Génesis 15
15
Papang yaklauwi Abram karakpramis as yamwi
1Adika usnit yak Dawan yaklauwi kalyuyulna Abram yak di as talna munah, aput kalyulna:
—Abram yamaduwinih yang kuduh man tamat dakyang, dawak man mamat dunam kidika nuhni palni karang.
2-3Kaunah Abram yaklauwi kalyulna:
—Dawan dawi Papang, ¿man yang akat mikit yama kidika ais ilpni yah, man yamni amanglataman yang walakbis disyang kidika? Man yang akat walakbis as bik yatasman bahang yang di ais dutayang kidika, yang diki yamyang Eliezer Damasco kaupak kidika witing duwarang.
4Dawan yaklauwi nangnitlana:
—Man dima balna duwarang kidika laih man walambis palni kidika duwarang, kaunah pa ūk muih laih awaski.
5Kaput laih Dawan yaklauwi ahni yakat duwi kiuna, dawi kalyulna:
—Yamni talah makau kisang yakat, dawak yala balna kidika kulta talah, man kulta talnam sipman kat. Yamniki, man sulama balna kidika mahni kaput karang.#Rom 4:18; Hib 11:12.
6Dawak Abram kidika Dawan yak rahm kalkulna, kaput bahang Dawan yaklauwi la kat muihni as#Rom 4:3,9,22; Gal 3:6; Jm 2:23. kapat kalkulna dai 7dawak kalyulna:
—Yang kuduh Dawan; caldeo balna panina Ur kaupak mayaknayang kidika, adika sauni mana atnik man dima atnin.
8—Kaunah, Dawan dawi Papang, ¿yang amput rahm kulkiyah, adika sauni yang diki karang kidika? —Abram yaklauwi kaput kalyulna.
9Dawak Papang yaklauwi kalyulna:
—Duaita yatah turuh yalbin as, kuts yal as dawak sīp almuk, dawak kidika balna bitik laih kurih bās duduwa atnin ki, dawak kaput bik buhtuku bikisni as, dawak buhtuku bin as.
10Dawak Abram yaklauwi adika dini balna bitik duaiwi kalana, dawak papus tihrwi dawi minit yakat kalmuh abukni lakna;#Jr 34:18-19. kaunah di lawani balna kidika laih tihrwas dai. 11Dawak upam balna kidika di dauna balna minitna yak aiwi bubukna dai, kaunah Abram yaklauwi usna dai. 12Mahka puklakwakat, Abram witing yamni palni kamana dai. Dawak sirihni puksani palni awaihdakna dai, dawak uba yamaduna. 13Dawak Dawan yaklauwi kalyulna:
—Man amanglanam ki sulama balna kidika muih ūk saunina yakat uiwi yalalahna karang, dawak kidika yakat muih dinina yamyang kakalna karang, dawak kidika yakat dutni diyayamna karang kurih 400.#Ex 1:1-14; Ap.w 7:6. 14Kaunah yang lawik wah kalakiki, angdika ninisan yaklauwi sulama balna warau lani yakat awarang kidika, kidika usnit kat witingna pri kalalahna karang, dawak bik di duyang kakalna karang.#Ex 12:40-41; Ap.w 7:7. 15Dawak man namangyakat laih, ismang aslah lani kidika duma, dawak muihbarak kalta dauma, kaput laih man muihma bararak balna karak kalpaknaman karang. 16Sulama balna kidika tilahwi wat arungka bayakwi kiwa kat, watwi nawatwi aina karang adika pāni akat, kat amorreo balna dutnina kidika baisa dutni palni yayamwas bahang.
17Uman puklakna bahang puksani dai dawak plawar busnin uni as kalahna bahang kidika kaupak wayau manah kalahwadai, dawak awas dahlna as dimuihni tirhna bangkidika minit munah kaiwi bayakwi awadai. 18Sihm kidika mani Dawan yaklauwi Abram karak pramis as yamna dawak aput kalyulna:
—Adika sauni laih sulama balna yakat diaki,#Ap.w 7:5. Egipto wasni#15.18 Egipto wasni, Kidika laih Nilo wasninuh awaski, kidika laih Egipto yakat wasbin as ki (Jos 15:4 yakat libitwi talnin), warmani balna akat ayangni papakna kidika laih el-Arish, kidika laih Sinaí kaupak tingpal nining yakat ki, dawak Palestina kaupak laih wadah niningyakat ki, Mediterráneo kumani kung yakat. kaupak Éufrates wasni nuhni kat. 19Yuldarangkat ceneo balna, cenezeo, cadmoneo, 20hitita, ferezeo, refaíta, 21amorreo, cananeo, gergeseo, dawak jebuseo, kidika balna saunina bitik.
Цяпер абрана:
Génesis 15: SUMU
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Biblia Sumo
Texto © Sociedad Bíblica de Nicaragua 1998