Recording of the Inuktitut NT without background music.

Eastern Arctic Inuktitut Bible © Canadian Bible Society, 2012, 2021. ℗ Hosanna 2023

Inuktitut - CBS (NT) Non Drama

Inuktitut - CBS (NT) Drama

ᔩᓱᓯᐅᑉ ᐃᓕᓐᓂᐊᕐᑎᓂ ᐅᖃᐅᑎᕔᑦ, “ᐊᖑᒻᒥᒃ ᐊᔪᕐᓴᖏᑦᑐᕐᑕᖃᓚᐅᕐᐳᖅ ᐱᖁᑎᒥᓄᑦ ᑲᒪᔨᖁᑎᖃᕐᑐᒥᒃ, ᐊᖓᔪᖅᑳᖓ ᐅᖃᐅᑦᔭᐅᕗᖅ ᐱᖁᑎᒥᓂᒃ ᐱᒪᔨᖁᑎᖓ ᑮᓇᐅᔭᖏᓐᓂᒃ ᓄᖑᓮᑐᐃᓐᓇᕐᓂᕋᕐᑕᐅᓪᓗᓂ. ᐊᖓᔪᖅᑳᖓᑕ ᕾᖁᕚ ᐅᖃᐅᑎᓪᓗᒍ, ‘ᑐᓴᕐᑕᕋ ᑕᒪᓐᓇ ᓱᓕᕚ? ᑲᒪᒋᔭᑎᒃ ᐱᖁᑎᒃᑲ ᓇᓗᓁᑦᓯᐊᕐᓗᒋᑦ ᕾᓕᒃᑭᑦ, ᐱᖁᑎᓐᓂᒃ ᑲᒪᔨᐅᔭᕆᐊᖃᕈᓐᓃᕋᕕᑦ.’ ᑕᕝᕙ ᑲᒪᔨ ᐃᓱᒪᓕᕐᐳᖅ, ‘ᖃᓄᕐᓕ ᐱᓂᐊᓕᕐᑐᖓ? ᐊᖓᔪᖅᑳᒪ ᐱᖁᑎᒥᓂᒃ ᑲᒪᔨᐅᖁᔪᓐᓃᕐᒪᖓ, ᓴᓐᖐᓗᐊᕋᒪ ᓄᓇᒥᒃ ᖃᓗᕋᕋᓱᒋᐊᒃᓴᖅ, ᕿᓄᓇᓱᐊᕆᐊᒃᓴᕐᓗ ᐃᓄᖕᓂᑦ ᑲᓐᖑᓱᒃᖢᖓ. ᐃᒫᒃ ᐱᔪᒪᓕᕐᐳᖓ, ᐃᖅᑲᓁᔮᒃᓴᖃᕈᓐᓃᕈᒪ ᐃᓄᐃᑦ ᐊᖏᕐᕋᖏᓐᓄᑦ ᑐᓐᖓᓱᒃᑎᑕᐅᖃᑦᑕᕐᓂᐊᕋᒪ!’ ᑖᑦᓱᒪ ᐊᖓᔪᖅᑳᒥᓄᑦ ᐊᑭᓕᒃᓴᓖᑦ ᕾᖁᓕᕐᐰᑦ ᐊᑕᐅᓯᐅᓈᕐᑎᕐᓗᒋᑦ, ᓯᕗᓪᓕᕐᐹᖅ ᐊᐱᕆᕚ, ‘ᐊᖓᔪᖅᑳᕋ ᖃᑦᓯᓂᒃ ᐊᑭᓕᒃᓴᖃᕐᕕᒋᕕᐅᒃ?’ ᑖᑦᓱᒪ ᑭᐅᕚ, ‘ᓇᐹᕐᑑᑉ ᐱᕈᕐᑐᖏᑕ ᐅᕐᓱᖏᓐᓂᒃ ᖃᑦᑕᐅᔭᓂᒃ 100ᓂᒃ,’ ᐅᖃᐅᑎᕚ, ‘ᐅᕝᕙᐅᓇ ᐊᑭᓕᒃᓴᖃᐅᑏᑦ ᐃᖏᓪᓗᑎᑦ ᑎᑎᕋᓕᕆᑦ 50ᓂᒃ,’ ᐊᒻᒪ ᐊᓯᐊᓂᒃ ᐊᐱᕆᒋᕗᖅ, ‘ᐃᕝᕕᓪᓕ ᖃᑦᓯᓂᒃ ᐊᑭᓕᒃᓴᖃᕐᐲᑦ?’ ᑖᓐᓇ ᑭᐅᕗᖅ, ‘ᓂᐊᖂᔭᒃᓴᓂᒃ ᐴᕐᓯᒪᔪᓂᒃ 100ᓂᒃ.’ ᑲᒪᔨᐅᑉ ᐅᖃᐅᑎᕚ, ‘ᐅᕝᕙᐅᓇ ᐊᑭᓕᒃᓴᖃᐅᑏᑦ ᑎᑎᕋᓕᕆᑦ 80ᓂᒃ.’ ᐊᖓᔪᖅᑳᖓᑕ ᖁᕕᐊᒋᓕᓚᐅᕐᐹ ᑍᒫᒃ ᓯᓚᑐᔪᒥᒃ ᐱᓇᓱᐊᕐᒪᑦ; ᒪᑐᒪ ᓯᓚᕐᔪᐊᑉ ᐃᓄᖏᑦ ᓯᓚᑐᐊᕿᓇᓱᐊᕈᓐᓇᕐᓂᕐᓴᐅᖕᒪᑕ ᖃᐅᒪᔪᒥᐅᑕᓂᑦ, ᐱᔭᕆᐊᖃᕐᑕᒥᖕᓂ ᐱᓇᓱᐊᕐᑎᓪᓗᒋᑦ.
“ᐅᖃᐅᑎᕙᑦᓯ, ᐃᓚᓐᓈᖃᕋᓱᐊᕆᑦᓯ ᓯᓚᕐᔪᐊᕐᒥᐅᑦ ᐊᔪᕐᓴᖏᑦᔪᑎᖏᑦ ᐊᑐᕐᓗᒋᑦ, ᐊᔪᕐᓴᓕᕈᑦᓯ ᑐᓐᖓᓱᒃᑎᑕᐅᖁᓪᓗᓯ ᐊᖏᕐᕋᒃᓴᑦᓯᓄᑦ ᐃᓱᖃᖏᑦᑐᒧᑦ. ᒥᑭᔪᑯᓗᖕᒥᒃ ᑲᒪᑦᓯᐊᕐᑐᖅ, ᐊᖏᔪᓂᒃ ᑲᒪᑦᓯᐊᕈᓐᓇᕐᐳᖅ; ᒥᑭᔪᑯᓗᖕᓂᒃ ᑲᒪᑦᓯᐊᖏᑦᑐᖅ ᐊᖏᔪᓂᒃ ᑲᒪᑦᓯᐊᕈᓐᓇᖏᓐᓂᕗᖅ. ᑲᒪᑦᓯᐊᕐᓯᒪᖏᒃᑯᕕᑦ ᓯᓚᕐᔪᐊᕐᒥᐅᑦ ᐊᔪᕐᓴᖏᑦᔪᑎᖏᓐᓂᒃ, ᖃᓄᕐᓕ ᑍᒪ ᐅᒃᐱᕆᔭᐅᔪᓐᓇᕋᔭᕐᐲᑦ ᐱᓪᓚᕆᐅᓂᕐᓴᓂᒃ ᐱᓕᕆᔪᓐᓇᕐᒪᖔᕐᐱᑦ? ᐱᒋᓐᖏᑕᕐᓂᒃ ᑲᒪᑎᑕᐅᓗᑎᑦ ᑲᒪᑦᑎᐊᕐᓯᒪᓐᓂᖏᒃᑯᕕᑦ, ᖃᓄᕐᓕ ᓇᖕᒥᓂᕆᔭᒃᓴᕐᓂᒃ ᐱᑖᕐᑎᑕᐅᔪᓐᓇᕋᔭᐱᑦ?
“ᐱᔨ ᐊᖓᔪᖅᑳᖕᓂᒃ ᒪᕐᕉᖕᓂ ᐱᔨᑦᓯᕈᓐᓇᖏᒻᒪᑦ; ᐂᑉᐸᖓ ᐆᒥᒋᒐᔭᕐᐹ ᐂᑉᐸᖓᓗ ᓇᒡᓕᒋᓗᒍ; ᐅᕝᕙᓗ ᐂᑉᐸᖓ ᑐᓂᓯᒪᕕᒋᑦᑎᐊᕐᓗᒍ ᐂᑉᐸᖓᓗ ᓇᕐᕈᒋᓗᒍ. ᐊᑕᐅᑦᓯᒃᑯᑦ ᐱᔨᑦᓯᕕᖃᕈᓐᓇᖏᓚᓯ ᒎᑎᒥᒃ ᑮᓇᐅᔭᓂᒡᓗ!”


ᐹᕆᓯᑦ ᑮᓇᐅᔭᓂᒃ ᐱᓪᓚᕆᖁᑎᖃᕋᒥ, ᑕᒪᑐᒥᖓ ᑐᓴᕋᒥᒃ, ᔩᓱᓯ ᒥᑕᐅᑎᒋᕚᑦ. ᔩᓱᓯᐅᑉ ᐅᖃᐅᑎᕔᑦ, “ᐃᓕᑦᓯ ᑕᕝᕙ ᐃᓄᖕᓄᑦ ᓈᒻᒪᒋᔭᐅᑦᓯᐊᕋᓱᐊᕐᐳᓯ, ᒎᑎᐅᓪᓕ ᐆᒻᒪᑎᓯ ᖃᐅᔨᒪᕔᑦ; ᐃᓄᖕᓄᑦ ᓂᕐᑐᕐᑕᐅᔪᑦ ᒎᑎᒧᑦ ᐊᑑᑎᖃᖏᒻᒪᑕ.
“ᒨᓯᓯᐅᑉ ᐱᖁᔭᖏᑦ, ᓇᓚᐅᑦᑍᔪᓪᓗ ᐊᒡᓚᖏᑦ ᐊᑐᓚᐅᕐᐳᑦ ᔪᐊᓇᓯ ᐹᑉᑎᑎᕆᔨ ᑎᑭᓪᓗᒍ; ᑭᖑᓂᖓᒍᑦ ᐅᖃᐅᓰᑦ ᑐᓴᕈᒥᓇᕐᑐᑦ ᒎᑎᐅᑉ ᐊᑕᓂᐅᕕᖓᓂᒃ ᐅᖃᐅᓯᖃᕐᑐᑦ ᐅᖃᐅᓯᐅᓕᕐᐳᑦ, ᐅᓄᕐᑐᐊᓗᐃᑦ ᐊᔪᐃᓐᓇᕐᓗᑎᒃ ᐃᑎᕋᓱᓕᕐᒪᑕ. ᐱᔭᕆᐊᑭᓐᓂᕐᓴᐅᕗᖅ ᕿᓚᒡᓗ ᓄᓇᕐᔪᐊᕐᓗ ᓄᖑᑉᐸᑎᒃ, ᐱᖁᔭᓂ ᓈᓂᑯᓘᓪᓘᓐᓃᑦ ᐊᑕᐅᓯᐅᑉ ᐊᑐᕐᑎᑕᐅᒐᔭᖏᓐᓂᖓᓂᑦ.
“ᐊᖑᑦ ᓄᓕᐊᒥᓂᒃ ᐊᕕᑦᓯᓪᓚᕆᒃᐸᑦ ᐊᓯᐊᓂᒃ ᓄᓕᐊᓂᒡᓗᓂ, ᑖᑦᓱᒪ ᓄᓕᐊᕆᓚᐅᕐᑕᓂᖅ ᐊᓯᓐᓂᐊᕐᐹ, ᐊᖑᓪᓗ ᐊᕐᓇᒥᒃ ᐊᕕᑕᐅᓪᓚᕆᒃᓯᒪᔪᒥᒃ ᓄᓕᐊᓂᒃᐸᑦ ᑖᓐᓇ ᐊᓯᓐᓂᐊᕆᕗ.”

“ᐊᔪᕐᓴᖏᑦᑐᖕᒥᒃ ᐊᖑᑎᑕᖃᓚᐅᕐᐳᖅ ᐊᓐᓄᕌᓯᒪᕙᒃᑐᒥᒃ ᐊᓐᓄᕌᓂᒃ ᐊᑭᑐᓂᕐᐹᓂᒃ ᐊᐅᐸᓪᓚᕆᒃᑐᓂᒃ, ᖃᐅᑕᒫᑦ ᓂᕆᕕᒃᔪᐊᕐᑎᑦᓰᓐᓇᕐᑐᒥᒃ. ᐊᔪᕐᓴᑐᐊᓗᒃᑕᖃᓚᐅᕆᕗᖅ ᓛᓴᕉᓯᒥᒃ ᐊᑎᓕᖕᒥᒃ, ᑖᑦᓱᒪ ᑎᒥᓕᒫᖓ ᐊᔪᐊᕐᑐᐊᓗᒃ, ᑖᓐᓇ ᐋᑕᐅᖃᑦᑕᕐᐳᖅ ᐊᔪᓴᖏᑦᑐᐊᓘᑉ ᐃᒡᓗᖓᑕ ᐃᓯᕆᐊᕐᕕᖓᑕ ᓴᓂᐊᓄᑦ. ᐃᓱᒪᖃᑦᑕᓚᐅᕋᓗᐊᕐᐳᖅ ᓂᕆᔪᒪᓪᓗᓂ ᐊᔪᕐᓴᓐᖏᑦᑑᑉ ᓂᕆᕕᖓᓂᑦ ᑲᑕᒃᑐᓂᒃ; ᐊᒡᓛᑦ ᕿᒻᒥᓂᑦ ᐊᔪᐊᖏᑦ ᐊᓗᒃᑐᕆᐊᑐᕐᑕᐅᕙᒃᓗᑎᒃ. ᐊᔪᕐᓴᕐᑐᐊᓗᒃ ᑐᖁᖕᒪᑦ ᐂᖏᓖᓂᑦ ᐊᒡᔭᕐᑕᐅᕗᖅ ᐂᑉᕋᕼᐋᒻ ᓴᓂᐊᓄᑦ. ᑭᖑᓂᖓᒍᑦ ᐊᔪᕐᓴᓐᖏᑦᑐᐊᓗᒃᑕᐅᖅ ᑐᖁᒋᕗᖅ ᐃᓗᕕᕐᑕᐅᓪᓗᓂᓗ. ᑐᖁᖓᔪᑦ ᐃᓂᖓᓂ ᐋᓐᓂᐊᔪᐊᓘᓪᓗᓂ ᖃᐅᔨᓕᕐᐳᖅ, ᖁᒻᒧᑦ ᑕᑯᓴᕋᒥ ᐂᑉᕋᕼᐋᒻ ᑕᑯᕚ ᐅᖓᓯᒃᑐᒦᑦᑐᖅ, ᓛᓴᕉᓯᓗ ᓴᓂᐊᓃᑦᑐᖅ. ᕾᒐᓛᓕᕐᐳᖅ, ‘ᐊᑖᑖᒃ ᐂᑉᕋᕼᐋᒻ, ᓂᑲᒋᓚᐅᓐᖓ, ᓛᓴᕉᓯ ᑎᓕᓚᐅᕈᒃ ᑎᑭᓂ ᒥᓱᒡᓗᒍ ᐃᒥᕐᒧᑦ, ᐅᖃᓐᓂᒃ ᓂᒡᓕᑎᕆᖁᓗᒍ; ᐋᓐᓂᐊᔪᐊᓘᒐᒪ ᐅᕙᓂ ᐃᑯᒫᓗᖕᒥ.’ ᐂᑉᕋᕼᐋᒻ ᐅᖃᐅᑎᕚ, ‘ᐃᕐᓃᒃ, ᐃᖅᑲᐅᒪᒋᑦ ᐃᓅᑎᓪᓗᑎᑦ ᐱᐅᔪᓂᒃ ᐱᖃᓚᐅᕋᕕᑦ, ᓛᓴᕉᓯᓕ ᐱᐅᖏᑦᑐᓂᒃ ᐱᑎᑕᐅᖃᑦᑕᓚᐅᕐᐳᖅ; ᒫᓐᓇ ᒫᓂ ᖁᕕᐊᓱᓕᕐᐳᖅ, ᐃᕝᕕᓪᓗ ᐋᓐᓂᐊᕐᑎᑕᐅᕗᑎᑦ. ᓱᓕ ᐊᑯᓐᓇᑦᑎᓐᓂ ᐃᑎᕐᓵᓗᒃᑕᖃᕐᒪᑦ, ᒫᓐᖓᑦ ᐃᓕᑦᓯᓐᓄᑦ ᐃᑳᕈᒪᔪᑦ ᐊᔪᕐᐳᑦ, ᑍᒫᒃᑕᐅᖅ ᐃᓕᑦᓯᓐᓂᑦ ᐃᑳᕈᒪᔪᑦ ᒪᐅᖓ ᐊᔪᕆᕗᑦ.’ ᑖᓐᓇ ᐅᖃᕐᐳᖅ, ‘ᑕᕝᕙᓕ ᐊᑖᑖᒃ ᐂᑉᕋᕼᐋᒻ ᕿᓄᕕᒋᕙᒋᑦ, ᓛᓴᕉᓯ ᑎᓕᓚᐅᕈᒃ ᐊᑖᑕᒪ ᐃᒡᓗᖓᓄᑦ. ᑕᓪᓕᒪᓂᒃ ᖃᑕᓐᖑᑎᖃᕋᒪ, ᑖᑦᓱᒪ ᐅᖃᐅᑎᓂᐊᕐᒪᒋᑦ, ᐅᕗᖓ ᐋᓐᓂᐊᓇᕐᑐᒧᐊᖁᓇᒋᑦᑕᐅᖅ.’ ᐂᑉᕋᕼᐋᒻ ᐅᖃᐅᑎᕚ, ‘ᖃᑕᓐᖑᑎᑎᑦ ᒨᓯᓯᐅᑉ ᓇᓚᐅᑦᑍᔪᓪᓗ ᐊᒡᓚᖏᓐᓂᒃ ᐱᖃᕐᐳᑦ ᑍᒃᑯᓇᓐᖓᑦ ᐅᖃᐅᑦᔭᐅᓕᕐᓕᑦ.’ ᑖᑦᓱᒪ ᑭᐅᕚ, ‘ᐋᒃᑲ ᐊᑖᑖᒃ ᐂᑉᕋᕼᐋᒻ; ᑐᖁᖓᔪᒥᒡᓕ ᒪᑭᑦᑐᖃᕐᓗᓂ ᐅᖃᐅᑦᔭᐅᔭᕐᑐᕈᑎᒃ ᖃᕿᐊᓕᕋᔭᕐᐳᑦ.’ ᐂᑉᕋᕼᐋᒻ ᑭᐅᕚ, ‘ᒨᓯᓯᐅᑉ ᓇᓚᐅᑦᑍᔪᓪᓗ ᐊᒡᓚᖏᓐᓂᒃ ᓈᓚᖏᒃᑯᑎᒃ, ᐅᒃᐱᕈᓱᒃᑲᔭᖏᓐᓂᕗᑦ ᑐᖁᖓᔪᒥᒃ ᒪᑭᑦᑐᖃᕋᓗᐊᕐᐸᑦ.’”

Listen to ᓘᑲᓯᐅᑉ ᐊᒡᓚᖏᑦ 16