These audio recordings contain books of the Rvwàng New Testament, in the GvrayShànshér Mòngkà(GSM) translation.

Gvray Shànshér Mòngkà Kagvp Àngshv́r (Rvwàng) &#8471; SIL Global and Rvcv́ngcè Kàru Gomidi Kristu Shvngø̀mré 2026.
© 2025Rvcv́ngcè Kàru Gomidi Kristu Shvngø̀mré.

Gvray Shànshér Mòngkà Kagvp Àngshv́r

Weyv́ng kèní àngmaq shvngbe búng nø̀, Yesu sv̀ng Pilat mv́rdv̀ng yv́ng shøl bǿà. Àngmaqí, “Yapèí nø Kesar dànipè sv̀ng kùyà gúnlv́m vgámò we nv̀ng, Àng nø Kristu a:lò pè koqkv́m ǿngàe wa shǿnshì weí, nøngmaq dvcì sv̀ng shèmà:nìe,” wa Àng sv̀ng koòe.
Wekvt Pilatní Yesu sv̀ng, “Nà nø Yuda vsv̀ngrìò koqkv́m èí ó?” wa rø:tnòe.
Yesuí, “Nàí ni èshø̀n bǿà,” wa vtá:nòe.
Pilatní shvrúngshú vjìrì nv̀ng vsv̀ng loksokrì sv̀ng, “Yapè taq ngàí pà mvrà gø mvyv̀ngò,” a:lòe.
Íwe, “Yapèí nø Galili rvgaq kèní pà:ngò nø̀ yazàng høqshaq shvngø:tnò weí, Yuda móngkøp taq bashàrì sv̀ng vjángshì dvzá:ròe,” wa àngmaq mvdøng mvdaq kvtshìe.
Pilatní yakà tá bǿà kvt, Yesu nø Galili vsv̀ng í má wa rø:tnòe. Yesu nø Herotní ø:pmò rvgaq vsv̀ng í we Pilatní shá bǿà kvt, Àng sv̀ng Herot yv́ng shøl dvzv́r bǿà. Herot gø wenila taq Yerusalem yv́ng vle.

Herot nø Yesu sv̀ng yv̀ng bǿà kvt gvzà dvbù lú:ngì. Pàwá wani Yesu shv̀ngkà táò nø̀ Àng sv̀ng yv́ng mvyǿ we mvme vlé ráì. Àng nø Yesuí wàò we mvshv́lpvrá tiqpv̀npv̀n yv́ng lúnlv́m vlǿmshìe. Wervt Herotní Yesu sv̀ng mvme kà rø:tnò we, Yesu nø tiqkà gø màtv́nshì. Shvrúngshú vjìrì nv̀ng dvrá svrarì nø rip sórí gvzà dvkv́ngshì nø̀ Àng sv̀ng koòe. Herot nv̀ng àng cìlcèrìí Àng sv̀ng màpǿpǿ dvshá dvcø a:lò nø̀, koqkv́m bèlaq tiqdùng dvgwaò dá:ngí, Pilat yv́ngsv̀ng dvtv̀ng bǿà. Vzv̀ng dvgvp Herot nv̀ng Pilat nø ngv̀nshà í yv̀ng we, weni kèní àngní nø rv̀mnvng íá:mì.

Wekvt Pilatní nø, shvrúngshú vjìrì, Yuda vsv̀ng shølshúrìí nv̀ng bashàrì sv̀ng dvkø̀ma:tnà dá:ngí, “Vsv̀ng yapè nø bashàrì kaq shvmànshú íe, èwànø̀ng nø̀ ngà yv́ngsv̀ng èshølvtshà. Nàmaq mv́rdv̀ngø Àng sv̀ng ngàí ni gùnò nø̀nggø, nàmaqí ènav́mnø̀ng we mvrà tiqciq gø lá mvlúnò. Herotní gø pà mvrà gø mvyà:ngò rvtnø̀, Àng sv̀ng nøngmaq yv́ng vtv̀nga:tnà. Eyv̀ngnø̀ng, yapèí nø shí vpǿ we tiqpv̀n gø mvwà dárà. Wervt ngàí Àng sv̀ng vdip dv̀ng shvlànglv́m íe,” a:lòe. [Nǿng vrv̀m Shvle Bóy taq à:ngí tung rung vsv̀ng tiqgǿ àngmaq dvpvt shvlángaò we vtóng vle].
Íwe àngmaq shvngbe ròwa, “Yapè sv̀ng èsha:tnò nø̀, Baraba mv̀ng shèlángashà!” wa vkiq lú:ngì. (Baraba nø wamà taq vjángshìlv́m dvbungò nø̀ vsv̀ng shvt dvkà rvt tung rú:ngò pè íe). Pilat nø Yesu sv̀ng shvláng mvyǿ rvt, vrá tiqkvt àngmaq sv̀ng a:lòe. Ínìgø, “Àng sv̀ng wurgang taq nàtaqò, nàtaqò!” wa vkiqe.
Pilatní vshø̀m kvt wakvt, “Pàwá lè? À:ngí kapà mvrà wà bǿà má? Àng taq shí vpǿ we mvrà ngàí pà gø lá mvlúnò. Wervt Àng sv̀ng vdip dv̀ng shvlànglv́m íe,” a:lòe.
Íwe àngmaq nø téwa shaqmèí vkiq nø̀ Yesu sv̀ng vtaqlv́m rvt mvdøng mvdaq røtshìe. Lv̀ngdø̀m taq, àngmaq vkiq we shaqí dv́ngké bǿà. Wervt àngmaq røtshì dø wáalv́m Pilatní kà ra:tnòe. Vjángshìlv́m dvbungò nø̀ vsv̀ng shvt dvkà rvt tung taq rú:ngò pè, àngmaq røtshì pè sv̀ng à:ngí shvlángaòe. Íwe Yesu sv̀ng nø, àngmaq shóngshì dø wàò nø̀ dvshílv́m dvpvt à:ngí tvle bǿà.


Cilcèrìí Yesu sv̀ng shøl bǿà dvgvp, vtv́r rvgaq kèní dìa:tnì we Kureni wamà pè Simon sv̀ng àngmaqí ta:pmò nø̀, àng mvdv̀m wurgang lòng ha:pmò dá:ngí Yesu mèpvngpvng baq dvzá:ròe. Bashàrì loksok tiqmvdòí gø Àng mèpvng cà:nòe. Svmaré tiqmvdò gø Àng dvpvt ngø:tnò nø̀ rv̀ngshvng wa sórí zv̀ne. Yesu wv́l poshì nø̀, “Yerusalem cèmèlaé, Ngà dvpvt nø mèngǿnø̀ngni. Nàmaq vdè nv̀ng nvcǿ nvcèrì dvpvt mv̀ng èngǿnø̀ng. Kadø íe wani, ‘Cv̀mré mvgv̀l dá:rò we, nong màdvcøqshì dvr we svmarérì nø ìshøt vle,’ wa shø̀nlv́m àngni tuq rae. Wervtø̀ taq,

àngmaq nø shìgùngrì sv̀ng,
‘Nøngmaq mvdv̀m nàzeq daqshà,’
mvrùlrì sv̀ng, ‘Nàpaq daqshà,’ wa røtshì longe.

Pàwá wani, shǿng vzø̀m sv̀ng dv́ng àngmaqí yadv́ng pv̀n wàò nìnø, shǿng shúng sv̀ng téwa kadø wà lú:ngò má?” a:lòe.
Àngmaqí dvgádø vsv̀ng mvchá vnípè sv̀ng gø Yesu nv̀ng tiqdø shvtlv́m rvt shøl bǿà. Vgo Sharø tǿò zàng tuq ráì kvt, weyv́ngø Àng sv̀ng wurgang taq vtaqòe. Vsv̀ng mvchá pèní sv̀ng gø, vbàngpa tiqpè, vgwépa tiqpè vtaqòe. Wekvt Yesuí, “Vpèá, àngmaq mvrà èchutnaò. Pàwá wani àngmaqí wàò long sv̀ng àngmaqí mvsháò,” wae. Cìlcèrì nø Àng belaq vwalshìlv́m shvwøn dóòe.
Bashàrì nø weyv́ng rip sórí yadv́ng pv̀n shvngbe sv̀ng dvjaqòe. Yuda vsv̀ng shølshúrì nø vhøshì sórí, “Dvgárì sv̀ng nø shvlu:tnò we, Gvrayí rvcv́ngshaq pè Kristu ni í nìnø, Àng vdè laq shvlutshì lè,” wa dvcøòe.
Cìlcèrìí gø Àng sv̀ng dvshá dvcø a:lòe. Àngmaq dìa:tnì nø̀ bìmtì mvcat shvaqò sórí, “Nà nø Yuda vsv̀ngrì Koqkv́mpè ni èí nìnø, Nà vdè shèlutshì lè!” a:lòe.
Yesu mvdv̀m ram kàrukø̀m taq, “Yapè nø Yuda vsv̀ngrìò Koqkv́m íe,” wa Àng sv̀ng koò kà taq vruòe.
Wurgang taq vchúng we vsv̀ng mvchá pèní kèní tiqpèí Àng sv̀ng, “Nà nø Kristu mèí má? Nà vdè nv̀ng nílvngà sv̀ng shèlutshà lè,” wa shvyǿ:mòe. Íwe wápèí àng sv̀ng nga:nò nø̀, “Nà gø Àng døni shìlv́m kà vngéshaq èí ke, Gvray kaq mèsère má? Ngàní nø shí vdushìe. Pawá wani ngàníí wà bǿshà rì rvt, lún vdu lòng lúnshò we íe. Íwe À:ngí nø màdu we pàgø mvwàò,” a:lòe. Wekvtrá à:ngí, “Yesuá, Nà móngdàn shvzønglv́m èdì daq dvgvp, ngà sv̀ng dvdvm èrǿnàé,” a:lòe.
Yesuí, “Ngàí jø̀ngjǿng vlvtnø̀ng, dèni Ngà nv̀ng nà nø Paradisu yv́ng tiqdø v̀lv́mshìe,” a:lòe.

Wedvgvp nø tvné vyáng rvwè í nø̀, wervtø̀ kèní nv̀mtan vshø̀mnari høq, wemóng køp døá:mì. Nv̀m gø naqá:mì nø̀, Shànshér Tø̀ngnø vdòng dvkøq laqtun dùng gø talàm díngá:mì. Wekvt Yesu nø, “Vpèá, Ngà pvlàcè nø Nà wur taq tvlengshø̀nge,” wa shaqmèí vkiq dá:ngí, shaq dvtná:mì.
Cìlcè tiqyá øpshú dùpèí yadø bø̀ná:mì rì sv̀ng yv̀ng bǿà kvt, Gvray dvgùng shvri:ngò sórí, “Yapè nø jø̀ngjǿng døngman vsv̀ng í dá:rì,” wae. Wurgang taq vtaqò lòng yv̀nglv́m dvkǿmshì ráì we vsv̀ng loksokrìí wedø íá:mì rì sv̀ng yv̀ng bǿà kvt, gv̀ng vnv́lshì sórí loá:mì. Íwe Yesu ó vsháke rì shvngbe nv̀ng Galili rvgaq kèní Àng mèpvng cv̀n daqà we svmarérì nø, cvmaq vrúm yv́ng rip nø̀ yadv́ng pv̀n sv̀ng yà:ngòe.


Wedvgvp Shaqré Lipòngmè taq Yosep tǿò we tiqpè vbáe. Àng nø vsv̀ng shvlá nv̀ng døngman pè íe. Shaqré Lìpòngmèò kàciq nv̀ng wàa:pmà lòng sv̀ng gø nøt màrávp. Àng nø Yuda rvgaq Arimatia mvrìngpè í nø, Gvray móngdàn tuq daq we sv̀ng caò we tiqpè íe. Àng nø Pilat yv́ngsv̀ng di nø̀ Yesu vnàng rø:tnòe. Wekvt Àng vnàng kaò dá:ngí, vzi shv́nàng laqtu:ní du:pmò nø̀, tiqgǿ gø shini mvkǿ:mò we vchuqshaq lóngdùng dvgv̀m vdòng vyà:lòe. Weni nø Narni níshì ráì rvt Dvgǿshìlv́m Àngni íe.
Galili rvgaq kèní Yesu nv̀ng tiqdø dì daqì we svmarémèlaí Yosep mèpvng cv̀n bǿà nø̀, lóngdùng dvgv̀m nv̀ng Àng vnàng kadø vyà:lò we sv̀ng yà:ngòe. Wekvt àngmaq vtv́ngá:mì nø̀ ngórdorcì dvgø̀òe. Íwe Gvray dvkv́mkà cà:nò nø̀ Narni taq àngmaq narshìe.

Listen to Luka 23