San Juan 2
2
Ti kóte̱he̱ chojni chjasin Caná
1A̱ndá iní ña̱o chrꞌéxi̱n mé kóte̱he̱ ijnko nkexro ti chjasin Caná estado Galilea, la kja̱xin ntiha itjen ti ìñé chꞌin Jesús. 2Kja̱xin tsíkꞌéye̱he̱ sin ti chꞌin Jesús la ko ti sin kꞌuájiko chꞌan kixin tsꞌejó sin ti kia. 3Ndá ti ó kꞌuànka̱ ti vino, la ti ìñé chꞌin Jesús la ndáche tjan ti jehe chꞌan:
―Í chóntahya sin vino.
4Ndá ndáchro chꞌin Jesús:
―Ìñéni, ¿nkekuènté janhan chro̱nka tíha? Na̱xa̱ kjuixrakájña ti ña̱o tso̱nohe chojni nkexro ti janhan.
5A̱ndá ti ìñé chꞌan mé ndáche tjan ti sin ichꞌe ixra̱:
―Nchexiteyára kaín ti nkehe tsꞌe̱to̱an chꞌan.
6A̱ndá ntiha tjejó injon ichi̱ tsíkꞌónaxín ixro̱, la tíha tikia ìnta̱ tꞌónti ti sin judío kixin kjuénka̱yáxin sin kixin xi̱kaha tsꞌaxrjehe ti ijie̱ chónta sin. La nkojnko ti ichi̱ mé tjacha tikia ciento litro ìnta̱. 7Ndá kꞌue̱tue̱hen chꞌin Jesús ti sin ichꞌe ixra̱, ndáchro:
―Nchekaónra ìnta̱ kaín ti ichi̱.
Ndá kjuínchexiteyá sin kjuinchekaón sin ìnta̱ nkojnko ti ichi̱. 8Ndá kjuixin la ndáchro chꞌin Jesús:
―Tákjára intsí ti ìnta̱ tjiá ti ichi̱ la tjikue̱héra ti chꞌin tꞌe̱to̱an ti kia.
Ndá xi̱kaha kjuínchexiteyá sin. 9A̱ndá ti nkexro tꞌe̱to̱an ti kia la tsjexín ti ìnta̱ tsíkꞌóna vino, kjánchó noehña chꞌan nketí kui̱xi̱n ti vino. Jehó ti sin chꞌexín ixra̱ mé nohe sin kixin jehe sin kuakitsje sin ti ìnta̱. Ndá ti nkexro tꞌe̱to̱an mé kꞌuéye̱he̱ ti nkexro tsíkóte̱he 10la ndáchro:
―Kaín kia tjasin chojni la sa̱o ti vino náxrjón tjajon sin, ndá ti ó yeé tsíkꞌi chojni, la tjajon sin ti vino náxrjónhña. A̱ndá jaha la kjuakꞌéchjina ti vino a̱ntsí náxrjón, ndá ijie tjánjua ―ichro chꞌan.
11Ti nkehe kjua̱ko̱xi̱n chꞌin Jesús ti chjasin Caná estado Galilea mé ti kjuaxroan sa̱oxín kjuasin chꞌan, la kjua̱ko̱xi̱n chꞌan nkexrín imá ijié ti kjuachaxin chónta chꞌan, la ti sin kꞌuájiko chꞌan la kuitekaon sin ti jehe chꞌan.
12 #
Mt. 4:13. *Ndá ti ó kꞌuatsínka ti kia, ndá chꞌin Jesús sákjuí chꞌan ti chjasin Capernaum, sákjuíko chꞌan ìñé chꞌan, ti sin kícho chꞌan la ko ti sin kꞌuájiko chꞌan, la kꞌuejó sin ntiha iso ña̱o.
Chꞌin Jesús kjuínchetjóá ti ni̱nko
(Mt. 21:12-13; Mr. 11:15-18; Lc. 19:45-46)
13 #
Ex. 12:1-27. *A̱ndá ti ó kuichjina ti kia Pascua kuènté ti sin judío, ndá chꞌin Jesús sakjui̱ chꞌan chjasin Jerusalén. 14Ndá nkaxehen ti ni̱nko la kꞌuíkon chꞌan itsjé sin nchekjixin ntiha, nchekji sin koxinta, kolélo la ko kontóá. La ko kja̱xin ntiha tjejótja̱xi̱n ti sin tjinkí chichaon. 15A̱ndá kꞌuíkon chꞌin Jesús xi̱kaha, la kuákja chꞌan ijnko ihno̱ kjuatꞌo chꞌan, ndá kuakitsjexín chꞌan sin ti ni̱nko, la kja̱xin kuakitsjexín chꞌan ntiha ti kolélo la ko ti koxinta. La ti mesa tjinkíxin sin chichaon la kótéka chꞌan xítjen, la xènjin ti chichaon. 16Ndá ndáche chꞌan ti sin nchekjixin kontóá ntiha:
―¡Takítsjexinra ntihi kaín ti nkehe i! Chꞌénahñara ndasin ti ndo̱e Tꞌaná.
17 #
Sal. 69:9. *Ndá xráxinkaon ti sin kꞌuájiko chꞌan ti nkehe tsíkjin sin ósé ndáchro: “Imá kónínkaon a̱sená kixin imá tjua̱ha̱ ti nchia kuèntá.”
18Ndá ti sin judío mé kjuanchankíhi sin ti chꞌin Jesús, ndáchro sin:
―¿Xá nkehe tsjáko̱xian kixin chonta kjuachaxin kixin xi̱kaha ichꞌe?
19 #
Mt. 26:61; 27:40; Mr. 14:58; 15:29. *Ndá kjuáte̱he chꞌin Jesús ndáchro:
―Tꞌoxikara ti ni̱nko i, la iní ña̱o la ó si̱tꞌána ínaá.
20Ndá ndáchro ti sin judío:
―Cuarenta y seis nánó kꞌuejó sin kjuíchꞌéna sin ti ni̱nko i, ¿a̱ndá jaha mé iní ña̱o si̱chꞌénaxián ní?
21Kjánchó kienxínhña sin kixin ti ni̱nko ndáchro chꞌin Jesús la ti cuerpo kuènté chꞌan. 22Méxra̱ ti ó xechón chꞌan la ti sin kꞌuájiko chꞌan la xráxinkaon sin ti nkehe tsíchronka chꞌan, ndá kuitekaon sin ti xroon nixja itén Díos tsíkjin sin ósé la ko ti nkehe tsíchronka chꞌan.
Chꞌin Jesús chóxin a̱sén kaín chojni
23Ti ó kjuákꞌe chꞌin Jesús ti chjasin Jerusalén ti kia Pascua, ndá itsjé chojni kuitekaon sin ti jehe chꞌan kixin kꞌuíkon sin ti kjuaxroan kjuasin chꞌan. 24Kjánchó chꞌin Jesús la kuitekakuenhña chꞌan ti jehe sin kixin jehe chꞌan la nohe chꞌan jína nkehe tjenka̱yáxin a̱sén nkojnko chojni, 25la tichánxi̱enhña chꞌan kixin nkojín nkexro tsochronka nkexrín tjenka̱yáxin ti chojni kixin ó nohe chꞌan kaín ti nkehe tjenka̱yáxin sin.
Цяпер абрана:
San Juan 2: poeNTplus
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2016, Wycliffe Bible Translators, Inc. All rights reserved.