ᓘᑲᓯᐅᑉ ᐊᒡᓚᖏᑦ 16

ᐱᔨ ᐃᓱᒪᒃᓴᕐᓯᐅᕐᓴᕅᑦᑐᖅ

1ᔩᓱᓯᐅᑉ ᐃᓕᓐᓂᐊᕐᑎᓂ ᐅᖃᐅᑎᕔᑦ, “ᐊᖑᒻᒥᒃ ᐊᔪᕐᓴᖏᑦᑐᕐᑕᖃᓚᐅᕐᐳᖅ ᐱᖁᑎᒥᓄᑦ ᑲᒪᔨᖁᑎᖃᕐᑐᒥᒃ, ᐊᖓᔪᖅᑳᖓ ᐅᖃᐅᑦᔭᐅᕗᖅ ᐱᖁᑎᒥᓂᒃ ᐱᒪᔨᖁᑎᖓ ᑮᓇᐅᔭᖏᓐᓂᒃ ᓄᖑᓮᑐᐃᓐᓇᕐᓂᕋᕐᑕᐅᓪᓗᓂ. 2ᐊᖓᔪᖅᑳᖓᑕ ᕾᖁᕚ ᐅᖃᐅᑎᓪᓗᒍ, ‘ᑐᓴᕐᑕᕋ ᑕᒪᓐᓇ ᓱᓕᕚ? ᑲᒪᒋᔭᑎᒃ ᐱᖁᑎᒃᑲ ᓇᓗᓁᑦᓯᐊᕐᓗᒋᑦ ᕾᓕᒃᑭᑦ, ᐱᖁᑎᓐᓂᒃ ᑲᒪᔨᐅᔭᕆᐊᖃᕈᓐᓃᕋᕕᑦ.’ 3ᑕᕝᕙ ᑲᒪᔨ ᐃᓱᒪᓕᕐᐳᖅ, ‘ᖃᓄᕐᓕ ᐱᓂᐊᓕᕐᑐᖓ? ᐊᖓᔪᖅᑳᒪ ᐱᖁᑎᒥᓂᒃ ᑲᒪᔨᐅᖁᔪᓐᓃᕐᒪᖓ, ᓴᓐᖐᓗᐊᕋᒪ ᓄᓇᒥᒃ ᖃᓗᕋᕋᓱᒋᐊᒃᓴᖅ, ᕿᓄᓇᓱᐊᕆᐊᒃᓴᕐᓗ ᐃᓄᖕᓂᑦ ᑲᓐᖑᓱᒃᖢᖓ. 4ᐃᒫᒃ ᐱᔪᒪᓕᕐᐳᖓ, ᐃᖅᑲᓁᔮᒃᓴᖃᕈᓐᓃᕈᒪ ᐃᓄᐃᑦ ᐊᖏᕐᕋᖏᓐᓄᑦ ᑐᓐᖓᓱᒃᑎᑕᐅᖃᑦᑕᕐᓂᐊᕋᒪ!’ 5ᑖᑦᓱᒪ ᐊᖓᔪᖅᑳᒥᓄᑦ ᐊᑭᓕᒃᓴᓖᑦ ᕾᖁᓕᕐᐰᑦ ᐊᑕᐅᓯᐅᓈᕐᑎᕐᓗᒋᑦ, ᓯᕗᓪᓕᕐᐹᖅ ᐊᐱᕆᕚ, ‘ᐊᖓᔪᖅᑳᕋ ᖃᑦᓯᓂᒃ ᐊᑭᓕᒃᓴᖃᕐᕕᒋᕕᐅᒃ?’ 6ᑖᑦᓱᒪ ᑭᐅᕚ, ‘ᓇᐹᕐᑑᑉ ᐱᕈᕐᑐᖏᑕ ᐅᕐᓱᖏᓐᓂᒃ ᖃᑦᑕᐅᔭᓂᒃ 100ᓂᒃ,’ ᐅᖃᐅᑎᕚ, ‘ᐅᕝᕙᐅᓇ ᐊᑭᓕᒃᓴᖃᐅᑏᑦ ᐃᖏᓪᓗᑎᑦ ᑎᑎᕋᓕᕆᑦ 50ᓂᒃ,’ 7ᐊᒻᒪ ᐊᓯᐊᓂᒃ ᐊᐱᕆᒋᕗᖅ, ‘ᐃᕝᕕᓪᓕ ᖃᑦᓯᓂᒃ ᐊᑭᓕᒃᓴᖃᕐᐲᑦ?’ ᑖᓐᓇ ᑭᐅᕗᖅ, ‘ᓂᐊᖂᔭᒃᓴᓂᒃ ᐴᕐᓯᒪᔪᓂᒃ 100ᓂᒃ.’ ᑲᒪᔨᐅᑉ ᐅᖃᐅᑎᕚ, ‘ᐅᕝᕙᐅᓇ ᐊᑭᓕᒃᓴᖃᐅᑏᑦ ᑎᑎᕋᓕᕆᑦ 80ᓂᒃ.’ 8ᐊᖓᔪᖅᑳᖓᑕ ᖁᕕᐊᒋᓕᓚᐅᕐᐹ ᑍᒫᒃ ᓯᓚᑐᔪᒥᒃ ᐱᓇᓱᐊᕐᒪᑦ; ᒪᑐᒪ ᓯᓚᕐᔪᐊᑉ ᐃᓄᖏᑦ ᓯᓚᑐᐊᕿᓇᓱᐊᕈᓐᓇᕐᓂᕐᓴᐅᖕᒪᑕ#16:8 ᓴᓇᑑᖑᒐᓱᐊᕐᓂᕐᓴᐅᓲᖑᖕᒪᑕ ᖃᐅᒪᔪᒥᐅᑕᓂᑦ, ᐱᔭᕆᐊᖃᕐᑕᒥᖕᓂ ᐱᓇᓱᐊᕐᑎᓪᓗᒋᑦ.

9“ᐅᖃᐅᑎᕙᑦᓯ, ᐃᓚᓐᓈᖃᕋᓱᐊᕆᑦᓯ ᓯᓚᕐᔪᐊᕐᒥᐅᑦ ᐊᔪᕐᓴᖏᑦᔪᑎᖏᑦ ᐊᑐᕐᓗᒋᑦ, ᐊᔪᕐᓴᓕᕈᑦᓯ ᑐᓐᖓᓱᒃᑎᑕᐅᖁᓪᓗᓯ ᐊᖏᕐᕋᒃᓴᑦᓯᓄᑦ ᐃᓱᖃᖏᑦᑐᒧᑦ. 10ᒥᑭᔪᑯᓗᖕᒥᒃ ᑲᒪᑦᓯᐊᕐᑐᖅ, ᐊᖏᔪᓂᒃ ᑲᒪᑦᓯᐊᕈᓐᓇᕐᐳᖅ; ᒥᑭᔪᑯᓗᖕᓂᒃ ᑲᒪᑦᓯᐊᖏᑦᑐᖅ ᐊᖏᔪᓂᒃ ᑲᒪᑦᓯᐊᕈᓐᓇᖏᓐᓂᕗᖅ. 11ᑲᒪᑦᓯᐊᕐᓯᒪᖏᒃᑯᕕᑦ ᓯᓚᕐᔪᐊᕐᒥᐅᑦ ᐊᔪᕐᓴᖏᑦᔪᑎᖏᓐᓂᒃ, ᖃᓄᕐᓕ ᑍᒪ ᐅᒃᐱᕆᔭᐅᔪᓐᓇᕋᔭᕐᐲᑦ ᐱᓪᓚᕆᐅᓂᕐᓴᓂᒃ ᐱᓕᕆᔪᓐᓇᕐᒪᖔᕐᐱᑦ? 12ᐱᒋᓐᖏᑕᕐᓂᒃ ᑲᒪᑎᑕᐅᓗᑎᑦ ᑲᒪᑦᑎᐊᕐᓯᒪᓐᓂᖏᒃᑯᕕᑦ, ᖃᓄᕐᓕ ᓇᖕᒥᓂᕆᔭᒃᓴᕐᓂᒃ ᐱᑖᕐᑎᑕᐅᔪᓐᓇᕋᔭᐱᑦ?

13 # ᒫᑎᐅᓯ 6:24. “ᐱᔨ ᐊᖓᔪᖅᑳᖕᓂᒃ ᒪᕐᕉᖕᓂ ᐱᔨᑦᓯᕈᓐᓇᖏᒻᒪᑦ; ᐂᑉᐸᖓ ᐆᒥᒋᒐᔭᕐᐹ ᐂᑉᐸᖓᓗ ᓇᒡᓕᒋᓗᒍ; ᐅᕝᕙᓗ ᐂᑉᐸᖓ ᑐᓂᓯᒪᕕᒋᑦᑎᐊᕐᓗᒍ ᐂᑉᐸᖓᓗ ᓇᕐᕈᒋᓗᒍ. ᐊᑕᐅᑦᓯᒃᑯᑦ ᐱᔨᑦᓯᕕᖃᕈᓐᓇᖏᓚᓯ ᒎᑎᒥᒃ ᑮᓇᐅᔭᓂᒡᓗ!”

ᔩᓱᓯᐅᑉ ᐊᔪᕆᕐᑐᐃᓂᖏᑦ

ᒫᑎᐅᓯ 11:12-13; 5:31-32; ᒫᑯᓯ 10:11-12

14ᐹᕆᓯᑦ ᑮᓇᐅᔭᓂᒃ ᐱᓪᓚᕆᖁᑎᖃᕋᒥ, ᑕᒪᑐᒥᖓ ᑐᓴᕋᒥᒃ, ᔩᓱᓯ ᒥᑕᐅᑎᒋᕚᑦ. 15ᔩᓱᓯᐅᑉ ᐅᖃᐅᑎᕔᑦ, “ᐃᓕᑦᓯ ᑕᕝᕙ ᐃᓄᖕᓄᑦ ᓈᒻᒪᒋᔭᐅᑦᓯᐊᕋᓱᐊᕐᐳᓯ, ᒎᑎᐅᓪᓕ ᐆᒻᒪᑎᓯ ᖃᐅᔨᒪᕔᑦ; ᐃᓄᖕᓄᑦ ᓂᕐᑐᕐᑕᐅᔪᑦ ᒎᑎᒧᑦ ᐊᑑᑎᖃᖏᒻᒪᑕ.

16 # ᒫᑎᐅᓯ 11:12,13. “ᒨᓯᓯᐅᑉ ᐱᖁᔭᖏᑦ, ᓇᓚᐅᑦᑍᔪᓪᓗ ᐊᒡᓚᖏᑦ ᐊᑐᓚᐅᕐᐳᑦ ᔪᐊᓇᓯ ᐹᑉᑎᑎᕆᔨ ᑎᑭᓪᓗᒍ; ᑭᖑᓂᖓᒍᑦ ᐅᖃᐅᓰᑦ ᑐᓴᕈᒥᓇᕐᑐᑦ ᒎᑎᐅᑉ ᐊᑕᓂᐅᕕᖓᓂᒃ ᐅᖃᐅᓯᖃᕐᑐᑦ ᐅᖃᐅᓯᐅᓕᕐᐳᑦ, ᐅᓄᕐᑐᐊᓗᐃᑦ ᐊᔪᐃᓐᓇᕐᓗᑎᒃ ᐃᑎᕋᓱᓕᕐᒪᑕ. 17#ᒫᑎᐅᓯ 5:18.ᐱᔭᕆᐊᑭᓐᓂᕐᓴᐅᕗᖅ ᕿᓚᒡᓗ ᓄᓇᕐᔪᐊᕐᓗ ᓄᖑᑉᐸᑎᒃ, ᐱᖁᔭᓂ ᓈᓂᑯᓘᓪᓘᓐᓃᑦ ᐊᑕᐅᓯᐅᑉ ᐊᑐᕐᑎᑕᐅᒐᔭᖏᓐᓂᖓᓂᑦ.

18 # ᒫᑎᐅᓯ 5:32; 1 ᑯᕆᓐᑎ 7:10,11. “ᐊᖑᑦ ᓄᓕᐊᒥᓂᒃ ᐊᕕᑦᓯᓪᓚᕆᒃᐸᑦ ᐊᓯᐊᓂᒃ ᓄᓕᐊᓂᒡᓗᓂ, ᑖᑦᓱᒪ ᓄᓕᐊᕆᓚᐅᕐᑕᓂᖅ ᐊᓯᓐᓂᐊᕐᐹ, ᐊᖑᓪᓗ ᐊᕐᓇᒥᒃ ᐊᕕᑕᐅᓪᓚᕆᒃᓯᒪᔪᒥᒃ ᓄᓕᐊᓂᒃᐸᑦ ᑖᓐᓇ ᐊᓯᓐᓂᐊᕆᕗ.”

ᐊᖑᑦ ᐊᔪᕐᓴᖏᑦᑐᖅ ᓛᓴᕉᓯᓗ

19“ᐊᔪᕐᓴᖏᑦᑐᖕᒥᒃ ᐊᖑᑎᑕᖃᓚᐅᕐᐳᖅ ᐊᓐᓄᕌᓯᒪᕙᒃᑐᒥᒃ ᐊᓐᓄᕌᓂᒃ ᐊᑭᑐᓂᕐᐹᓂᒃ ᐊᐅᐸᓪᓚᕆᒃᑐᓂᒃ, ᖃᐅᑕᒫᑦ ᓂᕆᕕᒃᔪᐊᕐᑎᑦᓰᓐᓇᕐᑐᒥᒃ. 20ᐊᔪᕐᓴᑐᐊᓗᒃᑕᖃᓚᐅᕆᕗᖅ ᓛᓴᕉᓯᒥᒃ ᐊᑎᓕᖕᒥᒃ, ᑖᑦᓱᒪ ᑎᒥᓕᒫᖓ ᐊᔪᐊᕐᑐᐊᓗᒃ, ᑖᓐᓇ ᐋᑕᐅᖃᑦᑕᕐᐳᖅ ᐊᔪᓴᖏᑦᑐᐊᓘᑉ ᐃᒡᓗᖓᑕ ᐃᓯᕆᐊᕐᕕᖓᑕ ᓴᓂᐊᓄᑦ. 21ᐃᓱᒪᖃᑦᑕᓚᐅᕋᓗᐊᕐᐳᖅ ᓂᕆᔪᒪᓪᓗᓂ ᐊᔪᕐᓴᓐᖏᑦᑑᑉ ᓂᕆᕕᖓᓂᑦ ᑲᑕᒃᑐᓂᒃ; ᐊᒡᓛᑦ ᕿᒻᒥᓂᑦ ᐊᔪᐊᖏᑦ ᐊᓗᒃᑐᕆᐊᑐᕐᑕᐅᕙᒃᓗᑎᒃ. 22ᐊᔪᕐᓴᕐᑐᐊᓗᒃ ᑐᖁᖕᒪᑦ ᐂᖏᓖᓂᑦ ᐊᒡᔭᕐᑕᐅᕗᖅ ᐂᑉᕋᕼᐋᒻ ᓴᓂᐊᓄᑦ. ᑭᖑᓂᖓᒍᑦ ᐊᔪᕐᓴᓐᖏᑦᑐᐊᓗᒃᑕᐅᖅ ᑐᖁᒋᕗᖅ ᐃᓗᕕᕐᑕᐅᓪᓗᓂᓗ. 23ᑐᖁᖓᔪᑦ ᐃᓂᖓᓂ ᐋᓐᓂᐊᔪᐊᓘᓪᓗᓂ ᖃᐅᔨᓕᕐᐳᖅ, ᖁᒻᒧᑦ ᑕᑯᓴᕋᒥ ᐂᑉᕋᕼᐋᒻ ᑕᑯᕚ ᐅᖓᓯᒃᑐᒦᑦᑐᖅ, ᓛᓴᕉᓯᓗ ᓴᓂᐊᓃᑦᑐᖅ. 24ᕾᒐᓛᓕᕐᐳᖅ, ‘ᐊᑖᑖᒃ ᐂᑉᕋᕼᐋᒻ, ᓂᑲᒋᓚᐅᓐᖓ, ᓛᓴᕉᓯ ᑎᓕᓚᐅᕈᒃ ᑎᑭᓂ ᒥᓱᒡᓗᒍ ᐃᒥᕐᒧᑦ, ᐅᖃᓐᓂᒃ ᓂᒡᓕᑎᕆᖁᓗᒍ; ᐋᓐᓂᐊᔪᐊᓘᒐᒪ ᐅᕙᓂ ᐃᑯᒫᓗᖕᒥ.’ 25ᐂᑉᕋᕼᐋᒻ ᐅᖃᐅᑎᕚ, ‘ᐃᕐᓃᒃ, ᐃᖅᑲᐅᒪᒋᑦ ᐃᓅᑎᓪᓗᑎᑦ ᐱᐅᔪᓂᒃ ᐱᖃᓚᐅᕋᕕᑦ, ᓛᓴᕉᓯᓕ ᐱᐅᖏᑦᑐᓂᒃ ᐱᑎᑕᐅᖃᑦᑕᓚᐅᕐᐳᖅ; ᒫᓐᓇ ᒫᓂ ᖁᕕᐊᓱᓕᕐᐳᖅ, ᐃᕝᕕᓪᓗ ᐋᓐᓂᐊᕐᑎᑕᐅᕗᑎᑦ. 26ᓱᓕ ᐊᑯᓐᓇᑦᑎᓐᓂ ᐃᑎᕐᓵᓗᒃᑕᖃᕐᒪᑦ, ᒫᓐᖓᑦ ᐃᓕᑦᓯᓐᓄᑦ ᐃᑳᕈᒪᔪᑦ ᐊᔪᕐᐳᑦ, ᑍᒫᒃᑕᐅᖅ ᐃᓕᑦᓯᓐᓂᑦ ᐃᑳᕈᒪᔪᑦ ᒪᐅᖓ ᐊᔪᕆᕗᑦ.’ 27ᑖᓐᓇ ᐅᖃᕐᐳᖅ, ‘ᑕᕝᕙᓕ ᐊᑖᑖᒃ ᐂᑉᕋᕼᐋᒻ ᕿᓄᕕᒋᕙᒋᑦ, ᓛᓴᕉᓯ ᑎᓕᓚᐅᕈᒃ ᐊᑖᑕᒪ ᐃᒡᓗᖓᓄᑦ. 28ᑕᓪᓕᒪᓂᒃ ᖃᑕᓐᖑᑎᖃᕋᒪ, ᑖᑦᓱᒪ ᐅᖃᐅᑎᓂᐊᕐᒪᒋᑦ, ᐅᕗᖓ ᐋᓐᓂᐊᓇᕐᑐᒧᐊᖁᓇᒋᑦᑕᐅᖅ.’ 29ᐂᑉᕋᕼᐋᒻ ᐅᖃᐅᑎᕚ, ‘ᖃᑕᓐᖑᑎᑎᑦ ᒨᓯᓯᐅᑉ ᓇᓚᐅᑦᑍᔪᓪᓗ ᐊᒡᓚᖏᓐᓂᒃ ᐱᖃᕐᐳᑦ ᑍᒃᑯᓇᓐᖓᑦ ᐅᖃᐅᑦᔭᐅᓕᕐᓕᑦ.’ 30ᑖᑦᓱᒪ ᑭᐅᕚ, ‘ᐋᒃᑲ ᐊᑖᑖᒃ ᐂᑉᕋᕼᐋᒻ; ᑐᖁᖓᔪᒥᒡᓕ ᒪᑭᑦᑐᖃᕐᓗᓂ ᐅᖃᐅᑦᔭᐅᔭᕐᑐᕈᑎᒃ ᖃᕿᐊᓕᕋᔭᕐᐳᑦ.’ 31ᐂᑉᕋᕼᐋᒻ ᑭᐅᕚ, ‘ᒨᓯᓯᐅᑉ ᓇᓚᐅᑦᑍᔪᓪᓗ ᐊᒡᓚᖏᓐᓂᒃ ᓈᓚᖏᒃᑯᑎᒃ, ᐅᒃᐱᕈᓱᒃᑲᔭᖏᓐᓂᕗᑦ ᑐᖁᖓᔪᒥᒃ ᒪᑭᑦᑐᖃᕋᓗᐊᕐᐸᑦ.’”

Currently Selected:

ᓘᑲᓯᐅᑉ ᐊᒡᓚᖏᑦ 16: EAIB

Highlight

Copy