Luk 24
24
Evrẹnushi ri Jesu
(Matiu 28.1-10; Mak 16.1-8; Jọn 20.1-10)
1Ẹkẹvuọvo vwẹ ẹdẹ rẹsosuọ rẹ ẹdidjala na, vwẹ irhiọke ride ayen da yanran kpo obo ushi na, vẹ ishani rẹ ayen cheri na. 2Ayen da mrẹ oragha na re ghorie nẹ ushi na, 3ẹkẹvuọvo ọke rẹ ayen vwọ ro evun rọye ayen mrẹ orivwi rọye-e. 4Rẹ ofu vwo dje ayen fiki rẹ Ọnana, nighe, eshare ivẹ vẹ emwa wrowro de mudia kẹrẹ ayen; 5rẹ uguegue vwo mu ayen rẹ ayen vwo gbe opharo phihọ otọ, eshare na da ta kẹ ayen, Die wa vwọ guọnọ ihwo ekpokpọ vwẹ evun rẹ ushi? 6Ọ gbe hẹ etinẹ-ẹ, ẹkẹvuọvo o vrẹnre. karohọ obo rọ ta kẹ ovwan rọ je vwọ hẹ obi Galili, 7nẹ e che mu Ọmọ rẹ ohwo vwọ hẹ obọ rẹ iruimwemwu, ra da kanrọ mu agbagba, vwẹ ẹdẹ rerha ko vrẹn. 8Ayen da karohọ eta rọye, 9rẹ ayen vwo rhivwi nẹ obo ushi na rhire ayen de gbe ọnana ejobi kẹ uhwọvo na kugbe otu ri chekọ. 10Asakiephana Meri ri Magdala kugbe Joana kugbe Meri rẹ oni ri Jems kugbe eya efa re vẹ ayen gba herọ ri gbe ikun nana kẹ iyinkọn na; 11ẹkẹvuọvo enana ke họhọ esia vwọ kẹ ayen, ayen gbi se ayen gbuyota-a.
12Ẹkẹvuọvo Pita de vrẹn ọ da djẹ kpo obo ushi na; ro vwo rhuẹn ni evun rọye, ọ da mrẹ ukpoyibo na ra phare phihọ asan obọ rọye sa, o de rhivwi kpo vẹ igbevwunu rẹ obo re phiare na.
Ọ yan kpo Emayọs
(Mak 16.12-13)
13Vwẹ ẹdẹ yena ọvuọvo na ivẹ vwẹ usun rẹ ayen ki kpo ọko ọvo re se Emaọs, kerẹ emu rẹ uroko ighwrẹ nẹ Jerusalẹm yanran, 14ri gbe ikun kẹ ohwohwo vwẹ oma rẹ imu nana re phiare na. 15Rẹ ayen vwo gbe ikun ta ota kuẹgbe na, Jesu vẹ ekpuyovwi rọye de si kẹrẹ ayen ọ vẹ ayen ke yan usun yanran. 16Ẹkẹvuọvo e de rhurhu ẹro rayen o gbi jẹ ayen vugbe-e. 17Ọ da ta kẹ ayen, Didi ikun ovwan gbe yanran na? Ayen de mudia gbiẹi, ri ni ohwohwo vẹ uvweri. 18Etiyin ọvo vwẹ usun rẹ ayen, re se Kliopas, da kpahe kẹ, Wọwẹ ọvo ọrhorha rọ hẹ Jerusalẹm ro jẹ obo re phiare vwẹ ẹdẹ nana ẹriẹn? 19Ọ da ta kẹ ayen, Didi imu? Ayen da ta kẹ, Kpahe Jesu ri Nazarẹt ro dia ọmraro vẹ ẹgba vwẹ uruemu vẹ ota vwẹ obaro rẹ Ọghẹnẹ vẹ ihwo ejobi, 20obo rẹ ilori rẹ irherẹn kugbe isun na muro re de brorhiẹ rẹ ughwu hwe, a da kanrọ mu agbagba. 21Ẹkẹvuọvo avwanre phiẹrohọ nẹ ọye cha tan Izrẹl hirhe. E, rha vwọ ba Ọnana, etiyin ẹdẹ erha rẹ imu nana phiare. 22Ọ rọ marho, eya ẹvo vwẹ otu rẹ avwanre da rhe vwẹ anegbe ghwiẹ avwanre. Ayen kpo obo ushi na vwẹ irhiọke ride, 23ayen gbe mrẹ orivwi rọye-e; ayen de rhivwi rhe tanẹ ayen mrẹ emramrẹ rẹ emakashe, rọ tare nẹ ọ je hẹ ọkpokpọ. 24Ẹvo ri nene avwanre kpo obo ushi na, a da mrẹ kirobo rẹ eya na tare; ẹkẹvuọvo ekpuyovwi rọye a mrẹrẹ-ẹ. 25Ọ da ta kẹ ayen, Ẹkpa rẹ ihwo na, rẹ udu rẹ ayen fobọ se eta rẹ emraro na gbuyota-a na! 26O rhe fo rere Kristi re oja rẹ imu nana tavwe ro ki kpo urinrin rọye-e? 27O de mu phihọ nẹ Mosis rhe kugbe emraro na ejobi, ọ da fan otọ rẹ ẹbe efuanfon na ejobi kpahe oma rọye kẹ ayen.
28Ọtiọye na ayen de rhi si kẹre ọko na rẹ ayen ra na. O de ru kerẹ ọ wan vrẹn, 29ẹkẹvuọvo ayen da gba phihọ, tanẹ, Nene avwanre dia etinẹ, kidie ọke na kpo ovwọnvwọn re yẹ ọke na ji kodo re. Ọtiọye ọ da ro uwevwi o de nene ayen dia. 30Ọke rọ vẹ ayen vwo tidia udoemu re, ọ da reyọ ikara ọ da nẹ ẹrhovwo phihọ, o de bro, ọ da vwọ kẹ ayen. 31Ẹro rayen de rhie ayen de vughe; ọ da ghwa ranvwiẹ nẹ ohri rayen. 32Ayen da ta kẹ ohwohwo, udu rhe kpokpo avwanre nanaye rọ vwọ ta ota kẹ avwanre vwẹ obo idjerhe-e, ro vwo rhie ẹbe efuanfon na kẹ avwanre? 33Ayen de ghwe vrẹn vwẹ unọke yena ayen de rhivwi rhe Jerusalẹm; ayen da mrẹ uhwọvo na ri kokori kugbe otu re vẹ ayen gba herọ, 34re tare, Ọrovwohwo ghine vrẹn vwẹ ọ rẹ uyota, ọ da vwẹ oma phia kẹ Saimọn! 35Etiyin ayen de gbe ikun rẹ obo re phia vwẹ idjerhe na, vẹ obo rẹ ayen mrẹrẹ vughe vwẹ oma rẹ ikara ro bruru.
Jesu vwẹ Oma nẹ Idibo Rọye
(Matiu 28.16-20; Mak 16.14-18; Jọn 20.19-23; Iruo rẹ Iyinkọn na 1.9-11)
36Rẹ ayen vwọ ta ọnana, Jesu vẹ ekpuyovwi rọye de mudia vwẹ ohri rẹ ayen. 37Ẹkẹvuọvo ayen de guegue oshọ de mu ayen, ayen de roro nẹ ayen mrẹ erhi. 38Ọ da ta kẹ ayen, Die ovwan vwọ phariẹ, kidie ovwan vwọ nọ enanọ vwẹ udu rẹ ovwan? 39Ni abọ mẹ vẹ awọ mẹ, mẹvwẹ wa mrẹ na; yọnrọn ovwẹ, re wọ mrẹ; kidie erhi vwo uvwo vẹ ibeku kirobo wa mrẹ vwẹ ri mi vwori na.
40Rọ vwọ ta ọnana nu, ọ da vwẹ abọ vẹ awọ rọye vwọ nẹ ayen.
41Ọke rẹ ayen ji segbuyota-a fiki rẹ aghọghọ, vẹ igbunu, ọ da ta ke ayen, We vwo ememu vwẹ etinẹ ra re? 42Ayen da vwẹ ubro rẹ eri re cheri vwọ kẹ, 43Ọ da reyọ ọ da riọ vwẹ irharo rẹ ayen.
44Etiyin ọ da ta kẹ ayen, Enana eta mẹ re me ta kẹ ovwan, re me vẹ ovwan vwọ herọ, nẹ kemu kemu re siri kpahe ovwẹ vwẹ evun re urhi ri Mosis kugbe emraro na vẹ ine rẹ ejiro na cha gba. 45Etiyin o de rhie udu rayen vwo vwo ẹruọ rẹ ẹbe efuanfon na, 46ọ da ra kẹ ayen, Enẹ e siro, nẹ Kristi na cha reoja vwẹ ẹdẹ rerha ko vrẹn nẹ ughwu, 47nẹ ekuorhẹriẹ vẹ evwoghovwo rẹ imwemwu keye e ghwoghwo vwẹ odẹ rọye kẹ ẹgborho na ejobi, ki Jerusalẹm a da tuọphihọ. 48Ovwan iseri rẹ imu nana. 49Nighe, mi che ji ive rẹ Ọsẹ mẹ na bru ovwan rhe; ẹkẹvuọvo wa dia evun rẹ orere na, bẹsiẹ ra vwọ reyọ ogangan nẹ obenu rhe rhi vwo rhuo ovwan.
Eyere kpenu
(Mak 16.19-20; Iruo rẹ Iyinkọn na 1.9-11)
50Etiyin ọ de sun ayen ro otafe rhiri re te Bẹtani, rọ vwọ kpare abọ kpenu ọ da nẹ ẹrhovwo kẹ ayen. 51Rọ vwọ nẹ ẹrhovwo kẹ ayen, a da hẹriẹ nẹ ayen oma. 52Ayen de rhivwi rhe Jerusalẹm vẹ aghọghọ rode, 53ayen ejobi kẹ uwevwi rẹ ẹga na ayen dia de jiri Ọghẹnẹ.
Цяпер абрана:
Luk 24: UBV77
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Bible in Urhobo © United Bible Societies, 1977.