If you would like a copy of this version please contact info@davaraudiobibles.org

Birjia Bible New Testament, CC BY-NC-ND 4.0, New Life Literature (NLL), 2023. (Text)
Birjia New Testament Audio Bible, CC BY-NC-ND 4.0, Davar Partners International, 2025. (Audio)

Birjia New Testament (NLL)

फिन पबितर आतमा ईसु टोंगरी पड़ा इदीया लिदियय, ताकि सयतान हुँनि परखावी। ईसु चलीस दिन-राइत हमिज् उपास दोहोलअय, अखरी रे हुँनि रंगिज् लिदिया। प-परखावी हुँनि ठँवरे वेज् कोते कथावा लिदियय, “अगर अमः परमेसर रेनमी होपोन हके दो कथायमी, चि नोआँ दीरी रुटी पड़ीकोः।”
ईसु कथा रुवाड़ लअय, “धरम पोथी रे ओल लआ इदानआँ, ‘चि मनवाँ सिरीप रुटी ही ते कोवन, बकिन परमेसर रआ अहा ते उडुङोः गोटा लेकन बचन ते जीवेड् दोहोनाकु।’”
तब सयतान हुँनि पबितर नगर जेरुसलेम रे इदी कोते सेंड़ा बिनती ओड़ाः रआ चुटित रे तींगु लिदियय। हेनते हुँनि कथावा लअय, “अगर अमः परमेसर रेनमी होपोन हके रेदो नोंडे एतेन डेगोःमी, ताकि अमः रआ जँगा दीरी रे एरो जड़ाः लेना,
“‘चितानतआचि अमः रआ बारे रे ओल लआ इदानआँ,
अनेज् रेनकु सिरमा दुत हुकुम वाकुअय;
हुँकू अमः अपन अती ते हथलाव मीआँकु।’”
ईसु हुँनि कथावा लअय, “नोंका हों ओल लआ इदानआँ, ‘चि अमः अपन परभु परमेसर अलोम परखावी।’”
फिन सयतान हुँनि मियड् अगम उसुल पहार तेङ रे इदी लिदियय, जोटोः दुनियाँ रआ गोटा राइज जोटोः ठट-बट एरञेल लीदिया। सयतान हुँनि कथावा लअय, “अगर अमः इकड़ुम कोते इञः रआ जँगा रेम जोहार वाइञ दो नोआँ गोटा अमःइञ ओवाआ।”
ईसु कथा रुवाड़ लअय, “सयतान, ओचोःमी! चितानतआचि धरम पोथी रे ओल लआ इदानआँ, ‘अमः परभु अपन परमेसर मी जोहारवा, जोटोः सिरीप हिनी रआ हीम सेवा-सुसार!’”
तब सयतान हुँनि बय केते सेनोः यनय, जोटोः सिरमा दुत वेज् कोते हुँनि रआय सेवा-सुसार लआ।


ईसु जब अयुम लअय चि जोहन एर सब् केते जेहेल ओड़ाः रे सींग कीदियाकु दो हुँनि गलील देस रे सेनोः यानय। जोटोः हुँनि नासरत बाय केते कफरनहूम रे, जे डहा रआ डुरी रे जबुलुन जोटोः नपताली पहटा रे सेन कोते दोहो यनाय। ताकि जे परमेसर पड़ा एतेन दुखमाय अवला जसायाह रआ कथा लआ दुखमा पुरायोः
“जबुलुन जोटोः नपताली पहटा रे,
समुदार रआ होरा ते जोटोः जरदन नाय होनहोंर
गैर-जहुदीकु रआ गलील रे!
जे होड़कु ञोता रे जिवेदोन दोहोलेनाकु
हुँकू मियड् सेंड़ा इंजोत ञेल लआकु;
जे गोज् रआ घुंज-घुंज ञोता रआ पहटा रे दोहोन अवलाकु तेङ रे
इंजोत मरसाल लेना।”
हेनेना बेरा एतेन ईसु परचारे जोटोः कथाय बुहड़ी लअय, “चि मन रुवाड़ेपे; चितानतआचि सिरमा रआ राइज ठँव रे वेज्‌कना!”


जब ईसु गलील रआ समुदार डुरी सेनो गोन दोहोनय दो हुँनि बार बोकोया ञेल लिड्किनय मियड् सिमोन जे पतरस वाइयाकु जोटोः हुँनि रेनि बोयहा अन्द्रियास। हुकिन समुदार रे जाल गिडी ञेल लिड्किनय। चितानतआचि हुकिन केंवटाकिन दोहोलेना। जोटोः ईसु हुकिन कथावा लअय, “इञः तयोम एला, अबन होड़ रेनकु केंवटा बनाव बनाइञ।” हुकिन झटहेले अपन जाल बय केते हुँनि तयोम सेनोः यनाकिन।
फिन ईसु होंडे एतेन मड़ाङ सेनलेनय दो हुँनि बार बोयहा जबदी होपोन जाकुब जोटोः हुँनि बोकोते जोहन, अपात् तेकिन सुधा डोंगा रे जाल सुढरावे ञेल लिड्किनय जोटोः हुकिन हों राअ् लिड्किनय। हुकिन झटहेले डोंगा जोटोः बबा तकीन बयअटु केते हुँनि रआ तयोम सेनोः यनाकिन।


ईसु गोटा गलील देस रआ जहुदीकु बिनती ओड़ाः रे सिछा एम यते दोहोनय, सिरमा राइज रआ बढ़ियाँ दुखमा परचार इञोः लअय, जोटोः होड़कु रआ गोटा लेकन जंडिरा जोटोः कमजोड़ी नपाय यते दोहोनय। हुँनि रआ ञुमुन गोटा सीरिया देस रे फयलावयना। जोटोः होड़कु जंडिरा लेनकु, जे कइक रकम जंडिरा जोटोः कसाट लेनकु, जोटोः जेकर एडे मुवाँ आतमा दोहोलेना, जोटोः मिर्गी अवला, अपङ अवला, हुँनि ठँवरे अगु लिड्कुआकु। जोटोः ईसु हुँकू नपाय लिड्कुअय। जोटोः गलील देस, दिकापुलिस, जेरुसलेम जोटोः जहुदिया एतेन जोटोः जरदन नाय होनहोंर एतेन होड़कु रआ अगम भीड़ वेज् कोते हुँनि तयोम सेन लआकु।

Listen to मती 4