Luka 6
6
A Yeezu nɩ a pɩ̃ɛnʋ-bibir yele
(Mat 12:1-8, Mark 2:23-28)
1A Zifʋ mɩnɛ pɩ̃ɛnʋ-bibir kãw, a Yeezu nɩ a ʋ po-tuurbɛ tɩ tɔlɛ nɩ póru pʋɔ. A ʋ po-tuurbɛ tɩ ŋmarɛ nɩ a ci-zuru ŋmɩɩnɛ 'wɔbr. 2Faarizɩ̃ɛ bɛ mɩnɛ kãw tɩ yel bɛ na: «Bʋ̃ʋ n'ʋ so nyɩ tone ton na bɛ sɛw a pɩ̃ɛnʋ-bibir a?» 3A Yeezu tɩ sɔw na yel bɛ: «Nyɩ nɔ̃w bɛ kanɩ a lɛ a Daviir nɩ a ʋ taabɛ na tɩ tõ, a kɔ̃ na tɩ kpɩɛr bɛ a bɩɩ?#6:3 Nyɛ̃ 1Sa 21.2-7. 4A lɛ ʋ na tɩ kpɛ a Naaŋmɩn yir pʋɔ de a dipɛ̃ bɛ na mɩ́ bin a Naaŋmɩn niŋé a 'wɔb, ɛ́ mɩ̀ kʋ̀ a ʋ taabɛ bɛ 'wɔb a ɩ? A dipɛ̃ á ŋá a, nɩr bɛ tɛr sɔ́r na 'wɔb a ɩ, alɛ bɛ ɩ bàwr-maalbɛ tɛwr a.» 5Ʋ tɩ cãà na yere kʋ̀rɛ bɛ: «A Nɩsaal Bie ɩ n a pɩ̃ɛnʋ-bibir sob.»
A Yeezu na sanɩ nũ-kũu sob kãw a
(Mat 12:9-14, Mark 3:1-6)
6A pɩ̃ɛnʋ-bibir ƴen sob, a Yeezu tɩ kpɛ n a Zifʋ mɩnɛ puoru-dĩó kanɛ nɩ a nɩbɛ. Nɩr kãw, a dʋrʋ nũu na tɩ kpi a, tɩ be n a be. 7A Naaŋmɩn wulu bãw-bãw-karɩ nɩ a Faarizɩ̃ɛ mɩnɛ tɩ piwre nɩ a Yeezu, kɛ́ bɛ nyɛ̃, ʋ na sanɩ nɩ nɩr a pɩ̃ɛnʋ-bibir bɩɩ, bɛ tʋ̃ɔ́ tɛr'ɩ ʋ ƴɛ̀rʋ. 8Ɛcɛ a Yeezu tɩ bãw nɩ a bɛ tɩɛrʋ. Lɛ so ʋ tɩ yel a nũ-kũu sob: «Ìr àr a ka a nɩbɛ niŋé.» Ʋ ìr àr. 9A Yeezu yel bɛ: «Nyɩɩm n'a ɩ̃ sowre: a pɩ̃ɛnʋ-bibir a, vla n'a a nɩr tɛr sɔ́r na tʋ̃ɔ́ maalɩ bɩɩ faa n'a? Nɩr'ʋ a sob tɛr sɔ́r na faa bɩɩ na bɛr ʋ kpi?» 10Ʋ tɩ jɩ́r'ɩ a bɛ za tɩ tɔ, ɛ́ yel a nũ-kũu sob: «Dɔl a fʋ nũu.» Ʋ dɔl, ɛ́ a nũu lɛb kpɛ̃w. 11A Faarizɩ̃ɛ mɩnɛ nɩ a Naaŋmɩn wulu bãw-bãw-karɩ tɩ nyɛ̃ nɩ suur pi kɔkɛɛ. Bɛ tɩ tĩ na bʋ̀rɛ taa a ʋlɩ bom nɛ bɛ na na tʋ̃ɔ́ ɩ a Yeezu a.
A Yeezu kaa na ír nɩ-toni pie nɩ ayi
(Mat 10:1-4, Mark 3:13-19)
12A alɩ bibie nɛ pʋɔ, a Yeezu tɩ tɔl'a do tãw zu k'ʋʋ tɩ puori. Ʋ tɩ puor'ɩ a Naaŋmɩn a tɩ̃ɩsɔw-ɓil za. 13A zie na wa vɩɛ a, ʋ bʋɔl'ɩ a ʋ po-tuurbɛ wa kaa ír pie nɩ ayi a bɛ pʋɔ, por a bɛ yúor kɛ́ nɩ-toni: 14Sɩmʋ̃, ʋ na por a yúor kɛ́ Pɩɛr a, nɩ a ʋ yɛb Ãdere, Zakɩ, Zã, Filib, Batelemi, 15Matie, Toma, Alfe bidɛb Zakɩ, Sɩmʋ̃ bɛ na bʋɔlɛ kɛ́ Zelɔtɩ#6:15 Zelɔtɩ: Tẽw maalʋ lãw kãw na tɩ be a Yeezu daar a n'ʋ. Bɛ tɩ bɔbr'a kɛ́ bɛ diw a Ʋrɔm tẽw nɩbɛ nɩ fãw, ɛ́ lɛb de a bɛ tẽw. a, 16Zakɩ bidɛb Zuda nɩ Zuda Ɩsɩkarɩɔtɩ na wa mɩl a Yeezu a.
A Yeezu kanɛ nɩ nɩ nɩbɛ ɛ́ sanɛ bàalbɛ
(Mat 4:23-25)
17A Yeezu tɩ siw nɩ a tãw, ʋlɛ nɩ a ʋ nɩ-toni. Ʋ tɩ tɛw na àr zi-tɩ̃tal pʋɔ. A ʋ po-tuurbɛ yaga tɩ àr'ɩ a be, lãwnɩ zu-sɛbla na bɛ tɛr vuo ɛ́ yi a Zude tẽw za, nɩ Zerizalɛm, nɩ kʋ̃ɔ-kpɛ̃ɛ nʋɔr ten Tɩ́ɩ̀r nɩ Sɩdɔ̃ wa a. 18Bɛ tɩ wa na kɛ́ bɛ wa bɛr wõ a ʋ ƴɛ̀rʋ, ʋʋ sanɩ a bɛ bàalʋ, ʋ mɩ̀ tɩ cãà na sanɩ a bɛlɩ dem kɔ̃tɔ̃-faar na tɩ fɛrɛ a. 19A zu-sɛbla za tɩ bɔbr'ɩ a ʋ tɔb, fãw kãw na mɩ́ tɩ yire a ʋ pʋɔ sanɛ bɛ za a ƴãw.
Zu-nʋ̃ɔ̀ nɩ baw-bio yele
(Mat 5:1-12)
20Lɛ n'a a Yeezu tɩ jɩ́r a ʋ po-tuurbɛ ɛ́ yel bɛ:
«Zu-nʋ̃ɔ̀ dem n'ɩ nyɩ,
nyɩɩm nan dem:
nyɩmɛ so a Naaŋmɩn Naalʋ!
21Zu-nʋ̃ɔ̀ dem n'ɩ nyɩ,
nyɩɩm kɔ̃ na kpɩɛr a ƴɛrɛŋa a:
nyɩ nãà tɩw na!
Zu-nʋ̃ɔ̀ dem n'ɩ nyɩ,
nyɩɩm na kone a ƴɛrɛŋa a:
nyɩ nãà laar a!»
22«Zu-nʋ̃ɔ̀ dem n'ɩ nyɩ, a lɛn daar a nɩsaalbɛ nãà wa hɩ̃ɛn nyɩ, ɛ́ zawrɛ a nyɩ yele ɛ́ tʋʋr nyɩ, sãwnɛ nɩ a nyɩ yúor a Nɩsaal Bie ƴãw a. 23Nyɩ cɩlɛ ƴawr'ɩ a lɛn daar, a nyɩ sã-ya na ɩ kpɛ̃ɛ a tẽ-vla pʋɔ a ƴãw. Bʋ̃ʋ n'ʋ vɛ̃, à ŋá tɔr za n'a a bɛ sãàkʋm-kore tɩ dɔwrɩ a naaŋmɩn-ƴɛ̀r-manbɛ.
24Ɛcɛ baw-bio dem n'ɩ nyɩ,
nyɩɩm na-mɩnɛ,
nyɩ páw nɩ a nyɩ mɔwlʋ baarɩ!
25Baw-bio dem n'ɩ nyɩ,
nyɩɩm na tɩw a ƴɛrɛŋa a,
kɔ̃ nãà kpɛ nyɩ na!
Baw-bio dem n'ɩ nyɩ,
nyɩɩm na laar a ƴɛrɛŋa a,
nyɩ nãà be n wahala pʋɔ kone!
26Baw-bio dem n'ɩ nyɩ, a lɛn daar a nɩbɛ za nãà wa mʋʋrɛ nyɩ a,
à ŋá tɔr za n'a a bɛ sãàkʋm-kore tɩ ɩrɛ a naaŋmɩn-ƴɛ̀r-man-bɛlɛbɛlɛ mɩnɛ!»
Nyɩ nɔnɛ a nyɩ dɔ̃ dem
(Mat 5:38-48, 7:12a)
27«Ɛcɛ ɩ̃ yere na kʋ̀rɛ nyɩ, nyɩɩm na bɛrɛ wone a ɩ̃ ƴɛ̀rʋ a: nyɩ nɔnɛ a nyɩ dɔ̃ dem. A bɛlɩ dem na hɩ̃ɛn nyɩ a, nyɩ maalɛ bɛ vla. 28Nyɩ zɛlɛ Naaŋmɩn maalʋ kʋ̀rɛ a bɛlɩ dem na ŋmɩɛr ƴãwn nyɩ a, nyɩ puore kʋ̀rɛ a bɛlɩ dem na ŋmarɛ ziri ƴãwn nyɩ a. 29Nɩr wa ɓa b kɔ́rɩ́ a, fʋ̃ʋ lɛb cɔw a ayi sob. Nɩr wa de a fʋ kpar-kpɛ̃ɛ a, bɛr ʋ ʋ mɩ̀ de a fʋ kpale ƴãw pʋɔ. 30Nɩr za na zɛlɛ bom a fʋ zie a, kʋ̀ ʋ, ɛ́ nɩr wa de a fʋ bom a, fʋ̃ʋ taa sowre ɩ. 31A lɛ nyɩ na bɔbr kɛ́ a nɩbɛ ɩrɛ a nyɩ zie a, nyɩ mɩ̀ ɩrɛ a lɛ a bɛ zie. 32Nyɩmɛ wa nɔnɛ a bɛlɩ dem na nɔnɛ nyɩ a tɛwr a, bʋ̃ʋ maalʋ n'a nyɩ na gùre a pʋɔ? A yel-bebe dem mɩ̀ mɩ́ nɔnɛ nɩ a bɛlɩ dem na nɔnɛ bɛ a. 33Nyɩmɛ wa maalɛ a bɛlɩ dem na maalɛ nyɩ a tɛwr a, bʋ̃ʋ maalʋ n'a nyɩ na gùre a pʋɔ? A yel-bebe dem tɛɛ za mɩ̀ ɩrɛ nɩ a lɛ. 34Nyɩmɛ mɩ́ wa pɛ̃w a nyɩ bom kʋ̀ a bɛlɩ dem nyɩ na bãw kɛ́ bɛ nãà tʋ̃ɔ́ na lɛb kʋ̀ nyɩ a, bʋ̃ʋ maalʋ n'a nyɩ na páw a pʋɔ? A yel-bebe dem mɩ̀ mɩ́ pɛ̃wn nɩ taa bome, kɛ́ bɛ mɩ̀ mɩ́ wa pɛ̃w bɛ yáa a san. 35A nyɩɩm n'a, nyɩ nɔnɛ a nyɩ dɔ̃ dem, nyɩ maalɛ bɛ vla ɛ́ pɛ̃wn bɛ a nyɩ bome, ɛ́ ta gùre kɛ́ bɛ mɩ̀ mɩ́ wa ɩ nyɩ a lɛ yáa a san ɛ. Lɛn daar'a a nyɩ sã-ya na ɩ bɛ́rʋ, ɛ́ nyɩ mɩ̀ ɩ a Naaŋmɩn-na-do-saa-bɛ-pɩɛl-a bibiir, ʋl na ɩ nɩ-vla a po-to-dem zie, nɩ a bɛlɩ dem zie fʋ na mɩ́ maalɩ vla ɛ́ bɛ bɛ ŋmɛlɛ kaar fʋ a. 36Nyɩ ɩ nɩ-bàal-zɔrbɛ mɛ̃ a lɛ a nyɩ Sãà na ɩ nɩ-bàal-zɔrɛ a.»
Nyɩ ta bãwnɛ a nyɩ taabɛ yele ɩ
(Mat 7:1-5)
37«Nyɩ ta bãwnɛ a nyɩ taabɛ yele ɩ, ɛ́ Naaŋmɩn mɩ̀ kʋ̃ bãw a nyɩ dem ɛ. Nyɩ ta mɩ́ yel kɛ́ a nyɩ taabɛ sãw na ɩ, ɛ́ Naaŋmɩn mɩ̀ kʋ̃ yel kɛ́ nyɩ sãw na ɩ. Nyɩ dɩrɛ suur kʋ̀rɛ a nyɩ taabɛ, ɛ́ Naaŋmɩn mɩ̀ na dɩ n suur kʋ̀ nyɩ. 38Nyɩ mɩ́ tɩr, ɛ́ Naaŋmɩn mɩ̀ na kʋ̀ nyɩ na. Ʋ na manɩ na paalɩ ɓol, tɛwtɛw ɛ́ dĩ ƴãw a cire, ʋ ƴãw a nyɩ pèlé pʋɔ. A bʋ̃-mána ʋl nyɩ na tɛr manɛ nɩ kʋ̀rɛ a nyɩ taabɛ a, ʋlɛ n'ʋ ʋ mɩ̀ na manɩ nɩ kʋ̀ nyɩ.»
39A Yeezu mɩ̀ tɩ lɔb'ɩ zʋkpar kʋ̀ bɛ yel: «Zɔ̃w na tʋ̃ɔ́ na tawr zɔ̃w ɩ? Bɛ za ayi kʋ̃ lo bɔw pʋɔ ɩ? 40Po-tuure bɛ zuore ʋ nɩ-kpɛ̃ɛ ɩ, ɛcɛ po-tuure za, a ʋ nɩ-kpɛ̃ɛ na wul vla a, na ŋmɛ̃ na taa nɩ a ʋ nɩ-kpɛ̃ɛ. 41Bʋ̃ʋ ƴãw n'a fʋ jɩ́rɛ a sàwr na be a fʋ yɛb mimirí a, ɛ́ bɛ nyɛ̃ a wɛw na be a fʋ dem pʋɔ a? 42Ŋmɩŋmɩn n'a fʋ na tʋ̃ɔ́ yel a fʋ yɛb: “Ɩ̃ yɛb i, alɛ ɩ̃ ír sàwr bɛr a fʋ mimirí!” Ɛ́ a fʋ̃ʋ mɩŋa nɩ̃ɛ bɛ nyɛ̃ a wɛw na be a fʋ mimirí a? Nɩsaal-libelibe ŋa! De niwn ír a wɛw bɛr a fʋ mimirí, lɛ n'a fʋ na nyɛrɛ pãa ír a sàwr bɛr a fʋ yɛb mimirí.»
A tɩɛ nɩ a ʋ wɔmɛ
(Mat 7:16-20, 12:33-35)
43«Tɩ-vla bɛ wɔnɛ wɔ̃-sãwnɩ ɛ, ɛ́ tɩ-sãwna mɩ̀ bɛ wɔnɛ wɔ̃-vɩɛlɩ ɛ. 44Tɩɛ za wɔmɛ n'a mɩ́ ɩ kɛ́ fʋ bãw ʋ. Bɛ bɛ pɔrɛ kãkamɛ gɔ-tɩɩr zu ɛ, bɛ mɩ̀ bɛ pɔrɛ divɛ̃ tɩɩr wɔmɛ gʋʋr zu ɛ. 45A nɩ-vla mɩ́ ɩrɛ nɩ ɩ-vɩɛlɩ, a ʋ pʋɔ na vɩɛl a ƴãw. Ɛ́ a nɩ-faa ɩrɛ ɩ-faar, a ʋ pʋɔ na kpɛ faa a ƴãw. A alɩ bome nɛ na paalɩ a nɩsaal socir a, alɛ n'a yire a ʋ nʋɔrɩ́.»
A yie ayi yele
(Mat 7:24-27)
46«Bʋ̃ʋ ƴãw n'a nyɩ mɩ́ yere a ɩ̃ zie: “Sore e, Sore e”, ɛ́ bɛ mɩ́ tuur a lɛ ɩ̃ na yere a? 47Sob nɛ za na waar a ɩ̃ zie wa bɛrɛ wone a ɩ̃ ƴɛ̀rʋ ɛ́ tuur a, ɩ̃ na wul nyɩ nɩ a ʋlɩ sob nɛ ʋ na ŋmɛ̃ taa nɩ a. 48Ʋ ŋmɛ̃ na taa nɩ nɩr na ŋmaarɛ yir a: ʋ tuw nɩ bɔw-zulu kʋsɛ-pan zu ɛ́ sʋ̃ɔ́ a yir pɛr. A kʋ̃ɔ-paal na wa wa a, a bà-fʋɔla kʋ̃ɔnɩ da n taa wa ŋmɛ a yir ŋa, ɛ́ bɛ dam ʋ ɛ, ʋ na mɛ vla a ƴãw. 49Ɛcɛ sob nɛ za na bɛrɛ wone a ɩ̃ ƴɛ̀rʋ ɛ́ bɛ tuur a, ʋ ŋmɛ̃ na taa nɩ nɩr kãw na bɛ tuw a yir pɛr ɛ́ ŋmãa a ʋ yir a: a bà-fʋɔla kʋ̃ɔnɩ na wa da taa wa ŋmɛ a yir ŋa a, ʋ lo n daadaalɛ, lo bugubugu.»
Цяпер абрана:
Luka 6: DBDC
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
La Bible en Dagara © Alliance Biblique du Burkina Faso, 2013.