N'KANGULU WUMOONË

Mu mbingu menë-ngwaali, bëkuluutu booso bë singangë-Nzaambi i mëkakëtë më mboongu baatu kukotë fuundu mu kutabë Yeesu lufwa. Bamani kun'kaangë bikonyi, baawu kun'natë i bisë ke n'vakulë ke Pilaatë.


Zuda wunë wun'vakulë, kwayuwu ti batabë Yeesu lufwa. Naandi kunyotëkënë i wusë vutulë mëkumë-tatu më binkongulu bi mboongo, kuke bëkuluutu bë singangë-Nzaambi i mëkakëtë. Naandi wusë tubë : « Miinu yasumukë, yavakulë meengë më mwaanë mpeembi yi mpeso. » Baawu bisë tubë : « Mbici mu beeswe? Njeeyi mëkutalë! » Kwabumi binkongulu bi mboongo mu civingë cisaantu, naandi wusë volikë i ke yilelikë. Bëkuluutu bë singangë-Nzaambi kunoongë binkongulu i bisë tubë : « Beeso tukeeli yi n'swa ko mu kusibuundë yimunë mëkabu më n'zo-Nzaambi, cibilë, oloolo luvunu lu meengë. » Bamani kudedikini mitimë, mu simboongo beenë bisë suumbë solë cifikulë sizuungu situmë, mu kuzikilaangë beenyi. Mati mu lyaawu, solë beenë bëyitelë « Solë meengë » tee cibubwayi. Mu bwaawu busë vangënë lyo litubë Yelemi m'bici : « Baawu bëboongë mëkumë-tatu më mboongo — luvunu lo baanë bë Islayeelë bëzitikë. — Baawu bisë sivaanë mu kusuumbë solë cifikulë sizuungu situmë, bunë Fumu kun'tuminë. »


Yeesu wakun'tabu fë meeso më n'tinu, wunë wun'yufulë : « Njeeyi wuli n'tinu Sizwiifë? » Yeesu kun'cikuninë : « Njeeyi, walitubë. » Bunë bëkuluutu bë singangë-Nzaambi i mëkakëtë bëlën'fuundë, naandi sye vutulë cin'velë ko. Pilaatë wusë n'kaambë : « Njeeyi wusë n'kuwu ko mamooso bëlë mu ke kufundilaangë? » Kasi Yeesu mbeembu kuvutulë ve mu lyosuku libuungu i bwaawu, n'tinu wusë tulumukë.


Mu kadë n'saangu wu Paakë, n'tinu wabë yiciipë ci kubëbasilaangë wumweekë mu buloko, wunë nkoongë wulëzolaangë. Munë ntaangu beenë, baawu babë yi mungë buloko wabë ndumu, bëlëteelë Yeesu li Balabaasë. Abu babë lukoongu, Pilaatë wusë bëkaambë : « Nani luzolisi yilubasilë, Yeesu li Balabaasë voo Yeesu bën'teelë Kliistu? » Licyelikë Pilaatë wulëzaabaangë kwaandi mu n'soci bëyin'vakulilë. Ntaangu Pilaatë kukalilë ku cinzonzi, n'kamaandi wun'filë ciluumbi mu kun'kaambë : « Keelë wulëkotë mu lyaambu li muutu wu mpeembi yi mpeesu, kasi Cibubwayi, miinu, mu ndoosi, yibe monë mpasi beenë mu cibilë cyaandi. »
Bëkuluutu bë singangë-Nzaambi yi mëkakëtë më Sizwiifë bisë lubulë nkoongë baatu mu kuloombë bëbëbasilë Balabaasë i mu kuvangisi kuvoondë Yeesu. N'tinu kubulë mbeembu mu kubëyufulë : « Nani mu babë bwaali lun'toombë yilubikilë? » Baawu kucikunë : « Balabaasë! » . Pilaatë kubëkaambë : « Miinu kuvangilë buni mu Yeesu awu bën'teelë Kliistu? » Babooso kucikunë : « Kwe baandu fë kuluusu! » Pilaatë wusë bëyufulë : « Libi mbici ku vangisye? » Baawu kulutilë kulosukë : « Kwe baandu fë kuluusu! » Pilaatë kwamoni ti wusë m'podi kutubë lin'viipë ko, tiilyoko ncyeembi ke lutilaangë, na kuboongë masi, wusë sukulë myooko fë meeso më nkoongë. Naandi wusë tubë : « Miinu yili mpeembi yi mpeeso mu meengë më n'zitu owo. Lyaawu olyo libe luyekiminë! » Nkoongë yooso yi baatu kulosukë : « Meengë maandi mëtyamukë mu beeso yimunë mu baanë biitu! » Mu bwaawu, Pilaatë kube yobulilë Balabaasë i fë mbusë bisë vivëdë Yeesu siswaali sinzimbulë-mbumë, naandi wusë bëlekulilë Yeesu mu kwe baandu fë kuluusu.


Mësodaadi më Pilaatë bisë natë Yeesu ku luumbu lu n'tinu, i bisë n'zukë ke nkoongë yooso yi mësodaadi. Ban'vuuli n'vwaatu, baawu bisë n'fukë ciyuungë cibeengë. Baawu kuvaangë mpu seendë, kun'vwiikë fë n'tu, i bisë n'tuulë liveeso fë kooko ku mëbakëlë. Baawu ke n'dyeengaangë, ke fukumaangë fë ntwaalaandi i kutubë : « Mëleembë omee, a n'tinu Sizwiifë! » Baawu ke n'taminaangë matë i kuboongë liveeso ke n'kongetaangë mu n'tu. Bamani kun'dyeengë, baawu kun'vuulë ciyuungë, kun'vwiikë n'vwaatwaandi i bisë n'natë mu kwe baandu fë kuluusu.


Fanë ba basikilë ku livulë, baawu bisë dyengënë musë Sileenë, lizinë Simu i bisë n'kacikë mu kunatë kuluusu yi Yeesu. Batuuci fë mbiinji bën'telaangë Ngolëgotë, dedë ti « Mbiinji Lidokusu li N'tu ». Baawu bën'vaanë viinyi yi nkakutu mu kunwa. Kasi naandi wusye vitikë ko mu kuyinwa. Bam'baandi fë kuluusu, baawu bëbulë njekë bisë kabësënë n'vwaatwaandi. Bisë kalë foofë mu kun'luungë. Fë mbatë n'twaandi, bëtuulë libayë bësonikë : « Awuuwu Yeesu, N'tinu Sizwiifë. » Bilyaani byooli bibaandu fë tukuluusu, fë nteku Yeesu, wumweekë ku mëbakëlë i wumesë ku mëcyeetu.
Banë bëlëvyookë faawu ke n'fiingaangë, ke nyinjyaangë n'tu. Baawu bëlëtubaangë : « Njeeyi wuzolë kutyamunë n'zo-Nzaambi i kuyitulikë fë bilumbu bi tatu, we yivuuci njeveekë! Mooti wuli Mwaanë Nzaambi, we kulukë fë kuluusu! » Bo bumweekë, bëkuluutu bë singangë-Nzaambi, miloonji n'kaakë i mëkakëtë më Sizwiifë bëlë ke n'dyeengaangë yivaawu ke tubaangë : « Naandi wuvuuci bën'ka, naveekë kupodi ve kuyivuucye! Mooti na wuli n'tinu Islayeelë, kwe kulukë buyifanwabu fë kuluusu, bwiinji beeso tuta maanë mu naandi. Naandi wufyaatë mu Nzaambi i wutubë : “Miinu yilë Mwaanë Nzaambi!” Ee, ningë Nzaambi wun'zolisi, kwe n'vuuci buyifanwabu! » Bilyaani bibaandu yaandi fë kuluusu bëlën'fiingaangë yivaawu bo bumweekë.


Fë ntaangu-mbatë, citoombi cisë batë si yakë yooso i cisë ziingë tee fë zoolë kuumi yin'taanu mu m'bukulu-bwiisi. Fë byeluku zoolë yivwa, Yeesu wusë losukë mu mbeembu nkamu : « Eli, Eli, lama sabakataani? » — Dedë mweekë : « Nzaambyaami, a Nzaambyaami! Mbici wakum'buminë? » — Bën'viipë mu banë babë faanë, bunë bayuwu, bisë tubë : « Naandi watelë Eli! » Wumweekë mu nkoongaawu, kukumbelëlë mu ke boongë lidedenvë, kulibwiikë mu viinyi nkakutu i wusë likwiikë mu liveeso, kun'vaanë mu kunwa. Kasi bëmesë bëlëtubë : « Biikë! Tumonaanu mooti Eli syawiisë kun'vuuci. »
Yeesu kube losukë fë vyaasi yin'ka mu mbeembu nkamu i wusë fwa. Mo më ntaangu beenë, n'lelë wabë kuciviingë wusë benzikë kutoninë ku yilu tee fësi. N'toto kututumukë, mëmanyi më ngooto kwanzikë, mëbuumbë misë zibukë i mpaapë baatu babë sisaantu sifwa sivulumukë. Baawu bëbasikë mu mëbuumbë i fë luvulumuku lu Yeesu, bisë kotë ku Yelusaleemë livulë li saantu, mpaapë baatu be bëmonë. N'kuluutu-mësodaadi wu Loomë yi bo babë yaandi mu kuluungë Yeesu, bamoni lututumuku lu n'toto i manë mëlëvyookë, boomë bunenë kubëkotilë. Baawu bëtubë : « Muutu owo wabë nguliku Mwaanë Nzaambi! » Mpaapë bëcyeetu babë foofë, bëlëtalilaangë cinaanu i bëlëlaandë Yeesu, kutoonë ku Ngalilee mu kun'salilë. Munë nkoongaawu, mwabë Maali li Magëdaalë, Maali nguli Zaakë i Zozeefë i mamë baanë bë Zebedee.


Mësikë matuuci, kubasikë libakëlë li cisinë, li musë Alimaatë, bëlëteelaangë Zozeefë, wabë yivaandi cilaanzi ci Yeesu. Naandi wuye monë Pilaatë i wun'loombë nyitu yi Yeesu. Mu bwaawu Pilaatë wusë tumisi bën'vaanë yaawu. Zozeefë wusë boongë vuumbi, kuyiziingë fë lilasolë li mpeembi. Naandi wusë yituulë mu libuumbë limoonë, kuvangisi kutobulë limanyi li ngooto. Kumanoofo, na wukundubulë limanyi linenë fë nkotulu libuumbë i wusë ke yendaangë. Maali li Magëdaalë i Maali limesë babë foofë, bëkalë fë ntwaalë libuumbë.

Cilumbu cilandëkënë, cyabë cilumbu ci lubelukulu ci saba, bëkuluutu bë singangë-Nzaambi yimunë Sifalisyaanu bëyeendë babooso fë cimweekë ke Pilaatë i bisë tubë : « A fumu, beeso twatandëkënë ti citombikini ci muutu owo, abu wabë moonyi wutubë : “Fë m'busë bilumbu bi tatu, miinu yin'vulumukë.” Mu cibilë ocyo, we tumisi bëluungë libuumbë tee cilumbu cin'tatu, mu kumaangë bilaanzi kukwiibë nyitu i kwiisë kukaambë mboongu baatu : “Na wavulumukë mu nkoongë bëfwa.” Lupuutu be loolo lu siitu lulëvyookë kudiifë yi lun'tetë. » Pilaatë wusë bëkaambë : « Beeno luke yi mësodaadi mën'luungaangë. Yendaanu lwe kun'luungaanu bunë lum'balilë. » Baawu bisë kweendë mu ke luungë libuumbë : kukandikilë limanyi lilëbatë libuumbë i bisë tuulë biluungë.

Listen to Matye 27