Lukasə 15
15
Mbéŋ Ndzɛd Páʼ ə́ Péŋ nə́
(Mat 18.12-14)
1Á nə ḿbə́ alě tsə́ ngaŋə́kwáalə́ nchubə aláʼ pópə ngaŋə́ghɛlə təpɔŋ ə́ tíʼə ńgyǐəə á mə́ jwə́ʼtə nə́ atséebə Yeso. 2Lə́ Pəfalasi pópə ngaŋə́zéʼkə pənoŋkə ə́ chúʼə á mə́ ŋwuntə̂ nə́ ə́sóŋə ńgə́, “Ŋwu nə́ a lɔg ngaŋə́ghɛlə təpɔŋ əshîʼnə ńtíʼə ńkə́ ńjîə məjî pó po! 3Yeso a tíʼ fiʼtə̂ ághɔ́b nə́ atséebə́nə́múʼ zəənə́.”
4Mbɔʼ ŋwu əwɨ yitsə̌ a túg məmbéŋ mə́ ndzɛd táʼ nkɛd, táʼə á yǐ ḿbéŋə á mə́m ə́wɨ́ a ghɛd ə́lɛ́? A kě mɛdtə̂ apuʼ zə́ məghə́m nəpuʼə́ nə́ mɛ́n nəpuʼə́ á ndu kɔŋ ńgɛn ńchwaalə̂ táʼ wə̂ páʼ á péŋ nə́ lə́ tə ńdzə́ənə áwɨ́d? 5Mbɔʼ a zə́ənə áwɨ́d, mbɨ əjǐ ə́ pɔŋ lɛ tətətə a tíʼ ńtwáamə áwɨ́d ńnoŋkə̂ á mbeʼtə yí, 6Ńkwə̂ nə́ wə́ələ́. Ńtíʼ ə́fóŋ pəghɨ pí pópə ngaŋ məpad ə́sóŋə á mbô pó ńgə́, “Pɛn kɔŋtə̂ ńté ńgə́ maŋ jɨ́ mbéŋ ndzɛlə mə páʼ ə́ nə mbéŋ nə́. 7Mäŋ fiʼtə̂ áwɨ́ ńgə́ ndzaŋ mbɨ ŋwu wə̂ ə́ pɔŋ nə́ ńgə́ a jɨ́ mbéŋ ndzɛd əjǐ zə́ lə́, lə́ ndzaŋ páʼ akɔŋtə á yǐ nə́ kə́ chîə á nəpó té táʼ ngɛdtəpɔŋ páʼ a kwúblə nə́ ńtsɛ pɨ məghə́m nəpuʼə́ nə́ nəpuʼə́ páʼ pó kwaŋ nə́ ńgə́ pó ŋwaʼ ḿbɨ ńkě chî mbɔʼ pó kwúblə pô.”
Atséebə́nə́múʼ ńté Nkéebə Atəənə́ Páʼ ə́ Péŋ nə́
8“Kɨ pɛn lɔg ńgə́ məngyě yitsə̌ a túg nkéebə atəənə́ ntáʼ nəghə́mə, táʼə á péŋə á mə́m ə́wə́, A yǐ ghɛd ə́lɛ́? A yǐ chúʼ nkyaʼ, ə́zəg mbindɛ̂, ə́ lɔg ndɛd ńnáŋ əliʼ ətsəm tə ə́zə́ənə zə́ələ́. 9Ndzaŋ a jɨ́ nə́ ájɨ́d lə́, ə́fóŋ pəghɨ pí pópə ngaŋ məpad əjíə, aliʼə́ mɔʼə́ ńtíʼ ə́sóŋ nə́ pó ńgə́, ‘Pɛn kɔŋtə̂, maŋ jɨ́ nkéebə mə páʼ ə́ nə ḿbéŋ nə́!’ 10Maŋ lɔg ə́lɨ́d ə́fiʼtə̂ áwɨ́ ńgə́ pətseŋpə́ndɛ́pə́sê pə́ kɔŋtə̂ ńté táʼ ngɛdtəpɔŋ páʼə a kwúblə nə́.”
Atséebə́nə́múʼ ńté Mɔ́ páʼ a nə Ḿbéŋ nə́
11Yeso a ghɛn nə́ mbiə á mə́ sóŋ nə́ ńgə́, “Ŋwu tsə́ a nə ńdáʼ ńchî ə́wɨ́ ńtúg pɔ́ pí pə́ pɛ̌. 12Yi ńkoʼnə̂ nə́ a yǐ ə́sóŋ nə́ yí ńgə́, ‘Tǎ, fɛ̂ azéemə apeʼ nə́ maŋə.’ Ŋwu wə̂ a tíʼ ńgeebə̂ apeʼə ajíə á mbô pó. 13Əlě pətsə́ ə́ ghə́ laŋə̂ mɔ́ yi ńkoʼnə̂ nə́ wə̂ a finə̂ ajíə apeʼ zə̂ tsɔʼə atsəm ńdɔg nkáb ə́fɛ́lə yə́ aláʼ ńgɛnə̂ atú yi ndaʼ tə ndi ə́ sag ńtə́mə́sɛ́ nə́ zɨ́d, ńdɔg ńjî əpú mbî ə́wə́. 14A nə ńkə́ ńgə́ kɔ́d nkáb zə̂ tə məg, nji ə́ wǔəə á mə́mə aláʼ páʼ a kə chî nə́ ə́wɨ́ lə̂, ajûtsə́ á pə́ ńkě á mbô yí pɛ́d pô. 15A tíʼ ńgɛnə̂ á mə́ faʼ nə́ á mbô ŋwunə aláʼ wɨ́d wə̂ yitsə̌, a túmə yə́ akad pəkwúna yə́ ńgə́ a ghɛn ńtə́ ńdzə́gə pəkwúna píə. 16Nji nə ńdzáŋə yí tə a tíʼə ńdoonə̂ á mə́ jî nə́ mənta mə́ atǐ pə́ nə̈ ə́fɛ̂ nə́ nə́ pəkwúneemə, lə́ ŋwu tsə̌ a pə́ ńkě nə́ yí fɛ̂ pô. 17Əghâ əjî əyí ə́ nə ḿbɨ nə́ ḿbɨ lə́, a sóŋ ńgə́, Ngaŋə́faʼ tǎ mə tsɔʼə ətsəm ə́ túg məjî tə mə́ tsɛɛlə̂ ághóobə́ á mə́ jî nə́, maŋ pə́ ńchîə aliʼə́ nə́ ńtə́ ńkwû njiə. 18Maŋ yǐ lǒo á əsê pɨ pəənə̂ á mbô tǎ mə ə́sóŋ nə́ yí ńgə́, Tǎ, maŋ ghɛlə̂ təpɔŋə á mbô Əsê ńkə́ ńgɛlə̂ á mbô gho. 19Maŋ kě pɨ ńkoʼ mbɔʼ pə́ fóŋə mə nə́ mɔ́ əgho pô. Lɔgə̂ mə ándó táʼ ngaŋəfaʼ əgho yitsə̌.” 20A tíʼ ńdǒo á əsê ḿbəənə̂ á mbô tǎ əyǐə.
“A nə ḿbɛ́d tsɔʼə á ndi yi sɛ, tǎ əyǐə a zə́ənə yí ńkó mələ́ŋ míə, ńkə ńgɛn ńtégə mɔ́ yí wɨ́ ḿmaʼ mbô mí nə́ yí ńtíʼ ńchwegə̂ yə́. 21A tíʼ ə́sóŋ nə́ tǎ əyǐ ńgə́, ‘Maŋ ghɛlə̂ təpɔŋ á mbô Əsê ńkə́ ńgɛlə̂ á mbô gho. Maŋ kě pɨ ńkoʼ mbɔʼ pə́ fóŋə mə nə́ mɔ́ əgho pô.’ 22Lə́, tǎ əyǐə a pə́ ə́fóŋ ngaŋə́faʼ əjí ə́sóŋ ńgə́, Ghə́glə nə́! yǐ nə́ nə́ chigə atsəʼ yə əshîʼnə ḿmaʼə̂ á mbɨ yə́. Néŋ nə́ yílə á fîəpô yə́ ńkə́ ńgwê ngwubə á məko yə́. 23Ńtíʼ ńgyǐ nə́ tə́kɔʼ ndu na wə́ ńgwaalə̂ áwɨ́d pɛn ghɛd məjî ə́wɨ́ ńjî ńkɔŋtə̂. 24Ńté ńgə́ móonə mə ghɛnə́ a nə ńkwûə, a pɛn ḿbɨ ńjúmnə, a nə ḿbéŋə, pə pɛn ḿbɨ ńdzə́ənə yə́. Pó tíʼ ńchúʼə á mə́ kɔŋtə̂ nə́.”
25“Əghâ yi wɨ́ lə́, mɔ́ əyǐ yi ntəŋkaŋə́ a pə́ ńchîə yə́ afoonə. Ndzaŋə a kə kwə̂ nə́ tə ńtíʼə ḿbáatə nchîndɛ̂ lə̂, ńdzóʼ ndzaŋ pə̈ póʼ nə́ apɛ́n ḿbɛ́nə. 26A fóŋə táʼ ngaŋəfaʼ yitsə̌ ńtíʼ ḿbítə yí nə́ anu páʼ á laŋ nə́. 27A sóŋ nə́ yí ńgə́, ‘Ndim əgho a kwə̂ tə tǎ əwəənə́ a waalə̂ tə́kɔʼ ndú na wə̂ ńté ńgə́ a kwə̂ əshîʼnə tə alɔʼ yətsə́.’ 28Ntsɛɛmbi əyǐ wə̂ a záŋ ndě lɛ tətətə ńkǐəə yə́ á mə́ kwú nə́ á ndɛ̂. Tǎ əyǐə a fɛ́lə apeŋ ńtíʼ ḿbóʼmbô nə́ yí ńgə́ a kwúnə á ndɛ̂. 29A pə́ ńkwěe tǎ əyǐ ńgə́, ‘zə́ənə! Ndɛn məngoʼ ghɛn tsɔʼə ətsəm mäŋ faʼə̂ á mbô gho ándó apoʼə, ńdáʼ ńkě anu yətsə́ á mbô gho kǐ pô. Gho pɛ́dtə əfɛ̂ akə̂ á mbô maŋə? Kɛ́ tsɔʼə mɔ́ mbéŋ təmbɔʼ pə̂gpə ngaŋ məkoolə mə tɔ ńkɔ́d ńkɔŋtə̂! 30Lə́ mɔ́ əgho ghɛnə́ a nə ḿbɛn ńtə́mə́sɛ́ nə́ apeʼə azô tsɔʼə atsəmə á ndzəm əkwɛlə. A pɛn ńkwə̂ gho waalə̂ tə́kɔʼ ndú na wə̂ ńté yə́.’ 31Tǎ əyǐə a kwěe yí ńgə́, ‘Móonə mə, lə̈ chîə tsɔʼə pɔ̌ əghâ ətsəmə, ajúmə atsəm maŋ túg nə́ á pə́ azô. 32Pɛn pə́ ńchîə á mə́ jî nə́ ə́ kɔŋtə̂ ńté ńgə́ ndim əgho ghɛnə́ a nə ńkwûə, a pɛn mbɨ ńjúmnə, a nə ḿbéŋə, pə́ pɛn mbɨ ńdzə́ənə yə́.’ ”
Цяпер абрана:
Lukasə 15: azo
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце