Lukasə 14
14
Yeso a Tsóʼə Ngoonə́
1A nə ḿbə́ alě aláʼ Əsê yitsə̌, Yeso a ghɛnə̂ a mə́ jî nə́ məjîə a ndɛ̂ nətû nə́ Falasi yi nə tsə́, pɨ pə́ pyádnə ńdɔg ndɛd ńtíʼə ńnáŋə yi nə́ anu páʼ a yǐ nə́ ghɛlə̂. 2Ŋwu tsə́ páʼ mbô mí pópə məko mí mə́ nə́ ńkɔ́ʼkə nə́ a yǐəə á mbi Yeso, 3Yeso a pítə ngaŋə́zéʼkə pənoŋkə pópə Pəfalasi ńgə́, “noŋkə əwɛnə̂ a pí ńgə́ mbɔʼ pə́ tsóʼə ŋwunə alě aláʼə əsê kɨ wə́ələ́ a kǐə?”
4Pó kě yí kwíʼnə ńkwěe pô. Yeso a lɔgə̂ ŋwu wə̂ ńtíʼ ńtsóʼə yí ńgɛlə̂ a ghɛnə̂ yə́. 5A tíʼ ḿbítə ághɔ́b ńgə́, “Mbɔʼ mɔ́ ŋwu əwɨ yitsə̌, kɨ ləəmə́ əyǐə a wǔəə á mə́mə atéemə alěláʼsê, a kě tsɔʼə əghâ yi wɨ́ yǐ fóg?”
6Lə́ pó kě akwe yə ndaʼ kwéʼnə ńtúg pô.
Mə Tsóokə nə́ Mbɨ pópə mə Lɔg nə́ Ngaŋnə́ghéenə á Ndɛ̂
7Yeso a zɨ́ ndzaŋə ándó ngaŋnə́ghá zə́ yitsə́ ə́ náŋ nə́ pə́ əkɔʼ pi əshîʼnə a mə́ náanə nə́ ághɔ́b wə́, a tíʼ ńtséebə atséebə́nə́múʼ zəənə́ á mbô pó ńgə́: 8Təmbɔʼ ŋwunə a wúnə gho nə́ ndzɔʼə́ əyí, gho yǐ kɔ gho náanə nə́ alíʼ yə əshîʼnə. Əghâ tsə́ pə́ nə ńkə́ ńgwúnə ŋwu páʼ a tsɛ nə́ gho ə́wə́. 9Ŋwu páʼ a wú nə́ áwɨ́ pətsəm lə́ a yǐ sóŋ nə́ gho ńgə́, “fɛ̂ akɔʼə azô á mbô ŋwu nə́.” Lə́, gho yǐ twá əsə́ənə ə́ tíʼ náanə chigə nə́ mɔ́kə́nyaŋə́ akɔʼə. 10Lə́ mbɔʼ pə́ wúnə gho, gho yǐ gho náanə chigə nə́ mɔ́ kə́nyaŋə́ akɔʼ ńjî ńgə́ ngaŋndzɔʼə́ a yǐ ńgyǐ ə́sóŋ nə́ gho ńgə́ “əshunə́ mə, lǒo əsê ńkɔ́ʼ ńgyǐ ńnáanə nə́ akɔʼ yə əshîʼnə.” Zəənə́ á yǐ yǐ nə́ ngóʼkə á mbô gho a mbi apuʼə ŋwu ntsəm páʼ pə́ pěʼ nə́ ńgwúnə. 11Ńté ńgə́ ŋwu ntsəm páʼ ä kɔ́ʼkə nə́ mbɨ əjǐ pə́ yǐ ə́ tsóokə yə́; ŋwu ntsəm páʼ a tsóokə nə́ mbɨ əjǐ pə́ yǒ kɔ́ʼkə yə́.
12Yeso a tíʼ ə́sóŋə a mbô ngaŋnchîndɛ̂ wə̂ ńgə́, “Təmbɔʼ gho wú pɨ ńgə́ pó yǐ ńjî əpúmə a ngyaʼə́ gho, a ntɨ̌numnə kəənə nkwanə́, kɔ gho wúnə pə́ pəshu pô kɨ pɔ́pə́mɛ́ pô kɨ pəlim pô kɨ ngǎŋnkáb ə́ pə́ nə́ ngaŋnə́pad əzô ńté ńgə́ pó yǒ kə́ wúnə azô aliʼə́, a tíʼ ḿbə́ ńgə́ pə́ tûə gho nə́ anu gho nə ńkə́ nə́ ə́faʼ lə̂. 13Təmbɔʼ gho wú pɨ ńgə́ pó yǐ ńjî əpú, wú pəfə́m pópə kɔ́ŋə́sê nə́ pəkə́neʼə́ntéemə, nə́ pəfəgə́; 14ńjî ńgə́ gho túg mbwɔ́dnə, ndzaŋ pó kě nə́ chî təmbɔʼ pó tûə gho pó lə́, ntsɔ́ʼəfaʼ əzo ə́ yǒ fɛ́lə á mbô Əsê alě pɨ pə́ tɨ́ nə́ ndə̌ŋdəŋ pə́ lǒ nə́ júmnə á nəwûə.”
Atséebə́nə́múʼ ńté Tə́kɔʼə Alě Ajíəpúmə
(Mat 22.1-10)
15Táʼ ŋwunə ándó pópə Yeso nə ńtə́ nə́ ńjîə məjîə a zóʼə anu yə wɨ ńtíʼ ə́sóŋ nə́ yí ńgə́, “Mbwɔ́dnə ə́ chîə a mbô ŋwu páʼ a yǒ nə́ jî əpúmə á mə́mə Anuə Nəfoonə Əsê!” 16Yeso a sóŋə á mbô yí ńgə́, “Ŋwu tsə́ a kə láʼ ńchî ə́wɨ́ páʼ a kə tə́ nə́ ńtyáŋtə əliʼ ńté tə́kɔʼə alě ajíəpú yətsə́ ńgwú pɨ tə pə́ nə́ənə. 17Ndɛlə́ ajíəpú ə́ nə ḿbɛn ńkoʼ, a tú ngaŋə́faʼ əjî ńgə́ pó ghɛn ə́sóŋ nə́ ŋwu ntsəm páʼ a nə́ ńgwú nə́ yí ńgə́, pó yǐəə, ajúmə atsəmə a koʼə̂! 18Pó pətsəm chúʼ táʼ táʼə á mə́ póʼ nə́ mbô ńgə́ pó kě yǐ yǐ pô. Ntsɛɛmbi ŋwunə a sóŋə a mbô ngaŋəfaʼ ŋwu wə̂ ńgə́, Maŋ júnə aliʼə́ ndəsê yətsə́ tsɔʼə əghâ nə́, maŋ yǐ ghɛn ńnáŋə zə́ələ́, maŋ póʼmbô ńgə́ maŋ kě yǐ yǐ pô. 19Yitsə́ ŋwunə a pɨ ə́sóŋ ńgə́, ‘Maŋ jú məna mə́ alíʼə́líʼə mimə tsə́ mɛ́n nəghə́m tsɔʼə əghâ nə́, maŋ lɔgə̂ lɛ̌ ághɔ́b ńgɛnə̂ á mə́ jwə́ʼ nə́, maŋ póʼmbô, maŋ kě yǐ yǐ pô.’ 20Yitsə́ ŋwunə a pɨ ńkə́ ə́sóŋ ńgə́, Maŋ zɔ́ʼ tsɔʼə əghâ nə, lə́ ghɛd ə́lɨ́d maŋ kě chî təmbɔʼ maŋ yǐ pô.”
21“Ngaŋəfaʼ wə́ a kwə̂ fiʼtə̂ anuə atsəmə á mbô tǎ afaʼ əyǐə. Tǎ afaʼ əyǐ wə́ a záŋ ndě lɛ̌ tətə ńtíʼ ə́sóŋ nə́ ngaŋəfaʼ əyǐ wə́ ńgə́, Ghə́glə nə́ mətɨ ńgɛn nə́ əlaŋə́ məkálə́ pópə məshwáŋ mə́ ndúmə á mə́m aláʼə, ńdɔg pəpóŋ, pópə pəkɔ́ŋə́sê, nə pəfəg ḿbá pə kə́neʼə́ntá ńgyǐ nə́ pó.”
22“Ngaŋəfaʼ əyǐ wə́ a sóŋ ńgə́, Tǎ, anu páʼ gho sóŋ nə́ lə́ pə́ pɛ́dtə ə́faʼə̂, lə́ aliʼə́ pə́ ḿbɛ́lə.”
23“Tǎ afaʼ wə́ a tíʼ ə́sóŋə á mbô ngaŋəfaʼ əyǐ wə́ ńgə́ ‘Ghɛn nə́ alaŋə́ndú pópə pəfyaalə́, ńgɛd pɨ pə́ yikə̂ ńjî ńgə́ ndɛ̂ mə́ ə́ lwɛ́nkə. 24Mäŋ fiʼtə̂ áwɨ́ ńgə́ pɨ pə́ tsɔʼə pətsəm páʼ maŋ kə peg nə́ ńgwú lə́, yitsə̌ a kě yǐ jwə́ʼə ajúmə á aliʼə́jíəpú maŋ pô.’ ”
Ndzaŋə á Tyantə̂ nə́ á mə pə́ nə́ Ndzoŋdzəm Yeso
(Mat 10.37, 38)
25Yeso a kə láʼ ńtə́ ńnyinə̂ pópə apoŋə ŋwuməsɔŋ yitsə́, ńtíʼ ə́sɛdnə̂ ə́sóŋ nə́ pó ńgə́, 26“Mbɔʼ ŋwu ntsəmə a tə́ nə́ ńdoonə̂ mə́ zoŋ nə́ mə a shib ḿbeenə̂ tǎ əyǐ pó mǎ əyǐ, nə́ ngwě əyǐ pópə pɔ́ pí ḿbá pəlim pí pi pə́ mbyâŋnə pó pi pə́ pəngyě, ńkə́ ḿbá əjǐ mbəəmə. Tə ńchî ə́lɨ́d pô, a kě koʼə̂ mə́ pə́ nə́ ndzoŋdzəmə mə pô. 27Ŋwu ntsəm ntsəm páʼ a kě nə́ chî təmbɔʼ a twáamə atǐə apagləpaglə ají ńdzoŋə̂ mə pô, mbɔʼ a kě pə́ ndzoŋdzəmə mə pô.”
28“Mbɔʼ táʼ ŋwu əwɨ yitsə̌ a tə́ ńdoonə̂ mə́ pɔ́ nə́ ndɛ̂, a peg ńnáanə a ndəsê ńkwaŋ ndɛn əpú páʼ pɨ́d yǐ nə́ kwú nə́ ndɛ̂ yi wə́ a mə jɨ́ nə́ ńgə́ a lɛ ńtúg nkáb ə́ koʼ təmbɔʼ a məgə̂ afaʼ yə wɨ́ ə́wə́. 29Ńchî ə́lɨ́d pô, nkáb əjǐ yǐ měe yí tsɔʼə nə́ achîəndɛ̂, pə́ tíʼə ńdaŋə̂ ńdeŋnə̂ yí,” 30ə́sóŋə ńgə́, ŋwu nə́ a nə ńchúʼ ndɛ̂ ḿbə́ ńkě chî təmbɔʼ a məg pô. 31“Kɨ təmbɔʼ əfo yitsə̌ a ghə́ a yǐ ghɛn lə́ʼ ntso pó yitsə̌ əfo, a kě peg ńnáanə a ndəsê ńkwaŋ ńgə́ a túg pəsoye tɔsə nəghə́m, tə pó tyantə̂ ndzaŋ mbɔʼ pó póʼnə pópə yitsə̌ əfo wə́ páʼ a túg nə pəsoye tɔsə məghə́m mɛ́n mbɛ̌ lə́? 32Mbɔʼ a jɨ́ ńgə́ a chúbnə, ḿbə́ a yǐ tú pəənə á mbô yitsə̌ əfo wə́ tsɔʼə páʼ a pɛ́d nə́ ndi yi sɛ ńgə́ pó yí pímnə. 33Lə́ələ́ pə́ ńgə́ mbɔʼ ŋwunə a kě pə́ ndzoŋdzəmə mə tə ghə́ a myaʼə̂ ajúmə atsəm ńté mə pô.”
34“Ngwáŋ mə́ pɔŋə̂, lə́ mbɔʼ mə́ chî pɨ pɛ́lə ləəmə̂ pô, gho ghɛd ə́lɛ́ ə́wɨ́ mə́ pɔŋə̂ pɨ ləəmə̂? 35Mə́ kě nə́ anu yətsə́ pɨ ńchî pô, kəənə á mə́ kwɛd nə́ ndəsê kəənə á ndumə akwɛlə manyɔ̂, pə́ yǐ myaʼə̂ mə́ələ́. Ŋwu páʼ a túg nə́ mətôglə á mə́ zóʼ nə́, a zóʼə.”
Цяпер абрана:
Lukasə 14: azo
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце