KA ʻEUANELIO I KĀKAU ʻIA AI E LUKA 22
22
MOKUNA XXII.
1 ʻŌhumu ʻia ʻo Iesū e make. 7 Ka Mōliaola. 19 Ka ʻAhaʻaina a ka Haku. 39 Pule Iesū ma ʻOliveta. 47 Kumakaia Iuda iā Iesū. 54 Hōʻole Petero iā ia. 63 Hōʻino ʻia Iesū.
1¶ A e kokoke mai ana ka ʻAhaʻaina Berena Hū ʻOle, i kapa ʻia ka Mōliaola.
2A ʻimi ihola nā kāhuna nui a me ka poʻe kākau ʻōlelo i mea e make ai ʻo ia iā lākou; no ka mea, ua hopohopo lākou i kānaka.
3¶ A laila komo ihola ʻo Sātana i loko o Iuda i kapa ʻia ʻo ʻIsekariota, ʻo ia kekahi o ka ʻumikumamālua.
4A hele akula ia, a kūkā pū me nā kāhuna nui, a me nā luna kiaʻi, i mea e hāʻawi aku ai ʻo ia iā ia iā lākou.
5A ʻoliʻoli ihola lākou, a ʻōlelo maila e hāʻawi i kālā iā ia.
6Hōʻoia akula ʻo ia, a ʻimi akula e kumakaia iā ia i ka wā e kaʻawale aku ai ka ʻaha kanaka.
7¶ A hiki mai ka lā o ka ʻAhaʻaina Berena Hū ʻOle, ka lā e pono ai ke pepehi i ke keiki hipa Mōliaola.
8Hoʻouna aʻela hoʻi ʻo ia iā Petero, a me Ioane, ʻī maila, “E hele ʻolua e hoʻomākaukau no kākou i ka Mōliaola e ʻai ai kākou.”
9Nīnau akula lāua iā ia, “Ma hea lā i kou makemake e hoʻomākaukau ai māua?”
10A haʻi maila ʻo ia iā lāua, “Aia hoʻi, i ko ʻolua komo ʻana i loko o ke kūlanakauhale, e hālāwai mai me ʻolua kekahi kanaka e hali ana i ke kīʻaha ʻoʻoma wai; e hahai ʻolua iā ia i loko o ka hale āna e komo ai.
11“A e ʻōlelo ʻolua i ka mea nona ka hale, ‘Ke nīnau nei ke Kumu iā ʻoe, “ʻAuhea ke keʻena ʻahaʻaina, kahi e ʻai ai au me kaʻu mau haumāna i ka Mōliaola?”’
12“A hōʻike mai nō ʻo ia iā ʻolua i ke keʻena nui ma luna i hoʻolakolako ʻia; ma laila ʻolua e hoʻomākaukau ai.”
13Hele akula lāua, a ʻike akula e like me kāna ʻōlelo ʻana iā lāua; a hoʻomākaukau ihola lāua i ka Mōliaola.
14¶ A hiki mai ka hora, noho ihola ia e ʻai, a me ka poʻe lunaʻōlelo he ʻumikumamālua me ia.
15A ʻōlelo maila ʻo ia iā lākou, “He nui ka makemake aʻu i makemake ai e ʻai pū me ʻoukou i kēia Mōliaola ma mua o koʻu make ʻana;
16no ka mea, ke haʻi aku nei au iā ʻoukou, ʻaʻole au e ʻai hou aku ia, a hoʻokō ʻē ʻia mai ia i loko o ke aupuni o ke Akua.”
17A laila, lālau ihola ʻo ia i ke kīʻaha, a hoʻomaikaʻi akula, ʻī maila, “E lawe ʻoukou i kēia, a e kaʻi like iā ʻoukou iho;
18no ka mea, ke ʻōlelo aku nei au iā ʻoukou, ʻaʻole au e inu i ko ke kumu waina, a hiki ʻē mai ke aupuni o ke Akua.”
19A laila lālau ihola ia i ka berena, hoʻomaikaʻi akula, a wāwahi ihola, a hāʻawi maila iā lākou, ʻī maila, “ʻO koʻu kino kēia i hāʻawi ʻia no ʻoukou; e hana hoʻi ʻoukou i kēia me ka hoʻomanaʻo mai iaʻu.”
20Pēlā nō hoʻi i ke kīʻaha, ma hope iho o ka ʻaina, ʻī maila, “ʻO kēia kīʻaha, ʻo ke kauoha hou ia i loko o koʻu koko i hoʻokahe ʻia no ʻoukou.
21“Eia hoʻi ʻeā, ʻo ka lima o ka mea nāna au e kumakaia, eia pū me aʻu ma ka papa ʻaina.
22“E hele ana nō hoʻi ke Keiki a ke Kanaka e like me ka mea i hoʻomaopopo ʻia ai; akā, e pōʻino kēlā kanaka nāna ia e kumakaia!”
23A laila ʻimi ihola lākou iā lākou iho i ko lākou mea nāna e hana ia mea.
24¶ Ua hoʻopaʻapaʻa ʻē lākou iā lākou iho i ko lākou mea e manaʻo ʻia ana he poʻokela.
25A ʻōlelo maila ʻo ia iā lākou, “Ua hoʻoaliʻi nā aliʻi ʻo nā lāhui kanaka ma luna o lākou; a ʻo ka poʻe i hoʻokoʻikoʻi ma luna o lākou, ua kapa ʻia lākou ‘He poʻe hana lokomaikaʻi.’
26“Akā, mai mea ʻoukou pēlā; ʻo ke poʻokela naʻe i waena o ʻoukou, e like ia me ka mea ʻuʻuku; a ʻo ka luna, e like ia me ka mea lawelawe.
27“ʻO wai lā ka mea nui, ʻo ka mea e noho ana e ʻai, a ʻo ka mea lawelawe anei? ʻAʻole anei ʻo ka mea e noho ana e ʻai? Akā, ua like au me ka mea lawelawe i waena o ʻoukou.
28“ʻO ʻoukou ka poʻe i noho pū mai me aʻu i loko o koʻu pōpilikia ʻana.
29“A ke hāʻawi aku nei au iā ʻoukou i ke aupuni, me koʻu Makua i hāʻawi mai ai iaʻu.
30“E ʻai ʻoukou a e inu hoʻi ma kaʻu papa ʻaina i loko o koʻu aupuni, a e noho hoʻi ma nā noho aliʻi e hoʻopono ana i nā ʻohana he ʻumikumamālua a ʻIseraʻela.”
31¶ ʻŌlelo maila hoʻi ka Haku, “E Simona, e Simona, ʻeā, ua noi mai ʻo Sātana e loaʻa ʻoukou iā ia e kānana ʻo ia iā ʻoukou e like me ka huapalaoa;
32akā, ua pule au nou i pau ʻole kou manaʻoʻiʻo; aia hoʻohuli ʻia mai ʻoe e hoʻoikaika ʻoe i kou poʻe hoahānau.”
33ʻĪ akula hoʻi ʻo ia iā ia, “E ka Haku, ua mākaukau wau e hele pū me ʻoe i ka hale paʻahao, a i ka make!”
34ʻĪ maila hoʻi ia, “Ke ʻōlelo aku nei au iā ʻoe, e Petero, ʻaʻole e kani ka moa i kēia lā ma mua o kou hōʻole ʻakolu ʻana i kou ʻike ʻana iaʻu.”
35¶ A laila ʻōlelo maila ʻo ia iā lākou, “I ka wā i hoʻouna aku ai au iā ʻoukou me ka ʻaʻa kālā ʻole, a me ke kīʻeke ʻai ʻole, a me ke kāmaʻa ʻole, i nele anei ʻoukou i kekahi mea e pono ai?” Haʻi akula hoʻi lākou, “ʻAʻole.”
36A laila ʻōlelo maila ʻo ia iā lākou, “Akā ʻānō, ʻo ka mea ʻaʻa kālā, e lawe ia, a pēlā hoʻi i ke kīʻeke ʻai; a ʻo ka mea nele i ka pahi kaua, e kūʻai lilo aku i kona ʻaʻahu, a e kūʻai lilo mai i ka pahi kaua.
37“No ka mea, ke haʻi aku nei au iā ʻoukou, iaʻu nō e hoʻokō ʻia ai ka mea i palapala ʻia, ‘«Ua helu pū ʻia ʻo ia me ka poʻe hana hewa»’; no ka mea, e pau auaneʻi nā mea noʻu.
38ʻŌlelo akula hoʻi lākou, “E ka Haku, eia hoʻi, nā pahi kaua ʻelua.” ʻĪ maila ʻo ia iā lākou, “He nui ihola ia.”
39¶ A laila puka ia i waho, a hele i ka mauna ʻo ʻOliveta, me kāna i hana mau ai; a hahai akula kāna mau haumāna iā ia.
40A hiki aku ia i laila, ʻī maila ʻo ia iā lākou, “E pule ʻoukou o lilo i ka hoʻowalewale ʻia.”
41Mamao akula hoʻi ʻo ia mai o lākou aku, me he nou ʻana lā o ka pōhaku, a kukuli ihola i lalo, pule akula ia,
42ʻī akula, “E ka Makua, inā e pono iā ʻoe, e lawe aku ʻoe i kēia kīʻaha mai oʻu aku nei; ʻaʻole hoʻi ʻo koʻu makemake; akā, ʻo kou nō ke hana ʻia.”
43A ʻike ʻia aʻela e ia ka ʻānela, mai ka lani mai, e hoʻoikaika ana iā ia.
44A ua puni ia i ka ʻeha nui, pule ikaika akula ia; a ua like hoʻi kona hou me nā kulu nui o ke koko e hāʻule ana i lalo i ka lepo.
45A kū aʻela ia mai ka pule ʻana, hoʻi maila ia i kāna mau haumāna, ʻike maila iā lākou e hiamoe ana no ke kaumaha;
46ʻī maila hoʻi ʻo ia iā lākou, “No ke aha lā ʻoukou e hiamoe nei? E ala aʻe i luna, e pule hoʻi ʻoukou, o lilo ʻoukou i ka hoʻowalewale ʻia.”
47¶ A iā ia e ʻōlelo ana, aia hoʻi, ka lehulehu, a ʻo ka mea i kapa ʻia ʻo Iuda, ʻo kekahi o ka poʻe ʻumikumamālua, hele aʻe ia ma mua o lākou, a hoʻokokoke nō ia i o Iesū lā e honi iā ia.
48Nīnau maila hoʻi ʻo Iesū iā ia, “E Iuda, ke kumakaia nei anei ʻoe i ke Keiki a ke Kanaka me ka honi?”
49A ʻike ihola ka poʻe me ia i ka mea e hana ʻia ana, nīnau akula lākou iā ia, “E ka Haku, e hahau anei mākou me ka pahi kaua?”
50A hahau ihola kekahi o lākou i ke kauā a ke kahuna nui, a ʻoki aʻela i kona pepeiao ʻākau.
51A laila ʻōlelo maila ʻo Iesū, ʻī maila, “Uoki pēlā!” A hoʻopā aʻela ʻo ia i kona pepeiao, hoʻōla ihola iā ia.
52A laila ʻōlelo maila Iesū i ka poʻe i kiʻi aku iā ia, i nā kāhuna nui, a me nā luna o ka luakini, a me nā lunakahiko, “Ua hele mai anei ʻoukou ma waho me nā pahi kaua, a me nā newa, e like me ka hahai ʻana i ka pōā?
53”I koʻu noho ʻana me ʻoukou i kēlā lā, a i kēia lā, i loko o ka luakini, ʻaʻole i lālau mai ko ʻoukou mau lima iaʻu. Akā, ʻo ko ʻoukou hora kēia, a me ka mana o ka pouli.”
54¶ A laila lālau aʻela lākou iā ia, kaʻi akula, a alakō iā ia i loko o ka hale o ke kahuna nui; a hahai kaʻawale akula ʻo Petero ma hope.
55A hoʻā ihola lākou i ke ahi ma waenakonu o ka pā hale, noho nui ihola lākou i lalo, noho pū ihola ʻo Petero i waena o lākou.
56A ʻike aʻela kekahi kaikamahine iā ia e noho ana ma ke ahi, a haka pono iā ia, ʻī aʻela ia, “ʻO ia nei nō kekahi me ia.”
57A hōʻole akula ʻo ia iā Iesū, ʻī akula, “E ka wahine, ʻaʻole au i ʻike iā ia.”
58A liʻuliʻu iki aʻela, ʻike maila kekahi mea ʻē iā ia, ʻī maila ia, “ʻO ʻoe nō kekahi o lākou!” ʻĪ akula Petero, “E ke kanaka, ʻaʻole au!”
59A hoʻokahi paha hora ma ia hope iho, hōʻoiaʻiʻo aʻela kekahi, ʻī aʻela, “ʻOiaʻiʻo, ʻo ia nei nō hoʻi kekahi me ia; no ka mea, no Galilaia ia nei.”
60ʻŌlelo akula hoʻi ʻo Petero, “E ke kanaka, ʻaʻole au i ʻike i kāu i ʻōlelo mai nei.” A i kāna ʻōlelo ʻana, kani koke ihola ka moa.
61Hāliu maila nō hoʻi ka Haku, nānā maila iā Petero; a hoʻomanaʻo ihola ʻo Petero i ka ʻōlelo a ka Haku i ʻōlelo mai ai iā ia, “Ma mua o ke kani ʻana o ka moa, ʻakolu ou hōʻole ʻana mai iaʻu.”
62A hele akula ʻo Petero i waho, uē mihi nui ihola ia.
63¶ ʻO ka poʻe kānaka hoʻi e paʻa ana iā Iesū, hoʻomāʻewaʻewa akula lākou iā ia, me ka pepehi iā ia.
64A pani aʻela lākou i kona mau maka, pepehi akula ma kona wahi maka, a nīnau akula iā ia, ʻī akula, “E koho ʻoe, na wai ʻoe i pepehi?”
65He nui nō hoʻi nā ʻōlelo ʻē aʻe a lākou i hōʻino aku ai iā ia.
66¶ A ao aʻela, ʻākoakoa koke maila ka poʻe lunakahiko o kānaka, a me nā kāhuna nui, a me ka poʻe kākau ʻōlelo, a lawe aʻela lākou iā ia i loko o ko lākou ʻaha luna kānāwai, ʻī akula,
67“ʻO ʻoe anei ka Mesia? E haʻi mai iā mākou.” ʻĪ maila hoʻi ʻo ia iā lākou, “Inā e haʻi aku au iā ʻoukou, ʻaʻole nō ʻoukou e manaʻoʻiʻo mai.
68“A inā e nīnau aku au iā ʻoukou, ʻaʻole ʻoukou e haʻi mai iaʻu, ʻaʻole hoʻi e hoʻokuʻu iaʻu.
69“Ma hope aku nei hoʻi, «e noho nō ke Keiki a ke Kanaka ma ka lima ʻākau» o ka mana o «ke Akua».”
70Nīnau akula lākou a pau, “ʻO ʻoe nō anei ke Keiki a ke Akua?” Haʻi maila hoʻi ʻo ia. “ʻO wau nō ʻo kā ʻoukou e ʻōlelo nei.”
71ʻĪ aʻela nō hoʻi lākou, “He aha kā kākou hemahema e pono ai ka mea hou e maopopo ai? No ka mea, ua lohe kākou no loko mai o kona waha ponoʻī.”
Цяпер абрана:
KA ʻEUANELIO I KĀKAU ʻIA AI E LUKA 22: KBH
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Ka Baibala Hemolele © Partners Development Foundation, 2018.