Matiu 5
5
Parpeenn labaar
(Luk 6.20-23)
1Yisa nba din la niburchiauŋ maŋ na, ki u doo kunkonn paak ki saa kar; ki u poorpoweiteeb lakin u boor ni. 2Ki u piin ki wantib Yennu maan ki yeen a
3“Binba mi bi mɔŋ nan bi namii,
parpeenn tee bi yare,
kimaan Yennu naan tee bi yare.
4“Binba mɔ ki fabin, parpeenn tee bi yare,
kimaan Yennu sa maan bi parawa.
5“Binba sikin bi mɔŋ, parpeenn tee bi yare,
kimaan ŋamme tan sii yen tingbouŋ na.
6“Binba ninbina mɔn ki bi para ni lakib nan Yennu toona,
parpeenn tee bi yare,
kimaan Yennu sa gboomm bi para nba lakib linba maŋ paak.
7“Binba mɔk ninbatinu nan bi leeb,
parpeenn tee bi yare,
kimaan ŋamme ki Yennu mun bia sa timm ninbaauk.
8“Binba para ni yeen, parpeenn tee bi yare,
kimaan ŋamme sa la Yennu.
9“Binba tee sandantinna nan kunkɔnpat teeb,
parpeenn tee bi yare,
kimaan ŋamme ki Yennu sii yib u waas.
10“Binba jiantir Yennu ki bi mukisib na,
parpeenn tee bi yare,
kimaan Yennu naan tee bi yare.
11“Niib-i sukii-i, ki mukisi, ki fa faakboorii boorii kur ki biiri, kimaan ya tee n poorpoweiteeb na paak, parpeenn tee i yare. 12Bi-i taŋŋi teei nna, yii mɔk parpeenn man bonchiann, kimaan i nyɔɔt tan sii yab Yendɔuŋ ni; nnee ki bi poŋ din mukis Yennu sɔkiniinba nba din be yaayoo ni na.
Yaarin nan yentu labaar
(Mak 9.50; Luk 14.34-35)
13“I tee kaman nan yaarin nee tingbouŋ na ni. Yaarim-i taŋŋi biir ki ji ki mani, nlee ki li ji sii mani? Li wann nan li ji kaa nyɔɔti; see ki bi kpaar ki mɔɔn tiŋ ni, ki niib somm li paak.
14“Yimme tee tingbouŋ na yentu; doo nba ki bi maa ki senn kunkonn paak, li kan fit bɔri. 15Sɔɔ mun kan joo fitir ŋaan jii ŋmaŋ ki chibini; see ki u jiir ki tɔɔnn bonsiar nba fɔk paak, ki lin tur ŋaak niib kura yentu. 16Yimm mun-ii be nna; ŋaant ki i yentu-n yent tur nifosaarii, a bii laat i toonŋana kii dont i Baa Yennu nba be Yendɔuŋ ni na.
Sennu po
17“I daa dukii nan n baar ma n tan kpeen Yennu sennu nan u sɔkiniinba maan nee; n ki baar ma n tan kpeenn kaa, ŋaan n baar ma n sakir nan barmɔniie; 18kimaan barmɔniie ki n beeri na, sanpaak nan tingbouŋ na tan sa gbenn, ŋaan Yennu sennu na nan li bonmintik kan mi bot, see ki li kura tan tun ki gbenn. 19Li paak, wunba tan tun ki kpet Yennu sennu maŋ yennkɔɔ gbaa, ki bia wann leeb bonkpetir maŋ, u tan sa joont tarike Yennu naan ni; ŋaan wunba waa sennu maŋ fanu, ki bia want u leeb fanu, ŋɔɔe tan sii tee nijaann Yennu naan ni. 20Kimaan mii beeri nan see ki i toonŋana yab ki gar sennu wannteeb nan Farisiinba yar, li-i kii tee nnai kaa, i kan mi ki kɔɔ Yennu naan ni.
Wutoor po
21“I poŋ gbat ki bi din yeen yaayoo ni niib a ‘Daa kpi nirɔ, kimaan wunba tan kpi nirɔ tan sii be barii ni barbudaar;’ 22ŋaan min ŋanin beerie la, nan wunba dont wutoor u naa bik paak yann yann, ki li kaa paaki, u tan sii be barii ni barbudaar; ki wunba sukir u naa bik a ‘Bon-yann na,’ u tan sii be barii ni; ki wunba mun bia sukir u naa bik a ‘Bonjatir na,’ u tan sii be barii ni ki kɔɔ muu nba kan mi kpeen na ni. 23Li paak, wunba tan kɔɔ Yennu diiuk ni a wun pi Yennu piinii, ŋaan tiar nan u mɔk biit nan u naa bik, 24wun nyik u piinii maŋ leŋ, ŋaan ŋmat saan u naa bik na boor ki bin saa ŋamm bi barii ki gbenna, ki wun jen ki tan pi u piinii maŋ ki tur Yennu.
25“Fin nan sɔɔ-i mɔk maan, ki saa barii maŋ buut, fan ŋaan ki yin taan mɔyemmkɔɔ ki ŋamm i barii maŋ yoo nba ki i daa be sɔnu ni na; li-i kii tee nnai kaa, jɔɔ na sa jiia ki saan nana barbuurɔ boor ni, ki barbuurɔ na-n mun jiia ki teena dansarguutɔɔ nuu ni ki wun kɔɔna dansarik. 26Barmɔniie ki n beera na, a kan mi nyi leŋi, see ki a tan pa likirii kur nba ki bi jiiara, ki kobu kan tenni.
Bonchonchonn toona po
27“I poŋ bia gbia ki bi din yeen a ‘I mi ki a tun bonchonchonn toona;’ 28ŋaan min ŋanin beerie la, nan wunba got poo ki u niauŋ kɔɔu, u tun bonchonchonn toonn u par niwa. 29Li-i tee ki a diitu po ninbinnie te ki a yaa a tun toonbiit, fan kpakirɔ ki lu, kimaan li-i tee ki a kɔŋ a ninbinn yennkɔɔ, li chee nan ki Yennu-n tan kɔɔn a gbanant kur muu nba kan mi kpeen na ni. 30Li-i tee ki a nuudiitue te ki a yaa a tun toonbiit, fan potɔ ki lu, kimaan li-i tee ki a kɔŋ a nuu yennkɔɔ, li chee nan ki a gbanant kur-n tan kɔɔ muu maŋ ni.
Pooyêtu labaar
(Matiu 19.9; Mak 10.11-12; Luk 16.18)
31“Bi bia din yeen a ‘Wunba loon ki wun yêt u ŋaapoo, wun turɔ pooyêtu gbouŋ;’ 32ŋaan min ŋanin beerie la, nan wunba kur tan yêt u ŋaapoo, ki li ki tee u tun bonchonchonn toonn kaa, ŋɔɔe te ki u poo maŋ tuun bonchonchonn toonn; ki wunba kɔɔn poo nba ki bi yêtɔ na mun bia tun bonchonchonn toonna.
Mɔpor po
33“I poŋ bia gbia ki bi din yeen yaayoo ni niib a ‘I mi ki a por mɔpor nan faak, ŋaan li-i tee ki a por mɔpor Yennu sann ni, li ŋan ki a tun ki gbenn a mɔpor maŋ;’ 34ŋaan min ŋanin beerie la, nan i mi ki a por mɔpor gbaa; daa yeen a ‘N por sanpaapo,’ kimaan li tee Yennu naangbouŋo; 35daa yeen a ‘N por tingbouŋ,’ kimaan li tee Yennu taapanŋmaatire; a bia daa yeen a ‘N por Jerusalemi,’ kimaan li tee yabint Yennu dooe; 36a bia daa yeen a ‘N por n yuri,’ kimaan a kan fit te ki a yukobuk yennkɔɔ-n penn amii ki bɔnni; 37ŋaan ŋaant man ki i jiinu-ii tee, ‘Nn,’ amii ‘Aaii,’ kimaan li-i tee ki a por siar ki pukin linba na paak, li ji nyii Biitdaanɔ maŋe.
Daa jiint leeb pana man
(Luk 6.29-30)
38“I poŋ bia gbia ki bi din yeen a ‘Sɔɔ-i kpakir a ninbinn, fan mun kpakir u yar ki jiin pann; sɔɔ-i faa-a ki fokit a nyann, fan mun faau ki fokit u yar ki jiin pann;’ 39ŋaan min ŋanin beerie la, nan i daa jiint leeb pana; sɔɔ-i peb a tanpak a nuudiitu po kpianu, fan ŋmant a gaŋ po mun ki wun peb; 40sɔɔ-i yaa wun saan nana buut boor a wun gaar a soot, fan sak ki wun tont a chinchenn biak kii saa; 41sɔɔ-i mia-a a jii u jikpiatir ki saan nann mar yennkɔɔ, fan jii ki saan nanɔ mar ŋannlee. 42Wunba miara siar, fan turɔ; ki wunba mun bia loon ki a kpentɔ siar, fan kpentɔ ki daa miinɔ.
Datai labaar
(Luk 6.27-28, 32-36)
43“I poŋ bia gbia ki bi din yeen a ‘I loon a naa waas ŋaan kii nan a datai;’ 44ŋaan min ŋanin beerie la, nan yii loon man i datai mun, kii yeen wunba sukii-i na a ‘Yennu mɔsonŋann-ii be a paak;’ kii tuun linba ŋan kii teen binba nami; kii mei Yennu kii teen binba dinti fara na. 45Ŋanne sa te ki i set kii tee ti Baa Yennu nba be sanpaapo na waas, kimaan ŋɔɔe te ki yennu do nifobiit nan nifoŋamm paak, ki bia te ki saak baa nifobiit nan nifoŋamm doi ni. 46Kimaan li-i tee ki i loon binba looni na kuukɔɔe, nyɔlantpoe ki i sa la Yennu boor ni? Li ki tee nna kaa ki nifobiit mun tuumii? 47Ki li-i tee ki i foont i naa waas kuukɔɔe, toonŋanlannpoe ki i tun ki gar leebi? Nna kaa ki binba ki waa Yennu sɔnu na mun tuumii? 48Li paak, yii be man fanu kaman nan i Baa Yennu nba be sanpaapo na nba be fanu biaŋinba na.
Цяпер абрана:
Matiu 5: BIM
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце