Lukas 18
18
'Ade-'ade mangale balo we-were'a re juruhakimi matengo
1Gena ḏua, Yesus 'o jarita 'ade-'ade rimoi di'a 'o doto'o 'Ai me-mete'e, la ananga manga 'akala re sinyingara 'i rapo'o awa mada'a 'aḏi manyiata tau-taunu. 2Yesus 'o kanau, “Toma limau rimoi juruhakimi matengo ga'a 'o mojongo ua Ma Jou'ongu Madutu re 'o faduli ua 'a guna ḇato. 3Toma limau gena-ge balo we-were'a matengo munanga mo talaḏi tau-taunu toma juruhakimi gena-ge di'a mo golo'o na'o nyengara gari'a 'o riono munanga 'ami hali. Munanga mo kanau, ‘Riono ngoi to talaḏi 'ari lawana.’ 4Ma di'ara ino, juruhakimi gena-ge 'o riono ua balo gena-ge. Mada'a ma ḏo-ḏogumu tala juruhakimi gena-ge 'o mafikiri, ‘Kalaha ngoi to mojongo ua Ma Jou'ongu Madutu re to faduli ua 'a guna ḇato, 5mada'a ma sababu balo gena-ge mo sapolo tau-taunu ra ngoi, jobilaha ngoi timi riono 'ami hali. Na'o so'o gena ua, munanga mo sapolo tau-taunu re mo sikangela ngoi.’ ”
6Ḏua Ma Jou 'o kanau, “ 'Isene la-la ino, juruhakimi ma 'adili ua 'ai demo-demo. 7Nah, sanga ua Ma Jou'ongu Madutu na riono ua 'ai ngowa-ngowa'a masiretene remanga hali ga'a 'aḏi maḏigaro'o ra Unanga lobi'i re wangere! Tantu ḏua Ma Jou'ongu Madutu 'a sitehe ua enanga ma 'orasa di'a 'O riono ananga! 8Ngoi to siajele ra ngini nena-ne: Unanga jau-jau 'o riono ananga remanga hali! Mada'a maha Ngoi, Manusia ma Ngowa'a Nau'u dadunu to sapolo moju, 'oru Ngoi to sanga moju bolo ua ngowa'a ga'a manga ngo-ngaku kama elala ua toma dungia nena-ne!”
'Ade-'ade mangale ngowa'a Farisi re ngowa'a golo-golo'o balastengi
9Yesus 'a sijarita ḏi'i 'ade-'ade nena-ne di'a ngowa'a ga'a 'aḏi si'aḏu-'aḏu ngowa'a lelegu, re 'aḏi matoro manga diri aje ananga ngowa'a loasa re banari. 10Yesus 'o kanau, “Ngowa'a nga muḏiḏi 'aḏi osama ra Ma Jou'ongu Madutu 'ai Wala di'a 'aḏi manyiata. Matengo ngowa'a Farisi, matengo ḏi'i ngowa'a golo-golo'o balastengi. 11Ngowa'a Farisi gena-ge 'o te'oso kara 'o manyiata mangale 'ai diri masiretene, ‘Ya Ma Jou'ongu Madutu ngoi to pula'a murasa ma la, sababu ngoi to ma tero ua ngowa'a lelegu: ngowa'a ga'a tori'i, 'akala re sinyingara 'i boloto ua, tinikai bolo ma tero sa'olo ngowa'a golo-golo'o balastengi nena-ne. 12Ngoi to puasa migu rimoi soi ḏiḏi, re to pula'a ma balangu moi toma balangu nyagi moi ino di'a 'ari jou-jou.’ 13Mada'a ngowa'a golo-golo'o balastengi gena-ge 'o te'oso toma giḏanga re 'ai biono talaḏi ie diwanga ua, 'a sata-sata katere re 'o kanau, ‘Ya Ma Jou'ongu Madutu no sijumu 'Ani 'akala re sinyingara ma la-la ra ngoi, ngowa'a baraḏosa!’ ”
14Yesus 'o kanau, “Ngoi to siajele ra ngini nena-ne: Wakutu ananga 'aḏi sisoi'i tala Ma Jou'ongu Madutu 'ai Wala, pa'i ngowa'a golo-golo'o balastengi ḇato Ma Jou'ongu Madutu 'o dawongo sa'olo ngowa'a loasa re banari. Sababu 'a guna ḇato 'o sihie 'ai diri, unanga Ma Jou'ongu Madutu ḏuanga i'a 'u siholo. Re 'a guna ḇato 'o maholo 'ai diri, unanga Ma Jou'ongu Madutu ḏuanga i'a 'u sihie.”#Mat. 23:12; Luk. 14:11
Yesus 'o sibarakati ngowa kiau
(Mat. 19:13-15; Mrk. 10:13-16)
15'Age rema ngowa-ngowa'a 'aḏi gasa manga ngowa kiau ra Yesus, la Unanga 'a siteru 'Ai giama re 'O sibarakati ngowa kiau gena-ge. Wakutu Yesus 'ai me-mete'e ya oḏi'i so'o gena, ananga 'aḏi ḇangata ngowa-ngowa'a ga'a 'aḏi gasa ngowa kiau. 16Mada'a Yesus ya'u 'aro'o ngowa-ngowa'a ga'a 'aḏi gasa manga ngowa kiau gena-ge ino ra Unanga re 'o kanau Tai me-mete'e, “Sieanga i'a ḇato, ngowa-ngowa kiau nena-ne 'aḏi sigasa ino ra Ngoi. Awa ni dola'aku ananga, sababu ngowa'a ga'a 'aḏi dadi ma tero sa'olo ngowa-ngowa kiau nena-ne pa'i ananga gena-ge nyengara 'aḏi osama nyo-nyoimi ra Ma Jou'ongu Madutu 'ai Pareta. 17Ni ngaku mode-mode'e 'Ari demo-demo nena-ne: 'A guna ḇato 'o sapolo ra Ma Jou'ongu Madutu ma tero ua sa'olo ngowa kiau nena-ne, unanga 'o osama nyo-nyoimi yoḏu'u ra Ma Jou'ongu Madutu 'ai Pareta.”
Mangale ngowa'a rema-enanga
(Mat. 19:16-30; Mrk. 10:17-31)
18Yahudi manga bi-biri'i matengo 'o sano ra Yesus, “Guru ga'a No la madutu, ngoi balasu to 'a'a sa'olo la to sanga 'ahu kasingado-ngadolo i'a?”
19Yesus 'o sano ra unanga, “I'a sa'olo ngana no si'aro'o Ngoi to la madutu! Matengo i'a mai ua 'o la madutu, ḏuga-ḏuga Ma Jou'ongu Madutu ḇato. 20Ngana na waro ḏua 'o parenta ra Ma Jou'ongu Madutu ino: ‘No tinikai awa, no sisengene ngowa'a awa, no to-tori'i awa, no sa-sakala awa, re no silamo'o 'ani ḇaḇa re ngina.’ ”#Sup. 20:12-16; Dad. 5:16-20
21Ngowa'a Yahudi gena-ge 'o sangoro, “Parenta mo-moini gena-ge ngoi ta si'a'a ḏua wakutu ngoi to ngowa 'olo i'a moju singadolo 'orasa nange-ne.”
22Yesus 'a 'isene so'o gena re 'o kanau, “Ma jingianga rimoi moju, ngana balasu na si'a'a: Na wu'unu 'ani 'ori i'a rana mo-moini, re ma pipisi na sibalangu toma ngowa-ngowa'a ma dinga'unu ua. Dadi ngana ḏuanga i'a no sanga 'ori i'a rana mode-mode'e toma soroga. Togumu i'a no sapolo re no mete'e Ngoi.” 23Mada'a wakutu unanga 'a 'isene Yesus 'o kanau so'o gena unanga 'ai 'akala re sinyingara 'i kangela masala, sababu unanga gena-ge ngowa'a rema-enanga madutu.
24Yesus 'o oḏi'i ngowa'a gena-ge 'ai 'akala re sinyingara 'i kangela. Sababu gena-ge Unanga 'o kanau, “Kangela masala di'a ngowa'a rema-enanga 'aḏi osama nyo-nyoimi ra Ma Jou'ongu Madutu 'ai Pareta. 25Lebe gapanga 'o 'unta rimoi 'i osama toma j̱aiti ma duso'o reo ngowa'a rema-enanga 'aḏi osama nyo-nyoimi ra Ma Jou'ongu Madutu 'ai Pareta.”
26Ngowa-ngowa'a ga'a 'aḏi 'isene Yesus 'o kanau so'o gena 'aḏi sano, “Na'o so'o gena, 'a guna nga'unu sanga salamata?!”
27Yesus 'a sangoro, “Toma manusia 'i osama 'akala ua, mada'a ra Ma Jou'ongu Madutu, mo-moini 'i osama 'akala.”
28Ḏua 'a Petrus 'o kanau, “Ngomi remi sisoi'i tala minga ngitu re ngale, la mi mete'e Jou!”
29Yesus 'a sangoro, “Ni ngaku mode-mode'e 'Ari demo-demo nena-ne: 'A guna ḇato ra sisoi'i tala ḏua 'ai wala, 'ai were'a, 'ai ioro re nongoḏu, 'ai ḇaḇa re ngina, bolo 'ai ngowa-ngowa'a, sababu 'o de-de'oso Ma Jou'ongu Madutu, 30unanga gena-ge toma 'orasa nange-ne ḏuanga i'a 'o sanga pai-pai'i, re toma 'orasa biono unanga 'o sanga 'ahu kasingado-ngadolo i'a.”
Yesus 'o masiajele mangale 'Ai se-sengene ma soi ro'ange
(Mat. 20:17-19; Mrk. 10:32-34)
31Yesus 'o lomu pa'i 'Ai me-mete'e nga nyagi moi re nga muḏiḏi, re 'o kanau, “ 'Isene! Ngene nange-ne wo si'a toma limau Yerusalem. I'a da'a 'oru ga'a nabi-nabi ya silefo pasala ḏua mangale Ngoi, Manusia ma Ngowa'a Nau'u, enanga 'i dadi mo-moini. 32Ngoi ḏuanga i'a sipula'a toma ngowa-ngowa'a Yahudi ua, ananga Ri nye-nyelo'o, Ri sije-jengere, re Ri obi'i 'Ari biono. 33Ananga 'aḏi sipo re 'aḏi sisengene Ngoi. Mada'a toma wangere ma soi ro'ange, Ngoi dadunu to 'ahu moju.”
34Mo-moini gena-ge Yesus 'ai me-mete'e ya sahe ua. Yesus 'ai demo-demo ma ngale 'i dadi rahasia Tai me-mete'e. Ananga ya sahe ua 'oru ga'a Yesus 'o kanau.
Yesus 'o si-la ngowa'a hafu matengo toma limau Yerikho
(Mat. 20:29-34; Mrk. 10:46-52)
35Wakutu Yesus toma ḏo-ḏagi ma dara sa'i ri ngadolo toma limau Yerikho, 'age rema ngowa'a hafu matengo 'o tegoro golo-golo'o toma ngo'omo ma 'uḏu. 36Wakutu unanga 'o 'isene ngowa'a repe manga nyiwere, unanga 'o sano, “Rema 'oru?”
37Ananga 'aḏi sangoro, “Yesus ngowa'a Nazaret 'o tola'a ino.”
38Dadi ngowa'a hafu gena-ge 'o 'aro'o siduga-duga, “Yesus, 'Olana Daud 'ai ju'uda!#18:38 'Olana Daud 'ai ju'uda ma tero sa'olo: Daud 'ai Ngowa'a Nau'u. No sijumu 'Ani 'akala re sinyingara ma la-la ra ngoi!”
39Ngowa-ngowa'a ga'a toma biono ananga 'aḏi ḇangata unanga re soma'a unanga masiogoro. Mada'a unanga ganapu 'o 'aro'o siduga-duga, “Jou, 'Olana Daud 'ai ju'uda, Na sijumu 'Ani 'akala re sinyingara ma la-la ra ngoi!”
40Yesus 'o matogumu tala re 'o soma'a ngowa'a 'aḏi gasa ino ngowa'a hafu gena-ge ra Unanga. Wakutu ngowa'a hafu gena-ge ro ngadolo, Yesus 'o sano, 41“ 'Ani mau 'oru Ngoi ta si'a'a?”
Ngowa'a hafu gena-ge 'a sangoro, “Jou, ngoi to mau to oḏi'i” 42Ḏua Yesus 'o kanau, “Na'o so'o gena, no oḏi'i! Sababu 'ani ngo-ngaku ra Ngoi, ngana no la.”
43Toma 'orasa gena ḏua, unanga nyengara 'o oḏi'i kara 'o mete'e Yesus re 'ai madanga ma dara kama tola'a ua 'o puji re silamo'o Ma Jou'ongu Madutu! Wakutu ngowa'a repe ya oḏi'i so'o gena, ananga mo-moini 'aḏi puji re silamo'o Ma Jou'ongu Madutu ḏi'i.
Цяпер абрана:
Lukas 18: SNT
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
2015 © Indonesian Bible Society