Luk 24
24
Yisa kuun fiiru labaar
(Matiu 28.1-10; Mak 16.1-8; Jɔɔnn 20.1-10)
1Lasir daar sanyafaar, ki poob maŋ nyii saan kaauk maŋ boor nan bi kpanunubit nan tulaarii nba ki bi poŋ ŋamm na. 2Ba baar leŋ ki bi la ki katangbeŋŋir ki li nyakit kaauk na mɔb paak, ki birint ki saa dɔɔ. 3Ba kɔɔ kaauk maŋ ni ki saa ki la Yisa gbanant 4ki bi ji biar see jiiaa. Li taakpaak ni ki jab bannlee see ki lia liatnyinyira; 5ki li teen poob na jaŋmaansooruk, ki bi gbaan tiŋ ni. Ki jab na boib a “Bee ki i gorii footɔɔ kpeemm ni? 6U kaa nna. U fiira. Tiat man wa din yeti biaŋinba, yoo nba ki u daa din be Galilee na, 7a bi tan sa soor ŋɔɔ nisaarik Bik ki jiiu teen biitdamm nuu ni ki bin kpaau tabinɔ dapunpunn paak ki wun kpo; a ki u tan sa fiir kuun ni daa ŋanntaa daar.”
8Ŋanne ki poob na ji tiar u maan maŋ po, 9ki ji seet kaauk na boor ki ŋmat kun, ki saa yet linba kur teen, ki tur u poorpoweiteeb piik nan yenɔkɔɔ, nan binba be leŋ na kura. 10Ki poob maŋ sanae din tee Mari Magdaliin, nan Joanna, nan Mari nba din tee Jems naa na; ki pooleeb mun din pukin bi paak ki be bi ni. 11Ŋamme din bet Yisa toomiinba barii maŋ; ki toomiinba na ŋanin din dukii nan li tee poomaame, ki bi ki teemm yada. 12Ŋaan ki Piita ŋanin din fiir ki chiar saan kaauk na boor, ki saa tibin ki got ki la kuun chinchenn na ki li dɔɔ li kuukɔɔe; ki u ji ŋmat kun ŋaak ni nan yaarlituk nan linba teen maŋ paak.
Emmaus sɔnu paak labaar
(Mak 16.12-13)
13Li daar maŋe ki bi ni niib bannlee din saa digbanbik nba yi Emmaus na. Leŋ nan Jerusalem din tee kaman nan maar ŋannlore nee. 14Ki bi din somm piak nan leeb linba na kur nba teen maŋ paak. 15Ba piak ki faa labaar nan leeb yoonba na, ki Yisa mɔŋ nakimm ki lakin namm saa; 16ŋaan ki Yennu te ki li liirib ki bi ki bann Yisa. 17Ki u boib a “I somm piak a bee?”
Ki bi set nan ninbiik. 18Ŋanne ki bi yenɔ, wunba sann yi Kleopas na boiɔ a “A kuukɔɔe tee saamɔ nba be Jerusalem na ki tan ki gbat barii nba teen leŋ daa ŋannlelee na-aa?”
19Ki u boib a “Barlannpoe?”
Ki bi yetɔ a “Ki jikit saa Nasaret nirɔ Yisa po; jɔɔ na daan tee Yennu sɔkiniie, ki tun toonjaana; ki u maan mun daan mɔk paŋ; ki u penn Yennu nan nirɔ para. 20Ki ti yudamm nan Yennu jiantu yudamm jiiu ki teenɔ barbuurɔ nuu ni a wun bu u buut ki yet a u ŋan nan kuume; ki bi tan kpaau dapunpunn paak. 21Ŋaan ki ti tuu daan nan ŋɔɔe tan sa nyinn timm Israel teeb ti datai nuu ni; ki linba pukin, dinna tee daa ŋanntaae na la teen. 22Ŋann maŋe biak, ki ti ni poosiab pakit u po ki li yaar ŋaan litit, kimaan ba saan kaauk maŋ boor sanyafaar na, 23bi saa ki la u gbananti. Ba jen yoonba ki bi betit a ŋamm saa la Yennu malakanba nan bi numm; ki malakanba maŋ yetib a Yisa jen u manfoor niwa. 24Ŋanne ki ti yemm tan saan kaauk maŋ boor, ki saa la kaman nan poob nba dɔŋ betit na, ŋaan ŋamm ŋanin saa ki la Yisa.”
25Ki ŋɔɔ Yisa betib a “Bee yankpeensime ki i mantik mi nna nan ki i teen sɔkiniinba maan kur yada. 26Li teen talas nan Yennu Niganntɔɔ Masia-n di fara maŋ, ki tan la u baakir.” 27Ŋanne ki u wantib u barii nba sɔb Yennu gbouŋ kur ni na paak, ki piin Moses sɔbu ni nan sɔkiniinba sɔbu kura ni.
28Tɔn, ki bi tan per digbanbik nba ki bi baat na; ki Yisa tan teen nan u gaare na. 29Ki bi gɔɔrɔ ki yeen a “Biat nant nna, a kimaan yennu baawa ki li ji bɔnte.” Li paak ki u ji kɔɔ ki biar bi boor ni. 30Ki u tan kar a wun di namm; ŋanne ki u jii boroboro na ki tur Yennu niipoouk li paak, ŋaan bɔkit ki turib. 31Li yoo na ki bi numm po ji yent ki bi ji bannɔ. Li taakpaak ni ki u bia lir bot bi ni. 32Ki bi ji beer bi leeb a “Wa piak nant sɔnu paak ki wantit linba sɔb Yennu gbouŋ ni na paak, a ti para ki penn bonchiannii?”
33Li taakpaak ni ki bi fiir ŋmat Jerusalem, ki saa la u poorpoweiteeb piik nan yenɔkɔɔ na nan siab ki bi lakin leeb. 34Ŋanne ki u poorpoweiteeb na betib a “Ti Yomdaanɔ set fiire nan barmɔnii. U dɔkit Simon paak.”
35Ki niib bannlee na mun betib linba teen sɔnu paak, nan biaŋinba ki bi bannɔ nan wa tan bɔkit boroboro biaŋinba na.
Yisa nba dɔkit u poorpoweiteeb paak biaŋinba
(Matiu 28.16-20; Mak 16.14-18; Jɔɔnn 20.19-23; Toona 1.6-8)
36Ba beerib linba na, li taakpaak ni ki Yisa set bi sinsuuk ni ki yetib a “Parmaasir-ii be i paak.”
37Ki jijekit nan jaŋmaanii soor kɔɔb hei, kimaan bi dukii mi a bi la siara bonfintikare. 38Ŋanne ki u boib a “Bee ki i yan paak puti? Bee ki birsuk be i ni? 39Gotir n nii nan n taa man, ki bann nan li set tee mine. Siimin ki bann nan mine. Bonfintikar ki mɔk gbanant nan kpaba, ŋaan i la ma mɔk gbanant nan kpaba biaŋinba.”
40Wa yet nna maŋ ki u wannib u nii nan u taa. 41Ŋaan bi parpeenn paak ki bi bia lek ki mi teenɔ yada nan li tee ŋɔɔe; ki li bia yaar litib. Ki u boib a “I mɔk jesiat nna-aa?” 42Ki bi jii jaŋŋaakir bonchiɔk ki turɔ; 43ki u gaar ki ŋman bi numm ni.
44Ŋanne ki u betib a “I tian man n mɔmaan nba ki n daan wanti ma daan be i boor ni yoonba na, a n barii kur nba sɔb Moses sennu ni, nan Yennu sɔkiniinba sɔbu ni, nan Yennu gbouŋ nba ki bi yi yanii na nɔɔk ni, a li kpaa talas nan li kur-n tan mantik tun ki gbenn.”
45Ŋanne ki u ji yênt bi numm a bin bann linba sɔb Yennu gbouŋ ni na paak, 46ki yetib a “Li sɔb a Yennu Niganntɔɔ Masia sa di fara ki kpo ki tan fiir kuun ni daa ŋanntaa daar; 47a bin saan ki mɔɔnt niib u sann paak a bi-i nyik bi biit Yennu sa nyik chabib; a bin piin ki mɔɔnt Jerusalem teeb barii maŋ sinsinn, ki bia mɔɔnt nibooru kur mun.” 48Ki u bia betib a “Yimme tee linba na siara damm. 49Nnara, mine yaa n tan turi n Baa Yennu Seyeeŋ nba ki u senn mɔsonn a u sa turi na. Yii daa biar kii be man Jerusalem mɔkmɔk nan yoo nba ki Yennu Seyeeŋ maŋ sa nyi sanpaapo ki sik i paak ki turi paŋ.”
Yisa nba doo Yendɔuŋ ni biaŋinba
(Mak 16.19-20; Toona 1.9-11)
50Ŋanne ki Yisa nyii namm doo maŋ ni ki saan namm Betani. Leŋe ki u saa donn u nii sanpaapo ŋaan senn mɔsonŋann bi paak. 51Wa senn mɔsonŋann na yoonba na, ki u yaat ki nyikib ŋaan doo Yendɔuŋ ni. 52Ki bi ji jiantɔ ki tan ŋmat Jerusalem nan parpeenn bonchiann. 53Ki bi ji din jii bi yoo ki be Yennu jiantu ŋasaakak ni yoo kura, ki piak dont Yennu sann.
Цяпер абрана:
Luk 24: BIM
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце