These audio recordings contain books of the Rvwàng New Testament, in the GvrayShànshér Mòngkà(GSM) translation.

Gvray Shànshér Mòngkà Kagvp Àngshv́r (Rvwàng) &#8471; SIL Global and Rvcv́ngcè Kàru Gomidi Kristu Shvngø̀mré 2026.
© 2025Rvcv́ngcè Kàru Gomidi Kristu Shvngø̀mré.

Gvray Shànshér Mòngkà Kagvp Àngshv́r

Narni mèpvng nár nv̀mlat ni sháng mvgágá svmarémèla nø àngmaqí dvgø̀a:pmà we ngórdorcìrì lá:ngò sórí lóngdùng dvgv̀m sv̀ng dìá:mì. Dvgv̀m shø lóngkø̀m nø kukaq tvrishaq í da we àngmaqí yv̀ng bǿà. Lóngdùng vdòng sv̀ng àngmaq gòngá:mì nìnø, Kàngpè Yesu vnàng mvyà:ngò. Welòng rvt àngmaq dvdáshì dvgvp, shorshor wa kvlàng we belaq gwashì we vnípè àngmaq shvnvngø chvnvnv́n rip daqì. Àngmaq shérvkaq svreá:mì nø̀ vbatø̀m sv̀ng kǿng kupshì ke, wepèníí, “Cúnshì pè sv̀ng shìrì dvhø̀ø pawá èlánø̀nge? Àng nø yayv́ng màvl, zuná:mì! Galili rvgaq vl dvgvp À:ngí shø̀na:pmà kàrì sv̀ng dvdvm èrǿnnø̀ng. ‘Vsv̀ng Àngcèpè nø mvrà vl rì wur kaq tvleò nø̀ wurgang taq vtaq bǿòe. Íwe vshø̀mni wa ni taq vrá zun longe,’ wa À:ngí dètávpshà we mø̀í má?” a:lòe. Wekvt Yesuí vla:pmà kàrì sv̀ng àngmaqí dvdvm rǿna:tnà nø̀ dvgv̀m kèní vtv́ngá:mì. Àngmaqí Tiqcé Tiqpè nv̀ng dvgárì shvngbe sv̀ng yadang shvngbe dvtáòe. Dvzv́rpèla sv̀ng yadang dvtáò rì nø, Makdvla mvrìngmè Mari, Yohana, Yaku àngmè Mari nv̀ng àngmaq ó tiqdø vl we dvgámèla gø íe. Íwe svmarérìí shø̀:nò kàrì nø vwawa dø vjoshìe lá:nò nø̀ dvzv́rpèla mvkv́m. Ínìgø Piter tv̀m búng nø̀ lóngdùng dvgv̀m sv̀ng vjèrá:mì. Àng ngǿmshì nø̀ vdòng rv́m sv̀ng dvjaqò nìnø, vzi shv́nàng laqtunrì wa vyálshì we yà:ngòe. Wervt Piter nø wedø íá:mì rì sv̀ng dvdáshì sórí, chø̀m sv̀ng loá:mì.


Weni taq ni, Yesu coqcv́n vnípè nø Yerusalem kèní shvngøt ming dv́ngte vrúm we Emmaus mvrìng sv̀ng dìá:mì. Àngní nø bø̀ná:mì we yadv́ng pv̀n dang tasv̀ng dvmv̀ne. Werì shø̀:nò nø̀ dvmv̀n ke, Yesu Àng vdè ni tvp dì ráì nø̀ àngní nv̀ng tiqdø vcv̀ná:mì. Íwe Yesu nø àngníí mvshv́l màdvzv́rshì.
Wekvt À:ngí, “Èdìshì sórí pàrì dèmv̀nshìe?” wa rø:tnòe.
Wekvt àngní nø nøt dvshà mv̀rshv̀m ríò sórí tønwa ripme. Àngní lvngà kèní Kleopa tǿò pèí, “Nà nø Yerusalemø zaqlè èwáshìa:pmì nìgø, yanila taq weyv́ng bø̀na:pmì rì sv̀ng mèsháò má?” wa vtá:nòe.
Yesuí, “Kapà bø̀na:pmì lè?” a:lòe.
Wekvt àngníí Àng sv̀ng, “Nazaretpè Yesu dang bø̀na:pmì tvrà lè! Àng nø Gvray nv̀ng bashàrì shvngbe mv́rdv̀ng taq, wàò bv̀nlì nv̀ng shø̀n kà taq nònggùn jòr we kàdvtutshú tiqpè íe. Ínìgø nøngmaq shvrúngshú vjìrì nv̀ng Yuda vsv̀ng shølshúrìí Àng sv̀ng Pilat kaq tvlea:pmà. Wekvt Pilatní shvtlv́m kàciq ra:tnò nø̀ àngmaqí wurgang taq vtaqa:pmà. Àng nø Israel dvcì sv̀ng shvlutshú íe, wa vlǿ:mì we íe. Yarì bø̀na:pmì mèpvng akvt vshø̀mni í ráì. Vrá, nøngmaq mvdò kèní svmaré tiqmaqí nøngmaq sv̀ng vtiq dèzá:rìe. Àngmaq nø lóngdùng dvgv̀m yv́ngsv̀ng mvgágá dì dá:rì. Íwe shì vnàng sv̀ng mvya:ngò. Wekvt àngmaq vtv́ng ráì nø̀, Kàngpè nø cúnshìe, wa nø̀ shø̀n we muqlàng dvzv́rrì shø̀ngran yv̀ng dá:rà tvrà dètávtshà. Vrá, nøngmaq nv̀ng à:lì rì tiqmaq gø dvgv̀m yv́ngsv̀ng dìá:mì nìnø, svmarérìí shø̀:nò dø tiqdvchá ni yà:ngòe. Íwe Yesu sv̀ng nø mvyà:ngò,” a:lòe.
Wekvt À:ngí àngní sv̀ng, “Kàdvtutshúrìí shø̀n yà:ngà rì sv̀ng kv́mlv́m nàkǿnnø̀ng we àngdálrìé! Kristu nø dvshà mvhøtlv́m werì tønshì dá:ngí, Àng ngø̀rdvgùng vdòng sv̀ng góng rà we mø̀í má?” a:lòe. Wekvt Moshi nv̀ng kàdvtutshú kàrurì kèní pà:ngò nø̀, Shànshér Kàru Bok køp taq Àng dang vru yà:ngà rì í dv́ngte, À:ngí àngní sv̀ng pǿnaòe.
Àngní di mvrìng sv̀ng àngmaq tuq ráì ke, Yesu nø chàng vzv̀nglv́m dø wae. Íwe àngníí Àng sv̀ng vgá:rò nø̀, “Akvt nø nv̀m gø vle daqì, èdøke bøe. Wervtnø̀ dèyaq ngàní nv̀ng èyøp ra,” a:lòe. Wervt àngní nv̀ng tiqdø yøplv́m Àng gòngá:mì.
Àngní nv̀ng v́mpà v́mlv́m rung ke, Yesuí zidòng lùò nø̀ Gvray kaq oqà wa dá:ngí, vmø:tnò nø̀ àngní sv̀ng zíòe. Wela:ngí àngní ne vtáná:mì nø̀, Yesu sv̀ng mvshv́l bǿà. Íwe, àngní negv̀m kèní Àng vmv́ngdv̀ng wàá:mì. Wekvt, “Tvrà ramø ngàní sv̀ng kà dvmv̀n nø̀, Shànshér Kàrurì èpǿnashì dvgvp, ngàní nvrø̀m nø vkatdv̀ng wàshì we mø̀í má?” wa àngní tasv̀ng vrùnge.
Àngní nø wekvt chàng búng nø̀ Yerusalem sv̀ng vtv́ngá:mì. Tiqcé Tiqpè nv̀ng àngmaq ó tiqdø vl rì gø weyv́ng dvkǿmshì da we sv̀ng yà:ngòe. Werìí gø, “Kàngpè nø jø̀ngjǿngni zuná:mì! Simon sv̀ng gø dvtánshì ráì,” wa shø̀n dáòe. Wekvt àngníí gø, tvrà ramø kadø í dárì we nv̀ng zidòng vmø:tnò la:ngí, Yesu sv̀ng kadø mvshv́l bǿà we tvrà àngmaq sv̀ng dvtáòe.


Àngmaqí we tvràrì shø̀:nò la:ngí ni, àngmaq dvhø̀ taq Yesu zvng ripmatnì nø̀, “Mòngzø̀l lòng leq lúnnø̀ng,” vla:tnà.
Íwe àngmaqí vshì íe lá:nò nø̀ shérvkaq svre lú:ngì. Wekvt Yesuí, “Pàwálv́m nøt nàjángshìnø̀nge má? Pàwálv́m nàtiqnø̀nge má? Ngà hí wur sv̀ng èyv̀ngshà lè, Ngà ǿngàe. Ngà sv̀ng èshupshà nø̀ èyv̀ngshà. Kadø íe wani Ngà taqnø shing nv̀ng sharø vle. Vshì taqnø wedø màvl,” a:lòe.
Wedø a:lò dá:ngí, Àng hí wur àngmaq sv̀ng dvtanshìe. Àngmaq nø dvbù nø̀ dvdáshì weí shini mvkv́m ke, À:ngí rá, “V́mlv́m tiqpv̀npv̀n vle má?” a:lòe. Wekvt àngmaqí nga dvgáng tiqkwit Àng sv̀ng zíòe. Àng tvpshì nø̀ àngmaq mv́rdv̀ngø á:mòe.
Yesuí, “Moshi Dvrá, Kàdvtutshúrì nv̀ng Shvgùn Zàywàrì taq, Ngà dang vru yà:ngà dv́ngte nø vhøm ràe, wvng Ngà nø nàmaq nv̀ng a:lì dvgvp, nàmaq sv̀ng shø̀n yv̀ngà we íe,” a:lòe.
Wekvt Shànshér Kàru sv̀ng àngmaqí cíng ràllv́m dvpvt, àngmaq shánøt sv̀ng tánaòe. “Kàru taq yadø vru yà:ngà. Kristu nø dvshà mvhøt tønshì dá:ngí, vshø̀mni wani taq shì yv́ngkèní zun ràe. Vrá, nøt língshì rì mvrà chutna lún we mvshǿl nø, Yerusalem kèní pv̀ng nø̀, Ngà bø̀ng taqkèní vsv̀ng dvcì í dv́ngte sv̀ng dvshvng rà longe, wa nø vrushaq íe. Nàmaq nø yadv́ng pv̀n dvpvt shvkse èínø̀nge. Ètánø̀ng, Vpèí vdv́nashaq dø Shànshér Pvlàcè nàmaq sv̀ng Ngàí ni dvzv́ra daqìe. Íwe nàmaq yv́ngsv̀ng muqlàng taqlap kèní jórnònggùn mvtuq daq dv́ngte, wamà vdòngø shini èca dánø̀ng,” wa Yesuí a:lòe.


Wemèpvng, Yesuí àngmaq sv̀ng Betani mvrìng shvnvng høq shø:lò dá:ngí, Àng wurtángní hángshì nø̀ àngmaq sv̀ng shvmá:nòe. À:ngí àngmaq sv̀ng wedø shvmá:nò la:ngí, Àng nø àngmaq yv́ngkèní rv́lshì nø̀, muqlàng sv̀ng vbun bǿà. Coqcv́nrìí Àng sv̀ng køtngǿmshì noqò dá:ngí, shaqshaqwa dvbù taqsórí Yerusalem sv̀ng vtv́ngá:mì. Àngmaq nø Noqngø̀m Tø̀ngnø taq ni vrv̀m dvkǿmshì nø̀ Gvray kaq shvring shvtàòe.

Listen to Luka 24