Genèse 3
3
Adam nì Awa yīntiǹ Unimbɔti
1Ukoobu di nìn nyí diŋmatindi ipeel in ti-Dindaan Unimbɔti nìn náańee kɔkɔ kansikin. Dalbee ní u dɔ́miń ki bí unimpu yii: «Tiŋman ní Unimbɔti lafun lī yii ní taa ŋmɔ́ bukpaa nee poon subiliŋaaa?» 2Ní unimpu kíí-u yii: «Ti ŋūǹ kí ŋmɔ́ isufi in yú bukpaa poonee biliŋ. 3Ama busubu bun yú bukpaa kansikinee bil ní Unimbɔti bí yii tí taa ŋmɔ́ kí taa gbēē-bu, an yaa sá fám ti làá kpú.» 4Niinee ní ukoobu bí unimpu yii: «Kaa sá míǹ, naa làá kpú. 5Di sá Unimbɔti nyí yii daliŋkin ni yaa ŋmɔ́ busubu gbanti bilee, ni-nimbiliŋ làá ŋúbití ní ní nīn kíǹ ki nyí tiŋan nì tikpitil kii úǹ Unimbɔti nín nyí puee.»
6Unimpu mun ká yii busubuee bil ŋān̄ ki mɔ̄ diŋmɔl, ki cáá nnimbitaataam, ki lafun máaǹ kí ŋúbití unil nimbiliŋ, ní u kītì ki ŋmɔ́. U-cal bí u-cee ní u tīī u mun ní u ŋmɔ́. 7Niinee ní bi-liitil nimbiliŋ cúu ŋúbitì ní bi ká yii bi bí dicancaŋgbeel, ní bi tīfì busubu bun bi yíì fiigee faati ki ŋáĺ ki dūu lōoǹ.
8Kujoou jóotì kubuŋu bíi jītí fílfilee ní bi gbìl̄ ti-Dindaan Unimbɔti pu u bí ki còom̄ bukpaan. Ní bi sáǹ ki bál̀-u bukpaayee sufii kansikin. 9Ní ti-Dindaan Unimbɔti yíiń uninja yii: «A bí la ní?» 10Ní u kíí-u yii: «M nín bí bukpaan ki gbìl̄ a-puee ní m fāŋkì, kun puee m bí dicancaŋgbeel, an pu ní m bál̀.» 11Ní ti-Dindaan Unimbɔti bí-u yii: «Ŋma tùkū-si yii a bí dicancaŋgbeel? Àá a ŋmɔ́ busubu bun bil m kpáafì-si yii á taa ŋmɔ́ee ní?» 12Ní uninja kíí-u yii: «Unimpu un a cáań ki ŋàl̄-mee di kītì disubil gbanti ki tīī-mi ní m ŋmɔ́.»
13Ní ti-Dindaan Unimbɔti bí unimpu yii: «Ba di yì-tì ní a ŋá míǹ?» Ní unimpu kíí-u yii: «Ukoobu di kíil̀-mi ní m ŋmɔ́#3.13 Dūú ŋmàntī nì 2 Kɔra 11.3, 1 Tiim 2.14..»
14Ní ti-Dindaan Unimbɔti bí ukoobu yii:
«An nín ŋá pu ní a ŋá mimmee,
m tɔ́-si mbusu tiwaŋkuti nì ipeel kɔkɔ kansikin.
A làá nīn kíǹ ki fù a-bindi pu ní.
A-jinti di làá nīn kíǹ ki sá ŋkpɔŋkpɔm
kí tin sāā a-kúm dal.
15M làá náań kudɔ̀ŋu kí bíĺ sii nì unimpu kansikin,
kí bíĺ a-maaliŋu nì u-maaliŋu kansikin.
U-maaliŋu làá dāá tāā kí mátí a-yil,
ní sii ń dāá jú úǹ tagbíndi#3.15 Kpèè Dilee 12.17..»
16Ní u bí unimpu yii:
«A nín ŋá miŋyee, m làá gbéeǹ-si timatíǹdi gìńdi.
Nì falaa ní a làá nīn màal̀ a-biyaamu.
A-cal neeliŋu làá nīn pée cáá-si,
ama úǹ di làá nīn cáá sii pu mpɔn.»
17Ní ki bí uninja yii:
«A nín ŋá pu ki pílifì a-nimpuu nyɔkɔ
ní ki ŋmɔ́ busubu bun bil man kpáafì-si yii á taa ŋmɔ́ee,
a-puee m tɔ́ kitiŋ mbusu.
A làá nīn ŋáań falaa
ní kí nín ká tijin kí jī.
Míǹ ní án làá nīn bí-si
áli kí tin sāā a-kúm dal.
18«Apɔn nì abɔjanaakun di làá nīn nyēē a-kpaabun,
a-kpaajinti ní a làá nīn jīǹ#3.18 B. 17-18: dūú ŋmàntī nì Eebru 6.8..
19See á tɔ̄ ditundi kí káaĺ kutuntuŋu a-yigbeel pu
ní kí wàatī kí nín ká tijin kí jī.
Án làá nīn pée bí-si míǹ ní,
áli á dāá fàtīí gítí ntam min m lēē ki máń-see poon.
Kun puee a sá ŋkpɔŋkpɔm ní
ki làá fàtīí gítí ŋkpɔŋkpɔm.»
20Ní uninja pú u-nimpuu diyindi yii Awa, taapu di sá yii un bí dimaŋfalinee, kun puee úǹ di sá binifoobi kɔkɔ na. 21Ní ti-Dindaan Unimbɔti dū tigban ki lōoǹ Adam nì u-nimpuu. 22U ŋá míǹ ki dóòyee ní ki bí yii: «Kɔŋkɔnnee, unil kpántì kii ti-kansikin ubɔ dee, ki kíǹ ki nyí tiŋan nì tikpitil. Tí taa yàntī ú ŋmɔ́ dimaŋfal subil kí nīn bí jaanjaan kaa kúù#3.22 Kpèè Dilee 22.14..» 23Niinee ní ti-Dindaan Unimbɔti jìn̄-u Eedeen kpaabun ú cù kí nīn kù kitiŋ kin pu bi lēē ki máń-uee. 24U jìn̄ unil mimmee ní ki cáań keerubimbi#3.24 keerubimbi sá biciitiliibi bin bí Unimbɔti nimbiin ki tūǹ atuunee ní. ki yóoǹ bukpaayee nyɔkɔpu ŋwìiń nyalaŋki pú, bi ŋúb́ kitàataajiki ki fīintí an ŋmóò làka laka, ki yú dimaŋfal subu saŋŋu pu ki cí-ŋu.
Цяпер абрана:
Genèse 3: BASSARDC
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
BIBLE EN N'TCHAM (Bassar) © Alliance Biblique du Togo, 2013.