Luc 20
20
Nkul jwɨ́ɨ mé Yésʉs
(Matthieu 21.23-27; Marc 11.27-33)
1Ɨ́ gúú móhó, Yésʉs dína lɨ́ elɛ́ɛ mínzɨnzɨ mi bʉ̂r Mbɨambɨa Lɔ́ɔ ɨ́ mpáh Nzyɛ̌m nɛ́ɛ: ojwɨ́ɨ o tɨ̂ʼ le olɛ̂ʼla o métié, le otɔ́má bʉ̂r, ntɔ̂ʼ pyâl tɨ̂ʼ ɨ́ sulûm. 2Bê nzě lɛ́ɔɔ ó: «Twóóláá díé é mʉ̂r á lómo go ó, go sâʼ bisá bîʼ nyá. Go ntémé pʉgʉ́ sâ byé e nkul mé nzé?»
3Yésʉs ntɔ̂ʼ yala e bé ó: «Mɛm ntémé múo nzě dî bɨ́n tíá. Yalaa gá me! 4Ndubó mé Yʉánɛs, wé á duho wó? Nzê kwá mé Nzyɛ̌m, nzê kwá bʉr?»
5Nó ó bé á nze díila páʼ nyɔ́ɔ́. Bé ó: «Mɨ́ná yálá gá ó: “Nzyɛ̌m ó b'á lómo nye” nó, nye óbáʼǎ dî ó: “Yé bé nó wá, bɨ̌n á bé abûʼla nyé ɨ́ yé?” 6Mɨ́ná yálá gá ó: “Bʉr ó b'á lómo nye” nó, minzɨnzɨ mi bʉ̂r mímyɛ̂h, myé ólúmo gá mɨná mekóʼ.»
(Ebě, myé á be lɨ́ ebúʼla ó, Yʉánɛs á kʉ be tyeetye ó ngwíha milɔ̌b mé Nzyɛ̌m.)
7Nó ó bé á ka yala e né ó: «Bɨ̌h bɨɛ, bé agʉ́a yɨ́h bé nkǒ ndubó wé waá, wé á pʉgʉ duho yɨ́!» 8Nó ó Yésʉs á lɛ́ɛ e bé ó: «Yé bé nó wá, me ntémé, me ákóʼó lɛ́ɛ bɨ́n mʉr dí edwe mé nkul ó, me sâʼ bisyɛ́ɛla bínɨ̌ nyá.»
Kɨkɛna bíbɨ́bla bílóbila
(Matthieu 21.33-41; Marc 12.1-12)
9Yésʉs nzě lwib e kúl óYúden ɨ́ nzɨ̌ kɨkɛna yɨ̂. Nye e né ó: «Mʉr á be ó, nzě lî pemé, be métín mé óraisin tɨ̂. Píe tɨ̂, nzě líʼe bílóbila e pemé yaá, ó byé jɨ̂jana nye ɨ́ swɨɨ ékpɛm. Nye nzě ja nzɨ́, tô ɨ́ tyen, tó di ɨ́ gúú pâʼ mimbû mimbû, miswɨɨ miswɨɨ. 10Jɔ̌ʼ swɨɨ ékpɛm, yé á pyâl yɨ́, nye nzě lómo syɛ̂l mesâ wé ó, nye tôʼ nʉa nyé nkɔ̂b mpumó. Bilóbila byaá nzě bî nyê, bwóolɔɔ nyé mebô e mebô. 11Nó nyé á baʼa lómo syɛ̂l mesâ swîh. Byê nzě bî ntémé nye, sáŋɔɔ nyé bisá bí ésɔ́m, bwóolɔɔ nyé mebô e mebô. 12Nye nzě báʼǎ lómo waá lɛ̂l. Nyɨ́haá ó, byé á bɛ́ble mepɨ́ɨ́, ntɔ̂ʼ soŋɔɔ nyê. 13Kúm pemé óraisin nzě lɛ́ɛ ó: “Á me káa sâ wâʼ nyá? Me múo kǎ lómo mwân wǎm mé dí ɨ́ buú kpɛl nyá. Jáŋá, byé ódwáawo nyê.” 14Jɔʼ bílóbila byé á bee mwân yɨ́, byê nzě lɛ́ɛla páʼ nyɔ́ɔ́ ó: “Beyɨɨ gá, medilá me kúm pemé ó mâ! Mɨná jʉ́ʼoo gá nye. Bilíʼé byé, byé nkʉ̂ sûʼla byaá gá bíná.” 15Byê nzě pɛʼ nyé ɨ́ pemé tʉ́ŋlʉ̌, tó jʉ́ŋɔɔ nyé mpómo pemé.
«Nó kúm pemé ókǎ sâ bé nyá? 16Mɛ̌m bee ó, nye ónzě jʉ̂ bílóbila byaá bíbyɛ̂h, nzě pɛ̂h bʉ̂r oswîh, nzě kǎ tímle bé pemé yaá.»
Jɔʼ bʉ̂r bé á jóʼo nó yɨ́, bé ó: «Heʼé, yʉ́ʉ́ sɔ̂ʼ, yé ákóʼó syɛ́ɛ bá nó!»
17Yésʉs nzě dwɛ̂ʼ bê. Nye e né ó: «Wáǎ lɔ̌b dí cɛmá ó?
“Ekóʼ óswim ó mbɛ̌r, bé á bene lɨ́,
lé ó b'á ka sûʼla ekóʼ e dí esúʼo médwii me sɔ́ŋ lɨ́.”
18Mʉr nyɨnyɛ̂h ócwe lɨ́ ekóʼ laá nyá, óbîʼ. Waá ékóʼ ngá bíla nyá, ósiǐ noʼ.»
19Olɛ̂ʼla o métié le ojwɨ́ɨ o mpáh Nzyɛ̌m á be ó lɨ́ esáa émɛ̂r Yésʉs ɨ́ jɔʼ yaá, ebě, bé á be ɨ́ gʉ́a ó, nye á lwib ɨ́ nzɨ̌ bikɨkɛna byaá ó, dumo e bê. Sâ gwár, bé á be lɨ́ ekpɛ́ɛ mínzɨnzɨ mi bʉ̂r.
20Bê nzě táare étô le ebaʼɔɔ nyê. Nzě lómɔɔ bʉ̂r o b'á nwɨɨla le otîtyěl o bʉ̂r bá ó, bé tôʼ lâm nyé lâm dí ó, bé nkʉ̂ mɛ̂r nyé ɨ́ lɔ̌b yalá yé. Jɔʼ yaá ó bé á be e nkul ebɛ́ma nyé ɨ́ mebó mé njwɨ́ɨ, ó nye kúrɨɨ ɨ́ nkul jwɨ́ɨ mé ngóvina yɨ́. 21Nó ó bé á nze lɛ́ɛ e né ó: «Lɛ̂ʼla, bɨ̌h bé lɨ́ ekʉ́ gʉ́a ó, sá gó dí elɛ́ɛ le elɛ̂ʼle yɨ́, gǒ lɛ́ɛ́ yé ó, njɨ tîtyěl. Gó abe lɨ́ edwáawo bʉ̂r mempǒm. Gǒ jaá dwidwe bʉ̂r milɛ́ʼlá ó, njɨ lɨ́ otyeetye, ɨ́ mpʉ̌ Nzyɛ̌m dí ekpɛl yɨ́. 22Nzê metié gá mɨ́ná, mé kam ó, mɨná jánaa gá Kɛ́ɛza tœ́a ɛ̌? Nzê yê mpéné ó, mʉ̌r sá ajána nyé yǎ ɛ̌?»
23Mpʉ̌ Yésʉs á be ɨ́ kʉ́ gwá gʉ́a mépɨʼ mɔ́ɔ́ yɨ́, nó ó nyé á lɛ́ɛ e bé ó:
24«Paá lɛ̂ʼle gá me nzǎŋ mɔnɨ́. Mpǒm mé nzé le díé mé nzé dí lúlá ɨ́ nzaŋ wɨ̂?»
Nó ó bé á lɛ́ɛ ó: «Byaá mé Kɛ́ɛza.»
25Nó ó Yésʉs á nze lɛ́ɛ e bé ó: «Bwóóláá gá bé Kɛ́ɛza bisá mé Kɛ́ɛza; le Nzyɛ̌m, bisá mé Nzyɛ̌m!»
26Bé á bé abe e nkul ká dwe nyé mebě ɨ́ mekǎn nyé á lwib ɨ́ míh mínzɨnzɨ mi bʉ̂r má. Bé á si kâm yalá yé. Bɨ́bɛ̂h di ɨ́ jolaaa.
Lɛ́ʼlá ɨ́ lɔ̌b épah ɨ́ mesoo
(Matthieu 22.23-33; Marc 12.18-27)
27Nó bʉ́ʉ́ óSadwisyɛ̂n, bʉr o dí elɛ́ɛ ó, odwe, bé ákóʼó pah ɨ́ mesoo bá, bé á nze kwá mé Yésʉs. Bê nzě dî e né ó: 28«Lɛ̂ʼla, Moyɨ̂z á be ɨ́ tyêl mɨ́ná gá etié lɨ̂. Lê cɛmá ó: “Mbɛ́á mʉ́rʉ̂m ódwe, alíʼe mwân nó, yé jala ó, mɨ́ɔɔ́ wé bâʼ mʉmá wé, bé e mʉmá waá nkʉ̂ byâ bwân lɨ́ esú é mɨ́ɔɔ́.” 29Nó ó, yé á be ó bʉr nzaangbá, bɨ́ɔɔ́ e bɨ́ɔɔ́. Medwéʼe á si bâ mʉmá. Di ɨ́ di di di, nye nzě dwe, alíʼe mwân. 30Waá mbá ntɔ̂ʼ bâ kúho waá, dwe, alíʼe mwân. 31Waá lɛ̂l ntémé. Tó pyâl ɨ́ bɨ́bɛ̂h nzaangbá, bé á dwe ó, alíʼe bwân. 32Píe tɨ̂, mʉmá ntémé kǎ dwe. 33Nó ɨ́ móhó bʉ̂r, bé ópah ɨ́ mesoo wɨ́, nye ókǎ sûʼla myáá mé nzé? Ebě, bɨ́bɛ̂h nzaangbá á si bâ nye.»
34Nó ó Yésʉs á yala e bé ó: «Bʉr ó jɔʼ yɨ̂, bé lɨ́ ebɛ́a. 35Sâ gwár, odwe ó Nzyɛ̌m dí ebee ó, bé ɨ́ jala le epah, tó di e né ɨ́ mpóʼo ngá tyélɔɔ nyɨ́ bá, bé ákóʼó kǎ bɛ́a. 36Ebě, bé ákǎ báʼǎ dwe. Bé óbe ó mpʉ bééngeles. Bé ó bwán mé Nzyɛ̌m, ebě, bɨ́ boó pah. 37Moyɨ̂z á si boo lɛ́ɛ ɨ́ hwɨ́m ó, bʉr, bé ópah ɨ́ mesoo. Nye á lɛ́ɛ nó ó, gúmó nyé á lwib ɨ́ lɔ̌b njʉl nyé á kœb lɨ́ edúo ɨ́ kpâʼ tʉ́ŋlʉ̌ wɨ́ yɨ́. Nye á jébe Dâ Nzyɛ̌m ó: “waá Abraham, Isaac, ndu e Yákɔb dí edwe kûm nyɔ́ɔ́ nyá.” 38Nó ó yé lɨ́ elɛ̂ʼle ó, Nzyɛ̌m, nyé abe waá odwe. Nye ó Nzyɛ̌m mikublakúbla mi bʉ̂r, ebě, bʉr bɨ́bɛ̂h, bé ó le twiʼ ɨ́ mpǒm nyé.»
39Bʉ́ʉ́ ólɛ̂ʼla o métié, bé á lɛ́ɛ ó: «Lɛ̂ʼla, gʉ́ kʉ́ gʉ́a élwib!» 40Bé á bé akǎ dûhwo ó, bé díʼee nye mʉ́ʉ́ métíá.
David, bé e Mʉ̌r Nzyɛ̌m á lœm múló mé jwɨ́ɨ nyá
41Nó ó Yésʉs á nze lɛ́ɛ e bé ó: «Bʉr, bé lɨ́ elɛ́ɛ ó, Mʉ̌r Nzyɛ̌m á lœm múló mé jwɨ́ɨ nyá, nye ó “Mwân mé David” ɨ́ yé? 42Ebě, David mʉr tɨ̂, nye lɨ́ elɛ́ɛ lɨ́ oSâm ó:#20.42: Nye á cɛma nó ó, ɨ́ Sâm 110.1.: Dâ Nzyɛ̌m á lɛ́ɛ e Tî wǎm ó: “Diʼee sí wâ, ɨ́ páʼ mbó éjʉ́m wâm. Go e bónó ɨ́ puuu náǎ,: 43tó pyâl ɨ́ jɔʼ mé ósâ óntɨ̂m le obɨn bô ó, bé díʼee tyélátyéla mékʉ̌ yô yɨ́.”
44«David nyɨɛ á jébe nye ó: “Tî wǎm”. Á bɨ̌n bɨɛ̌ kǎ lɛ́ɛ ó, Mʉ̌r Nzyɛ̌m á lœm múló mé jwɨ́ɨ nyá, nye ó “Mwân mé David”#20.44: Olɛ̂ʼla o métié jébé Mʉ̂r Nzyɛ̌m á lœm múló mé jwɨ́ɨ nyá ó: Mwân mé David. e nyáa nzɨ́?»
Bidyɛʼ bí ólɛ̂ʼla o métié
45Mpʉ éntumo e bʉ̂r, lé á jʉjôʼlo nye yɨ́, Yésʉs nzě lɛ́ɛ le ompʉ́n bé ó: 46«Bɨ̌n e báʼ ólɛ̂ʼla o métié. Bé ɨ́ kpɛl ébwâr míkán mi dí ɨ́ jaa jaa mí. Bé kpɨkpɛl ntémé ó, bʉr sóhaa bê, le edwe bé dúu gúmó bʉ̂r dí eswâl yɨ́. Bé ntémé kpɨkpɛl ó, bidiá bí ésôʼ ɨ́ mempáh mínjɨʼla ti e mpǎŋ bidiá bí dóló, gúmó bé dí edě dína yɨ́. 47Bé lɨ́ esa míkúho, nʉnʉa bísá bíbyɛ̂h bé dí e tɨ̂ʼ bí. Bé jɨjɨʼla ntémé e Nzyɛ̌m ó, bul mékǎn, ebě, bé gwɨ́m ó, bʉr béyɨɨ bé mimbɨambɨa mi bʉ̂r. Bé ó ngá buú nʉa mébě le edweŋɔɔ bíntɨ́ʼá bí tɨ̂.»
Цяпер абрана:
Luc 20: ozm
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце