उत्पत्ति 20
20
अब्राहाम नेरो अबीमेलेक
1च क्ल्ह्योउँइँले अब्राहाम नेगेब बिबै क्ल्ह्योउँइँ ह्याइ, धै कादेश नेरो शूरए म्हाँजोर्बै गरार बिबै ह्युलर टिइ। गरार ह्युलर टिमा चर्बै म्हिमैंने 2अब्राहामइ ह्रोंसए प्ह्रेंस्यो सारालाइ “चम् ङए अङाँ ग,” बिइ। छबिमा गरारर्बै अबीमेलेक म्रुँइ सारालाइ ह्रोंस ङाँर पखबर ल्हैदिइ।#उत १२:१३; २६:७
3दिलेया म्हुँइँसर परमेश्वर अबीमेलेक ङाँर म्होंडर युसि बिइ, “थेद्, च च्हमिरि आगुए प्ह्रेंस्यो ग! छतसि क्हिइ चलाइ पखस्याँ क्हि सियाब्मुँ।”
4अबीमेलेक च त्हे समा सारा ङाँर आह्याल। छतसि चइ बिइ, “ओ प्रभु, ङइ आछ्याँबै के तोइ आलइमुँ! ङइ तोइ न्होह्रों आललैया क्हिजी ङि सैवाम्मा? 5‘च ङए अङाँ ग’ बिसि च म्हि#20:5 चु “प्रभु” ताँ म्हिने मान लबर चलेब या। ह्रोंसइन् ङने बिब आङिं रो वा? धै च च्हमिरिज्यै या ‘च ङए आघें ग’ बिसि बिब आङिं रो वा? ङइ चु के छ्याँबै सैंइ लब् ग। ङइ तोइ आछ्याँबै के आलइमुँ।”
6झाइले परमेश्वरजी अबीमेलेकने म्होंडर बिइ, “अँ, क्हिए छ्याँबै सैंउँलेन् चु के लब् ग बिसि ङइ सेइमुँ। ङए उँइँर क्हिइ आछ्याँबै के आलरिगे बिसि क्हि जोगेमिंब ङन् ग। छतसि ङइ च च्हमिरि क्हिइ छुइल् आपिंल। 7तारे अब्राहामए प्ह्रेंस्यो एवाद्, तलेबिस्याँ च अगमबक्ता ग। चइ क्हिए ल्हागिर प्राथना लमिंब्मुँ, धै क्हि सोब्मुँ। दिलेया क्हिइ च च्हमिरि आएमिंस्याँ क्हि नेरो क्हिए ताँन् म्हिमैं खैलेबिलेया सियाब्मुँ बिसि सैंर मैंन्।”
8अबीमेलेक न्हाँगर्न रेसि ह्रोंसए ताँन् सिपाइमैं हुइसि चु ताँन् ताँमैं बिइ। च ताँ थेसि चर्बै म्हिमैं बेल्ले ङ्हिंयाँइ। 9छतमा अबीमेलेकइ अब्राहाम हुइसि बिइ, “क्हिइ ङिने तो लल् म्हैल? ङइ क्हिल तो न्होह्रों लवाइ? क्हिइ ङ नेरो ङए ह्युलए फिर च्हौ थेबै छ्याब खबै के तले तल् पिंल? क्हिइ ङने लल् आतबै के लइ! 10तो मैंसि क्हिइ ङने बालु छाबै के लल?”
11अब्राहामइ बिइ, “तलेबिस्याँ चु क्ल्ह्योर परमेश्वरने ङ्हिंब खाबै आरे। छतसि म्हिमैंइ ङए प्ह्रेंस्यो छ्याँब् म्रोंसि ङलाइ सैवासि चलाइ बोवाम् उ? बिसि ङइ मैंल। 12छतसि ङइ चने ‘ङए अङाँ ग’ बिसि बिब् ग। च ताँ क्ह्रोंसेंन ग, तलेबिस्याँ चु ङए आबाए च्हमि ग, दिलेया आमा स्यो-स्योन् ग। धै चु ङए प्ह्रेंस्यो तइ। 13परमेश्वरजी ङलाइ ङए आबाए धिं पिसि आगुए ह्युलर क्याइ-माइ स्युरइ प्रब लमिंइ। छतसि ङइ साराने ‘गार् आम्हाँदिल्ले क्हिइ म्हिमैंने बालु चु ङए आघें ग बिद् ओ’ बिसि ङइ बिल।”
14छ बिबै लिउँइँ अबीमेलेकइ र-क्युमैं, क्ल्या-मेमैं, केब्-केब्स्योमैं पखसि अब्राहामलाइ पिंइ, धै चए प्ह्रेंस्यो सारा या एमिंइ। 15झाइले अबीमेलेकइ बिइ, “ङ्ह्योद्, ङए ह्युल क्हिए ओंसोंन् मुँ। क्हि खनिर टिदा ङ्हाँइमुँ चर्न टिद्।”
16अबीमेलेकइ साराने बिइ, “क्हिए आघेंलाइ ङइ चाँदिए हजार घ्रि पिंइमुँ। क्हिने बालु मुँबै म्हिमैंए उँइँर क्हिल तोइ छ्याब् आरे बिब चु मुइ प्रमाण तब्मुँ। तारे खाबज्यै या क्हिए फिर आछ्याँब मैंरिब् आरे।”
17छतसि अब्राहामइ परमेश्वरने प्राथना लइ, धै परमेश्वरजी अबीमेलेक नेरो चए प्ह्रेंस्यो धै चए केब्स्योमैंइ धबै प्हसे योंल् खाँरिगे बिसि चमैं सल् लमिंइ। 18तलेबिस्याँ अब्राहामए प्ह्रेंस्यो साराई लमा याहवेहजी अबीमेलेकए धिंर मुँबै ताँन् च्हमिरिमैंए कोख म्रुवाल।
Цяпер абрана:
उत्पत्ति 20: GCMB
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2020, Wycliffe Bible Translators, Inc. All rights reserved.