाजन पणैगो, ताकी बे नाए मरएं। 15अगर कोइ अप्नो घरको छतमे हए कहेसे अपनी सम्पति लेनके ताहीं भितर नाए जामएं, बिना देर करे हुनासे भागजान पणो। 16और अगर कोइ खेतमे हए कहेसे, बे अपन चद्रा लेनके ताहीं लौटके घर नाए जामएं। 17जा बे बैयरके ताहीं एक अग्ठो समय होइगो, जौन गरबबती हए। और बे बैयरके ताहीं जो बच्चनके दुध पिबात हएं, बिनके ताहीं जा समस्यासे बाहिर निकरन बहुत मुस्किल होबैगो। 18जे बात जाडो महिनामे नाए आमएं कहिके परमेश्वरसे प्राथना करओ। 19काहेकी बे दिनमे, अइसो महासंकट आएजएहए, कि परमेश्वरको करोभओ सृष्टिके सुरुवातसे लैके हबएतक अइसो नए भओहए नए त कभु हुइहए। 20परमेश्वर बो अग्ठो समयके छोटो करनके निर्णय लइहए, नए त कोइ फिर नाए बचाओ जैतो। पर बा बे अपने आदमीनके मारे, जौननके बा छाँटी हए, बो समय कम करदइ हए। 21बो बेरा कोइ तुमसे, ‘देखओ, ख्रीष्ट हियाँ हए,’ या ‘हुवाँ हए,’ कएहए तओ, तुम बिश्वास मत् करियओ। 22काहेकी झुठे ख्रीष्ट और झुठे अगमबक्ता अएहएं, चिन्हा और चमत्कारको काम दिखए हएं और हुइ सकत हए, कि जौनके परमेश्वर चुनी हए बेहीं आदमीनके धोखा देनके ताहीं अएहएं। 23घटना होनसे पहिले, मए तुमके जे सब घटनाके बारेमे बताओ हओं, ताकी तुम होसियार रहाबओ।”
येशू फिरसे आबैगो
24“बे दिनमे, भयानक दुखको समय खतम हुइजएहए, तओ महासंकटमे दिन और जोनी, दुनौ उजियारो देन बन्द करदेहएं, 25तारा बादरसे गिरंगे, और बादरमे भओ शक्ति डगमगाबैगो। 26और बो समयमे मनै, मए आदमीको लौंणाको महान शक्ति और महिमाके बद्रिमे आत देखंगे। 27तओ मए आदमीको लौंणा स्वर्गदूतन्के पठामंगो, और बे पृथ्वीके अन्तसे लैके बादरको अन्त तक चारौ घेनसे अपन चुनेभएनके इकट्ठा करंगे।”
अञ्जीरको रुखाकी कहानी
28“अञ्जीरको रुखासे जा कहानी सिखओ: जब बोको हँगामे कलंगी और पत्ता निक्रन लागत हएं, तओ तुम जानलेत हओ, कि मेँहे आनको मौसम ढिँगै हए। 29अइसियए, जब तुम जे सब चीज होत देखैगे, तओ तुमके पता होन पणो कि, मए आदमीको लौंणा फिरसे आन बारो हओं। जा जल्दीयए होबैगो। 30नेहात्तओ मए तुमसे कहात हओं, जा पिढीके कुछ आदमी तओ फिर जिन्दा रहामंगे जब जे सब घटना हुइहएं। 31बादर और पृथ्वी खतम हुइजए हए, पर मिर कहो भओ बचन सदामानके ताहीं रहाइगो।”
सदामान जगे रहाओ
32“जे बात कौन दिनमे और कौन समयमे होबैगो जा कोइ नाए जानत हए, नए त स्वर्गमे होन बारे स्वर्गदूत नए त मोए लौंणाके, पर दौवाके इकल्लो पता हए। 33देखओ, संसार रहियओ और परमेश्वरसे प्राथना करत रहियओ, काहेकी तुम नाए जानत हओ, जे बात कब होमंगे। 34जा कहानीसे सम्झाए जाए सकत हए: एक आदमी लम्बी यात्रामे जानके ताहीं अपन घर छोडदेत हए। जानसे अग्गु, बो अपनो सेवकके बहे काम बतात हए जो-जो बक करनके हए, और बो चौकीदारके बतात हए, कि बो तयार रहाबए।” 35जहेमारे येशू अपन चेलनसे कही: “तुम नाए जानत हओ, घरको मालिक कब लौटके आबैगो। जहेमारे तुमके फिर जगो रहानके हए, काहेकी घरको मालिक संझाके या आधि रातके या सुबेरे आएसकत हए। 36अगर बो बिना चेतावनी अचानक आतहए तओ बोके जा पता नाए होन पणो, कि तुम सोए रहेहओ। 37जो मए तुमसे कहात हओं बो मए सबसे कहात हओं: ‘रोजए तयार रहियओ!’”
المحددات الحالية:
मर्कूस 13: THRNT
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.