मरकुस 6
6
येसुन ओना संतम नाटेनोरे ओप्कुना हिल्लुर
(मत्तयाल 13:53-58; लूकाल 4:16-30)
1येसु अगटाल पेय्सि ओना सहरते होत्तोर, ओना सिस्युल्कगुडा ओना पज्जो होत्तुर. 2नोमकेम रोजुने दर्मसास्त्रम कराहना लोते होंचि पेनदा पोल्लें कराहसेक मत्तोर. वेल्लेटुर लोकुल्क अव पोल्लें केंजसि, “ईर इच्चोर बेस बल्हा वेहासेक मंतोर? ईनकु इच्चोर बुद्दि बगाटाल वाता? ईर अद्बूतामाता कबाह्क बल्हा कीसेक मंतोर? 3ईर अय्ते मरियमुना मर्रि वडलल आंदुर, याकोब, योसेस, सिमोन, यहुदल, ईरा दादल आंदुर. इगे मनातोनि उद्दिसि मनानव ओना हेलाहके आंदु,” इंचि इनालय दल्गतुर. अदुनहाटीं ओर येसुन ओप्कुना हिल्लुर. 4अस्के येसु ओर्कुन, “पेनदा कबुरतोंक ओना संतम नाटेने, ओना जीवातोरगा आनि ओना लोन होळसिसि, कळमतव अन्नि जेगाने मान-मर्यादा दोर्कंता,” इंचि इत्तोर. 5अगा येसु बतले अद्बूतामाता कबाह्क किया हिल्लोर, सिराप बिमार मत्तोर्कुन इच्चुर्कुन इट्सि बेस कीतोर. 6येसुन ओर विस्वासम कियवाहाटीं ओन्क इचंत्रम आता. पजा नार-नार होंचि पेनदा पोल्लें कराहसेके तिरियतोर.
येसु पन्नेंड सिस्युल्कुन लोहमळ
(मत्तयाल 10:1,5-15; लूकाल 9:1-6)
7उंदि रोज येसु पन्नेंड मंदि सिस्युल्कुन दग्गेरा केयतोर. ओर्कुन इव्वुर-इव्वुर दंटा कीसि, ओर्क देय्याल्क गेदमना अदिकारम हीसि सेवा कियालय लोहतोर. 8-9अदिकारम हीसि ओर्कु इल्हा वेहतोर, “मिमेट होननेंके मीतोनि गाटो आयि, जोरा आयि, कोत्ताना संचि आयि, एक्कोतव अंगिं आयि ओयमट. सिराप कय्दे दुड्डु, काल्कुंक हेरपुह्क ओम्टु. 10मिमेट बद लोन अय्ते दांतिटो, अगटाल पेय्सनदाका अदे लोते मंटु. 11बोर अय्ते मीकुन ओप्कुन्नुर, मीवा पोल्लें केंजुर अगटाल पेय्सनेंके ओर्क विरोदमते गवाइलेसीं मीवा काल्कुना दुम्मु दुल्पट. (नना मीक निजम वेहासेक मंतन, न्यायमता रोजुने आ नाटुक वाता गोसाकन्ना सदोम, गमोरा सहरकुंक वायाना गोसा बच्चोरो तक्को मनंता,)” इंचि वेहतोर. 12अस्के सिस्युल्कु अगटाल होंचि, “मीवा पापाल्क ओप्कुंचि, मनसु मार्सकुंटु” इंचि लोकुल्कुंक प्रचार कीतुर. 13देय्याल्क पीतोरगटाल बच्चुंगो देय्याल्कुन गेदुमतुर. बिमारते मत्तोर्कुन निय होकसि बेस कीतुर.
हेरोद राजल येसुन बापतिस्मा हियना योहान इनकुंतोर
(मत्तयाल 14:1-12; लूकाल 9:7-9)
14येसुना पोरोल अंटोर्क तेळियसि होत्ता. हेरोद राजालगुडा येसुना बारेमते केंजतोर. अस्के ओर इल्हा इत्तोर, “बापतिस्मा हियना योहान हातोराव्टेटाल मर्रा तेदतोर. अदुनहाटीं ओर इसंटा अद्बूतामाता कबाह्क कीसंतोर.” 15अल्हेने इच्चुर बारे, “पेनदा कबुरतोर एलियल आंदुर,” इंकिच्चुर बारे, “एनकटा पेनदा कबुरतोरा लोप्पोटाल बोरन्ना वरोर मंदनुर,” इंचि इत्तुर.
16गानि हेरोद राजाल इदुन केंजसि, “बापतिस्मा हिय्यना योहानुना तल्ला नना कोय्यागोटतन, ओरे हातोराव्टेटाल मर्रा जीवाते तेदतोर,” इंचि इत्तोर.
17-18बारित्ते, हेरोद राजाल ओना तम्मुर पिलिपुना मुत्तो हेरोदियान इरकुंचि मत्तोर. अय्ते योहान हेरोद राजानगा होंचि, “नीवा तम्मुना मुत्तोन निमे निहगा इरमळ नियम परकारम बेस आयो,” इंचि वेहुंदुर. अल्हा वेहतादान्कु हेरोदियनहाटीं हेरोद राजाल सिपाइल्कुन लोहचि योहानुन जेलने वाटा वेहतोर. 19-20अय्नागानि मोका दोर्कते योहानुन हव्कालय हेरोदियल हूळुंदु, गानि अद हव्का पर्राहिल्ले. बारित्ते योहान नीतिमंतुड, पवित्र मनकल इंचि हेरोद राजाल वेरियुंदुर. अदुनहाटीं ओर जेलते मननेंके ओन्क बतल आयामन्नि इंचि ओन कापाळसि इर्रुंदुर. हेरोद राजाल योहानुना पोल्लें केंजसि परेसान आसिगुडा कुसिते केंजुंदुर.
21उंदि रोज हेरोदियांक मोका दोर्कता. हेरोद राजाल ओना पुटता रोज मंता इंचि ओनगा मनना पेद्दाल्कुन, सिपाइल्कुना अदिकारिल्कुन आनि गालिल राज्येमता लीडर्कुन बोजनमहाटीं केयतोर. 22अस्के हेरोदियाना मिय्यड अगा वासि हेरोद राजाल अल्हेने हेळमितोरा मुन्ने एगरिसि ओर्कुन कूस कीता. अस्के राजाल आ पेगिटुन केय्सि, “नीकु बतल गावाले नाकुन तल्का, नना अद हींतन,” इंचि इत्तोर. 23अल्हेने, “नावा सगम राज्येमगुडा नीकु हियालय तयार मंतन,” इंचि ओट्टु तित्तोर.
24अस्के अद पेगिळ दाना यावानगा पलाते होंचि, “बतल तल्ककन” इंचि पूसकीता. अस्के, “बापतिस्मा हियना योहानुना तल्ला तल्का,” इंचि दाना यावल वेहता. 25गाबरते आ पेगिड हेरोद राजानगा बिराना लोप्पो होंचि, “बापतिस्मा हियना योहानुना तल्ला उंदि गिन्नेते वाटसि नाकु हीम,” इंचि इत्ता.
26इद केंजसि राजांक इरगा दुक्कम वाता. गानि अगा मत्ता अंटोर हेडमितोराहाटीं आनि तित्ता ओट्टुहाटीं, दानकु हींतन इत्तद हिय्योन ईना पराहिल्लोर. 27अस्के राजाल, जेलते मत्ता योहानुना तल्ला कोय्सि ता इंचि वरोर सिपाइंक बिराना आदेस हीसि लोहतोर. 28आ सिपाइ जेलते होंचि, योहानुना तल्ला कोय्सि, उंदि गिन्नेते वाट्सि तच्चि पेगिड्क हीतोर, अस्के आ पेगिड अदुन दाना यावांक हीता. 29इद पोल्ले योहानुना सिस्युल्कुंक तेळियता. अस्के ओर होंचि ओना पीनगुन ओसि बोंदाते इरतुर.
हेय्युं वेय्कुना मंदिक गाटो दोसमळ
(मत्तयाल 14:13-21; लूकाल 9:10-17; योहान 6:1-14)
30नार-नार होंचि मत्ता येसुना प्रेरितुल्क, येसुनगा मल्सि वातुर. ओर होंचि लोकुल्कुंक बतल-बतल कीतुर, बतल-बतल कराहतुर इवन्नि पोल्लें येसुंक वेहतुर. 31ओरगा वायानुर-होनानुर लोकुल्क वेल्लेटुर मत्तुर, ओर्क गाटो तिनालयगुडा वेला दोर्काकोंदु. अदुनहाटीं, “मीक अराम किया पींता, बोरे हिल्वा जेगातगा दाकोम दट,” इंचि येसु ओर्कुन इत्तोर. 32अस्के ओर उंदि डोंगाते उद्दिसि बोरे हिल्वा जेगाते होत्तुर. 33गानि वेल्लेटुर लोकुल्क ओर्कुन होननेंके हूळसि एरपाट कीतुर. अदुनहाटीं अन्नि सहरकुनाल विच्चि वासि, ओर्कन्ना मुन्नेने अगा जमा आतुर. 34येसु डोंगाताल रेयसि अद जेगातगा वेल्लेने मंदितुन हूळतस्के, कोहानोर हिल्वा गोर्रें बल्हा मनांतंगो ओर अल्हा आसि मत्तुर. अदुनहाटीं ओनकु ओरपोर्रो दया वासि ओर ओर्क पेनदा पोल्लें कराहलय सुरुव कीतोर.
35-36पोळ्द होनना वेलाक सिस्युल्क येसुनगा वासि, “मनम सुनसान जेगाते मंतोम, वेलागुडा बागेन आता. लोकुल्कुन लोहचीम, ओर दग्गेटा नाह्कुने होंचि, ओराहाटीं तिनालय बतलन्ना अस्कुंतुर,” इंचि इत्तुर. 37गानि, “मिमेटे ओर्क हीम्टु,” इंचि ओर्कुन येसु इत्तोर. अस्के ओर इत्तुर गदा, “रोंडु नुह्कुना दिनारकुनतोनि#6:37 दिनार इद कोत्ता आंद. उंदि दिनार इत्ते उंदि रोजुना बूतितच्चो दाना विलुवा मनंता. अंटोराहाटीं तिंडि अस्सि तच्चि हियमळा बतला?” इंचि पूसकीतुर. 38“मिहगा बच्चुं हारिं मंतां, होंचि हुळट,” इंचि येसु इत्तोर. ओर अवुन हूळसि, “हेय्युं हारिं, रोंडु जिम्मां मंतां,” इंचि वेहतुर.
39अस्के येसु, “अंटोर लोकुल्कुन पच्चाटा जाडि पोर्रो ग्रुप-ग्रुपुने उप्सट,” इंचि सिस्युल्कुंक आदेस हीतोर. 40ओर अंटोर ग्रुप-ग्रुपकुने उदतुर, उंदि ग्रुपने एबै, नूर इल्हा मत्तुर. 41अस्के येसु अव हेय्युं हारिं, रोंडु जिम्मां कय्दे पीसि, स्वर्गमताहेके हूळसि पेनदुक दन्यवाद कीतोर. अवुन तुकडें कीसि, “ओर्क पंचि हीम्ट” इंचि सिस्युल्कुंक हीसीतोर. अल्हेने अव रोंडु जिम्मानगुडा तुकडां कीसि हीतोर. 42ओर अंटोर पीरनिंडा तित्तुर. 43तिनुड आतस्के मिगुल्ता हारिना आनि जिम्माना तुकडां जमा कीते पन्नेंड तट्टां निंडतां. 44हारिं तित्तोरव्टे, सिराप मांडसे हेय्युं वेय्कुना मंदि मत्तुर.
येसु एतपोर्रो ताकमळ
(मत्तयाल 14:22-33; योहान 6:16-21)
45अद आता पजा येसु बिराना ओना सिस्युल्कुन डोंगाते उपिच्चि, “मिमेट अंटोर समुद्रमता हब्बेटा बाजुंक मंदना बेतसेदा सहरते नाकन्ना मुन्नेने होंट,” इंचि इत्तोर. अगा मत्ता लोकुल्कुन ओरा नाहकुनहेके होनालय सार्ला कीतोर. 46ओर्कुन सार्ला कीता पजा, येसु पारतना कियालय गुट्टापोर्रो होत्तोर. 47पोळ्द होत्ता पजा सिस्युल्कुना डोंगा नड्डुम समुद्रमते मत्ता, गानि येसु वरोरे ओड्डुनपोर्रो मत्तोर. 48समुद्रमते वळि-दुमारम डोंगाक एदुर तेदताहाटीं सिस्युल्कुंक डोंगा ताकसालय तकलिप होंचेके मत्तद येसु हूळतोर. हूळसि, नर्कटां मूड-नालुं एगाना वेलाते येसु सिस्युल्कुना डोंगाहेके एतपोर्रो ताकसेक होत्तोर. ओर ओरगटाल मुन्ने पेय्सि होननदे मत्ता, 49-50गानि येसु एतपोर्रो ताकानद हूळसि देय्यम इंचि मोत्कुत्तुर, बारित्ते अंटोर ओन हूळसि वेरियतुर. अस्के येसु, “वेरियमट! ननाने आंदुन. दैरनेमते मंटु!” इंचि इत्तोर.
51पजा सिस्युल्कुना डोंगाते येसु एक्कुता एक्कुडे वळि-दुमारम बंद आता. अद हूळसि ओर्क वेल्ले इचंत्रम आता. 52बारित्ते मुन्ने हेय्युं वेय्कुना मंदिक गाटो दोसतद हूळसि मत्तुर, अय्नागानि येसु सामिना बलमतुन ओर एरपाट किया हिल्लुर. ओरा मनसुक बंडालेसीं आसि होत्तां.
बिमार मत्तोर्कुन येसु बेस कींतोर
(मत्तयाल 14:34-36)
53पजा ओर अद समुद्रम दाटसि गेनेसरेत इनना नाटे एव्सि, अगा डोंगातुन आपतुर. 54ओर डोंगाताल रेयनेंकेन वेल्लेटुर लोकुल्क हूळसि येसुन एरपाट कीतुर. 55पकापीसि मत्ता नाह्कुने विच्चि होंचि बिमार मत्तोर्कुन कटुल्कुने वाटसि येसु बगा मंतोर इंचि तेल्पिच्कुंचि, अगा-अगा कांजसेक ओयुंदुर. 56येसु नाटेने, सहरते, नेलिने बद-बद जेगाते अय्ते होनुंदुरो, अगाटा बिमार मत्तोर्कुन चौकते तच्चि मींडिच्चि, “सिराप नीवा कप्पिडता अंचुन इट्टा हीम,” इंचि येसुन विनंति कियुंदुर. अल्हा बोर-बोर अय्ते ओना अंचुन इट्तुरो, ओर अंटोर पुरागा बेस आतुर.
Цяпер абрана:
मरकुस 6: ESG
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Wycliffe Bible Translators, Inc. All rights reserved.