Lukase 14
14
Yěsô gÿǒ tsɔ̌ ngùɔ zeŋe lyɛ’ɛ́ nzsè pà Yuda
1Á gwɔ́ tsɔ́ *lyɛ’ɛ́ nzsè pà Yuda, Yěsô gʉa mbʉ̀a tsɔ̌ tá ndá pà *farisay léjÿó mmó. Epʉ̀a pie é laa wó ne ńdeŋe yé leŋ, 2ńgwɔ́ gwɔ́ tsɔ̌ nyìŋ tyé mvfò yé, mbà kwɔ́’te lěen ńgwoon yé. 3Yěsô zɛ́te pà *farisay pâ pàkyàgte mbʉ̌ Ssé pie é laa ndá ngie: Áa nà *lepʉ̌ ségè pé’e, ńgwáa ngwe mé gÿo nyìŋ zeŋe lyɛ’ɛ́ nzsè yégè kà ngǎŋ? 4Tá pɔ́ pú tè tsɔ́b, Yěsô kíbe ngùɔ ŋwɛ́, ńgÿo á zéŋe, ńtsẅi á gʉa. 5Á zɛ́te wɔ́b ngie, awɔ̌ aa tsetsɛ̀ɛ pi pɛ́’ɛ̀ ńgwɔ́ gie míŋ we kà foŋ we wɔ́ lɔɔn ńgwe tsɛ̀ɛ ntse ntǔŋ lyɛ’ɛ́ nzsè yégè, á nyé té sẅɛte fóo tsɛ̀ɛ wó ńkẅile yé? 6Á cʉa wɔ́b, pɔ́ zága pÿɛ.
E Ssé zẅǐŋ pɔ́ nò nyìŋ gẅie à nǎ nnɛ́ ssé
7Yěsô gyá pá’ pʉ̀a pie mé ně ńtóŋo wɔ́b ne ńkúu ndá, éfa’a pɔ́ jʉ’ ye melÿò tá ńnéŋe, ésaga mbwo pɔ́b ngie: 8Nyìŋ lá’ ńtóŋo ɔ́ jʉ’e línɔ́ɔn lɔ́ɔn ndá, ɔ̀ kúu wó, ɔ̀ pɔ́ɔn léfa’ pɔ́ léńnéŋe nà jʉ’ ye melÿò, ḿbɔ́gɔ tsɔ̌ nyìŋ gẅie à cʉa ɔ́ lépiŋ ńtó nzèm. 9Ngàŋ ndá gẅie à toŋó línɔ́ɔn leen ńtó ńgɔɔn né gù ngie: Lu ssé, andÿò wɔɔn ńnéŋe, mbà shʉ́ ge kú ɔ́ légʉa ńnéŋe nzèm. 10Áa yɛ̌ ŋwɛ́ tá ńgwɔ́ gie nyìŋ lá’ ńtóŋo gú nà línɔ́ɔn, ɔ̀ tó ńnéŋe jú pɔ́ nzèm. Ɔ̀ ńnéŋe jʉ’ó, nyìŋ gẅie à ně ńtóŋo ɔ́ kúu ndá, ńgyá ɔ̀ gwɔ́ nzèm, á gɔɔn né gù ngie: Ashǔ wɔ̀ɔn, tó lê mvfò, mbà à lɔgɔ ńkwé’e nzẅìŋ ɔ́ mvfò pʉ̀a metsèm pie pi lâ pɔ̌ ee ndá. 11Áa pú’u, tá ńgwɔ́ gie nyìŋ lɔɔn ńŋá’te nnɛ́, mbà Ssé ge sẅé’e yé náa ssé, ésẅé’e mbùm ye ńnáa ssé, mbà Ssé ge pʉ’ʉ yé tÿɔ́g tÿɔ́g.
Á poŋ mé tóŋ mepóŋ yɔ́b nà línɔ́ɔn
12Yěsô gíŋe ńgɔɔn mbwo nyìŋ gẅie à ně ńtóŋo yé ngie: Ɔ̀ lá’ ne ńtóŋo línɔ́ɔn, fʉ̀’e zsǒ kà ncwò nzém wɔ́, tè tóŋ meshǔ pú, kà mefɛ́ pú wɔ́, kà pʉ̀a nà tsìŋe ndá gí wɔ́, kà megàŋ nkwɔ’ɔ́ mbʉ̀a pú pie ée megàŋ nkáb wɔ́, á nue pɔ́ ge gÿo gíŋe tóŋo gú jú, é lɔg tsɔ́’ shʉ́’ gú. 13Ɔ̀ la’ ne ńtóŋo línɔ́ɔn, ɔ̀ tóŋ pàtèmmó, ńtóŋ menkÿǒon, ńtóŋ pànkème kwò, ńtóŋ pàfʉ̀ menÿɔ́g. 14Ɔ̀ gÿo pú’u, mbà ɔɔ shÿó mbòŋo, mélà’mie à lɔɔn ńgwɔ́ pɔ́ le tsɔ́’ shʉ́’ gú wɔ́, pú’u, e Ssé lá’ ńtsɔ́’ɔ fà’ ɔ́, á fʉ̀’ gie pʉ̀a pé ge lá’ zíme nà legwé.
Esagá nò ná pá’ línɔ́ɔn ye Ssé ge lá’ gwɔ́ pú’u
(Matio 22.1-10)
15Mé jú’u yɔɔn shwóŋè tà tsɔ̌ nyìŋ gẅie pâ pɔ̌ la ńnéŋe ssé ńně ńjÿó mmó gɔɔn mbwo Yěsô ngie: Ashÿó mbòŋo aa nyìŋ gẅie à ge lá’ jÿó yé mmó tsɛ̀ɛ ngwòŋ Ssé! 16Yěsô tsɔ́’ɔ mbwo yé ngie: Tsɔ̌ nyìŋ lǎ’ ńtáŋte máamáa línɔ́ɔn, ńtsẅii mbwo pʉ̀a tà ńgyɔ́ɔn. 17Afʉ̀’e léjÿó shúm gÿo ńku’, á túmo ménkʉ́ we ngie à gʉa ńtóŋo wɔ́b ngie pɔ́ leen ńké ńtó fʉ̀’ɔɔn. 18Tá’, pɔ́ metsèm pú fa’ ndiletáŋ lélɔg ńtsó línɔ́ɔn. Amvɔ́g mvfò gɔɔn ngie: Mèŋ, n ka jú nká’, á poŋ n gʉa ńgyá, tsétsɔ́’, shwóŋó yé ngie n tè tó wɔ́. 19Atsɔ̌ gɔɔn ngie: N ka jú mefòŋ legém lélɔg fa’a fà’, mèŋ n ně fa’a légʉa ńzẅí’ ńgyá, tsétsɔ’ gɔɔn ngie à pɔ́ɔn lé la’a wɔ̀ɔn. 20Wetsɔ̌ ye: Mèŋ, n ka nyě ńzɔ́’ɔ, ńgwɔ́ n de tó.
21Ménkʉ́ wá piŋ nzèm, éshwóŋó tá we pá’ pɔ́ gɔ̌ɔn, á pú ńgyáŋa yé tɛ’, á gíŋe ńtúmo ménkʉ́ ŋwɛ́, ńgɔɔn né yé ngie: Kÿote lêtʉ̀, ńgʉa tÿǒsoŋ ńtyé metwó nzsè, ńgiŋe nà melyěen nzsè, ńtóŋ pàtèmmó, ńtóŋ menkÿǒon, mbɔɔ mefʉ̀ menÿɔ́g pâ pànkème nkwò pia pɔ́ tó. 22Á gʉa tà ḿbiŋ, ńgɔɔn né tá we ngie: Andè, mèŋ, m bǔ ńgÿo mmó gie ɔ̀ ně ńtsẅi, n něŋ pʉ̀a ndá tá’, ajʉ’ nyé pɔ́ wó. 23Tá we jú’ ńgɔɔn né yé ngie: Gʉa metwó nzsè fʉ̀’ɔɔn, mbɔɔ nà melyěen nzsè tsɛ̀ɛ mbʉ̀a, wɛ̌ nyìŋ wɔ́ gẅie ɔ̀ gyǎ, ɔ̀ lɔg tʉ̀, ńtóŋo yé ngie à tó, ńnéŋe wɔ́b tà ndá yɔɔn lúe. 24Zsé mboŋó ngie, ńgwɔ́ tsɔ̌ tà’ ná pʉ̀a pie n ka vɔg ńtsẅii mbwo pɔ́b la, à lɔɔn ńgwɔ́ á le mmó léjÿó yɔ́ɔn zẅí’.
Á poŋ ngie ngàŋa kwò Yěsô gwá’a kɔ̀ɔkɔ́ɔ wɔ́, ńcʉ́me nzèm yé
25Yěsô gwɔ́ lyɛ̌’, ńcʉ́me mánzsé ńne ńgiŋe, pʉ̀a tà ńgyɔ́ɔn gwɔ́ nzèm yé, á kúu tsɔ́ jʉ’, ésele nnɛ́ ńgɔɔn né pɔ́b ngie: 26Nyìŋ lɔɔn ńcʉ́me nzèm mèŋ, à tè kwoŋo wɔ̀ɔn ńcʉa tá we, ńcʉa má we, ńcʉa nzwě we, ńcʉa pènkʉ́ pé, ńcʉa mefɛ́ pé pe mbàŋa mbɔɔ pe pànzwě, ńcʉa mbɔɔ kwà’ twó mbùm yé wɔ́, mbà à tè ku’u légwɔ́ *ngàŋa kwò wɔ̀ɔn mɔ́. 27Nyìŋ lɔɔn tè kaa yé tÿǒ nkǐ ńdɔgɔ ńzẅíŋe lékwé, tá ńcʉ́me nzèm mèŋ wɔ́, mbà ńgwɔ́ á le ku’u légwɔ́ *ngàŋa kwò wɔ̀ɔn mɔ́.
28Nyìŋ gẅi lɔɔn ne ńgee ńkwɛ́ máa ndá, mbà à ge zɔɔn ńnéŋe ssé kwaŋte shúm fà’, é zsé nzẅìŋ nkáb gie ńgwɔ́ á lɔg ńkwɛ́ tà ńgyá é ku’u ná ye, 29ḿbɔ́gɔ lénuŋe cÿó, ndá ńcʉa yé. Mé lá’a ńzɔ́gɔ ńgyá ńgẅe yé ngie: 30Gyá pá’ tsɔ̌ nyìŋ wá la zye ndá, à tè ku’u lémege wɔ́.
31Kà pɔ́ fùɔ túm gẅie à ne ńcwoŋte mbùm ye légʉa ńdÿɔ́’ɔ wetsɔ̌ fùɔ túm gẅie à kěm ncù wɔ́, mbà à ge sáŋ pé pʉ̀a gyá ngie kà à lɔɔn ńgwɔ́ á lɔg pʉ̀a ntsá’ legém, ńgʉa ńdÿɔ́’ɔ wetsɔ̌ fùɔ gẅie à ne ńdɔgɔ pʉ̀a ntsá’ móm mbʉ́a ńtóo wɔ́? 32À lɔɔn ńgyá, epé pʉ̀a kɔ́g, mbà fùɔ gẅie à ne ńdɔgɔ ncù ńtóo ge nyé pɔ́ ngʉ̀a shʉ̀shʉ̀a, à túmo mamekěm, à gʉa sẅíŋte yé ngie à shwóŋó yé mmó gie à lɔɔn ńgwɔ́ á ná tá ńgẅiin sẅétè. 33Yěsô ma’a twó ngie: Áa ndʉŋ ndʉŋ pú’u, nyìŋ lɔɔn ńgwɔ́ tsetsɛ̀ɛ pi, à tè vɔg ńnyé shúm sie à gẅiin wɔ́, mbà à tè ku’u légwɔ́ *ngàŋa kwò wɔ̀ɔn mɔ́.
Tà ngàŋa kwò Yěsô cʉ́’ʉ lebe ngwáŋ
(Malékuse 9.50)
34Ngwáŋ ée mmó mbòŋo, tá ńgwɔ́ gie é lɔɔn ńcʉ́’ ńdebe lebe, mbà à lɔɔn ńgwɔ́ mé gÿo lêkɔ́ tà é gíŋe ńdʉm? 35Mɛ̌ ngwáŋ ńgwɔ́ é ke le tsetsá’ kẅéte, à lɔɔn ńgwɔ́ mé le lɔg ńgÿo kʉ̀ŋe wɔ́, mé ŋwa ḿma’a pǐ. Nyìŋ lɔɔn ńgẅiin metwoŋó lélɔg ńjú’u nò, á jú’.
Цяпер абрана:
Lukase 14: NGBM
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Nouveau Testament en Ngienboum © Alliance Biblique du Cameroun, 2007.