LUKAS 4
4
Iha' en Iblis pesek
Mat 4:1-11; Mk 1:12-13
1 #
Mat 4:1-11; Mk 1:12-13 Tegu Yesus uli men Yordan, penu nah Iha' té' Belua' Ma'ang, Belua' anan pah geri Iha' ha' tana ngahit pat-pulu dau dara na'. Hinan nah Iblis pesek Iha'.
2Dara-dara anan ji nun-nun pah em té' ket en Na' kani. Uh pat-pulu dau anan la'o nah Iha'. 3Lun ken Iblis men Iha', “Tana' Ika' Anak Allah lan, nyihu nah bato' anih balui luti.” 4#Kel d M 8:3 Bi Yesus kuma' men iha', “Té' kah uh kalung, ‘Nusi' ha' kenan luti tua kelunan seng murip,’ ” ken Na'.
5Men'uh atih, en Iblis geri nah Iha' hujung ji ujet bau, pelalau alem ji kejep mata' iha' bara Iha' lim-lim keligem ha' usun tana. 6Ken Iblis men Iha', “Ika' aleng seng ek uk lim tingan anih dahin aren na', avin lim anan uh té' alem usu kui, dahin hi-hi aleng kenep kui seng ek uk, adang kui ma'uk na'. 7Avin anan, iha' Ika' nyepukun sebayang ha' unan kui, lim anan pah Ika' seng hipun na' lim-lim.” 8#Kel d M 6:13-14 Nyu'ei nah Yesus dahin kuma' men iha', “Té' kah uh kalung,
‘Sayu nah im nyepukun ngelu'ep sebayang ha' unan Allah Tuhan ka'
dahin nyepida té' Iha' telesen,’ ”
ken Na'.
9Men'uh atih la'an, en Iblis atih geri pah Iha' ha' Yerusalem, pelalau metei Iha' hujung mubung Uma Allah, dahin kuma' men Iha', “Tana' Ika' Anak Allah lan, sayu nah Im nesau men inih tei hida, 10#NDI 91:11 avin té' kah uh kalung,
‘Iha' seng nyihu meliket Na' jaga ika', ja daha' petuboh ika',’
11 #
NDI 91:12
Té' pah,
‘Daha' seng nyidah usu daha' dahin meju ika',
bahi kudek ka' netung té' bato'.’ ”
12 #
Kel d M 6:16
Nyu'ei nah Yesus dahin kuma' men iha', “Té' kah daho', ‘Meng nah im pekayuh pesek Tuhan Allah ka',’ ” ken Na'.
13 #
Ib 4:15
Tegu Iblis uh pekpah ha'ut na'an pesek, leka' nah iha' men béh Yesus tegu anan.
Hadui Tuhan Yesus ha' Nazaret
Mat 4:12-17; Mk 1:14-15
14Men'uh anan Yesus tei uli ha' Galilea alem tingan Belua', pelalau putat nah dengah Na' ha' lim-lim daléh anan. 15En Na' pekatuk nah daha' alem lim uma sebayang daha', daha' lim pah meju Iha'.
Yesus en daha' uau ha' Nazaret
Mat 4:12-17; Mk 6:1-6
16Tei nah Iha' ha' daléh Nazaret, ngavan Na' men alem Iha' kahang. Dau Kelarah tei nah Iha' halem uma sebayang, awi alei Na' pa'en, pelalau biti nah Iha' seng basa' surat Tuhan. 17#Yes 61:1-2; 58:6 En daha' jei nah surat nabi Yesaya men Iha', pelalau Iha' muah na' ha' ngavan aleng uh kalung,
18“Beluan Tuhan té' hujung Kui,
avin Iha' uh ngenyu Akui ja Akui pedengah dengah aleng sayu men kelunan aleng humé'.
Iha' nyihu Akui bara alan avan daha' aleng salut tei takau,
dahin meting matan daha' aleng buta',
dahin makau daha' aleng bemah,
19 #
Lewi 25:10
dahin pedengah duman ngavan Tuhan ma'uk asi Na' uh nei ateng.”
20Pelalau en Na' lulun nah buhup anan, en Na' uk uli men laké' aleng puboh na', pelalau melo' nah Iha'. Lim daha', alem uma sebayang atih ngehaneng nyineng Iha'.
21Pelalau Iha' bara men daha', “Men dau anih huang surat Tuhan aleng kam kelenghi anih uh la'ung.” 22#Yoh 6:42 Lim-lim daha' pah menglan jam dahun Na', dahin ngeniheng kelenghi daho' aleng sayu lelan aleng musang men ba Na'. Ken daha', “Bi anih nah anak Yusuf dih keta'?” 23#Mat 4:13 Iha' nah Yesus kuma', “Adang nunih kah dahun kam men Akui na daho' pivun, ‘U duktun, Im petagéh nah batung Ka' dep. Ket aleng uh Im na ha' Kapernaum arei dih, Im na nah ha' Ngavam hinih lahuh,’ ken kam kah.” 24#Yoh 4:44 Iha' Ha' kuma' la'an, “Dahuk lan men ikam, ji-ji la'ung nabi pah em té' aleng uh en daha' ju té' alem daléh na' dep. 25#1 Laj 17:1,8-16; 18:1; Yak 5:17 Bi Akui kuma' men ikam, aleng lan na'. Alem urip Elia té' kahum debalo' té' hang daha' Israel tegu taga' aya' telo' duman nem bulan dara na' arei di, aleng na kelunan daléh anih katé' matei na té' lien daha' dih. 26Bi nusi' Tuhan nyihu Elia tei pala kelunan ha' béh, té pah Iha' nyihu iha' tei pala ji doh aleng debalo' ha' Saripta alem daléh Sidun. 27#2 Laj 5:1-14 Men alem urip nabi Elisa pah té' kahum kelunan aleng ga' perah malin té' hang kelunan Israel, bi ji la'ung pah men daha' atih iha' em petagéh, ketu na' nah Naaman kelunan Siria atih tua.” 28Lim kelunan atih pelalau bunget alem uma sebayang tegu daha' kelenghi daho' atih. 29Pelalau peju nah daha' muga Yesus dahin mebet Iha' men daléh, dahin geri Iha' té' behilak ngalang aleng ngavan uma-uma daléh atih, tinan nah daha' ngenep mesau Iha' hida. 30Bi uh lalau nah Iha' leka', nesak men hang daha' atih.
Tuhan Yesus ha' Kapernaum.
Iha' petagéh ji la'ung aleng té' to' nilung
Mk 1:21-28
31 #
Mat 4:13; Yoh 2:12 Uh anan Iha' ngiléh tei ha' Kapernaum, ji daléh ha' Galilea. Alem Iha' pekatuk daha' té' Dau Kelarah, 32#Mat 7:28-29; Yoh 7:46 ngeniheng nah daha' atih té' katuk Na' atih, avin dahun Na' atih té' tingan. 33Té' pah ji la'ung alem uma sebayang atih aleng té' to' nilung, medéng nah iha' dahin mennyik dahun na', 34ken na', “Nuno' kah tuk kamé' seng piah kenep Ka' lo, u Yesus kelunan Nazaret? Ika nei seng ngenep nasa' kamé' anih iah? Akui jam Ika' anih, Ika' nah Iha' Aleng Ma'ang aleng nei men Allah.” 35Pelalau Yesus mano' iha', ken Na', “Tepaka', musang nah im men kelunan anih.” Tegu to' atih uh mayah kelunan atih té' hang kelunan kahum atih, pelalau musang nah to' atih men alem na', dahin em ngeprah iha'. 36Ngeniheng lelan nah daha' atih dahin petengaran pedeng daha', ken daha', “Bei-nei, melak ta' té' tingan dahun kelunan anih! Avin kenan tingan dahun Na' tua nah Iha' muga to' anih ateng daha' musang.” 37Putat nah dengah marung tuk Yesus atih alem lim-lim daléh daha' tih.
Tuhan Yesus petagéh hinan-divan Petrus dahin kuri-kuri kelunan ha' béh lahuh
Mat 8:14-17; Mk 1:29-39
38Peju nah Iha' tei musang men alem uma sebayang atih, pelalau tei alem uma Simon. Hinan-divan Simon pah ngelepéng tua avin iha' larem aya' lelan, pelalau daha' kahi Yesus masi iha'. 39Nekring nah Iha' té' béh na' pelalau duan larem atih, pelalau larem atih puéh kenan Na', pelalau peju nah iha' tegu atih dahin nyamah té' dalo' atih.
40Tegu dau tei herep, en daha' geri nah lim-lim kelunan aleng té' perah pala Yesus, na'an-na'an perah en daha' geri ha' Iha', en Na' tei nah usu Na' ujung ha'ut—ha'ut la'ung daha' atih, dahin petagéh daha'. 41#Mat 8:29 To' pah musang men kelunan atih, dahin medéng, ken daha', “Ika' anih nah Anak Allah.” Pelalau Yesus mano' to' atih dahin em mun daha' duan, avin daha' jam Iha' Kristus.
42Dau malah ji musang nah Iha' men inan tei ha' ji ngavan aleng henung, kelunan kahum atih pah ilau Iha', pelalau daha' atih tei ateng ha' Iha' ngenep ma'eng Iha', ja meng Iha' leka' men béh daha'. 43#Lk 8:1 Bi ken Na' men daha', “Adang men daha' daléh ha' béh lahuh Akui seng pedengah dengah sayu marung tuk keligem Allah, avin atih nah tavit na' Akui en Na' nyihu nih.” 44#Mat 4:23 Iha' nah Iha' pedengah dengah sayu alem lim-lim uma sebayang ha' Galilea.
المحددات الحالية:
LUKAS 4: TDK1990
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Bible in Today's Dahun Kayan Version © Bible Society of Malaysia, 1990.