Matiu 10
10
Se toni omuqa apositolo madu
(Maka 3:13-19; Luke 6:12-16)
1Ni vo Jisu ta o nokaemake ni o padoemake omadeukoi o ṉaviko toni omuqa disaipeli madu, ni vota o katimake se ko pizato tu seta ke rerikou ko ziolo poso ni urikimou se maba poso kiadama azaazama vere poso kale azo. 2Komi kio sea toni omuqa disaipeli madu ko ṉi poso, se vo Jisu apositolo madu ma kioveni. Saimone ka pado voko ṉi ta Pita, ni vovo visi Aduru, Jemisi, ni vovo visi Jone, nioqa tamania Zebeti ko meqora kidi, 3Pilipi, ni Batolomiu, Tomasi, ni Matiu vo takisi ko maba, ni Jemisi vo Alepiasi vo meqora, ni Tadiasi, 4ni Saimone, vo oka zariovini rupasimo Izireli qoqono Romu ko vailo kale azo, tu ke ṉavi ke lojolou, ni Jiudasi Isikarioti, vo Jisu o saiqorivo ala.
Jisu ko soroemo sea toni omuqa apositolo madu iruruputole
(Maka 6:7-13; Luke 9:1-6)
5Ni vo Jisu ta o soroemake sea toni omuqa apositolo madu komia bazu sate ni vota eri kiolake, “Meta pui me ziovou se pui Jiu amu kasi ni pui me ziovou Sameria mu ko peuru poso kale. 6Melai meta me ziovou Izireli mu kasi, ako seta mumamuma kama sipi poso sole. 7Ni meta me bazubazutou ni eri kimevou, ‘Vo Baṉara ko lekasa puo ta sipole kota barolou!’ 8So sole meta me urikimou seke verepani ni me jaevimou se voumu, ni me urikimou se pokupoku amu ni meta mema rerikou ko ziolo poso. Ni meta me ṉeamukani mela koa tauvezato utuakoi, so sole meta mata katimomo se koa tauvezato utuakoi. 9Ni meta pui me borikou kama takula meko kukulu kale. 10Ni pui me borikou ko vesa ni pui me borikou omuqa sabosabo ni meta pui me borikou ko buti ni daṉa meko talio kale. Ako vo iruruputo ko maba inio ke kativou sole vo oka zariovo ama quli.
11“Ni so keru meme barolou keru matuma peuru kale ma silo ama peuru kale, meta me amaqeovou sai ni me vailivou kala vo o mela zariovo ala baroekimelo me, ni meta me elou sai vokasi, ti kobeta barolou so keru meme vaekou ni me vatutou koa zaekale azo. 12Ni so keru meme amaqeovou keru koa pade kale, meta eri kimevou, ‘Vo Baṉara ko bule ta ko elou me tana,’ kimevou. 13Ni koa pade kale ama maba poso seke bulemuani ke elou ta meko bule sama pesio ta komai loilou, melai pui soamu ke elou ta kota ko melai vaitou me ṉavi. 14Ni kake maba poso ni peuru poso ta pui ke melai zariovou ni pui ke didiemelou, ti meta me vaekou koa zae, ni me bapazikou meko kiti kale ama pari, tu ko mamola pueko seta pui Baṉara ko madu inio. 15Aṉata a bazuemela me, koa matuma ṉaniu titizato ko kale ta vo Baṉara ta o matu koqotaekou koa peuru kokai paloasou Sodomo ni Qomora peuru kale amu ke kovo ama koqotato.
Ko kilo ama koqotato
(Maka 13:9-13; Luke 21:12-17)
16“Meta didielomo! Aṉata a joroemela me omadeuvo sipi jaria mela piru ama ni kade ama biaṉabiaṉa ko tiania. So sole meta balauvomo ni ibuibumu emo meko saevo kale sekasi. 17So inio meta me balauvou, ako kake maba poso ta ke melati ziovou sole me titizikinio kale, ni ke pazomelou seko ilusato ko pade kale. 18Aṉako luluelo ko kio kale sole meta ke melati ziovou titizimelole qavuna madu kasi ni aikovakova poso kasi, tu meqai bazutou vo Baṉara ko Uri ama Bazu sekasi ni se pui Jiu ama maba poso kasi. 19Ni so keru seke melati ziovou keru me titizikinio kale, meta pui tiṉoliṉoli meqai elou ko noi nio me kimevo avo kio seke melai kuirikani me ko ruqe kasi. Melai so keru ko barolou keru meko pesio ko taku inio kota ko puariziovou mekasi ko quli me meqai pesiovo ama. 20Ako ko quli ko meme qaseko ama ta pui me ṉaviko pesio kio sole, melai kota mevo Mama ko Auvana ko pesio meko kora kale.
21“So keru inio kaka poso ta ke luavimou seko visi poso aṉa ke tuvevo puelani tu ke titiziovou ni seko kana madu ta ke vouvaemou, ni se mama kamu melai ke luavimou seko meqora poso aṉa ke tuvevo puelani tu se melai ke vouvaemou, ni se meqora poso ta ke kanaemou seko niania ni mama poso aṉa ke tuvevo puelani tu se melai ke vouvou, 22kiadama maba poso ta ke melai kaikuapou, ako meta aṉa me luluelani mela sole. Melai vo o pizato ala, ti obeta barolo ala koa taku ko paitopaito kale, vo inio o pakiovou. 23Ni seke melai kaikuapou keru me matu peuru kale, meta me joqoilou mata kala zavaṉa kale. Tuvevo avole aṉata a bazuemela me, puliako okotiko meko iruruputo kiadama Izireli matu peuru poso kale inio aṉa maba a eveni lala ta ada vaitou.
24“Puliala o sikuluputani inio raura kala vovo nianiiekato ko maba kasi azo. Ni puliala nabulu inio raura kala vovo lekasa kasi azo. 25So sole vo o sikuluputani ta ota zoleilou, ruqe ke ivou ma uri kebe ivou melai, omadeuvo vovo nianiiekato ko maba ke ivani jari, ni vo nabulu ta ota zoleilou, ruqe ke ivou melai, omadeuvo vovo lekasa ke ivani jari. Sea maba poso se kelai kaikuapani aṉa inio kelai nokaeka aṉa Setani aṉa mevo odikato ko maba lala, sole me aṉako maba poso mela ta ke melai kuirikou matu ruqe ama ṉi meko kana madu.
Vo meda va ṉalo ala
(Luke 12:2-7)
26“Meta pui meda ma ṉalou sea maba poso. Ako kiadama quli ko mutamuta kama quli ta kasa ko elou sole, ni ko quli ko pui ko puratako ta ko puratou sole. 27Ko quli ko aṉa a melai bazuekako me moiza kalo kale ta me dova kasekou padopadoilo kale. Ni meme viqako quli vazavazao kale ta meqai velavelaovou ubutiania. 28Meta pui meda ma ṉalou seke vouvaeko amu meko tupu, ako seta pui kepa roveovou vouvaeko sole meko auvana. Melai meta meda va ṉalou vo Baṉara vo o bokaovani vouvaeko koa omuqa quli, tupu ni auvana heli kale. 29Omuqa pitikole ko tatabara ta matu zara. Melai mevo aukale ala Mama pui o zariekou, ta puliala kala pado pitikole inio opa vouvou. 30Ni meko tou meko lezu topi ama ta lula o ataeke muli vo Baṉara. 31So sole meta pui me ṉalou, ako meta matu qulepoa mela sole kubo pitikole azo vo Baṉara ko vilu kasa sole!”
Vai bazubazuemo maba poso ma vai zolio vo Karisito
(Luke 12:8-9)
32Ni Jisu ta mata eri kiolake, “Aṉata a bazuemela me, vo o bazubazuemo ala se maba madu ko vota aṉavo inio, aṉa melai a bazuevou aṉavo aukale ala Mama ta vota aṉavo inio. 33Melai vo olai zoliovo ala ni olai keduvo ala aṉa maba poso ko ubutiania ta aṉa melai avai keduvou vo aṉavo aukale ala Mama ko tanama kale.
Bule ni pazokinio
(Luke 12:51-53; 14:26-27)
34“Meta pui me qerukeruekou ta aṉata a queva katikole ko bule komia peuru ma peuru. Pui! Aṉata pui a qati kueva ko bule, melai aṉata a qati kueva ko pazokinio. 35Aṉata a queva tu saidi poso ta ke zolizoliekiniou, lasive meqora poso ta ke kanaekimou seko mama poso, ni reko meqora poso ta ke kanaekimou seko niania poso, ni se niania ravaza poso ta ke kanaekimou seko reko meqora ravaza poso, ni se reko meqora ravaza poso ta ke kanaekimou seko niania ravaza poso, ako kake sea saidi kale ta tuvevo ke ilou aṉa, melai kake sea saidi kale ta pui tuvevo ke ilo amu aṉa sole. 36Vo maba ko matuma kana ko eloa koi ta o ṉaviko saidi kale.
37“Ni kala ta o matu roquekou voko mama ni niania ni kobe kai paloasou aṉako roquelo, ta pui o male tu aṉavo disaipeli elo. Ni kala ta o matu roquemou voko meqora poso ni kobe kai paloasou aṉako roquelo, ta pui o male tu aṉavo disaipeli elo. 38Ni vo pui oka zariovo ala tolailo aṉako luluelo kale omadeuvo vo maba vo o borikani o ṉaviko korosi vo okai vouvo ama, vota pui o maleizika aṉavo disaipeli elo. 39Vo o madoekani tu pakieko o ṉaviko saevo ta vota o niumaeka inio voko saevo tovama saevo kale ama. Melai vo o ṉamuko ala voko tupu kale ama saevo aṉako luluelo kale ta o kovou noqola kama saevo.
Lotu maba ko reketekete
(Maka 9:41)
40“Vo o baroekimelo ala me ta o baroekila inio aṉa jari. Ni vo o baroekilo ala aṉa, ta o baroekiva inio vo o soroeleni aṉa. 41Ni vo o baroekivo ala vo Baṉara vo bazubazuto ko maba, voa bazubazuto ko maba ko vai nabulupute vo Baṉara ko kio kale avo, ta o zomanou kovo voa Baṉara vo nabulu ko reketekete. Ni vo o baroekivo ala kala sidopu ala maba, voa maba ko sidopu elo ko kio kale avo, ta o zomanou kovo voa sidopu ala maba ko reketekete. 42Meta uria kai nianiimo komi quli, vo o kativo ala kama kapa saroro ju pala kala zara kala, ako vota aṉavo lulupato ko maba sole, ta vo Baṉara inio reketekete saṉa o ivou voa maba,” kiolake vo Jisu.
Цяпер абрана:
Matiu 10: BLBNT
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
The New Testament in the Bilua language, Solomon Islands © The Bible Society of the South Pacific, 1995.