यूहन्ना 2
2
गलील रे काना च पैहला चमत्कार
1फेरी तिज्जे दिन गलील जिले रे काना नगरा च इक ब्याह लगीरा था, तिसच जे यीशुये री माता बी आईरी थी। 2यीशु कने तिसरे चेले बी तिस ब्याह च न्यून्दा देईने सद्दीरे थे। 3ताहली जे दाखरस घटणे लगया, तां यीशुये रिये माते तिसजो गलाया, “इन्हांले हुण होर दाखरस निआं।” 4यीशुये तिसाजो गलाया, “माता ये तू मिन्जो कां दस्या राईं? मेरा बगत हल्तिये नीं आईरा।” 5पर तिसरी माते सेवकां ने गलाया, “सै काम्म जे यीशु तुहांजो करने जो गलाओ तियां इ करयों।” 6यहूदी रितिया रे मुताबक ऊथी पाणी भरने रे पत्थरा रे छे मटके रखीरे थे, सै मटके तियां इ थे जियां जे यहूदी शुद्धी करने खातर कम्मां च इस्तेमाल कराँ थे। हर मटके च कोई अस्सी ते इक सौ बीह लीटर तक पाणी औआं था। 7यीशुये सेबकां जो गलाया, “मटकयां जो पाणिये ने भरी दो।” तिन्हें सारे मटके बिल्लां-बिल्लां तक भरीते। 8फेरी तिने सेवकां ने बोल्या, “हुण थोड़ा जेआ पाणी इन्हां चते कड्डीने दाबता रा इन्तजाम कराणे औल़े मुखिये ले लेई जवा।” कने सै दाखरस तिसले लेईये। 9ताहली जे तिने मुखिये सै पाणी चख्या सै जे दाखरस बणी गरा था, सै नीं जाणदा था भई ये कित्ते आया, पर तिन्हां सेबकां जो पता था तिन्हे जे पाणी कड्डया था, तां तिने लाड़े जो सद्दीने तिसजो गलाया, 10“हर कोई पैहले बधिया दाखरस परोसां कने ताहली जे मेहमान पी ने तृप्त हुई जांये तिसते बाद सै दाखरस जे परोसया जां सै इतणा बधिया नीं हुन्दा; पर तैं बधिया दाखरस हुण तक संभाली ने रखीरा।” 11यीशुये गलील जिले रे काना नगरा च ये पैहला नशाण दस्सीने अपणी महिमा परगट कित्ती कने तिसरे चेलयां तिस पर विश्वास कित्या। 12इसते बाद यीशु कने तिसरी माता, तिसरे भाई कने तिसरे चेले कफरनहूम नगरा जो गये कने तित्थी किछ दिन रुके।
ब्यापारियां जो मन्दरा ते बाहर कड्डया जाणा
(मत्ती 21:12; मरकुस 11:15-17; लूका 19:45,46)
13यहूदियां रा फसह रा त्योहार नजदीक आईरा था, कने यीशु यरूशलेम नगरा जो गया। 14तित्थी परमेशरा रे मन्दरा च यीशुये देख्या भई लोक बैलां, भेड्डां कने कबूतरां जो बेचणे लगीरे कने सिक्कयां जो बदलने औल़े सौदागर अपणियां सीटां पर बैठिरे। 15फेरी तिने रस्सियां रा कोड़ा बणाया कने सब्बीं जो बैलां कने भेड्डां समेत परमेशरा रे मन्दरा ते बाहरौ खदेड़ीत्या, सिक्कयां जो बदलने औल़े सौदागराँ रे सिक्के खन्डेरीने तिन्हांरियां चौकियां मुन्धियां करीने सट्टीतियां, 16कबूतर बेचणे औल़यां जो तिने गलाया, “इन्हांजो इत्थीते बाहर लेई जवा कने मेरे पिता रे घरा जो बजार मता बणान्दे।” 17फेरी तिसरे चेलयां जो याद आया भई पवित्रशास्त्रा च लिखिरा, “तेरे घरा खातर मेरा ये जनून मेरे अन्दर अग्गी साई भड़कां।” 18इस पर यहूदी अगुवेयां यीशुये ने बोल्या, “तू जे ये काम्म करी रां तां अहांजो कुण जेआ नशाण दस्सीरां?” 19फेरी यीशुये तिन्हांजो जबाब दित्या, भई “इस मन्दरा जो तोड़ी दो, मांज इस्सो तिन्नां दिनां च दोबारा बणाई देणा।” 20इस पर यहूदी अगुवेयां बोल्या, “इस मन्दरा बनाणे जो छताल़ि साल लगीरे कने तू इसजो तिन्नां दिनां च बनाणे री गल्ल करी रां!” 21पर अपणिया गल्ला च यीशुये तिस मन्दरा रा जे जिकर कित्या था सै तिसरा अपणा इ शरीर था। 22पर ताहली जे सै मूईरयां चते भीं ते जिऊंदा हुया तां तिसरे चेलयां जो याद आया भई यीशुये येढ़ा बोलीरा था; कने तिन्हे पवित्रशास्त्र सै जे मसीह रे मरने ते बाद जिऊंदा हुणे रे बारे च दस्सां यीशुये रियां गल्लां पर विश्वास कित्या।
यीशु माहणुआं रे मना जो जाणाँ
23ताहली जे यीशु यरूशलेम नगरा च फसह रे बगत त्योहारा च था, तां मतयां लोकें तिन्हां नशाणां जो जे सै दस्सां था देखीने तिस पर विश्वास कित्या। 24पर यीशुये अप्पूँजो तिन्हांरे भरोसे नीं छड्डया, काँह्भई सै सारयां लोकां जो जाणाँ था। 25तिस्सो इसा गल्ला री कोई जरूरत नीं थी भई कोई आईने तिसजो लोकां रे बारे च दस्सो, काँह्भई लोकां रे मना च क्या, इसजो सै जाणाँ था।
Цяпер абрана:
यूहन्ना 2: KFSNT
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
This work is licensed under Creative Commons Attribution-ShareAlike 4.0 License.