MAFIYU 6
6
Kala‐bogi é vile faa‐nɛɛ‐ɣɛɛ va
1Ziizɛ ɣɛni tea, “A kɛsɛ wo mɛ lɛ wa Ɣala tuoi wo nɔ nu ƃuse ɣaazu ga te wo vɛtɛ. Ƃɔvɛlaale wa na ɣɛɛ na, wɛ lɛ wuloa ná nu ma wo ɣeeai nii ya é gee‐zuvɛ.
2“Na mavele ma ani yà ɣɛ na faa‐nɛɛ ɣɛɛzu, mɛ lɛ kɛ ga puu‐loo‐ma ʋaa è ɣɛ velei daa‐nɛɛ‐wũ‐ba veaitiɛ ta kɛɛ la Gala‐feli wɔtaitiɛ wu ta pele‐vɛɛgitiɛ ma kɛɛ ʋaa ma nu ƃusea te te laa maa lɛ. Gè bo wiɛ ga gaama, mawulo‐nu‐mai nɔ na sa te ya. 3Kɛ̀ ani yà ɣɛ na faa‐nɛɛ ɣɛɛzu, mɛ lɛ ƃe ba nii è yee‐zagi ɣa ɣɛ kɛɛzu è wɔwɔ‐yeegi ƃalaa ɔ́ su wɛ̃ɛ, 4kɛɛ ʋaa ma yà ʋaa‐nɛi ɣɛ ga doowu ʋaa. Nà wɔ ka ɣɛɛ na, è ɣeea Gala nii yá wɛlɛ doowu ʋaa zu va towaa su loo yìɛ.
Kala‐bogi é vile Gala‐felia va
5“Wa ɣɛ na wɔnɔ Gala felizu, a mɛ lɛ ƃɔɔ wulo ga daa‐nɛɛ‐wũ‐ba veaitiɛ. Natiɛ wɔ ka te wõini te lo Gala‐feli wɔtaitiɛ wu ta vɛ pele‐vɛɛgitiɛ ta wũi na tiɛ Gala feli na, kɛɛ ʋaa ma numaa tiɛ te vɛtɛ. Gè bo wiɛ ga gaama, mawulo‐nu‐mai nɔ na te ya. 6Kɛ̀ yà ɣɛ na Gala felizu, lɔ yà lumui zu è daa wulu è è ɣeea Gala nii ʋeli nu ƃuse lɛ pɛtɛga. È ɣeeai na wɔgi yá wɛlɛ doowu ʋaa zu va towaa su loo yìɛ. 7Wa ɣɛ na Gala felizu, a mɛ lɛ woo yãka letele gaa kpɔ ba è ɣɛ velei zii ƃalaagitiɛ ta kɛɛ la. Tɔ te ɣigi zu ga Gala ka te woi mɛni ta woo lama‐lamagi ʋaa ma. 8A mɛ lɛ ɣɛ ga te ɣavele, ƃɔvɛlaale nii maƃala wo ma wo ɣeea Gala ge kwɛ̃ni pɛ wɔ teɣa ɣɛ bosu má. 9Na ma wa Gala feli ŋɛ ni.
‘Yài è ga gé ɣeeai è gee‐zuvɛ,
ƃaa ɣa la yà laa‐zeigi ma,
10yà masadai va,
è yii‐mai ɣɛ zui zu è ɣɛ velei é ɣɛɛzu la
è wɔ vɛ,
11è zaa mii ŋɛnigi ʋe gé ya,
12è gé vaa ʋaitiɛ zu ʋaa yɛ,
è ɣɛ velei gá ƃalaa gé zɔitiɛ zu ʋaa yɛga la
gá ʋaa yɛga te va.
13Mɛ lɛ kɛ tɛ‐ga ɔ́ wo ga gíɛ,
kɛ̀ è gé wulo tuƃo‐vele‐yowũ nui ya.’
14Ƃɔvɛlaale ani wa numaa ta ʋaa yowũ zu ʋaa yɛ na, wo ɣeeai é gee‐zuvɛ towaa wo zu ʋaa yɛ tɔ ƃalaa. 15Kɛ̀ ani wɛ lɛ numaa ta ʋaa yowũ zu ʋaa yɛga, vele nɔ na wo ɣeea lɛ wa ʋaa yowũitiɛ zu ʋaa yɛga la.
Kala‐bogi é vile zi‐dɔɔ va
16“Wa ɣɛ na zi dɔɔzu, a mɛ lɛ ƃɔɔ ɣaazu maa wõi è ɣɛ velei daa‐nɛɛ‐wũ‐ba veaitiɛ ta kɛɛ la, ƃɔvɛlaale ta ɣaazu maa ʋeli kɛɛ ʋaa ma nu ƃuse wɛlɛ ta zi‐dɔɔ ʋai zu va. Gè bo wiɛ ga gaama, mawulo‐nu‐mai nɔ na te ya. 17Kɛ̀ wa ɣɛ na zi dɔɔzu, a gulo ƃadi ziɛ wũmɔ wo ɣaazu wuo, 18kɛɛ ʋaa ma nu ƃuse mɛ lɛ wɛlɛ wa zi‐dɔɔ ʋai zu va, kɛni nɔ wo ɣeeai nii nu ƃuse lɛ pɛtɛga. Wo ɣeeai nii ɣá wɛlɛ doowu ʋai zu va towaa su loo wiɛ.
Nu weli daa‐zu‐ɣɛi Gala ta
19“A mɛ lɛ yii‐ma ŋɛnia laa‐zu ɣɛ zui ɣa, vɛ koi kpɔga koi‐koi ta te mii na. Na ɣa ɣɛɛ na wũmɔ vea te pɛlɛ laa wolo te ma te te wũmɔ. 20Kɛ̀ a yii‐ma ŋɛnia laa‐zu ɣɛ Gala ta vɛ koi gɛ lɛ mia na ɔ́ nɔ ɣɛ ga koi‐koi. É wɔnɔ ga ŋadɛi wũmɔ vea tɛ lɛ pɛlɛ laa woloa na te ma tɔ te wũmɔ. 21Toku ge zei ga vɛ nu yii‐ma ŋɛni na ná ɣa kígi na ƃalaa pɛ.
Ŋada wodoai nu lɔtɔi ʋaa ma
22“Nu ɣaazu ɣɛzɛgi ɣa é ga nu lɔtɔi malaboi. Na ma ani è ɣaazu ɣɛzɛgi maʋaa za‐su wuovɛ, è lɔtɔi laa ɣa ʋe ga ŋada wodoa. 23Kɛ̀ ani è ɣaazu ɣɛzɛgi za‐su lɛ wuoni, è lɔtɔi laa ɣa ʋe ga ŋada ƃidia. Ani tɔwɔ mu nii é ga è maŋada wodoai sú ƃidivɛ, maƃidi maʋaa wala zu ɣa wɔɔlɔ ma.
Gala kpɔga nu weli
24“Nu ɣila na nu keea nu lɛ ɣɛɛ fele ɔ́ zoo é ɣɛ tii ɣɛɛzu te wu. Towaa zili ga gila é wõi ga zɔi, ɔɔ é wũ kpado gila maʋaa va ɛ́ lɛ ƃalaa zɔi ʋaa ma. Wɛ lɛ zooga wɔ ɣɛ tii ɣɛɛzu Gala bu wɔ ɣɛ wɔnɔ tii ɣɛɛzu kpɛtɛ ŋɛniitiɛ te maɣaa‐ƃai yee wu.
25“Na ma gè bo wiɛ, a mɛ lɛ yii zɛlɛ wa ŋeteai maʋaa ma toku ge zei zɔi va wa mi ɔɔ zɔi wa kpoale, ɔ́ nɔ ɣɛ ga wo yii zɛlɛ é vile wo lɔtɔi va ga zɔi wa tɛ ma.? Zɛʋui lɛ leveni daa‐mii ŋɛni va? ?Ɔɔ nu lɔtɔi lɛ leveni seɣe va? 26A wɛlɛ wɛ̃niitiɛ va. Tɛ lɛ sii‐zii ŋɛni zeizu ɔ́ nɔ ɣɛ ga te gaa lɛ ba te pu kwɔta zu. Na ƃalaa ɣɛɛvɛ wo ɣeeai nii é gee‐zuvɛ tɔ te wɔ̃nɔ kulozu.? Wo maʋaa lɛ ʋize woni te va? 27Wo ta zɛƃɛ ɣa kui dái zéea ŋeteai zu yá zoo é maƃuo ƃalaa vɛɛ ba manui yii‐zɛlɛ pele ma? 28Zɛƃɛi é kɛɛ wo seɣe mayii‐zɛlɛ seizu ma? A ɣi gaa ziɛ lɛɛ é vile gulu wuoitiɛ va te fitegi zu, velei ta ƃɛtɛ la. Tɛ lɛ tii ƃaa‐ƃaa kɛɛzu ɔ́ nɔ ɣɛ ga te geze wõɛ. 29Gè bo wiɛ, Salamɔ̃ ƃalaa na bɔɔlɔlai ɣaazɔ zu máa lɛ ŋɛni ziɣini ga gulu wuoi niitiɛ te ta ɣavele. 30?Tɔwɔ tifei nii mugi towaa ɣɛ za ga maʋulu ŋina te pili ŋabu ɣa nà mu ka Gala ge maa ziɣizu, wa mu ka teɣa ɛ́ lɛ wo maa zeɣe wuloa, wai ŋɛ ni zee‐la‐ma vɛnɛi wo ya? 31Na ma a mɛ lɛ yii zɛlɛ a wɔ ɣɛ ɣɛɛzu tea, ‘Zɛƃɛ ɣa gá mi?’ ɔɔ ‘Zɛƃɛ ɣa gá kpoale?’ ɔɔ ‘Zɛƃɛ ɣa gá tɛ ma?’ 32Ƃɔvɛlaale zii ƃalaa‐gitiɛ ta niitiɛ ɣaazɔ maa vele ɣaa ziɛzu. Tɔwɔ wo ɣeeai é gee‐zuve é kwɛ̃ni ga te maƃala ɣa wiɛ kpowũ. 33Kɛ̀ a ná masadai maa vele ɣaa ziɛ dɛ ɣaʋu pa é vɛɛ ná tele‐bo tuoi va. Na ɣa ɣɛɛ na ŋɛnii niitiɛ ɣaazɔ ta ɣɛ ga wo wo ƃalaa pɛ. 34Na ma a mɛ lɛ yii zɛlɛ ŋina ʋaa ma, ƃɔvɛlaale ŋina ɣagi yii ɣa zɛlɛ ƃɔɔ ʋaa ma. A ƃe ba faa ƃaagitiɛ ta wulo folo yee wu te wooli ƃɔɔ nɔ foloi na ma.”
Цяпер абрана:
MAFIYU 6: DN1971
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Loma New Testament © British and Foreign Bible Society, 1971.