Jọn 4
4
Jesu vẹ Aye ri Sameria
1Asakiephana rẹ Ọrovwohwo vwọ riẹn nẹ Farisi nyori nẹ Jesu vwo idibo buebu nẹ ọ je vwẹ ame kẹ ihwo bu nọ Jọn, 2(dede na Jesu vwẹ obọ rọye vwẹ ame kẹ ihwo-o, ẹkẹvuọvo idibo rọye ọvo), 3o de vrẹn nẹ Judia ọ da rhoma kpo Galili. 4Kọ cha wan Sameria vrẹn. 5Ọtioye na o de rhi te orere ri Sameria ọvo, re se Saka, rọ kẹrẹ udju ri Jekọp vwọ kẹ ọmọ rọye Josẹf. 6Orhare ri Jekọp hẹ etiyin, ọtiọye re, rẹ oma vwọ ghwọrọ Jesu vwẹ oyan na re, o de tidia akakọ rẹ orhare na. Yẹ ọke na te unọke esan re.
7Etiyin aye ri Sameria ọvo de rhi vo ame. Jesu da ta kẹ, Kẹ vwẹ ame da. 8Kidie idibo rọye yanran kpo obo orere na ra dẹ emuọre. 9Aye ri Sameria na da ta kẹ, Mavọ ọ epha re o wẹ, ohwo ri Ju, vwọ nọ ekpẹn rẹ ame ra da, vwẹ obọ mẹ aye ri Sameria? Kidie ihwo ri Ju vẹ ihwo rẹ Sameria na gba-a. 10Jesu da kpahe kẹ, Ọ da dianẹ wo riẹn ẹse rẹ Ọghẹnẹ, wo de rhe vughe ohwo rọ ta ota kẹ wẹ nẹ, Kẹ vwẹ ame da na, ku wa rhoma nọ ekpẹn rẹ ame rẹ arhọ, ka vwọ kẹ wẹ. 11Aye na da ta kẹ, Ọga, wo vwo emu wo vwo vo-o, yẹ orhare na okokodo; ki tivọ wo de vwo ame rẹ arhọ yena? 12Wọ rhonọ Jekọp rẹ ọsẹ rẹ avwanre, rọ vwẹ orhare na kẹ avwanre, rẹ ekpuyovwi rọye da je da vwọ, kugbe emọ rọye, kugbe uchuru rọye? 13Jesu da ta kẹ, Kohwo kohwo rọ da ame nana nu urhuru rẹ ame ji che hwe vwẹ obọ, 14ẹkẹvuọvo kohwo kohwo rọ da ame re me cha vwọ kẹ na urhuru rẹ ame gbi che hwe ọfa-a; ame re me cha vwọ kẹ na ko che hirhe phihọ ogbugbu rẹ ame ro duvwẹ cha re te arhọ ro vwo oba-a. 15Aye na da ta kẹ, Ọga, kẹ vwẹ ame nana, rere urhuru rẹ ame vwo jẹ uvwe ehwe, eyẹ jẹ ame evo vwẹ etinẹ.
16Jesu da ta kẹ, Yanran, re se ọshare wẹn, rere wọ rhe. 17Ayen da kpahe kẹ, mi vwo ọshare-e. Jesu da ta kẹ, Wo riẹn ta ru wọ vwọ tanẹ, mi vwo ọshare-e; 18Kidie eshare iyori wọ rọvwọ re, ọ ru wọ vẹ ọye gba herọ na dia ọshare wẹ-ẹn; ọnana uyota wọ tare na. 19Aye na da ta kẹ, Ọga, mi rori nẹ wọwẹ ọmraro. 20Esẹ rẹ avwanre gọre vwẹ ugbenu nana; wọ tare nẹ Jerusalẹm hẹ asan rẹ ihwo a da gọ, 21Jesu da ta kẹ, Aye, se vwe gbuyota, ọke cha re de jẹ ugbenu nana eyẹ Jerusalẹm a da ga Ọsẹ na. 22Wọ ga obo wo jẹ riẹn, avwanre ga obo rẹ avwanre riẹnre, kidie esivwo vwenẹ obọ ri Ju o nurhe. 23Ẹkẹvuọvo ọke cha, ọ rhe nure, rẹ ọ gegagọ rẹ uyota na da gọ Ọsẹ na vwẹ erhi vẹ uyota, kidie ọtiọye Ọsẹ na guọnọre nẹ a ga ọye. 24Ọghẹnẹ hẹ erhi, otu re ga me ga vwẹ erhi vẹ uyota. 25Aye na da ta kẹ, Me riẹnre nẹ Mesaya cha (ọ re se Kristi); ọke rọ da rhe, ko dje emu na ejobi kẹ avwanre. 26Jesu da ta kẹ, mẹvwẹ ro ta ota kẹ wẹ na mẹvwẹ hẹ ọye.
27Vwẹ ọke yena idibo rọye da rhe. O de gbe ayen unu rọ vẹ aye na vwọ ta ota, ẹkẹvuọvo ọvuọvo rọ tare nẹ, Die wọ guọnọ? eyẹ, Die wọ vẹ aye na vwọ ta ota? 28Ọtioye na aye na da yan jẹ ochẹ rẹ ame rọye vwo, ọ da yanran kpo obo orere, ọ da ta kẹ ihwo na, 29Yanrhe, wa rhe mrẹ ohwo rọ ta obo ri mi ruru ejobi rhabae kẹ vwẹ. Ọna sa dia Kristi vwẹ etiyin na? 30Ayen de tue nẹ orere na rhe kẹ ayen bro cha.
31Vwẹ umuvwre rẹ ọke yena idibo rọye ke rẹ, tanẹ, Rabbi, re emu. 32Ẹkẹvuọvo ọ da kẹ ayen, Mi vwo emu re me ria rẹ ovwan riẹnre-e. 33Ọtiọye na idibo na da ta kẹ ohwohwo, Kẹ ohwo vwẹ emu kẹ re? 34Jesu da ta kẹ ayen, Emu mẹ vwenẹ hẹ eruo rẹ ọhọre rẹ ọ ro ji vwe rhe, re mi vwo ru iruo rọye re. 35Ọ dia ovwan tare nẹ, Emeranvwe ẹne ri chekọ, tavwe rẹ orhọ ki te? Me ta kẹ owẹ, kpare ẹro kpenu, rẹ wo ni obo rẹ idju na ejobi ghwo te orhọ nure. 36Ọ ro vuẹ ghwe vwo osa, ọ ghwẹ emamọ koko hẹrhẹ arhọ ri bẹdẹ, ọtiọye na te ọ rọ kọn te ọ ro vuẹ vwọ sa ghọghọ kugbe. 37Kidie kẹ ọna ọta na vwọ sẹ, Ọvo kọn yẹ ọfa vuẹ. 38Mi ji ovwan re vun obo rẹ wa wian phihọ-ọ, efa wianre, erere rẹ owian rayen kọye ovwan ria na.
39Ihwo ri Sameria buebu ri nẹ orere na rhe de se gbuyota fiki rẹ iseri rẹ aye na, Ọ ta kẹ ovwe emu ejobi ri mi ruru rhahae. 40Ọtiọye na ọke rẹ ihwo ri Sameria na vwo bro rhe, ayen da rẹ nẹ ọ vẹ ayen dia; ọ vẹ ayen da dia etiyin ẹdẹ ivẹ. 41Efa buebu de segbuyota fiki rẹ ota rọye. 42Ayen da ta kẹ aye na, Ọ gbe dianẹ fiki rẹ ota wẹn ọvo avwanre vwo segbuyota-a, kidie avwanre vwẹ erhọn rẹ avwanre nyo rhe, avwanre gbine riẹn vwẹ ọ rẹ uyota nẹ ọnana hẹ Osivwi rẹ akpọ na.
Jesu Sivwi Ọmọ rẹ Osun ọvo
43Rẹ ẹdẹ ivẹ vwọ wan nu o de vrẹn kpo Galili. 44Kidie Jesu ọvo se oseri nẹ ọbo vwo ọghọ vwẹ orho robọ rọye-e. 45Ọtiọye na ro rhi vwo te Galili, ihwo ri Galili de dede, rẹ ayen vwọ mrẹ obo ro ruru vwi Jerusalẹm vwẹ ọke orẹ na, kidie ayen ji kpo orẹ na rhe.
46Ọtiọye na o de rhivwi rhe Kana ri Galili, asan rọ da rhẹriẹ ame hẹ udi na. Vwi Kepanọm oruiruo ọvo herọ rẹ ọmọ rọye honvwa. 47Ọke ro vwo nyo nẹ Jesu nẹ Judia rhe Galili, ọ da ra ra rẹ nẹ ọ rhe rhi sivwi ọmọ rọye na, kidie o muegbe rẹ ughwu. 48Jesu da ta kẹ, Jokpa nẹ wọ mrẹ oka kugbe igbunu-u wo che segbuyota-a. 49Osun na da ta kẹ, Ọga, yanrhe re ọmọ mẹ na ki shero. 50Jesu da ta kẹ, Yanran, ọmọ wẹn na cha rhọ. Ohwo na de se ota ri Jesu ta kẹ na gbuyota ọ da yanran. 51Rọ vwọ yanran re, idibo rọye da vwa ayen da ta kẹ nẹ, Ọga rẹ ọmọ na kpori re. 52Ọtiọye ọ da nọ ayen nẹ kẹ unọke vọ oma na vwo yovwẹ cha na, ayen da ta kẹ, Ọdẹ ro kpori na vwẹ unọke ighwrẹ ọye ọga na vwo no oma. 53Ọsẹ na da ghwa riẹn dẹn nẹ ọye hẹ unọke na ri Jesu vwọ ta kẹ nẹ, Ọmọ wẹn na cha rhọ; ekpuyovwi rọye dẹ segbuyota, kugbe evwruwevwi rọye ejobi. 54Asakiephana ọnana kọye rha hẹ ọka rivẹ ri Jesu ruru ro vwo nẹ Judia rhe Galili.
Цяпер абрана:
Jọn 4: UBV77
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Bible in Urhobo © United Bible Societies, 1977.