ᒨᓯᓯ ᓯᕗᓪᓖᑦ 24
24
ᐂᓴᑭᐅᑉ ᓄᓕᐊᓂᖕᓂᖓ
1ᐂᑉᕋᕼᐋᒻᓕ ᐃᓄᑐᖃᒻᒪᕆᐅᓕᖅᐳᖅ, ᐊᕐᕌᒍᖃᓕᓚᐅᖅᐳᖅ ᐅᓄᖅᑐᓂᒃ; ᐊᑕᓂᐅᓪᓗ ᓮᒻᒪᖅᑎᓯᒪᓚᐅᖅᐹ ᖃᓄᑐᐃᓐᓇᖅ ᐱᓇᓱᐊᕐᖕᓂᓕᒫᖓᒍᑦ. 2ᐂᑉᕋᕼᐋᒻ ᐱᔨᒥᓄᑦ ᐅᖃᖅᐳᖅ, ᐃᒡᓗᒥᓂ ᐊᖓᔪᒃᓯᖅᐹᒧᑦ, ᐱᖁᑎᓕᒫᖏᓐᓄᑦ ᑕᒤᓐᓄᑦ ᐊᖓᔪᖅᑲᐅᔪᒧᑦ, “ᐊᒡᒐᑎᑦ ᖁᒃᑐᕋᕐᖕᒪ#24:2 ᖁᒃᑐᕋᐅᑉ ᐊᑯᓐᓂᖓᓄᐊᖅᓯᓗᓂ ᐊᒡᒐᓂᒃ ᐅᖃᕕᖕᓂᖅ ᑕᒪᓐᓇ ᐊᓯᑦᔨᖅᑕᐅᔪᓐᓇᖏᒻᒪᕆᒃᑐᖅ ᐊᑯᓐᓂᖓᓄᐊᓚᐅᒃᑭᑦ. 3ᐅᖃᕕᒃᑎᓐᓂᐊᕋᒃᑭᑦ ᐊᑕᓂᐅᑉ ᐊᑎᖓᓂ ᕿᓚᐅᑉ ᓄᓇᐅᓪᓗ ᒎᑎᖓᓄᑦ, ᐃᕐᖕᓂᕐᖕᒪ ᓄᓕᐊᒃᓴᖓᓂᒃ ᓂᕈᐊᖁᓇᒃ ᑬᓇᓂᒥᐅᑦ ᐸᓂᖓᓐᓂᒃ ᓄᓇᖅᑲᑎᖏᔭᓐᓂᒃ. 4ᓄᓇᓐᓄᓪᓕ ᐂᓕᕆᑦ ᐃᓚᓐᓄᑦ, ᓄᓕᐊᒃᓴᖅᓯᐅᕆᐊᖅᓗᑎᑦ ᐃᕐᖕᓂᓐᓄᑦ ᐂᓴᑭᒧᑦ.”
5ᐱᔨᐅᓪᓗ ᐊᐱᕆᕚ, “ᖃᓄᕐᓕ ᐊᕐᖕᓇᖅ ᓄᓇᒧᑦ ᒪᐅᓐᖓᕈᒪᖏᑉᐸᑦ? ᑕᕝᕙ ᐃᕐᖕᓃᑦ ᑕᐅᕗᖓ ᓄᓇᕕᓂᕐᖕᓄᑦ ᐅᑎᖅᑎᒋᐊᖃᕋᔭᖅᐸᕌ?”
6ᐂᑉᕋᕼᐋᒻ ᑭᐅᕚ, “ᐅᑦᔨᖅᓱᑦᓯᐊᕆᑦ ᐃᕐᖕᓂᕋ ᑕᐅᕗᖓ ᐅᑎᖅᑯᓇᒍ! 7ᐊᑕᓂᐅᑉ, ᕿᓚᐅᑉ ᒎᑎᖓᑕ, ᑕᒪᐅᓐᖓᖅᑎᓚᐅᕐᖕᒪᖓ ᐊᑖᑕᒪ ᐊᖏᕐᕋᖓᓂᑦ ᓄᓇᒥᓪᓗ ᐃᓅᓕᕐᕕᒋᓚᐅᖅᑕᓐᓂᑦ, ᑖᑦᓱᒪ ᐅᖃᕕᒃᓗᓂ ᐅᖃᕐᕕᒋᓚᐅᕐᖕᒪᖓ, ‘ᑭᖑᕚᒃᓴᕐᖕᓄᑦ ᑕᒪᓐᓇ ᓄᓇ ᑐᓂᔪᒪᕙᕋ,’ ᐂᖏᓕᖁᑎᓂᓗ ᓯᕗᓂᕐᖕᓂ ᑎᓕᓂᐊᖅᐹ, ᐃᕐᖕᓂᕐᖕᒪ ᓄᓕᐊᒃᓴᖓᓂᒃ ᓇᓂᓯᓂᐊᖅᐳᑎᑦ ᑕᐅᕙᓐᖓᑦ. 8ᐊᕐᖕᓇᕐᓕ ᐃᓕᖕᓄᑦ ᒪᓕᒍᒪᖏᑉᐸᑦ, ᑕᕝᕙ ᑕᒪᑐᒧᖓ ᐅᖃᕕᒍᑎᒋᔭᑦᑎᓐᓄᑦ ᕿᓚᕈᑦᔮᕐᖕᓂᐊᖅᐳᑎᑦ; ᑭᓯᐊᓂᓕ ᐃᕐᖕᓂᕋ ᑕᐅᕗᖓ ᐅᑎᖅᑎᑦᓴᐊᕆᐊᖃᓐᖏᓚᑦ.” 9ᑕᕝᕙ ᐱᔨᐅᑉ ᐊᒡᒐᓂ ᐂᑉᕋᕼᐋᒻ ᐊᖓᔪᖅᑳᒥ ᖁᒃᑐᕋᖏᑕ ᐊᑯᓐᓂᖓᓄᐊᖅᐰᑦ, ᐅᖃᕕᒃᓗᓂᓗ ᐱᓇᓱᐊᕈᒪᓪᓗᓂ ᑕᒪᑐᒥᖓ.
10ᑕᕝᕙ ᐱᔨᐅᑉ, ᐊᖓᔪᖅᑳᖓᑕ ᑳᒥᓕᖁᑎᖏᓐᓂᒃ#24:10 ᑳᒥᓕ ᐅᕝᕙᓗ ᐱᑯᓕᒃ ᕿᒻᒥᕐᔪᐊᕆᔭᐅᕙᒃᑐᑦ ᓯᐅᕅᓐᓇᕐᖕᒥ ᕿᑎᒥᒍᑦ ᐱᑯᓖᑦ 10ᓂᒃ ᓇᒃᓴᖅᓗᓂ ᐊᐅᓪᓚᖅᐳᖅ, ᐱᐅᓂᖅᐹᓂᒡᓗ ᓇᒃᓴᖅᓗᓂ ᑐᓂᕐᕈᑎᒃᓴᓂᒃ ᐊᖓᔪᖅᑳᖓᑕ ᐱᖏᓐᓂᒃ; ᐊᐅᓪᓚᕋᒥ ᒥᓱᐳᑍᒥᐊᒧᐊᖅᐳᖅ, ᓇᕼᐅᕆᐅᑉ ᐃᒡᓗᒐᓴᖏᓐᓄᑦ. 11ᑕᕝᕗᖓᓗ ᑎᑭᓐᓇᒥ, ᑳᒥᓕᖁᑎᓂ ᐊᖁᕕᑎᑉᐰᑦ ᐃᒥᖅᑕᕐᕕᐅᑉ ᓴᓂᐊᓄᑦ ᐃᒡᓗᒐᓮᑦ ᓯᓚᑖᓃᑦᑐᒧᑦ, ᐅᓐᓄᓕᖅᑎᓪᓗᒍ, ᑍᒤᓪᓗᐊᓕᕌᖓᑦ ᐊᕐᖕᓁᑦ ᐃᒥᖅᑕᖅᐸᖕᒪᑕ. 12ᐅᖃᖅᐳᕐᓗ, “ᐊᑕᓃᖅ, ᐊᖓᔪᖅᑳᒪ ᐂᑉᕋᕼᐋᒻ ᒎᑎᖓ, ᐅᓪᓗᒥ ᐱᓇᓱᐊᖅᑕᓐᓂᒃ ᐱᔪᓐᓇᖅᑎᓚᐅᓐᖓ, ᑐᒃᓯᐊᕐᕕᒋᕙᒋᑦ, ᓇᒡᓕᖕᓃᑦ ᓱᖁᓯᔪᐃᑦᑐᖅ ᓴᖅᑭᑎᓚᐅᕈᒃ ᐊᖓᔪᖅᑳᓐᓄᑦ ᐂᑉᕋᕼᐋᒻᒧᑦ. 13ᑕᑯᒋᑦ, ᐃᒥᖅᑕᕐᕕᐅᑉ ᓴᓂᐊᓂ ᓇᖏᖅᐳᖓ, ᐃᒡᓗᒐᓴᒡᔪᐊᑦ ᐃᓄᖏᑕ ᐸᓂᖏᑦ ᕾᓕᖅᐳᑦ ᐃᒥᖅᑕᕆᐊᖅᓗᑎᒃ. 14ᐅᖃᐅᑎᔭᕋ ᐊᕐᖕᓇᖅ ᐃᓅᓱᒃᑐᖅ ᐃᒫᒃ, ‘ᐃᒪᖃᐅᑏᑦ ᒪᓂᓗᒍ ᐃᒥᖅᑎᓚᐅᓐᖓ.’ ᑕᕝᕙ ᑖᑦᓱᒪ ᑭᐅᒃᐸᖓ, ‘ᐃᒥᓕᕆᑦ, ᑖᒃᑯᐊᓗ ᑳᒥᓕᖁᑎᑎᑦ ᐃᒥᖅᑎᓐᓂᐊᖅᐸᒃᑲ,’ ᑕᕝᕙ ᑍᒤᓕᔪᖅ ᑖᓐᓇ ᓇᓗᓁᓚᐅᕈᒃ ᐱᔨᖕᓄᑦ ᐂᓴᑭᒧᑦ ᓄᓕᐊᒃᓴᐅᖁᒐᕕᐅᒃ. ᑍᒫᒃ ᐱᒍᕕᑦ ᑕᕝᕙ ᖃᐅᔨᓂᐊᖅᐳᖓ ᓇᒡᓕᖕᓃᑦ ᓱᖁᓯᔪᐃᑦᑐᖅ ᓴᖅᑭᔮᖅᑎᓐᓇᕕᐅᒃ ᐊᖓᔪᖅᑳᓐᓄᑦ.”
15ᓱᓕᓕ ᐅᖃᕇᖅᑎᓐᓇᒍ, ᑕᑯᒋᑦ, ᕇᐱᑲ ᕾᕗᖅ ᐃᒪᖃᐅᑎᓂ ᐃᖅᓱᒡᓗᒍ, ᑖᓐᓇ ᐂᑉᕋᕼᐋᒻ ᓄᑲᖓᑕ ᓇᕼᐅᕆᐅᑉ ᓄᓕᐊᖓᑕᓗ ᒥᐅᓪᑲᐅᑉ ᐃᕐᖕᓂᖓᑕ ᐱᑐᐃᓕᐅᑉ ᐸᓂᖓ. 16ᑖᓐᓇᓗ ᐊᕐᖕᓇᖅ ᐃᓂᖁᓇᖅᑐᐊᓘᕗᖅ, ᐊᖑᒻᒧᑦ ᐊᒃᑐᖅᑕᐅᓚᐅᖅᓯᒪᖏᑦᑐᖅ; ᐊᒻᒧᐊᒃᓗᓂ ᐃᒥᖅᑕᕐᕕᖕᒧᐊᕋᒥ, ᐃᒪᖃᐅᑎᓂ ᐃᒻᒥᕇᕋᒥᐅᒃ ᒪᑭᑉᐳᖅ ᒪᔪᐊᓕᖅᓗᓂ. 17ᑖᑦᓱᒪᓗ ᐱᔨᐅᑉ ᐅᓪᓚᒡᓗᓂ ᐸᕐᕆᐊᕋᒥᐅᒃ, ᐅᖃᐅᑎᕚ, “ᐃᒥᖅᑎᐊᕐᔪᓚᐅᓐᖓ ᐃᒪᖃᐅᑎᖕᓂᑦ.”
18ᐊᕐᖕᓇᐅᑉ ᐅᖃᐅᑎᕚ, “ᐊᖓᔪᖅᑳᒃ, ᐊᑏ ᐃᒥᓕᕆᑦ,” ᐃᒪᖃᐅᑎᓗ ᐃᖅᓱᒃᑕᓂ ᑐᐊᕕᖅᓗᓂ ᑎᒍᓪᓗᒍ, ᐃᒥᖅᑎᓕᖅᐹ. 19ᐃᒥᖅᑎᑦᓴᕇᕋᒥᐅᒡᓕ, ᐊᕐᖕᓇᖅ ᐅᖃᖅᐳᖅ, “ᑳᒥᓕᖁᑎᑎᑦᑕᐅᖅ ᐃᒥᖅᑎᑦᓱᒪᕙᒃᑲ ᐃᒥᕈᐃᑦᓯᐊᖁᓪᓗᒋᑦ.” 20ᑕᕝᕙ ᑐᐊᕕᖅᓗᓂ ᐃᒪᖃᐅᑎᓂ ᐆᒪᔪᐃᑦ ᐃᒥᕐᕕᖏᓐᓄᑦ ᑯᕕᕚ, ᑐᐊᕕᖅᓗᓂᓗ ᐃᒥᖅᑕᕐᕕᖕᒥᑦ ᖃᓗᓯᔭᖅᑐᒃᑲᓐᓂᖅᐳᖅ, ᑳᒥᓕᖁᑎᖏᑦ ᑕᒪᕐᖕᒥᒃ ᐃᒥᕇᓚᐅᖏᓐᓂᖏᓐᓂ. 21ᐊᖑᑎᐅᓪᓕ ᑕᑯᓐᓇᑐᐃᓐᓇᓚᐅᖅᐹ ᓂᐱᖃᕋᓂ ᑐᑭᓯᔪᒪᓪᓗᓂ ᐊᑕᓂᐅᑉ ᐱᑎᒻᒪᖔᒍ ᐱᔪᒪᔭᒥᓂᒃ.
22ᑳᒥᓖᓪᓕ ᐃᒥᕇᕐᖕᒪᑕ, ᐊᖑᑦ ᑎᒍᓯᕗᖅ ᒎᓗᒥᒃ ᓴᓪᑰᑉ ᐊᕝᕙᖓᓂᒃ ᐅᖁᒤᓐᓂᖃᖅᑐᒥᒃ ᕿᖓᕐᖕᒥᐅᑕᕐᖕᒥᒃ, ᒪᕐᕉᖕᓂᒡᓗ ᐊᒡᒐᐅᒻᒥᐅᑕᒃᓴᖏᖕᓂᒃ ᒎᓗᓂᒃ ᐅᖁᒤᓐᓂᖃᖅᑐᓂᒃ ᖁᓕᓂᒃ ᓴᓪᑯᓂᒃ. 23ᐅᖃᖅᓗᓂᓗ, “ᐅᖃᐅᑎᓚᐅᓐᖓ ᑭᓇᒧᑦ ᐸᓂᒋᔭᐅᖕᒪᖔᖅᐱᑦ ᐊᑖᑕᕕᓪᓗ ᐃᒡᓗᖓᓂ ᐃᓂᒃᓴᖃᖅᐹ, ᐅᕙᑦᑎᓐᓄᑦ ᓯᓂᒃᑕᕐᕕᒃᓴᒥᒃ?”
24ᐊᕐᖕᓇᐅᑉ ᑭᐅᕚ, “ᐱᑐᐃᓕᐅᑉ ᐸᓂᒋᕚᖓ ᒥᐅᓪᑲᐅᓪᓗ ᓇᕼᐅᕆᐅᓪᓗ ᐃᕐᖕᓂᖓᑕ.” 25ᐅᖃᕆᓪᓗᓂᒡᓗ, “ᐃᕕᒃᓱᒐᕐᖕᓂᒃ ᐱᑕᖃᖅᐳᒍᑦ ᐆᒪᔪᐃᓪᓗ ᓂᑭᒃᓴᖏᓐᓂᒃ ᓈᒻᒪᒃᑐᓂᒃ, ᐃᓂᒃᓴᖃᑦᓯᐊᖅᓗᑕᓗ ᐅᕙᑦᑎᓐᓂ.”
26ᐊᖑᑎᐅᓪᓗ ᓂᐊᖁᓂ ᐅᑯᓪᓗᒍ ᐊᑕᓂᖅ ᑐᒃᓯᐊᕐᕕᒋᕚ, 27ᐅᖃᖅᓗᓂᓗ, “ᐊᑕᓂᖅ ᓂᖅᑐᖅᑕᐅᓕ, ᐊᖓᔪᖅᑳᒪ ᐂᑉᕋᕼᐋᒻ ᒎᑎᖓ, ᑖᑦᓱᒪ ᓇᒡᓕᖕᓂᓂ ᓱᖁᓯᔪᐃᑦᑐᖅ ᐳᐃᒍᖏᒻᒪᒍ ᓱᖁᓯᔪᐃᑦᑑᓂᓂᓗ ᐊᖓᔪᖅᑳᓐᓄᑦ ᓴᖅᑭᑎᒻᒪᒍ. ᐅᕙᖓᓕ, ᐊᑕᓂᐅᑉ ᑕᓯᐅᓚᐅᖅᐹᖓ ᐊᖅᑯᒻᒧᑦ ᐊᖓᔪᖅᑳᒪ ᐃᓚᖏᑕ ᐃᒡᓗᖓᓄᑦ.”
28ᐊᕐᖕᓇᕐᓗ ᐅᓪᓚᒡᓗᓂ ᐊᓈᓇᒃᑯᒥᓄᑦ ᐅᖃᕆᐊᖅᑐᖅᐳᖅ ᑕᒪᒃᑯᓂᖓ ᑕᒤᓐᓂᒃ. 29ᕇᐱᑲᓕ ᐊᓂᖃᖅᐳᖅ ᓔᐸᓂᒥᒃ ᐊᑎᖃᖅᑐᒥᒃ; ᑖᓐᓇᓗ ᐅᓪᓚᒡᓗᓂ ᐊᓂᕗᖅ ᐊᖑᒻᒧᐊᖅᓗᓂᓗ ᐃᒥᖅᑕᕐᕕᖕᒦᑦᑐᒧᑦ. 30ᓔᐸᓂᓗ ᑕᑯᒐᒥ ᕿᖓᕐᖕᒥᐅᑕᕐᖕᒥᒃ ᐊᒡᒐᐅᒻᒥᐅᑕᓂᒡᓗ ᓇᔭᖓᑕ ᐊᑐᖅᑕᖏᓐᓂᒃ, ᑐᓴᕋᒥᓗ ᓇᔭᖓ ᕇᐱᑲ ᐅᓂᒃᑳᖅᑎᓪᓗᒍ ᐃᒫᒃ, “ᐊᖑᑦ ᑕᕝᕙ ᐅᖃᓪᓚᓚᐅᖅᑐᖅ ᐅᕙᓐᓄᑦ.” ᑕᕝᕙ ᐊᖑᒻᒧᑦ ᐂᕗᖅ; ᑕᑯᒋᓪᓗ, ᑳᒥᓕᖁᑎᖏᑕ ᓴᓂᐊᓂ ᓇᖏᖅᐳᖅ ᐃᒥᖅᑕᕐᕕᐅᑉ ᓴᓂᐊᓂ. 31ᐅᖃᖅᓗᓂᓗ, “ᐅᕙᑦᑎᓐᓄᐊᓚᐅᕆᑦ; ᖃᐅᔨᒐᒪ ᐊᑕᓂᐅᑉ ᓮᒻᒪᖅᑎᓯᒪᖕᒪᑎᑦ; ᓱᖕᒪᑦ ᓯᓚᒥ ᓇᖏᑐᐃᓐᓇᖅᐲᑦ? ᐃᒡᓗ ᐃᓂᒃᓴᓕᐅᖅᓯᒪᕙᕋ, ᑳᒥᓕᖁᑎᑎᓪᓗ ᐃᓂᒃᓴᖃᖅᓗᑎᒃ.”
32ᑕᕝᕙ ᐊᖑᑦ ᐃᒡᓗᒧᑦ ᐃᑎᖅᐳᖅ; ᓔᐸᓂᐅᓪᓗ ᑳᒥᓖᑦ ᓇᖕᒪᒃᑕᖏᑦ ᐲᔭᖅᐰᑦ, ᐃᕕᒃᓱᒐᕐᖕᓂᒡᓗ ᓂᕿᖏᓐᓂᒡᓗ ᑐᓂᓯᕕᒋᓪᓗᒍ ᑳᒥᓕᖁᑎᖏᑕ ᐱᓂᐊᖅᑕᖏᓐᓂᒃ, ᐃᒥᕐᖕᒥᒡᓗ ᐃᑎᒐᖏᑕ ᐃᓚᒋᔭᖏᑕᓗ ᐊᖑᑎᑦ ᐅᐊᓴᐅᑎᒋᓂᐊᖅᑕᖏᓐᓂᒃ. 33ᓂᕆᔭᒃᓮᓪᓕ ᐊᑐᐃᓐᓇᕈᖅᑕᐅᖕᒪᑕ, ᑖᓐᓇ ᐊᖑᑦ ᐅᖃᓕᖅᐳᖅ, “ᓂᕆᓂᐊᓐᖏᓚᖓ ᑎᓕᔭᐅᑦᔪᑎᒋᔭᓐᓂᒃ ᐅᖃᓚᐅᖅᑳᕐᖕᓇᖓ.”
ᓔᐸᓂᓗ ᐅᖃᖅᐳᖅ, “ᐊᑏ ᐅᖃᓪᓚᓚᐅᕆᑦ.”
34ᐅᖃᖅᐳᕐᓗ, “ᐂᑉᕋᕼᐋᒻ ᐱᔨᒋᕚᖓ, 35ᐊᖓᔪᖅᑳᕋ ᐊᑕᓂᐅᑉ ᓮᒻᒪᖅᑎᕐᔪᐊᖅᓯᒪᖕᒪᒍ, ᐊᔪᖅᓴᕈᓐᓃᖅᑎᓯᒪᓪᓗᓂᐅᒡᓗ; ᑐᓂᓯᕕᒋᓯᒪᓪᓗᓂᐅᒡᓗ ᓰᐱᓂᒃ ᐃᒻᒧᒃᓯᐅᒐᕐᖕᓂᒡᓗ ᐅᓄᖅᑐᓂᒃ, ᓯᐅᓪᕕᕆᓂᒃ, ᒎᓗᓂᒡᓗ, ᓯᐊᓛᓂᒡᓗ ᐊᖑᑎᓂᒃ ᐊᕐᖕᓇᓂᒡᓗ, ᑳᒥᓕᖕᓂᒡᓗ, ᓯᐅᑎᖅᑯᖅᑐᔪᓂᒡᓗ. 36ᓵᕋᐅᓪᓗ ᐊᖓᔪᖅᑳᒪ ᓄᓕᐊᖓᑕ ᐃᕐᖕᓂᖅᑖᖅᑎᓚᐅᖅᐹ ᓂᖏᐅᖑᓕᕋᓗᐊᖅᓗᓂ; ᐊᖓᔪᖅᑳᒪᓗ ᐱᔨᓕᒫᒥᓂᒃ ᐃᕐᖕᓂᓂ ᑐᓂᓯᕕᒋᓯᒪᕚ. 37ᐊᖓᔪᖅᑳᒪᓗ ᐊᖏᒻᒪᕆᒃᑎᓚᐅᖅᐹᖓ ᐅᖃᖅᓗᓂ, ‘ᐃᕐᖕᓂᕋ ᓄᓕᐊᒃᓴᖅᓯᐅᕐᖕᓂᐊᕐᖕᓇᒍ ᑬᓇᓂᒥᐅᑦ ᐸᓂᖏᓐᓂᑦ, ᓄᓇᖃᑎᒋᔭᓐᓂᑦ; 38ᐊᑖᑕᒪᓕ ᐃᓚᖏᓐᓄᑦ ᐃᓚᓐᓄᓪᓗ, ᓄᓕᐊᒃᓴᖅᓯᐅᕆᐊᕆᑦ ᐃᕐᖕᓂᓐᓄᑦ.’ 39ᐊᖓᔪᖅᑳᕋᓗ ᐅᖃᐅᑎᓚᐅᖅᐸᕋ, ‘ᖃᓄᕐᓕ ᐊᕐᖕᓇᖅ ᐅᕙᓐᓂᒃ ᒪᓕᒍᒪᖏᑉᐸᑦ?’ 40ᑖᑦᓱᒪ ᑭᐅᓚᐅᖅᐹᖓ, ‘ᐊᑕᓂᐅᑉ, ᑍᒪᓐᖓᑦ ᒪᓖᓐᓇᖅᑕᒪ, ᐂᖏᓕᖁᑎᓂ ᑎᓕᓂᐊᖅᐹ ᑕᓯᐅᖅᑕᐅᖁᓪᓗᑎᑦ ᐊᖅᑯᑎᖕᓂ; ᐃᕐᖕᓂᕐᖕᒪᓗ ᓄᓕᐊᒃᓴᖓᓂᒃ ᓇᓂᓯᔪᒫᖅᐳᑎᑦ ᓇᖕᒥᓂᖅ ᐃᓚᒋᔭᓐᓂᑦ, ᐊᑖᑕᒪᓗ ᐃᓚᒋᔭᖏᓐᓂᑦ. 41ᐅᖃᕕᒍᑎᒋᔭᓐᓂᑦ ᑭᓯᐊᓂ ᕿᓚᕈᑦᔮᖅᑕᐅᔪᒫᖅᐳᑎᑦ ᐃᓚᒋᔭᓐᓄᑦ ᑎᑭᒃᑯᕕᑦ; ᑖᒃᑯᓇᓐᖓᑦ ᕿᐱᓗᒡᕕᐅᒍᕕᑦ, ᑕᕝᕙ ᐅᖃᕕᒍᑎᒋᔭᓐᓂᑦ ᕿᓚᕈᑦᔮᖅᑕᐅᔪᒫᖅᐳᑎᑦ.’
42“ᐅᓪᓗᒥᓕ ᐃᒥᖅᑕᕐᕕᖕᒧᐊᕋᒪ, ᐅᖃᖅᑲᐅᕗᖓ, ‘ᐊᑕᓃᖅ, ᐊᖓᔪᖅᑳᒪ ᐂᑉᕋᕼᐋᒻ ᒎᑎᖓ, ᐱᓇᓱᐊᖅᑕᓐᓂᒃ ᐊᖅᑯᒻᒥ ᑕᓯᐅᕐᖕᓂᕈᕕᖓ. 43ᑕᑯᒋᑦ, ᐃᒥᖅᑕᕐᕕᐅᑉ ᓴᓂᐊᓃᒃᑲᒪ; ᐊᕐᖕᓇᒥᒃ ᐃᓅᓱᒃᑐᒥᒃ ᕾᔪᖃᖅᐸᑦ ᐃᒥᖅᑕᖅᑐᒥᒃ, ᑖᑦᓱᒧᖓ ᐅᖃᕈᒪ, ᐃᒪᖃᐅᑎᖕᓂᑦ ᐃᒥᖅᑎᐊᕐᔪᓚᐅᓐᖓ.’ 44ᑖᓐᓇᓗ ᐊᕐᖕᓇᖅ ᐅᖃᖅᐸᑦ ‘ᐃᒥᕆᑦ, ᑳᒥᓕᖁᑎᑎᓪᓗ ᐃᒥᖅᑎᓐᓂᐊᕆᕙᒃᑲ.’ ᑕᕝᕙ ᑖᓐᓇᐅᓂᐊᖅᐳᖅ ᐊᕐᖕᓇᖅ ᐊᑕᓂᐅᑉ ᓂᕈᐊᖅᑕᖓ ᓄᓕᐊᒃᓴᐅᖁᓪᓗᒍ ᐊᖓᔪᖅᑳᒪ ᐃᕐᖕᓂᖓᓄᑦ. 45ᓂᐱᖃᖏᓪᓗᖓᓕ ᑐᒃᓯᐊᕐᖕᓂᕋ ᓱᓕ ᐃᓱᓕᓚᐅᕐᖕᓇᒍ, ᑕᑯᒋᑦ ᕇᐱᑲ ᕾᖅᑲᐅᕗᖅ ᐃᒪᖃᐅᑎᒥᒃ ᐃᖅᓱᒡᓗᓂ; ᑕᐅᓄᖓᓗ ᐃᒥᖅᑕᕐᕕᖕᒧᐊᖅᓗᓂ ᐃᒪᖃᐅᑎᓂ ᐃᒻᒥᕇᕐᖕᒪᒍ, ᐅᖃᐅᑎᖅᑲᐅᕙᕋ, ‘ᐃᒥᖅᑎᑦᓱᓐᓇᖅᐱᖔ.’ 46ᑐᐊᕕᖅᓗᓂ ᐃᖅᓱᒃᑕᓂ ᐲᖅᓗᓂᐅᒃ ᐅᖃᖅᑲᐅᕗᖅ, ‘ᐃᒥᓕᕆᑦ, ᑳᒥᓕᖁᑎᑎᑦᑕᐅᖅ ᐃᒥᖅᑎᓐᓂᐊᕆᕙᒃᑲ.’ ᑕᕝᕙ ᐃᒥᕇᕋᒪ, ᑳᒥᓕᖁᑎᒃᑲ ᐃᒥᖅᑎᓕᖅᑲᐅᒋᕔᑦ. 47ᐊᐱᕆᒐᒃᑯᓗ, ‘ᑭᐊ ᐸᓂᒋᕚᑎᑦ?’ ᑖᑦᓱᒪ ᑭᐅᕚᖓ, ‘ᐱᑐᐃᓕᐅᑉ ᐸᓂᒋᕚᖓ, ᓇᕼᐅᕆᐅᑉ ᒥᐅᓪᑲᐅᓪᓗ ᐃᕐᖕᓂᖓᑕ,’ ᑕᕝᕙ ᕿᖓᕐᖕᒥᐅᑕᕐᖕᒥᒃ ᑐᓂᓯᕕᒋᓕᖅᑲᐅᕙᕋ ᐊᒡᒐᐅᒻᒥᐅᑕᓂᒡᓗ ᐃᒡᓗᒃᑐᑦ ᐊᑎᑎᓪᓗᒍ. 48ᐅᑯᓪᓗᖓᓗ ᐊᑕᓂᖅ ᑐᒃᓯᐊᕐᕕᒋᓕᖅᑲᐅᕙᕋ, ᐊᑕᓂᖅ ᓂᖅᑐᖅᓗᒍ, ᐊᖓᔪᖅᑳᒪ ᐂᑉᕋᕼᐋᒻ ᒎᑎᖓ, ᑖᑦᓱᒪ ᐊᖅᑯᑎᓐᓂ ᓈᒻᒪᓈᑦᓯᐊᖅᑐᒥᒃ ᑕᓯᐅᕐᖕᒪᖓ ᐊᖓᔪᖅᑳᒪ ᐃᓚᒋᔭᖓᑕ ᐸᓂᖓᓄᑦ ᐃᕐᖕᓂᖓᑕ ᓄᓕᐊᒃᓴᖓᓄᑦ. 49ᒫᓐᓇᓕ, ᐊᖓᔪᖅᑳᕋ ᐱᓂᐊᕕᒋᔪᒪᒍᑦᓯᐅᒃ ᐅᐱᒋᓗᒍ ᓱᓕᑦᓯᐊᕐᕕᒋᓗᒍᓗ, ᐅᖃᐅᑎᓚᐅᖅᓯᓐᖓ; ᑍᒤᖏᑉᐸᓪᓗ, ᐅᖃᑦᓯᐊᖅᓗᓯ, ᑕᕝᕙ ᓴᖑᓂᐊᖅᐳᖓ ᑕᓕᖅᐱᒧᑦ ᓴᐅᒥᒧᓪᓘᓐᓃᑦ.”
50ᑕᕝᕙ ᓔᐸᓂᒃᑯᒃ ᐱᑐᐃᓕᒃᑯᒃ ᑭᐅᕘᒃ, “ᑕᒪᓐᓇ ᐊᑕᓂᕐᖕᒥᑦ ᐱᓯᒪᖕᒪᑦ; ᐅᕙᒍᓪᓕ ᐅᖃᒃᑲᓐᓂᕈᓐᓇᓐᖏᓚᒍᑦ ᐱᐅᖏᑦᑐᒥᒃ ᐱᐅᔪᒥᒡᓘᓐᓃᑦ. 51ᑕᑯᒋᑦ, ᑕᕝᕙ ᕇᐱᑲ ᓵᑦᓯᓐᓃᑉᐳᖅ; ᓇᒃᓴᖅᓗᒍ ᐊᐅᓪᓚᕈᓐᓇᓕᖅᐳᑎᑦ, ᐊᖓᔪᖅᑳᕕᑦ ᐃᕐᖕᓂᖓᑕ ᓄᓕᐊᖅᑖᕆᓕᖅᓕᐅᒃ, ᐊᑕᓂᐅᑉ ᐱᖁᔨᓯᒪᓂᖓ ᒪᓕᒡᓗᒍ.” 52ᐂᑉᕋᕼᐋᒻᓕ ᐱᔨᖓᑕ ᑕᒪᓐᓇ ᑐᓴᕋᒥᐅᒃ, ᓄᓇᒧᑦ ᐅᑯᕗᖅ ᐊᑕᓂᖅ ᑐᒃᓯᐊᕐᕕᒋᓪᓗᒍ. 53ᓇᒃᓴᖅᓯᒪᔭᒥᓂᒃ ᐲᔧᓕᖅᐳᖅ ᓯᐅᓪᕕᕆᓂᒃ ᒎᓗᓂᒡᓗ ᓴᓇᓯᒪᔪᓂᒃ, ᐊᓐᓄᕌᓂᒡᓗ, ᕇᐱᑲᒧᓪᓗ ᑐᓂᓪᓗᒋᑦ; ᐊᓂᖓᓄᑦᑕᐅᖅ ᐊᓈᓇᖓᓄᓪᓗ ᑐᓂᓯᕗᖅ ᐊᑭᑐᔪᒃᓴᔭᓂᒃ.
54ᑕᕝᕙ ᑖᓐᓇ ᐃᓚᒋᔭᖏᓪᓗ ᐊᖑᑎᑦ ᓂᕆᓕᖅᐳᑦ ᐃᒥᖅᓗᑎᒡᓗ, ᑕᕝᕙᓂᓗ ᓯᓂᒃᑕᖅᐳᑦ ᐅᓐᓄᐊᒥ. ᐅᓪᓛᒃᑯᓪᓕ ᒪᑭᓐᓇᒥᒃ, ᐊᖑᑦ ᐱᔨ ᐅᖃᓕᖅᐳᖅ, “ᐊᖓᔪᖅᑳᓐᓄᑦ ᐊᐅᓪᓚᕈᓐᓇᖅᑎᓕᖅᓯᓐᖓ.”
55ᐊᓂᖓᓕ ᐊᓈᓇᖓᓗ ᐅᖃᖅᐳᒃ, “ᐊᕐᖕᓇᖅ ᐅᕙᑦᑎᓐᓃᒃᑲᓐᓂᑬᓐᓇᕐᓕ, ᐅᓪᓗᓂᒃ ᖁᓕᓂᒃ, ᑭᖑᓂᖓᒍᑦ ᐊᐅᓪᓚᕈᓐᓇᖅᓯᓂᐊᖅᐳᖅ.”
56ᑖᓐᓇᓕ ᐅᖃᖅᐳᖅ, “ᓄᖅᑲᖓᑎᓐᓂᐊᕐᖕᓇᓯᓐᖓ; ᐊᑕᓂᐅᑉ ᐃᖏᕐᕋᓂᕋ ᓈᒻᒪᓈᑦᓯᐊᖅᑎᓯᒪᖕᒪᒍ; ᐊᐅᓪᓚᖅᑎᓕᖅᓯᓐᖓ ᐅᑎᕐᖕᓂᐊᓕᕋᒪ ᐊᖓᔪᖅᑳᓐᓄᑦ.”
57ᑖᒃᑯᐊ ᐅᖃᖅᐳᑦ, “ᐊᕐᖕᓇᖅ ᕾᖁᓗᒍ ᐊᐱᕆᓚᐅᖅᓚᕗᑦ.” 58ᕇᐱᑲᓗ ᕾᖁᒐᒥᑦᔪᒃ ᐊᐱᕆᕚᑦ, “ᐅᓇ ᐊᖑᑦ ᐊᐅᓪᓚᖃᑎᒋᔪᒪᕕᐅᒃ?”
ᑭᐅᕔᑦ, “ᐊᐅᓪᓚᖃᑎᒋᔪᒪᕙᕋ.”
59ᑍᒤᒻᒪᑦ ᓇᔭᑎᒃ ᕇᐱᑲ ᑲᒪᔨᖓᓗ ᐊᐅᓪᓚᖃᑕᐅᑎᑉᐹᑦ, ᐂᑉᕋᕼᐋᒻ ᐱᔨᖓᓄᑦ ᐃᓚᒋᔭᖏᓐᓄᓪᓗ. 60ᑖᒃᑯᐊᓗ ᕇᐱᑲ ᓮᒻᒪᖅᑎᑉᐹᑦ ᐃᒫᒃ ᐅᖃᖅᓗᑎᒃ,
“ᓇᔭᒃᐳᑦ, ᐅᓄᖅᑐᕐᔪᐊᓄᑦ ᐊᓈᓇᐅᓕᕆᑦ ᓈᓴᒐᒃᓴᐅᖏᑦᑐᓄᑦ;
ᑭᖑᕚᒃᓴᑎᓪᓗ ᐱᖃᕈᒫᖅᓕᑦ ᐊᑭᕋᖅᑐᖅᑎᖏᑕ ᐃᑎᖅᑕᕐᕕᖏᓐᓂᒃ!”
61ᑕᕝᕙ ᕇᐱᑲ ᐱᔨᖏᓪᓗ ᐊᕐᖕᓁᑦ ᐃᓅᓱᒃᑐᑦ ᐸᕐᖕᓇᓕᖅᐳᑦ, ᑳᒥᓕᖕᓂᓗ ᐃᑭᒪᓪᓗᑎᒃ ᐊᖑᑦ ᒪᓕᒃᐹᑦ; ᑍᒤᒻᒪᑦ ᐱᔨᐅᑉ ᕇᐱᑲ ᓇᒃᓴᖅᐹ, ᐊᐅᓪᓚᓕᖅᓗᑎᒡᓗ.
62ᐂᓴᑭᓕ ᑎᑭᓚᐅᖅᐳᖅ ᐱᐊᕐ-ᓚᕼᐂ-ᕈᐂᒥᑦ, ᓄᓇᖃᓕᖅᓗᓂᓗ ᓯᕿᓂᐅᑉ ᓇᓛᓂ ᓂᒋᑉᒥ. 63ᐂᓴᑭᓗ ᐊᓂᕗᖅ ᐅᓐᓄᓕᕋᑖᖅᑎᓪᓗᒍ ᐃᓱᒪᒃᓴᖅᓯᐅᕈᒪᓪᓗᓂ ᐱᕈᖅᓰᕕᖕᒥ; ᑕᑯᓴᕋᒥᓗ ᑕᑯᓕᖅᐳᖅ ᑳᒥᓕᖕᓂᒃ ᑎᑭᓕᖅᑐᓂᒃ. 64ᕇᐱᑲᓗ ᑕᑯᓴᕋᒥ, ᐂᓴᑭ ᑕᑯᒐᒥᐅᒃ, ᐃᑭᒪᕕᒋᔭᒥᓂᑦ ᑳᒥᓕᒥᑦ ᐊᖅᑲᖅᐳᖅ; 65ᐱᔨᓗ ᐊᐱᕆᕚ, ᐅᖃᖅᓗᓂ, “ᑭᓈᓐᓇ ᐊᖑᑦ ᐱᕈᖅᓰᕕᒃᑯᑦ ᐱᓱᒃᐸ ᐅᕙᑦᑎᓐᓂᒃ ᐸᕐᕆᐊᖅᑐᖅ?”
ᐱᔨᐅᑉ ᑭᐅᕚ, “ᐅᓇ ᐊᖓᔪᖅᑳᕋ.” ᑕᕝᕙ ᕇᐱᑲᐅᑉ ᑮᓇᕐᖕᒥᓄᑦ ᑖᓗᑕᓂ ᑎᒍᓪᓗᒍ ᑮᓇᓂ ᒪᑐᐊᖅᐹ.
66ᐱᔨᐅᓪᓗ ᐂᓴᑭ ᐅᓂᒃᑲᐅᑎᕚ ᑕᒤᓐᓂᒃ ᐱᓂᐊᕐᖕᓂᕆᓚᐅᖅᑕᒥᓂᒃ. 67ᑕᕝᕙ ᐂᓴᑭᐅᑉ ᕇᐱᑲ ᑐᐱᕐᖕᒧᐊᕈᑎᕚ ᐊᓈᓇᖓᑕ ᓵᕋᐅᑉ ᐊᖏᕐᕋᕆᖃᑦᑕᓚᐅᖅᑕᖓᓄᑦ, ᓄᓕᐊᖅᑖᕆᓪᓗᒍᓗ; ᐂᓴᑭᐅᓪᓗ ᕇᐱᑲ ᓇᒡᓕᒋᒻᒪᕆᒃᐹ, ᐂᓴᑭᓗ ᒪᓂᒍᖅᑕᐅᕗᖅ ᐊᓈᓇᒥ ᑐᖁᓂᖓᑕ ᑭᖑᕐᖓᓂ.
المحددات الحالية:
ᒨᓯᓯ ᓯᕗᓪᓖᑦ 24: EAIB
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Eastern Arctic Inuktitut Bible © Canadian Bible Society, 2012, 2021-2023.