Lukasə 16
16
Atséebə́nə́múʼ Ńté Ngaŋəfaʼ yi Ńgyáŋ nə́
1Yeso a sóŋə á mbô ngaŋə́zoŋə́ndzəm əjí ńgə́, “Ngaŋnkáb yitsə̌ a kə chî ə́wɨ́, atséebə á yǐ ńkwúnə á mbô yí ńgə́ ŋwu páʼə a náŋ nə́ apeʼə ajíə a tə́ ńtsəŋkə̂ nkáb əjǐə, 2A tíʼ ə́fóŋə yə́ á ndɛ̂ ḿbítə yí ńgə́, ‘Mäŋ zóʼə lɛ̌ akə̂ mənu ńté gho? Fɛ̂ əŋwaʼlə ətsəmə á mbô maŋ ndzaŋ gho kə̈ faʼ nə́ ńté ńgə́ mbɔʼ gho kě pɨ ḿbɛ́d ńgɛn nə́ mbiə á mə́ náŋ nə́ apeʼə mə pô.’ 3Ŋwu wə̂ a nə̈ náŋ nə́ apeʼ zə̂ lə́ a tíʼə ńdəmtə̂ á ngǎ yí ə́sóŋə ńgə́, ‘Tǎ afaʼ mə a yǐ fógə mə afaʼə. Nə́ əghâ nə́ maŋ yǐ tíʼ ghɛd lə́ ə́lɛ́? Maŋ kě mətɨ túg təmbɔʼ maŋ líʼə alíʼ pô, əshɨ́ ə́ pɨ ńtə́ ńkóolə mə á mə́ tə́ nə́ lɔ́nə. 4Əghâ nə́, maŋ jîə zóŋ páʼ maŋ yǐ nə́ ə́ tá ńjî ńgə́ mbɔʼ maŋ yǐ ə́fɛ́lə afaʼ maŋ pɛ́d ńtúg pɨ mbɔʼ pó lɔgə̂ mə əshîʼnə á məláʼ pô.’ 5A tíʼ ə́fóŋ ngaŋ məkyɛ́ tǎ afaʼ əyǐ tsɔʼə ətsəm. Ḿbítə ntsɛɛmbi ŋwu ńgə́, ‘Ghö waamə̂ tǎ afaʼ mə lə́ nə́ ə́lɛ́?’ 6A kwěe ńgə́, ‘Məŋkag mə́ məghɔ́d mə́ məzaŋ táʼ nkɛlə́.’ A tíʼ ə́sóŋ nə́ yí ńgə́, ‘Náanə á əsê ńtíʼ ŋ́ŋwaʼlə̂ pə́ məghə́m mɛ́n tênə, ghə́glə.’ 7A pɨ ńkə́ ḿbítə yitsə̌ ŋwu ńgə́, ‘Gho waamə̂ azô lə́ ə́lɛ́?’ A kwěe ńgə́, ‘apéenə məkálə́ yə ghɔʼ nə́ əpa nkɛlə́.’ A sóŋə mbô wɨ́d wə̂ ŋwu ńgə́, ‘Náanə á əsê ńtíʼ ŋ́ŋwaʼlə̂ pə́ məghə́m mɛ́n nəfeemə́.’ 8Tǎ afaʼ wə́ a pímtə anu páʼ ngaŋəfaʼ wə̂ a nə ńgɛd nə́ lə́ ńté ńgə́ a nə faʼ nə́ ajíənuə, pɨ pə́ mbî pə́ yáŋ á mə́ faʼ nə́ məmɔ́b mənu ńtsɛ pɨ pó chî nə́ á mə́m nkyaʼə.”
9Yeso a ghɛn nə́ mbiə á mə́ sóŋ nə́ ńgə́, “Mäŋ fiʼtə̂ áwɨ́ ńgə́ lɔg nə́ əpú mbî ńkaŋ pəshu pɨ ə́wə́, ńjî ńgə́ əghâ pɨ́d ə́ lǒo nə́ ḿměe pə́ lɔgə̂ áwɨ́ əshîʼnə á mə́m məláʼ mə́ mɛdnə̂ nə́ ngǎ mɔʼə́. 10Ŋwu páʼ pə́ néŋ nə́ ntɨ́ nə́ yí nə́ pɔ́ pə́ mənu, təmbɔʼ pə́ kə́ ńnéŋ ntɨ́ nə́ yí nə́ pətə́kɔʼ pə́ mənuə. Ŋwunə a kě nə́ ndə̌ŋdəŋ tséebə nə́ pɔ́ pə́ mənu, mbɔʼ a kě ndə̌ŋdəŋ nə́ pətə́kɔʼ kə́ ńtsáb pô. 11Lə́ələ́ pə́ ńgə́ mbɔʼ gho chîə ndə̌ŋdəŋə́ á mə́m əpú mbî tsáb, əwə a yǐ ńnéŋ ntɨ́ nə́ gho nə́ mənu mə́ Əsê? 12Təmbɔʼ gho chîə ndə̌ŋdəŋə́ á mə́mə apeʼə ŋwu ndaʼ ə́ tsáb pô, əwə a yǐ ə́fɛ̂ azô?”
13“Ngaŋəfaʼ yitsə̌ a kě ə́wɨ́ chî təmbɔʼ a faʼə̂ á mbô pətǎ pɛ́n pɛ̌ pô; tə ḿbə́ a yǐ peenə̂ táʼ ə́ kɔŋə̂ táʼə, kəənə a lánə ńtə́ ə́faʼə̂ á mbô yitsə̌ ńdəgnə̂ yitsə̌. Təmbɔʼ gho kě nɔd ə́faʼə̂ á mbô Əsê pó nkáb pô.”
Ətsáb Yeso Pətsə́
(Mat 11.12, 13; 5.31, 32; Mag 10.11, 12)
14Pəfalasi pó zóʼ ətsáb pɨ tsɔʼə ətsəm ńtíʼə ńdeŋnə̂ Yeso ńté ńgə́ pó nə ńkɔŋ nkéebə. 15Yeso a sóŋə á mbô pó ńgə́, nə́ kɔŋə̂ á mə́ nɨd nə́ mbɨ əzəənə́ á mbi ŋwu məsɔŋ ńgə́ nə́ koʼnə̂, lə́ Əsê a pə́ ńjî ntɨ́ əwə́ənə́. Ajú nə́ zɨ́ nə́ ńgə́ á túgə nəsəgə á mbô pɨ, lə́ afanə anuə á mbi Əsê.
16“Pə́ nə̈ ńdzoŋə̂ pənoŋkə pə́ Mosisə pópə məntəgə́ mə́ məntúmə́sê tə ńkoʼ nə́ ndɛd páʼ Jɔn Əfɛ̂nkǐə a nə ńgyǐ nə́. Ə́fɛ́d nə́ ndɛd jɨ́d zə̂, atséebə Əsê a tíʼə ńnyinə̂ ńté anuə nəfoonə Əsê tə ŋwu ntsəmə a tíʼə ə́fyád mbɨ əjǐə á mə́ kwú nə́ á mə́m ə́wə́. 17Lə́ á pwɔ́dnə mbɔʼ nəpó pó ndəsê péŋ ńtsɛ ndzaŋ mbɔʼ mɔ́ aliʼə́ á péŋ nə́ pənoŋkə pə́ Əsê.”
18“Ŋwu ntsəm páʼ a kəm nə́ ngwě əyǐ ńdzɔ́ʼə yi ndaʼ, a jî lə́ mə̂ghabə, lə́, ŋwu ntsəm páʼ a kə́ nə́ ńdzɔ́ʼə məngyě páʼ a fɛ́d nə́ á ndɛ̂ ŋwu a kə́ ńjî lə́ mə̂ghabə.”
Əfoʼ Yitsə̌ pó Lazalɔsə
19Əfoʼ yitsə̌ a nə ńdáʼ ńchî ə́wɨ̈ ńgwê yí tsɔʼə ətsəʼ nkéebə̈, ńdzóʼ əshîʼnə tsɔʼə á mə́m əpú nkáb əlě ətsəmə. 20Njɨ̂ngə́ʼ yitsə́ a nə ńkə́ ńchî ə́wɨ́ pə yǐəə ńnáakə yə́ á ntsǒndɛ̂ əfoʼ wə́, əlɛ́n yí pə́ Lazalɔsə, məfəŋ mə́ chíkə á mbɨ yə́, 21Ä kwaŋə̂ ńgə́ a yǐ lagtə̂ əpúʼ məjî páʼ ə́ lǒo nə́ á ndu təpɛlə əfo wə̂ ńgwukə̂. A kə chî tə məngwû mə́ kə̈ ńgyǐəə ḿbəŋə̂ məfəŋ míə.
22Ndɛd ə́ nə ḿbɛn ńkoʼ njɨ̂ngə́ʼ wə̂ a kwûə yə́, pətseŋpə́ndɛ́pə́sê pə́ twáamə yí ńgɛnə̂ á nəpɛnə́ Ablaamə. Əfoʼ wə̂ a yǐ ńkə́ ńkwû pə́ twə́ŋə. 23A kə chîə á mə́m móg Satan ńtə́ ńjɨ́ ngə́ʼ ḿmaʼ əmə́g mí ńdzə́ənə Ablaamə á ndi yitsə̌ pó Lazalɔsə á nəpɛnə́ yə́. 24Ńtíʼ ə́fóŋnə ńgə́, “Tǎ Ablaam, kó mələ́ŋə mə ńtúmə Lazalɔsə a tsɛn nətû nə́ fîəpô jí nə́ nkǐ yi féŋtə nə́ ńgyǐ ńkwumə̂ á alɨ́ maŋə; ńté ńgə́ maŋ chîə á ngə́ʼə á mə́m mógə́ nə́.” 25Ablaam a kwěe ńgə́, móonə mə, kwúmtə ńgə́ gho nə́ ńchîə á mbî lə́ ńjî əpɔŋ əghô tsɔʼə ətsəmə lə́ Lazalɔsə tə́ ńjɨ́ ngə́ʼə. Lazalɔsə a pɛn ńkə́ ńtə́ ńdzóʼ əshîʼnə əghâ nə́, gho kə́ ńchîə azô á ngə́ʼə. 26A pěʼ ńkě tsɔʼə ə́lɨ́d pô, tə́kɔʼ atéemə á chîə tətɨ pɛnə̂, páʼ təmbɔʼ ŋwunə a kě lǒo á ndzɛnə́ wə̂ ńgyǐəə á ndzɛnə́ nə́ kɨ ŋwunə a kə́ ńdǒo á ndzɛnə́ nə́ ńgɛnə̂ á ndzɛnə́ wə̂ pô. 27A pɨ ńkə́ ńkwěe ají ńgə́, “Maŋ póʼmbô nə́ gho tǎ, túmə Lazalɔsə a ngyaʼə́ pəgə́. 28Ńté ńgə́ maŋ túg pɔ́pə́mɛ́ pɛ́n pə́ tênə, ńjî ńgə́ a kwantə̂ ághɔ́b ńgə́ kɔ pó yǐ ńkə́ ńgyǐ ńkwúnə á mə́mə aliʼə́ ngə́ʼə.”
29Ablaamə a kə́ ńkwěe ají ńgə́, Mosisə pópə məntúmə́sê ə́ chî ə́wɨ́ páʼ təmbɔʼ pó jwə́ʼtə á mbô pó. 30A sóŋ ńgə́ ngá ḿbə́ Tǎ Ablaam, təmbɔʼ ŋwu tsə́ a fɛ́lə á mə́m pəkwû ńgɛnə̂ á mbô pó, pó kwúblə. 31Lə́ Ablaam a pɨ ńkə́ ə́sóŋ nə́ yí ńgə́, “Təmbɔʼ pó chîə á mbô Mosisə pópə məntúmə́sê jwə́ʼtə pô, á pə́ ńgə́ pó yǐ kě pí páʼ təmbɔʼ ŋwunə a pěʼ ńjúmnə á pə́ nəwû ńgɛn ə́wɨ́ pô.”
Цяпер абрана:
Lukasə 16: azo
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце