KA ʻEUANELIO I KĀKAU ʻIA AI E IOANE 7
7
MOKUNA VII.
1 Hele malū akula ʻo Iesū ma Ierusalema i ka ʻAhaʻaina. 14 Aʻo akula ia i loko o ka luakini. 40 Nui nā manaʻo a nā kānaka nona. 45 Manaʻoʻiʻo kekahi, manaʻo kānalua kekahi, manaʻo pepehi kekahi.
1¶ Ma hope iho o ia mau mea, kaʻahele aʻela ʻo Iesū i Galilaia; ʻaʻole ona makemake e kaʻahele i Iudea; no ka mea, ua ʻimi nā Iudaio e pepehi iā ia.
2A ua kokoke mai nō ka ʻAhaʻaina Kauhalelewa a nā Iudaio.
3No ia mea, ʻōlelo akula kona mau hoahānau iā ia, “E haʻalele ʻoe i kēia wahi, a e hele aku i Iudea, i ʻike ai kāu poʻe haumāna i nā hana āu e hana ai.
4“No ka mea, ʻaʻohe mea hana malū, ke makemake ia e ʻike ʻia mai ʻo ia. Inā e hana ʻoe i kēia mau mea, e hōʻike aku ʻoe iā ʻoe iho i ko ke ao nei.”
5ʻAʻole naʻe ʻo kona poʻe hoahānau i manaʻoʻiʻo iā ia.
6ʻŌlelo maila ʻo Iesū iā lākou, “ʻAʻole i hiki mai koʻu manawa; akā, ʻo ko ʻoukou manawa ua maopopo mau nō ia.
7“ʻAʻole e inaina mai ko ke ao nei iā ʻoukou; ke inaina mai nei nō naʻe lākou iaʻu; no ka mea, ʻo wau ke hōʻike aku no lākou, ua hewa kā lākou hana ʻana.
8“ʻO ʻoukou ke piʻi i kēia ʻahaʻaina; ʻaʻole au e piʻi ʻānō i kēia ʻahaʻaina; no ka mea, ʻaʻole i hiki maopopo mai koʻu manawa.”
9A pau aʻela kāna ʻōlelo ʻana ia mau mea iā lākou, noho iho ia i Galilaia.
10¶ A piʻi akula kona poʻe hoahānau, a laila piʻi malū akula ia i ka ʻahaʻaina, ʻaʻole i ʻikea.
11No laila ʻimi ihola ka poʻe Iudaio iā ia ma ka ʻahaʻaina, a nīnau aʻela lākou, “ʻAuhea ʻo ia?”
12A nui loa aʻela ka hoʻopaʻapaʻa ʻana o ua ʻaha kanaka lā nona; ʻōlelo maila kekahi poʻe, “He maikaʻi ʻo ia”; ʻī maila kekahi poʻe, “ʻAʻole, ke hoʻopunipuni mai nei ia i nā kānaka.”
13ʻAʻole naʻe kekahi i ʻōlelo mai nona ma ke ākea, no ka makaʻu i ka poʻe Iudaio.
14¶ I waena o ka ʻahaʻaina, piʻi maila ʻo Iesū i loko o ka luakini, a aʻo maila.
15A kāhāhā ihola ka naʻau o nā Iudaio, ʻī aʻela, “Pehea lā i ʻike ai ʻo ia nei i ka Palapala, ʻaʻole ia i aʻo ʻia?”
16ʻŌlelo maila ʻo Iesū iā lākou, ʻī maila, “ʻO kaʻu mea e aʻo aku nei, ʻaʻole naʻu ia; akā, na ka Mea nāna au i hoʻouna mai.
17“Inā makemake kekahi e hana i kona makemake, e ʻike nō ia i ka mea aʻu e ʻōlelo nei, na ke Akua mai ia, ʻaʻole naʻu iho.
18“ʻO ka mea e ʻōlelo aku i kāna iho, ʻo ia ke ʻimi e hoʻonani iā ia iho; akā, ʻo ka mea i ʻimi e hoʻonani i ka Mea nāna ia i hoʻouna mai, he ʻoiaʻiʻo kāna, ʻaʻole he wahaheʻe i loko ona.
19“ʻAʻole anei ʻo Mose i hāʻawi mai iā ʻoukou i ke Kānāwai, ʻaʻole hoʻi kekahi o ʻoukou e mālama i ke Kānāwai? No ke aha lā ʻoukou e ʻimi nei e pepehi iaʻu?”
20ʻŌlelo akula ka ʻaha kanaka, ʻī akula, “He daimonio kou, ʻo wai lā ke ʻimi e pepehi iā ʻoe?”
21ʻŌlelo maila ʻo Iesū, ʻī maila iā lākou, “Ua hana iho nei au i kekahi hana, a kāhāhā ko ʻoukou naʻau a pau ia mea.
22“Na Mose i hāʻawi mai iā ʻoukou ke ʻoki poepoe, ʻaʻole naʻe na Mose mai ia, na ka poʻe kūpuna mai; a ke ʻoki poepoe nei ʻoukou i ke kanaka i ka lā Sābati.
23“Inā e ʻoki poepoe ʻia ke kanaka i ka lā Sābati, i haʻi ʻole ʻia ai ke Kānāwai o Mose, ke huhū mai nei anei ʻoukou iaʻu, i kuʻu hoʻōla ʻana i ke kanaka i ka lā Sābati?
24“Mai manaʻo ʻoukou ma ka mea o waho; akā, ma ka pono ʻiʻo ʻoukou e manaʻo ai.”
25¶ A laila ʻōlelo aʻela kekahi poʻe no Ierusalema, “ʻAʻole anei kēia ka mea a lākou e ʻimi nei e pepehi?
26“Aia hoʻi, ke ʻōlelo wiwo ʻole mai nei ia, ʻaʻole lākou e ʻōlelo aku iā ia. Ua ʻike maopopo anei ka poʻe aliʻi, ʻo ia nō ka Mesia?
27“Ua ʻike nō kākou i kahi i hele mai ai kēia; akā, aia hiki mai ka Mesia, ʻaʻole e ʻike kekahi i kona wahi i hele mai ai.”
28No laila kāhea maila ʻo Iesū i kāna aʻo ʻana i loko o ka luakini, ʻī maila, “Ua ʻike ʻoukou iaʻu, ʻike hoʻi ʻoukou i koʻu wahi i hele mai ai; ʻaʻole au i hele mai noʻu iho; akā, ʻo ka Mea nāna au i hoʻouna mai, he ʻoiaʻiʻo ia, ka Mea a ʻoukou i ʻike ʻole ai.
29“ʻO wau kai ʻike iā ia; no ka mea, nona mai wau, a nāna hoʻi au i hoʻouna mai.”
30No ia mea, ʻimi ihola lākou e hopu iā ia; ʻaʻole naʻe i lālau aku kekahi lima iā ia; no ka mea, ʻaʻole i hiki mai kona manawa.
31Akā, nui nā mea o ua ʻaha kanaka lā i manaʻoʻiʻo iā ia, ʻī ihola, “Aia hiki mai ka Mesia, e ʻoi aku anei nā hana mana āna e hana mai ai, ma mua o nā mea a kēia kanaka i hana ai?”
32Lohe aʻela nā Parisaio i ka ʻōhumu ʻana o ua ʻaha kanaka lā i kēia mau mea nona; hoʻouna akula nā Parisaio a me nā kāhuna nui i nā ilāmuku e lālau iā ia.
33A laila ʻōlelo maila ʻo Iesū iā lākou, “ʻAʻole au e liʻuliʻu me ʻoukou, a hoʻi aku au i ka Mea nāna au i hoʻouna mai.
34“E ʻimi auaneʻi ʻoukou iaʻu, ʻaʻole e loaʻa; a ma koʻu wahi e noho ai, ʻaʻole loa ʻoukou e hiki aku.”
35No ia mea, nīnau ihola nā Iudaio iā lākou iho, “Ma hea anei ʻo ia e hele ai, i loaʻa ʻole ai ʻo ia iā kākou? E hele anei ia i ka poʻe i puehu liʻiliʻi i waena o nā Helene, a e aʻo aku i nā Helene?
36“He aha hoʻi kēia mea āna i ʻōlelo mai nei, ‘E ʻimi auaneʻi ʻoukou iaʻu, ʻaʻole e loaʻa; a ma koʻu wahi e noho ai, ʻaʻole loa ʻoukou e hiki aku’?”
37¶ I ka lā nui ma ka hope o ua ʻahaʻaina lā, kū aʻela ʻo Iesū, kāhea akula, i ka ʻī ʻana aʻe, “Inā e make wai kekahi, e hele mai ia i oʻu nei e inu.
38“ʻO ka mea e manaʻoʻiʻo iaʻu, e like me kā ka Palapala Hemolele i ʻī mai ai, ‘E kahe mau mai nā muliwai no loko mai o kona ʻōpū.’”
39(ʻO kēia kāna i ʻōlelo ai no ka ʻUhane, ka mea e loaʻa auaneʻi i ka poʻe e manaʻoʻiʻo iā ia; ʻaʻole i hiki mai ka ʻUhane Hemolele ia manawa; no ka mea, ʻaʻole i hoʻonani ʻia ʻo Iesū ia wā.)
40No ia hoʻi, he nui ka poʻe o ua ʻaha kanaka lā i ko lākou lohe ʻana ia ʻōlelo, ʻōlelo ihola lākou, “He ʻoiaʻiʻo, ʻo ke Kāula kēia.”
41ʻŌlelo maila kekahi poʻe, “ʻO ka Mesia kēia.” Akā, nīnau aʻela kekahi poʻe, “E hele mai anei ka Mesia no Galilaia mai?
42“ʻAʻole anei i ʻī mai ka Palapala Hemolele, na nā mamo a Dāvida mai ka Mesia, a no Betelehema mai, ke kūlanakauhale o Dāvida?”
43Kūʻē ihola kekahi poʻe me kekahi poʻe nona.
44Makemake ihola kekahi poʻe e hopu iā ia, ʻaʻole naʻe kekahi i kau aku i ka lima ma luna ona.
45¶ A laila hoʻi maila nā ilāmuku i nā kāhuna nui a me ka poʻe Parisaio; a nīnau maila lākou iā lākou lā, “No ke aha lā i lawe ʻole mai ai ʻoukou iā ia?”
46ʻĪ akula nā ilāmuku, “ʻAʻole loa he kanaka i ʻōlelo like me kēia kanaka.”
47Nīnau maila nā Parisaio iā lākou, “ʻO ʻoukou anei kekahi i hoʻopunipuni ʻia?
48“Ua manaʻoʻiʻo nō anei kekahi o ka poʻe aliʻi, a me nā Parisaio iā ia?
49“Akā, ʻo kēia ʻaha kanaka ʻike ʻole i ke Kānāwai, ua hoʻohewa ʻia lākou.”
50Nīnau aʻela ʻo Nikodemo iā lākou, (ʻo ka mea i hele i ona lā i ka pō, ʻo ia kekahi o lākou,)
51“Ke hoʻohewa nei anei ko kākou Kānāwai i ke kanaka ma mua o ka lohe ʻana iā ia, a ʻike hoʻi i kāna mea i hana ai?”
52ʻŌlelo maila lākou iā ia, ʻī maila, “No Galilaia anei ʻoe? E ʻimi, a ʻike ʻoe, ʻaʻohe kāula no loko mai o Galilaia.”
53A hoʻi akula kēlā mea kēia mea i kona hale iho.
Цяпер абрана:
KA ʻEUANELIO I KĀKAU ʻIA AI E IOANE 7: KBH
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Ka Baibala Hemolele © Partners Development Foundation, 2018.