Jo̩n 4
4
Jisus kpai onobule̩ Samaria le̩
1Todule̩ e̩gba kʼOndu ma kʼamaFarisi gbo̩ kaku Jisus ache amako̩che̩ wewe, kʼi la ache ma baptism ku ma wewe tu e-Jo̩n le 2(Jisus onugo muda che ma baptism n, chai amako̩che̩-wñ che ma), 3i tu Judia no̩, i ño̩ kwʼo̩mo̩ nyi Galili ge̩; 4i la dukpe̩ kʼi alale gu Samaria du. 5Abe̩le̩ i lewa ewo Samariaʼka ku ma dʼodu-wñ ko̩ Saikar; i me̩ru ane̩ ku Jeko̩b bu ñw o̩ma-wñ Jose̩f le̩. 6Omi e-Jeko̩b ki abi kwef ane̩ dufu la dʼugbo le̩. Todule̩ abu ule̩ kʼi le fu Jisus hia, i kwogugu abe̩le̩ ugbo kʼomi abi dufu le̩.
E̩gbale̩ dab auwa e̩ke̩fa. 7Oñ i onobule̩ʼka kwo Samaria wa kʼi kpa omiofo. Jisus ka ñw u kakini, Dʼomi ñwu mi ñmo̩. 8Todu amako̩che̩-wñ kwʼo̩mo̩ le tef ewo ku ma la uje̩wñ. 9Todule̩ onobule̩ Samaria le̩ ka ñw u kakini, Abile kʼuwe̩ kʼe̩ chʼiJu abi omi kʼe̩ ñmo̩ ugbo mi kʼu chʼonobule̩ Samaria? (Todu amaJu anaru abo Samaria n.) 10Jisus dohi ñw u kakini, Iche̩wñ kʼuwe̩ ma ma ele O̩jo̩, kpai e̩ne̩ kʼi aka ñw e̩-i kakini, Dʼomi ñwu mi ñmo̩, uwe̩ ma bi owñ, tak owñ ma dʼomi ki adeju ñw e̩. 11Onobule̩ le̩ ka ñw u kakini, Odu-mi, e̩ nʼe̩wñ kʼe̩ nʼakpa n, obuga-i la chʼenefu; ugbo e̩ nʼomi ki deju le̩ kwo ta? 12Uwe̩ tʼata-wa Jeko̩b le? e-ki mʼobuga-i du ñwu wa, kʼowñ onugo la ñmo̩ omi-wñ, kpai amo̩ma-wñ kpai ame̩wño̩re̩-wñ? 13Jisus dohi ñw u kakini, E̩ne̩ du ki añmo̩ omi kide̩ olugbe̩ ñʼakpʼo̩ ge̩; 14e̩ne̩ du kʼi muda ñmo̩ omi e-kʼomi adu ñw u, alugbe̩ ñʼakpʼo̩ gbegbele̩ ge̩ n, omi kʼu nadu ñw u la amud omi ki abi efu-wñ e-ki aroko tef iñmi ogbegbele̩. 15Onobule̩ le̩ ka ñw owñ kakini, Odu-mi, dʼomi kide̩ ñwu mi, todu kʼalugbe̩ ki we ekpa mi, kʼu we ele gbogbo wʼemi kʼu kpa.
16Jisus ka ñw u kakini, Lo, kʼe̩ dʼo̩ko̩-we̩ omu, kʼe̩ lewa emi. 17Onobule̩ le̩ dohi kakini, U nʼo̩ko̩ n. Jisus ka ñw u kakini, O̩me̩me̩le̩ e̩ ka kakini, U nʼo̩ko̩ n; 18todu e̩ fʼo̩ko̩ me̩lu ne̩ me̩, e̩ne̩ kʼe̩ ne̩ fa-i i la chʼo̩ko̩-we̩ de̩ n; ochochi e̩ ka le̩. 19Onobule̩ le̩ ka ñw u kakini, Odu-mi, u cheli kʼuwe̩ chʼakache̩. 20Amata-wa dojikane̩ ñw O̩jo̩ oj uwo kide̩; ame̩ la ka ku Je̩rusale̩m chʼugbo ki dukpe̩ kʼamone̩ adojikane̩ ñw O̩jo̩. 21Jisus ka ñw u kakini, Onobule̩, e̩ ki dʼo̩la-mi rʼochochi kakini, Adiko auwa awa, e̩gba le̩ tʼoj uwo kide̩ tʼefu Je̩rusale̩m, me̩ ñʼadojikane̩ ñw Ata n. 22Ame̩ jʼadojikane̩ ñw e̩wñ ku me̩ ma ma n; awa adojikane̩ ñw e̩wñ kʼa ma; todu ef amaJu oñ ujadu kwo. 23Ama adiko auwa awa, owñ la chʼifa-i, kʼabo ku ma dojikane̩ ogbolo adojikane̩ ñw Ata ef afu kpai ef ochochi; todu Ata do̩mo̩ afeju abo ki dʼabʼe-i ku ma dojikane̩ ñw u. 24O̩jo̩ chʼAfu; oñ i dukpe̩ kʼabo ku ma dojikane̩ ñw u ki dojikane̩ ñw u ef afu kpai ochochi tila. 25Onobule̩ le̩ ka ñw u kakini, U chema ka ku Me̩saya awa (e-ku ma do̩ Kraisti le̩); e̩gba kʼe̩ne̩ le̩ lewa, i aka e̩wñ du ñwu wa. 26Jisus ka ñw u kakini, Omi, ki ako̩la ñw e̩-i, omi le̩ de̩.
27Tak ababa le̩ amako̩che̩-wñ lewa; aye je̩ ñwu ma n, todabu kʼi ako̩la kpai onobule̩; e̩ne̩ du muda kakini, E̩wñ e̩ feju? abe̩k e̩wñ chi kʼe̩ ko̩la kpai owñ? n. 28Tak onobule̩ le̩ tʼotube̩-wñ no̩ tane̩, oñ i kwʼo̩mo̩ le tef ewo, oñ i ka ñw amone̩ kakini, 29Me̩ lewa ku me̩ go e̩ne̩ ki fʼe̩wñ du kʼu che ka ñwu mi; e̩ne̩-i neke che Kraisti le̩ de̩? 30Ma kwʼef ewo dufu, oñ ma jʼo̩na awʼugbo-wñ.
31Agbagba le̩ amako̩che̩-wñ rodubʼo̩ kakini, Rabai, je̩ e̩wñ ke. 32I muda ka ñwu ma kakini, Omi chenʼuje̩wñ kʼu naje̩ e-kʼame̩ ma ma n. 33Todule̩ amako̩che̩ le̩ ka ñw o̩la-ma kakini, I neke chʼone̩ dʼe̩wñ wa ñw u je̩? 34Jisus ka ñwu ma kakini, Uje̩wñ-mi de̩: todu kʼu che e̩wñ ki dʼe̩ne̩ ki kpe̩ mi wa e̩do̩, kʼu la fʼuko̩lo̩-wñ chekpa. 35Ame̩ kakini, Ochu me̩le̩ tak iko o̩ka e̩ja awane̩ n? Me̩ go, naka ñwu me̩, me̩ ki chi eju-me̩ nyʼate̩ ku me̩ la go oko, abu kʼi chefufu te̩, i tʼe̩gba e̩ja me̩. 36E̩ne̩ ki aja agbʼuro̩me̩, oñ i amʼe̩ro kowa jo̩ tef iñmi o̩gbegbele̩; todu kʼe̩ne̩ ki agbe̩ kpai e̩ne̩ ki aja ku ma yo̩ e̩gba kate. 37Todu ef e̩wñ-i oñ o̩la le̩ chʼogbolo kakini, E̩ne̩ʼka agbe̩; e̩ne̩ omune̩ la aja. 38Omi kpʼume̩ uche̩ ku me̩ ja e̩wñ ki ma chʼame̩ chʼakanya uko̩lo̩-wñ n; abomune̩ chʼakanya wñ tak ame̩ lewa tef akanya e-ma.
39Abo Samaria wewe ef ewo le̩ la ke̩do̩nʼowñ tod o̩la onobule̩ ki gbʼibenu kakini, I fʼe̩wñ du kʼu che ka ñwu mi me̩. 40Todule̩ e̩gba kʼabo Samaria wʼugbo wñ, ma rodubʼo̩ kʼi bʼuma gugu; oñ i gugu o̩mo̩ o̩jo̩ meji. 41Amone̩ wewe tʼe-le̩ le ño̩ ke̩do̩no tod o̩la e-wñ ge̩, 42taku ma ka ñw onobule̩ le̩ kakini, I chʼutod o̩la kʼe̩ ka oñ a ke̩do̩no-i ge̩ n; todu awa onugo nʼeti-wa gbo̩ me̩, a la chema kakini, E̩ne̩-i chʼE̩najadu ile̩ ochochi.
Jisus fʼo̩ga o̩ma edibo che Galili
43O̩jo̩ meji le̩ lerane̩ tak i kwʼo̩mo̩ dufu nyi Galili. 44Todu Jisus onugo gbʼibenu kakini, Akache̩ nʼojima ane̩ e-wñ n. 45Abe̩le̩ e̩gba kʼi lewa Galili, abo Galili mʼowñ gba abu ku ma fʼe̩wñ du kʼi che Je̩rusale̩m ef uje̩wñ ucholo le̩ li; todu ama ño̩ nyʼugbo uje̩wñ ucholo le̩ ge̩.
46Todule̩ i ño̩ dabi wa Kena e-Galili ge̩, ugbo kʼi dʼomiofo le̩ che omi achiwebe̩te̩ma. Oñ edibo onuʼka kʼo̩ma-wñ achʼo̩ga de̩ Kapanahum. 47Abu kʼe̩ne̩ le̩ gbo̩ ka ku Jisus kwo Judia wa ane̩ Galili me̩, i nyʼugbo wñ, oñ i rodubʼo̩ kʼi gwo̩ru wa kʼi che o̩ga o̩ma-wñ kpa; todu i ache kʼi ku. 48Todule̩ Jisus ka ñw u kakini, Me̩ ma li ujiwe kpai uno̩ n, i nʼugbo du ku me̩ jʼake̩do̩no n. 49Edibo le̩ ka ñw owñ kakini, Odu-mi, gwo̩ru wa o̩gba tak o̩ma-mi ki ku. 50Jisus ka ñw u kakini, E̩ nalo we̩, o̩ma-we̩ deju. E̩ne̩ le̩ ke̩do̩nʼo̩la ku Jisus ka ñw u, oñ i le wñ. 51Tak abu kʼi agwo̩ru alo, owñ kpai amadu-wñ de, ma ka ñw u kakʼo̩ma-wñ deju. 52Todule̩ i tʼuma ene auwa e̩gba kʼi checheme̩. Todule̩ ma ka ñw u kakini, Auwa e̩kebie o̩nale̩ oñ o̩la-e̩kpuna le̩ tʼo̩ no̩. 53Oñ ata le̩ ma ka kʼauwa ku Jisus ka ñw u kakini, O̩ma-we̩ deju, le̩ de̩; tak owñ onugo ke̩do̩no kpai o̩gbo̩ abunyi-wñ du. 54Ujiwe ekeji ki Jisus che abu kʼi kwo Judia nyi Galili le̩ de̩.
Цяпер абрана:
Jo̩n 4: IGL70
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
O̩TAKADA O̩LA O̩JO̩ Bible in Igala © United Bible Societies, 1970.